Bann Benediksyon Ki Nu Gayne Kan Nu Montre Rekonesans pu Lamur Zeova—Premye Parti
1 Lapot Zan finn ekrir: “Me nu, nu ena lamur, parski [Zeova] finn kontan nu an premye.” (1 Zan 4:19) Kan nu pans tu seki Zeova finn donn nu, sa pus nu pu montre nu profon rekonesans an retur. Pu sa, Zezi finn donn legzanp kan li finn donn temwaynaz lor non Bondye ek lor Rwayom avek lobeisans. (Zan 14:31) Li bon ki nu get detrwa fason kuma nu kapav montre nu rekonesans pu lamur Zeova ek bann benediksyon ki nu gayne an retur.
2 Kan Nu Al Lakaz-Lakaz: Zezi ti anseyn so bann disip kuma pu fer travay predikasyon Rwayom. So bann linstriksyon montre klerman ki zot ti al lakaz-lakaz pu partaz labonn nuvel. (Lik 9:1-6; 10:1-7) Kan bann dimunn pa pran kont nu mesaz ek zot fer lopozisyon, fode nu ena lamur pu Bondye ek pu nu prosin pu nu kapav kontiyn al lakaz-lakaz. Me selman, kan nu fer sa, nu tir profi personelman, parski nu lafwa vinn pli solid, nu ena plis konviksyon, ek nu lesperans vinn pli kler.
3 Avek direksyon bann anz, nu finn zwenn buku dimunn ki fin ek swaf laverite. (Rev. 14:6) Suvan nu zwenn bann dimunn ki dir ki zot ti pe priye pu gayn led kan enn Temwin finn tap zot laport. De madam Temwin ek enn ti zanfan ti pe pres lakaz-lakaz dan enn lil Caraïbes. Kan sa de ser la finn desid aret prese, ti zanfan la li, li finn al tap prosin laport li tusel. Enn zenn madam finn vinn uver laport. Kan de ser la finn truv sa, zot finn al koz ar madam la. Li finn invit bannla pu rantre ek li finn explik zot ki li ti pe fek priye Bondye pu avoy bann Temwin pu anseyn li Labib!
4 Temwaynaz lor Lari: Pwiski li difisil dan sertin landrwa pu truv bann dimunn kot zot, temwaynaz lor lari finn vinn enn bon mwayin pu donn bann dimunn temwaynaz. Anplis, zordi zur buku dimunn viv dan bann flat prive, uswa dan bann batiman kot ena bann bel-bel sistem sekirite, kot nu pa kapav pres laport-laport. Me, nu rekonesans pu lamur Zeova pus nu pu profit tu bann mwayin ki ena—parmi temwaynaz lor lari usi—pu fer bann dimunn gayn mesaz Rwayom.—Pro. 1:20, 21.
5 Kan Fer Vizit: Pwiski nu pe rod bann ki “konsyan zot bezwin spirityel,” nu anvi fer tu nu posib pu satisfer sa bezwin la. (Mat. 5:3) Pu sa, nu bizin returne pu aroz bann lagrin laverite ki nu finn plante. (1 Kor. 3:6-8) An Australie enn ser ti plas enn trak avek enn madam ki pa ti paret tro interese. Kan mem sa, ser la finn persiste pu rezwenn madam la kot li. Kan alafin li finn reysi zwenn li, nu ser finn remarke ki depi sa dernye konversasyon ki zot ti gayne la, madam la ti finn al aste enn Labib byin ser. Ser la finn kumans etidye avek li!
6 Kan Diriz Bann Letid Labib: Diriz enn letid, kitfwa sa mem kitsoz pli interesan ek ki donn nu plis satisfaksyon dan nu minister. Wi, li vremem enn benediksyon pu ed bann dimunn aprann konn Zeova, pu truv zot fer bann sanzman dan zot lavi pu fer Bondye plezir, ek apre pu truv zot pran batem Kretyin kuma enn sinbol zot langazman ar Bondye!—1 Tes. 2:20; 3 Zan 4.
7 Dan prosin nimero Nu Minister DiRwayom, nu pu egzaminn bann lezot fason kuma nu gayn benediksyon kan nu montre rekonesans pu lamur Zeova.