Gard Rwayom dan Premye Plas
1 Li pa fasil pu gard Rwayom Bondye dan premye plas dan nu lavi ek kontiyn fer sa kan nu gayn bann problem ekonomik uswa bann lezot problem. Me kuma eski nu pu kapav gard Rwayom dan premye plas kan nu gayn problem? Ki nu pu fer si nu gayn enn travay ki fer nu rat bann reynion uswa anpes nu al prese? Eski lerla Rwayom bizin pran dezyem plas dan nu lavi?
2 Enn Lafwa Solid Neseser: Kan bann sityasyon kumsa teste nu lafwa, nu bizin pa bliye promes Zeova ek lasirans ki Zezi ti done ki Bondye pu sutenir nu si nu rod Rwayom avan tu. (Psom 37:25; Mat. 6:31-34) Bann linflyans lemond ek bann presyon kapav fer nu vizyon vinn som ek anpes nu gard Rwayom dan premye plas. Sertin finn les bann posibilite pu gayn promosyon dan travay uswa pu gayn plis kas vinn premye dan zot lavi. Me, kuma Pol, nu bizin kalkil byin ki kitsoz ki vremem pli inportan dan nu lavi.—Fil. 3:7, 8.
3 Eski Bizin Fer Bann Sanzman?: Enn proklamatris finn dir: “Mo ti byin atase ar mo biznes—sa mem ki mo ti pli kontan. Mo ti krwar ki mo ti pu kapav res enn Temwin ek an mem tan donn laplipar mo letan dan mo biznes.” Me selman, li ti ena tuletan santiman ki li ti kapav fer plis pu servi Zeova. Avek letan li finn abandonn so biznes ki ti pe anpes li progrese lor plan spirityel. Apre ki li finn angaz li aplintan dan travay predikasyon Rwayom, li finn kapav dir: “Asterla mo santi ki mo finn reysi mo lavi devan lizye Zeova; sa mem ki pli inportan.”
4 Nu bizin felisit buku ki finn abandonn bann karyer dan lemond ek bann posibilite pu gayn plis kas. Zot finn fer zot lavi vinn pli sinp, ek zot finn kumans servis aplintan. Bann zenn serviter ministeryel ek bann ansyin selibater ki finn asiste Lekol Formasyon Ministeryel finn fer sa ek zot pe gut bann bon privilez servis. Parey kuma Pol, zot kontant zot ar bann kitsoz materyel ki neseser.—1 Kor. 11:1; 1 Tim. 6:6-8; Ebre 13:5.
5 Mem si lemond bufonn fason ki nu konsider lavi, nu ena benediksyon Zeova. (1 Kor. 1:26-31) Eski sa pa donn nu kuraz kan nu kone ki Zeova pu servi nu otan ki posib ek Li pu ed nu pu akonpli so travay? Nu pa pu regayn lokazyon ankor pu pres Rwayom ki Bondye finn fini etabli. Alor, asterla mem ki nu bizin gard Rwayom dan premye plas dan nu lavi.