4. Pena l’amour

“Bann dimoune . . . pa pou ena l’affection naturel pou zot famille.”​—2 TIMOTHÉE 3:1-3, God’s Word Bible

● Chris travail dan enn groupe ki aide bann victime violence ki arrivé dan lakaz, dan nord Pays de Galles. Chris dire: “Mo rappel enn fois, enn madame ti vini. Li ti tellement gagne batté ki mo pa ti reconette li ditou. Lezot madame tellement affecté lor plan emotionnel ki zot pa kapav mem leve zot lizié pou guette ou.”

KI LA REALITÉ MONTRÉ NOU? Dan enn pays l’Afrique, apepré 1 madame lor 3 finn violé kan li ti tipti. Enn sondage ki finn faire dan sa mem pays-la montré ki plus ki enn tiers bann zom pensé ki li normal zot batte zot madame. Mais selman, pa zis bann madame ki victime violence dan lakaz. Dan Canada, par exemple, apepré 3 zom lor 10 finn gagne batté ou-soit finn konn bann mauvais traitement dan lezot fason, ar zot conjoint.

KI L’OBJECTION SOUVENT NOU TENDÉ? Violence dan lakaz touletan finn existé. C’est zis ki zordi bann dimoune prend plus compte sa probleme-la ki dan le passé.

ESKI SA L’OBJECTION-LA LI VALABLE? Dan bann dernier dizaine l’année ki’nn passé, bann dimoune inn prend plus conscience violence ki arrivé dan lakaz. Mais eski sa finn diminué quantité cas ki’nn gagné? Non, pa sa ki’nn arrivé. Partout dan le monde, encore plus dimoune nepli ena l’affection naturel.

KI OU PENSÉ? Eski 2 Timothée 3:1-3 pé realisé? Eski beaucoup dimoune nepli ena l’affection ki zot supposé manifesté dan enn fason naturel envers zot famille?

Cinquieme prophetie ki nou trouvé pé realisé implik la terre, place kot nou resté. Anou guetté ki la Bible dire lor sa sujet-la.

[Zimage page 7]

“Bann dimoune reconette ki violence dan lakaz c’est enn parmi bann offense ki touletan finn ena dan la societé ek ki moins rapporté. En moyenne, enn femme pou gagne maltraité ar so compagnon 35 fois, avant ki li al guette la police.”​—PORTE PAROLE POU ENN SERVICE TELEPHONE KOT AIDE BANN VICTIME VIOLENCE DAN LAKAZ, DAN PAYS DE GALLES.