5. Bann dimoune pé detruire la terre
“[Bondié] pou detruire bann ki pé detruire la terre.”—RÉVÉLATION 11:18.
● Missié Pirri so travail c’est vann di-vin palme dan enn village ki appel Kpor, dan Nigeria. Mais kan enn grand quantité petrole ti deversé dan Delta du Niger, so commerce ti detruire net. Li dire: “Sa pé touye nou bann poisson, abime nou la peau, detruire nou bann la riviere. Mo nepli ena travail.”
KI LA REALITÉ MONTRÉ NOU? Dapré certain expert, 6.5 million tonne saleté rente dan bann l’ocean chaque l’année. Apepré 50 pour cent sa bann saleté-la zot en plastik. Ek pendant plusieurs centaine l’année, bann vague pou sarié zot avant ki zot decomposé. Bann dimoune pa pé zis pollué la terre, mais zot pé aussi fini so bann ressource naturel dan enn vitesse extraordinaire. Bann l’etude montré ki la terre bizin enn an ek cinq mois pou remplace bann ressource ki bann dimoune finn consommé dan enn an. Sydney Morning Herald, enn journal australien, dire: “Si population ek consommation ena tendance pou contigne augmenté, vers 2035 nou pou bizin l’equivalent deux la terre [pou nou gagne seki nou bizin].”
KI L’OBJECTION SOUVENT NOU TENDÉ? Bann dimoune zot intelligent ek zot kapav trouve bann bon solution pou reglé bann probleme. Nou kapav renverse sa situation-la ek sauve la terre.
ESKI SA L’OBJECTION-LA LI VALABLE? Beaucoup dimoune ek beaucoup association pé travail dur pou faire bann dimoune prend conscience bann probleme l’environnement. Pourtant, pli allé, la terre pé plus pollué.
KI OU PENSÉ? Eski Bondié bizin prend bann action ek sauve nou planete pou ki li pa detruire, pareil couma Li’nn promette pou faire?
En plus sa cinq prophetie ki nou’nn fek examiné-la, la Bible ti annonce aussi bann kitsoz positif ki ti pou arrivé pendant bann dernier jour. Anou guette enn l’exemple dan sixieme prophetie.
[L’encadré page 8]
“Mo ena l’impression ki mo nepli possede enn ti paradis mais enn grand poubelle kot jette bann saleté toxik.”—ERIN TAMBER, ENN DIMOUNE KI RESTE LOR LA COTE GOLFE DU MEXIQUE, ÉTATS-UNIS, KI KOZ LOR BANN L’EFFET KI FINN ENA KAN PETROLE FINN DEVERSÉ DAN GOLFE MEXIQUE EN 2010.
[L’encadré page 8]
Eski Bondié responsable?
La Bible ti fini annonce bann mauvais condition ki nou pé trouvé zordi. Alors, eski sa vedir ki c’est Bondié ki responsable si sa bann kitsoz-la pé arrivé? Eski c’est Li ki faire nou souffert? Ou kapav trouve bann bon reponse pou sa bann question-la dan chapitre 11 dan livre Ki la Bible enseigné vrai-mem? publié par bann Témoins de Jéhovah.
[Remerciement photo page 8]
U.S. Coast Guard photo