3^eme Secret

KI LA BIBLE ENSEIGNÉ? “Remercié Bondié pou tou kitsoz.”—1 Thessaloniciens 5:18.

KIFER LI DIFFICILE? Nou entouré avek bann dimoune ki ena l’orgueil ek ki ingrat, ek sa bann l’attitude-la kapav deteint lor nou. (2 Timothée 3:1, 2) En plus, nou kapav senti-nou obligé pou ajoute encore ek encore lezot activité dan nou la vie ki deja bien rempli. Nou kapav ena tellement probleme ou-soit nou tellement occupé pou rod nou prop l’interet ki nou pena le temps pou apprecié bann kitsoz ki nou deja ena ou-soit pou montré ki nou apprecié seki lezot faire pou nou.

KI OU KAPAV FAIRE? Prend le temps pou medite lor bann bon kitsoz ki ou pé kapav profité asterla. Li vrai, ou kapav senti-ou accablé par bann probleme. Mais anou guette l’exemple le roi David. Parfois li ti senti-li demoralisé, ek li ti envie baisse lé-bras a cause bann difficulté. Malgré sa, li ti dire Bondié dan enn la priere: “Mo finn medite lor tou to action; volontairement mo contigne interesse-moi ar travail ki to la main finn faire.” (Psaume 143:3-5) Malgré so bann difficulté, David ti contigne montré reconnaissance ek ti garde so la joie.

Pense lor seki lezot inn faire pou aide ou, ek montré ki ou apprecié zot bann zeffort. Jésus inn laisse enn l’exemple extraordinaire dan sa domaine-la. Par exemple, kan so camarade Marie ti verse enn de l’huile ki ti coute bien cher lor so la tête ek lor so lipié, certain ti demandé: “Kifer finn bizin gaspille sa de l’huile parfumé-la?”a Bann ki ti faire sa commentaire negatif-la ti pensé ki ti’nn bizin vann sa de l’huile-la ek donne bann pauvre sa kass-la. Jésus ti reponn: “Laisse li trankil. Kifer zot pé envie faire li la peine?” Apré sa li ti dire: “Li’nn faire seki li’nn kapav.” (Marc 14:3-8; Jean 12:3) Au lieu ki li ti fixé so l’esprit lor seki Marie pa ti faire, Jésus ti montré ki li ti apprecié seki li ti faire.

C’est selman apré ki zot finn perdi enn membre dan la famille, enn camarade, ou-soit lezot benediction ki zot ena, ki certain dimoune apprecié valeur sa bann kitsoz-la. Ou kapav evite enn consequence bien triste coumsa, si ou reflechi lor bann bon kitsoz ki ou pé profité asterla-mem! Kifer ou pa pense lor bann kitsoz ou-soit faire enn la liste bann bienfait ki ou bien apprecié?

“Tou joli don,” sorti kot Bondié, alors li bon ki dan bann la priere nou remercié Li pou sa bann kitsoz-la. (Jacques 1:17) Kan nou faire sa souvent, sa kapav aide nou pou contigne montré reconnaissance ek developpe enn sentiment satisfaction.—Philippiens 4:6, 7.

[Note]

[Zimage page 6]

Eski ou montré ki ou apprecié seki lezot faire pou ou?