Bann mauvais kitsoz vrai-mem pou fini!

BONDIÉ finn donne nou so Parole inspiré, ki explik nou kifer bann dimoune faire bann mauvais kitsoz. Li finn aussi donne nou liberté pou choisir ek capacité pou controle nou-mem, coumsa nou kapav choisir pou pa faire bann mauvais kitsoz. (Deutéronome 30:15, 16, 19) Parski nou ena sa bann capacité-la, nou kapav reconette n’importe ki mauvais tendance ki nou kapav ena ek faire bann zeffort necessaire pou corrige zot. A la fin, si nou arrete faire bann mauvais kitsoz, sa pou faire nou ek aussi bann dimoune ki autour nou, heureux.—Psaume 1:1.

Mais selman, malgré tou zeffort ki nou faire personnellement pou essaye arrete faire bann mauvais kitsoz, le monde li, li pé contigne souffert a cause bann mauvais kitsoz ki bann dimoune faire. La Bible donne sa l’avertissement-la: “Mazinn sa bien, ki dan bann dernier jour pou ena bann lepok critik ki difficile pou supporté.” Pou montré kifer pou ena bann jour ki “difficile pou supporté,” li dire: “Parski bann dimoune pou content zot-mem, zot pou content l’argent, zot pou vantard, zot pou ena l’orgueil, zot pou koz en mal lor lezot ek lor Bondié, zot pou desobeir zot parent, zot pou ingrat, zot pa pou fidele, zot pa pou ena okenn affection naturel, zot pa pou d’accord entre zot-mem, zot pou mette bann fausse accusation lor lezot, zot pa pou konn controle-zot, zot pa pou ena okenn pitié, zot pa pou content seki bien, zot pou traitre, zot pou ena la tête dur, zot pou rempli ar l’orgueil, zot pou content plaisir plutot ki Bondié, zot pou faire coumadir zot attaché ar Bondié, mais zot pou trahir so pouvoir; reste loin ar sa bann dimoune-la.”—2 Timothée 3:1-5.

Kitfois ou’nn remark l’expression “bann dernier jour” dan prophetie ki finn cité dan paragraphe avant. Ki sa l’expression-la vedir pou ou? Kan bann dimoune dire “bann dernier jour,” la plupart dimoune comprend ki sa represente enn kitsoz ki pé al fini. Ki été sa kitsoz-la? Guetté ki Bondié finn promette dan so Parole.

Pou tire tou bann mauvais dimoune.

“Enn tigit le temps encore, ek mauvais dimoune nepli pou existé; oui, to pou rod li dan so place, mais li pa pou la. Mais bann ki ena l’humilité pou herite la terre, ek vrai-mem zot pou trouve enn grand la joie dan l’abondance la paix.”—PSAUME 37:10, 11.

“Jéhovah pé protege tou bann ki content Li, mais Li pou detruire tou bann mauvais.”—PSAUME 145:20.

Pou nepli ena bann dimoune ki faire dominere.

“Li pou sap sa dimoune misere ki criyé au secours-la, ek aussi sa dimoune ki dan grand chagrin-la, ek n’importe kisannla ki pena personne pou aide li. Li pou delivré zot nâme ar bann ki pé faire dominere ar zot ek li pou tire zot nâme dan violence.”—PSAUME 72:12, 14.

“La creation li aussi pou nepli esclave ar seki pé detruire li ek li pou gagne liberté extraordinaire bann zenfant Bondié.”—ROMAINS 8:21.

Bann dimoune pou gagne seki zot bizin lor plan materiel.

“Vrai-mem sakenn pou assize enba so pié raisin ek enba so pié figue, ek pa pou ena personne ki faire zot tremblé.”—MIKA 4:4.

“Oui, zot pou ranz bann lakaz ek zot pou reste ladan; ek zot pou plante bann karo raisin ek zot pou mange zot bann fruit. Zot pa pou ranzé pou ki enn lot resté; zot pa pou planté pou ki enn lot mangé. Parski bann jour mo peuple pou pareil couma jour enn pié; ek bann ki mo finn choisir pou profite tou travail ki zot la main faire.”—ISAÏE 65:21, 22.

Pou ena la justice.

“Alors, eski Bondié pa pou faire enn maniere ki rann la justice bann ki Li finn choisir ek ki pé criyé la-nuit li-jour pou gagne so l’aide, . . . ? Mo dire zot, Li pou faire ki zot gagne la justice bien vite.”—LUC 18:7, 8.

“Jéhovah content la justice, ek Li pa pou quitte so bann fidele. Oui, Li pou veille lor zot pou touletan.”—PSAUME 37:28.

“Bann habitant ki reste lor la terre vrai-mem pou aprann la justice.”—ISAÏE 26:9.

“Nou pé attann, couma Li’nn promette, bann nouveau le ciel ek enn nouveau la terre, kot pou ena la justice.”—2 PIERRE 3:13.

Mem asterla dimoune pé changé

Pena doute, nou tou nou pou content pou profite sa bann promesse-la. Mais ki l’assurance nou ena ki zot pou realisé? En realité, asterla-mem nou ena preuve ki bann promesse Bondié pou realisé. Ki sa preuve-la sa? Nou trouve plusieurs million dimoune partout lor la terre, ki depuis asterla-mem pé gagne bann bienfait kan zot inn debarrasse-zot ar bann defaut couma l’egoïsme, l’immoralité, ou-soit enn caractere violent ek zot inn aprann pou vinn bann dimoune honnete, pacifik ek bon. Azordi, plus ki sept million Témoins de Jéhovah, forme parti dan enn famille international bann frere. Zot pé surmonte bann barriere ki ena a cause different race, culture, nationalité, parti politik, ek niveau economik; bann kitsoz ki finn crée beaucoup la haine, violence, ek ki finn verse beaucoup di-sang a travers l’Histoire.a Si nou pé trouve bann changement coumsa azordi, sa donne nou enn base solide pou croire ki tou bann lezot promesse Bondié pou realisé lor pli beaucoup dimoune encore.

Mais, ki kitsoz ki amenn sa bann changement-la? Reponse sa question-la trouve dan enn lot promesse la Bible, ki prophete Isaïe ti ecrire. Li ti dire:

“Enn loulou pou reste inpé le temps avek enn ti mouton, ek enn leopard pou dormi avek enn ti cabri, ek enn ti taureau, ek enn jeune lion ek bann zanimo ki bien nourri, zot tou ensam; ek enn ti garson pou conduire zot. . . . Ek mem enn lion pou mange la paille pareil couma enn taureau. Enn tibaba pou joué lor trou kot enn cobra resté; ek enn ti zenfant pou vrai-mem mette so la main lor trou kot enn serpent ki empoisonné, resté. Personne pa pou faire okenn di-tort ni okenn ravage dan tou mo montagne ki saint, parski la terre vrai-mem pou rempli avek connaissance Jéhovah, pareil couma de l’eau couvert la mer.”—Isaïe 11:6-9.

Eski sa prophetie-la pé zis annonce enn lepok kot bann zanimo pou vive en paix avek bann dimoune? Non, li pé rod dire plus ki sa. Remarké ki dernier partie sa bann verset-la montré nou seki amenn sa transformation-la: “La terre vrai-mem pou rempli avek connaissance Jéhovah.” Eski sa connaissance-la change maniere ki bann zanimo comporte zot? Non. Mais li kapav change bann dimoune ek vrai-mem li faire sa! Sa prophetie-la annoncé ki bann dimoune ki kitfois avant ti ena tendance pou agir couma bann zanimo ti pou abandonne sa bann tendance-la ek ti pou developpe enn personnalité chretien parski zot finn aprann seki la Bible enseigné ek zot finn mette sa en pratik.

Prend l’exemple Pedro.b Li ti pensé ki li ti pé lutte pou la justice kan li ti rente dan enn l’organisation terroriste. Apré enn formation, li ti gagne l’ordre pou explose enn caserne la police. Letan li ti pé faire bann preparation pou faire sa, la police ti arrete li. Pedro ti passe 18 mois dan prison, kot li ti ré-prend so l’activité illegal. Entre-temps, madame Pedro ti commence etudié la Bible avek bann Témoins de Jéhovah. Apré ki li ti sorti dan prison, Pedro aussi ti commence etudié la Bible, ek seki li ti aprann lor Jéhovah ti pousse li faire bann grand changement dan so comportement ek lor fason ki li considere la vie. Li dire: “Mo remercié Jéhovah ki pendant tou sa bann l’année ki mo ti enn terroriste-la jamais mo finn touye kikenn. Asterla, mo servi l’epée l’esprit Bondié, la Bible, pou donne bann dimoune enn message lor vrai la paix ek justice—bon nouvelle lor Royaume Bondié.” Pedro finn mem visite sa caserne ki li ti ena l’intention pou detruire-la pou partage sa message lor la paix ek enn le monde sans violence-la.

L’effet puissant ki Parole Bondié kapav ena lor bann dimoune donne nou encore plus raison pou ena la foi dan promesse Bondié ki tou bann mauvais kitsoz vrai-mem pou fini. Oui, bann dimoune pou nepli faire bann mauvais kitsoz pou touletan, mais zot pou vinn bann bon dimoune. Bientot Jéhovah pou retire sa kikenn ki responsable sa bann mauvais kitsoz-la, Satan le Diable, ki dan enn fason invisible pé controle le monde couma li envie. La Bible dire: “Le monde entier li dan pouvoir sa kikenn ki mauvais-la.” (1 Jean 5:19) Mais dan enn tigit le temps li pou nepli existé. Bann ki teti ek pa’lé arrete faire bann kitsoz mauvais, zot aussi zot pou detruire. Li pou vrai-mem extraordinaire pou vive dan enn lepok coumsa!

Ki enn kikenn bizin faire pou ki li sur ki li pou vive dan enn l’avenir coumsa? Rappel ki c’est enn “conaissance lor Jéhovah” ki pé amenn changement dan bann dimoune azordi ek ki pou amenn bann changement partout lor la terre dan l’avenir. Kan ou gagne enn connaissance exact lor la Bible ek ou applik sa—pareil couma Pedro inn faire—ou aussi ou kapav attann pou vive dan enn le monde “kot pou ena la justice.” (2 Pierre 3:13) Alors nou encourage ou pou saisi sa l’occasion ki ou encore ena-la pou gagne enn connaissance lor Bondié ek Jésus Christ, parski sa kapav faire ou gagne la vie eternel.—Jean 17:3.

[Notes]

[L’encadré page 9]

Ou aussi ou kapav attann pou vive dan enn le monde “kot pou ena la justice.”—2 PIERRE 3:13