Communik ar le monde bann l’esprit

BONDIÉ TOUT-PUISSANT finn donne certain responsabilité lezot creature spirituel. Par exemple, Li finn donne Jésus responsabilité pou dirige la terre, ek Li finn donne bann ange fidele responsabilité pou dirige predication la bonne nouvelle. (Révélation 14:6) Mais selman, en seki concerne bann la priere, li different. Bondié pa finn donne personne responsabilité pou ecoute bann la priere. Nou bizin adresse nou bann la priere zis ar Bondié tousel.

Jéhovah Li-mem sa Kikenn “ki ecoute la priere[-la].” (Psaume 65:2) Li ecoute nou bann la priere ek Li reponn zot. Concernant la priere, l’apotre Jean ti ecrire bann lezot serviteur Jéhovah: “N’importe ki kitsoz nou demandé en accord avek so volonté, [Bondié] ecoute nou. En plus, si nou koné ki Li tann nou concernant tou seki nou demandé, nou koné ki nou pou gagne seki nou’nn demandé parski nou’nn demann Li sa bann kitsoz-la.”—1 Jean 5:14, 15.

Bann ange fidele pa envie ki nou essaye communik avek zot ou-soit prié zot. Zot comprend ek zot soutenir disposition ki Bondié inn prend en rapport avek la priere, kot parfois zot impliké dan enn fason direct. Couma sa? Dan le passé, kan prophete Daniel ti prié Jéhovah concernant Jérusalem ki ti abandonné net, Bondié ti reponn so la priere. Li ti envoye enn message encourageant a travers ange Gabriel.—Daniel 9:3, 20-22.

Eski c’est bann message ki sorti kot bann dimoune mort?

Eski nou bizin essaye contacté bann dimoune ki’nn mort? Ena beaucoup zistoire ki raconte bann conversation ki bann dimoune inn soi-disant gagné avek l’esprit bann dimoune ki’nn mort. Par exemple, en Irlande enn sorcier ti prend contact avek enn madame. Sorcier-la ti dire li ki la veille li ti gagne enn conversation avek so mari, Fred. Pourtant, Fred ti’nn mort inn gagne deux-trois semaine. Sorcier-la ti raconte-li bann kitsoz ki “Fred” ti dire, ek sa bann kitsoz-la, madame-la ti pensé ki c’est zis li tousel ki ti konn sa. Li ti kapav parette logik ki sa madame-la tire conclusion ki Fred ti vivant dan le monde bann l’esprit ek ki li ti pé essaye prend contact avek li a travers enn etranger. Mais selman, sa conclusion-la pa en accord avek seki la Bible dire, dan enn fason clair, lor condition bann dimoune mort.—Guette l’encadré ki trouve en-bas.

Mais alors, couma nou kapav explik sa bann qualité zistoire-la? Enn fason ki bann demon essaye trompe bann dimoune, c’est kan zot faire zot passe pou sa bann dimoune ki’nn mort-la, ek dan sa cas-la c’est Fred. Ki zot l’intention? Pou detourne bann dimoune ar bann l’enseignement ki ena dan la Bible ek pou affaibli zot la foi ek zot confiance en Jéhovah. Pena doute ki Satan ek so bann demon mette bann dimoune dan l’erreur “avek tou sorte mirak ek signe ek prediction ki fausse, ek avek tou sorte trik ki pa juste pou trompe bann ki pé mort.”—2 Thessaloniciens 2:9, 10.

Nou pena doute ki certain bann sorcier ek certain parmi bann dimoune ki vinn guette zot, vrai-mem croire ki zot pé contacté bann dimoune ki’nn mort. Mais en realité, si ena kikenn ki zot pé contacté, c’est bann l’esprit ki oppose-zot ar Jéhovah. Pareil aussi, bann ki croire ki zot pé adore Bondié, zot dan l’erreur. L’apotre Paul ti inspiré pou ecrire sa l’avertissement bien franc-la: “Bann kitsoz ki bann nation sacrifié, zot sacrifié sa ar bann demon, pa ar Bondié.”—1 Corinthiens 10:20, 21.

Si nou koné ki nou kapav prié sa Kikenn ki Pli Grand ki tou-la, ki content nou ek interessé ar nou, kifer nou pou envie prié enn lot? Apré tou, la Bible donne sa l’assurance-la: “En seki concerne Jéhovah, so lizié pé guette partout lor la terre pou montré so la force en faveur bann dimoune ki ena enn leker complet envers Li.”—2 Chroniques 16:9.

[L’encadré page 9]

Si nou koné ki nou kapav prié sa Kikenn ki Pli Grand ki tou-la, ki content nou ek interessé ar nou, kifer nou pou envie prié enn lot?

[Tableau page 8]

Vrai ou-soit fausse?

SATAN LI ENN PERSONNE RÉEL: VRAI

“Satan li-mem pé contigne transforme-li couma enn ange la lumiere.”—2 Corinthiens 11:14.

“Garde zot bon sens, ek reste lor zot garde. Zot adversaire, le Diable, pé circulé couma enn lion ki pé criyé ek ki pé rod kikenn pou devoré.”—1 Pierre 5:8.

“Sa kikenn ki pratik peché-la sorti kot le Diable, parski le Diable finn faire peché depuis commencement.”—1 Jean 3:8.

“Soumette-zot ar Bondié, mais oppose-zot ar Satan, ek li pou sauvé, li pou al loin ar zot.”—Jacques 4:7.

“Kan li ti commencé, [Satan le Diable] ti enn criminel. Li pa’nn tini ferme dan la verité parski la verité pa dan li. Kan li koz menti, li koz dapré so prop tendance, parski li enn menteur ek li-mem papa mensonge.”—Jean 8:44.

KAN NOU MORT NOU AL DAN LE MONDE BANN L’ESPRIT: FAUSSE

“To pou bizin transpiré pou to gagne to di-pain, ziska ki to retourne dan la terre, parski c’est ladan ki to finn sorti. Parski to finn faire avek la poussiere ek to pou ré-vinn la poussiere.”—Genèse 3:19.

“Bann ki vivant koné ki zot pou mort; mais bann dimoune mort zot, zot pa konn nanyin ditou.”—Ecclésiaste 9:5.

“Tou seki to la main trouve pou faire, faire li avek to la force, parski pena ni travail, ni plan, ni connaissance, ni sagesse dan shéol [setadir tombe], place kot to pé allé.”—Ecclésiaste 9:10.

“So l’esprit sorti, li retourne dan so la terre; sa jour-la-mem so bann pensée fini net.”—Psaume 146:4.

BANN ANGE FIDELE INTERESSÉ AR NOU: VRAI

“Ange Jéhovah pé campe autour bann ki ena la crainte pou Li, ek li delivré zot.”—Psaume 34:7; 91:11.

“Eski [bann ange] zot tou zot pa bann l’esprit pou enn service publik, ki’nn envoyé pou servi bann ki pou gagne delivrance?”—Hébreux 1:14.

“Mo’nn trouve enn lot ange ki ti pé envolé au milieu le ciel, ek li ti ena enn bon nouvelle eternel pou annoncé couma enn l’evangile ar bann ki reste lor la terre, ek ar tou bann nation, tribu, langue, ek peuple, li ti pé dire avek enn la voix fort: ‘Ena la crainte pou Bondié ek donne Li la gloire.’ ”—Révélation 14:6, 7.

JÉSUS EGAL AR BONDIÉ: FAUSSE

“Mo envie ki zot koné ki chef tou bann zom c’est Christ; chef enn femme c’est zom; ek chef Christ c’est Bondié.”—1 Corinthiens 11:3.

“Kan tou kitsoz pou’nn fini soumette ar li, lerla Garson-la li-mem pou soumette-li aussi ar sa Kikenn ki finn soumette tou kitsoz ar li-la, pou ki Bondié vinn tou kitsoz pou zot tou.”—1 Corinthiens 15:28.

“Oui, vrai-mem mo dire zot, Garson Bondié pa kapav faire nanyin par li-mem, mais zis seki li trouve le Père faire.”—Jean 5:19.