Bann Benediksyon Ki Nu Gayne Kan Nu Montre Rekonesans pu Lamur Zeova—Dezyem Parti
1 Mwa dernye dan premye parti sa size la, nu ti atir latansyon lor kat fason ki nu kapav montre nu rekonesans pu lamur Zeova dan nu minister. (1 Zan 4:9-11) Dan sa parti la nu pu get ankor sink lezot fason pu fer sa. Kan nu partisip afon pu ed lezot lor plan spirityel, nu gayn bann benediksyon.
2 Temwaynaz Okazyonel: Sa li enn bon metod pu truv bann dimunn ki fin ek swaf lazistis ek usi pu ofer zot bann piblikasyon ki kapav ed zot. Li vo lapenn ki nu ‘reaste letan ki bizin’ ek nu sezi tu lokazyon pu donn temwaynaz ar ninport ki dimunn nu zwenn. (Efe. 5:16) Kitfwa nu pu bizin pran kuraz pu donn temwaynaz dan sa fason la, me si nu ena rekonesans pu lamur Bondye ek nu konsyan bezwin bann dimunn, nu pu donn temwaynaz sak fwa lokazyon prezante.—2 Tim. 1:7, 8.
3 Enn frer misyoner finn gayn buku benediksyon parski li ti kumans enn konversasyon avek enn misye ki ti pe vwayaz ansam avek li dan enn taxi-trin. Misye la finn montre lintere. Alor, frer la finn vizit li plizir fwa ek finn kumans enn letid Labib avek li. Sa misye la finn vinn dan laverite ek li finn progrese ziska ki li vinn enn ansyin dan kongregasyon!
4 Ekrir Bann Let: Kitfwa nu pa kapav al predikasyon lakaz-lakaz parski nu ena enn andikap fizik uswa akoz move letan. Me atraver let, nu kapav donn enn ti temwaynaz ar bann dimunn ki nu kone, bann dimunn ki finn perdi zot pros dan lamor, uswa bann ki pa kot zot kan nu prese dan teritwar. Ansam avek let la, nu kapav met enn nu bann trak ki ena enn mesaz baze lor Labib ki kapav atir dimunn la ek ankuraz li pu reponn nu si li ena bann kestyon. Servi u ladres personel uswa ladres Lasal DiRwayom; me silvuple pa servi ladres filyal.
5 Temwaynaz par Telefonn: Sa li enn bon mwayin pu koz avek bann dimunn ki nu pa kapav zwenn dan predikasyon. Si nu fer li avek disernman, avek polites, ek si nu kone ki pu dir ek kuma pu dir li, nu kapav gayn bon rezilta. Nu Minister DiRwayom Fevriye 2001 paz 5-6, donn bann sigzesyon pratik lor fason ki nu kapav gayn bann pli bon rezilta.
6 Enn ser ki ti pe donn temwaynaz par telefonn, finn demann enn madam si li’nn deza reflesi lor so lavenir ek lavenir so fami. Madam la finn dir li wi. Li’nn fer ser la kone ki li finn anferm li tusel kot li parski li dezespere. Lintere sinser sa ser la finn tus li, alor li finn aksepte pu zwenn li dan enn bazar ki pa ti tro lwin. Rezilta: madam la finn aksepte enn letid Labib deswit!
7 Akey bann Etranze: Si nu kontan nu prosin, deswit nu pu remark enn etranze ki finn vinn asiste reynion ek nu pu met li alez. (Rom. 15:7) Les li santi ki li parmi bann ki interese sinserman ar so boner spirityel. Kan nu interes nu sinserman avek li ek nu propoz pu etidye Labib personelman ar li, sa kapav pus li pu aksepte nu led.
8 Nu Bon Kondwit: Par nu bon kondwit, nu rann laverite pli atiran. (Tit 2:10) Kan bann dimunn dan lemond dir dibyin lor nu antan ki Temwin Zeova, zot donn loner nu Bondye. (1 Pyer 2:12) Sa usi kapav ed lezot pu angaz zot lor semin ki amenn ver lavi.
9 Kifer eski nu pa reget sa sink fason pu montre nu rekonesans pu gran lamur ki Bondye ena pu nu ek kifer eski nu pa met zot an pratik? (1 Zan 4:16) Si u fer sa, u pu gayn buku benediksyon.