Dire la verité ou prochain
“Asterla ki zot finn arrete koz menti, sakenn parmi zot, dire la verité so prochain.”—ÉPH. 4:25.
1, 2. Couma beaucoup dimoune considere la verité?
PENDANT longtemps, bann dimoune inn faire beaucoup debat lor la verité. Dan sixieme siecle avant nou lepok, enn poete grec ki ti appel Alcée ti dire: “Ena la verité dan di-vin.” Li ti pé rod dire ki c’est zis apré ki enn dimoune inn boire beaucoup di-vin ki kitfois li plus envie kozé ek lerla dire la verité. Dan premier siecle, gouverneur romain Ponce Pilate aussi ti montré ki li ti ena enn fausse l’opinion lor la verité ek a cause sa, sans okenn conviction li ti demann Jésus: “Ki été la verité?”—Jean 18:38.
2 Dan nou lepok, bann dimoune entre zot-mem zot ena bann l’opinion bien different lor la verité. Beaucoup dimoune dire ki sa mot “verité[-la],” pou chaque dimoune, li ena enn sens different. Ena lezot ki dire la verité zis kan sa arrange zot ou-soit pou zot fini vite ar enn situation. Livre L’importance koz menti (en anglais) dire: “L’honneteté li kapav enn principe bien honorable, mais li pena valeur kan nou bizin lutté pou survive ek pou nou reste en securité. Dan sa domaine-la, enn dimoune pena beaucoup choix—li bizin koz menti pou li vive.”
3. Kifer Jésus li ti enn l’exemple extraordinaire en rapport avek dire la verité?
3 Li vrai-mem different pou bann disciple Christ! C’est pa coumsa ki Jésus li, li ti considere la verité. Li ti touletan dire la verité. Mem so bann l’ennemi ti reconette: “Enseignant, nou koné ki to dire la verité ek ki to enseigne bann pensée Bondié avek verité.” (Mat. 22:16) Li pareil aussi zordi, bann vrai chretien imite l’exemple Jésus. Zot pa hesité pou dire la verité. Avek tou zot leker, zot d’accord avek l’apotre Paul ki ti donne sa conseil-la bann chretien: “Asterla ki zot finn arrete koz menti, sakenn parmi zot, dire la verité so prochain.” (Éph. 4:25) Anou examine trois l’aspect concernant seki Paul ti dire. Premierement, kisannla ki nou prochain? Deuxiemement, ki sa vedir dire la verité? Ek troisiemement, couma nou kapav applik sa dan nou la vie toulé-jour?
Kisannla ki nou prochain?
4. (a) Pou bann chef juif dan premier siecle, kisannla ti zot prochain? (b) Couma Jésus ti ena mem pensé ki Jéhovah lor sa sujet-la?
4 Dan premier siecle nou lepok, certain chef juif ti enseigné ki zis bann Juif couma zot ou-soit zot bann camarade proche ki ti zot “prochain,” ek ki ti merité ki appel zot coumsa. Mais Jésus li, li ti imite so Papa dan enn fason parfait ek ti ena mem fason pensé ki Li. (Jean 14:9) Li interessant pou remarké ki Jésus ti montré so bann disciple ki Bondié pa favorise enn race ou-soit enn nationalité plus ki enn lot. (Jean 4:5-26) En plus, l’esprit saint ti faire l’apotre Pierre koné ki “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.” (Actes 10:28, 34, 35) Alors, nou bizin considere tou dimoune couma nou prochain ek montré nou l’amour mem envers bann ki agir couma nou bann l’ennemi.—Mat. 5:43-45.
5. Ki sa vedir koz la verité avek nou prochain?
5 Alors, ki Paul ti pé rod faire nou comprend kan li ti dire ki nou bizin koz la verité avek nou prochain? Dire la verité implik ki nou donne bann renseignement ki vrai, sans ki nou rod embete lezot. Bann vrai chretien pa deforme ou-soit mal presente bann fait pou embete lezot. Zot “ena degout pou seki mauvais” ek zot “reste attaché ar seki bon.” (Rom. 12:9) Pou imite “Bondié la verité,” nou bizin faire zeffort pou reste honnete ek franc dan tou seki nou faire ek dire. (Ps. 15:1, 2; 31:5) Kan nou bien choisir nou bann parole, nou pou kapav reglé mem bann situation embarrassant ou-soit difficile avek tact, sans ki nou koz menti.—Lire Colossiens 3:9, 10.
6, 7. (a) Eski dire la verité, vedir ki nou bizin donne mem bann detail personnel, chaque dimoune ki pose nou question? Expliké. (b) Kisannla ki merité ki nou dire zot la verité?
6 Mais pou nou koz la verité avek nou prochain, eski sa vedir ki nou bizin dire tou seki nou koné lor enn sujet ar n’importe kisannla ki pose nou enn question? Non, li pa necessaire. Kan Jésus ti lor la terre, li ti montré ki certain dimoune pa merite ki nou donne zot enn reponse direct ou-soit certain renseignement. Kan bann chef religieux hypocrite ti demann li par ki pouvoir ou-soit l’autorité li ti faire bann mirak, Jésus ti dire: “Mo pou pose zot enn sel question. Zot reponn moi ek mo’si mo pou dire zot par ki pouvoir mo faire sa bann kitsoz-la.” Kan bann scribe ek bann ancien pa ti’lé reponn li, Jésus ti dire zot: “Mo’si mo pa pou dire zot par ki pouvoir mo faire sa bann kitsoz-la.” (Marc 11:27-33) Jésus ti koné ki li ti pé koz ar bann dimoune ki ti pé faire bann mauvais kitsoz, ki ti pé donne enn mauvais l’exemple, alors li pa ti senti-li obligé pou reponn zot. (Mat. 12:10-13; 23:27, 28) Zordi aussi pareil, bann serviteur Jéhovah bizin faire attention ar bann apostat ek lezot mauvais dimoune ki servi bann trik ek bann manigance pou zot prop l’avantage.—Mat. 10:16; Éph. 4:14.
7 Paul aussi ti montré ki certain dimoune kitfois pa merite ki nou donne zot enn reponse complet. Li ti dire ki bann ki “faire palab ek rente dan zaffaire lezot dimoune,” zot “koz lor bann kitsoz ki zot pa bizin kozé.” (1 Tim. 5:13) Oui, bann ki rente dan zaffaire lezot dimoune ou-soit bann ki pa kapav garde enn kitsoz confidentiel, kitfois sa bann dimoune-la kapav trouvé ki lezot pa’lé donne zot certain renseignement. Li beaucoup pli bon ki nou suive sa conseil Paul-la: “Faire zeffort pou vive trankil ek pou veille zot prop zaffaire.” (1 Thess. 4:11) Mais li arrivé parfois ki bann ancien dan congregation bizin pose certain question personnel pou zot kapav faire zot travail. Dan sa cas-la, zot pou bien apprecié ki nou cooperé ek nou dire la verité, ek sa pou aide zot beaucoup.—1 Pierre 5:2.
Dire la verité dan la famille
8. Kan bann membre enn famille dire la verité, couma eski sa aide zot pou vinn proche ar zot camarade?
8 Normalement c’est avek bann membre nou famille, ki nou pli proche. Pou fortifié sa relation-la, li bien important ki nou koz la verité sakenn avek nou camarade. Nou kapav diminué ou-soit evite beaucoup probleme ek malentendu si nou franc, nou honnete ek nou koz avek bonté. Par exemple, kan nou faire enn erreur, eski nou hesité pou reconette sa ar nou conjoint, nou bann zenfant ou-soit ar lezot membre nou famille ki proche avek nou? Kan nou demann excuse avek tou nou leker, sa favorise la paix ek l’unité dan la famille.—Lire 1 Pierre 3:8-10.
9. Kifer kan nou dire la verité sa pa vedir ki nou bizin koz brite ou-soit ki nou pena tact?
9 Dire la verité pa vedir koz brite ou-soit pena tact. Kan nou koz brite, sa pa donne nou parole plus valeur, ni li ena enn pli grand l’effet lor lezot. Paul ti dire: “Pa vinn amer envers lezot, arrete faire la rage, en colere, criyé, dire bann parole pou insulté lezot, ek arrete faire tou seki mauvais. Mais vinn bon sakenn envers so prochain, ena enn grand compassion, sakenn bizin pardonne so prochain avek tou so leker pareil couma Bondié aussi finn pardonne zot avek tou so leker par Christ.” (Éph. 4:31, 32) Kan nou koz avek bonté ek tact, nou bann parole ena plus valeur ek sa donne l’honneur bann dimoune avek ki nou pé kozé.—Mat. 23:12.
Dire la verité dan congregation
10. Ki bann ancien kapav aprann ar bon l’exemple ki Jésus inn laissé kan li ti koz la verité?
10 Jésus ti koz ar so bann disciple dan enn fason simple ek direct. Touletan li ti donne bann conseil avek amour, mais li pa ti maquille la verité pou faire plaisir bann ki ti pé ecoute li. (Jean 15:9-12) Par exemple, kan so bann zapotre ti laguerre entre zot pou koné kisannla ki pli grand, avek fermeté mais patience, Jésus ti aide zot pou comprend ki zot bizin ena l’humilité. (Marc 9:33-37; Luc 9:46-48; 22:24-27; Jean 13:14) Li pareil aussi zordi, bann ancien zot ferme pou la justice mais en mem temps zot pa faire dominere ar peuple Bondié. (Marc 10:42-44) Zot imite Christ kan zot “vinn bon sakenn envers so prochain” ek zot “ena compassion” dan zot relation avek lezot.
11. Couma nou l’amour pou nou bann frere pou faire nou servi nou la langue?
11 Kan nou franc avek nou bann frere sans ki nou trop direct avek zot, nou kapav dire seki nou pensé sans ki nou blesse zot. Oui, jamais nou pa pou envie ki nou la langue “fité couma enn rasoir,” ek servi sa pou blesse nou prochain avek bann parole ki insulté zot. (Ps. 52:2; Prov. 12:18) L’amour pou nou bann frere pou pousse nou pou “veille [nou] la langue pou [nou] pa dire seki mauvais, ek [nou] la levre pou [nou] pa dire bann parole ki trompe lezot.” (Ps. 34:13) Dan sa fason-la, nou honore Bondié ek nou favorise l’unité dan congregation.
12. Eski dan tou cas kot enn kikenn inn koz menti, bizin faire enn comité judiciaire? Expliké.
12 Bann ancien travail dur pou protege congregation ar bann ki koz menti pou faire di-tort lezot. (Lire Jacques 3:14-16.) Bann ki koz sa qualité menti-la, zot envie faire di-tort enn kikenn. Zot envie faire li souffert dan enn certaine fason ou-soit faire li gagne bann probleme. C’est plus ki zis dire bann ti menti, bann kitsoz ki pou embete lezot, ou-soit ki zot exageré. Bien sur, tou sorte qualité mensonge li mauvais. Mais c’est pa dan tou cas kot enn dimoune inn koz menti, ki bann ancien pou faire enn comité judiciaire. Sa vedir ki bann ancien pou bizin equilibré, raisonnable, ek ena enn bon jugement kan zot decidé si enn dimoune ki’nn dire bann kitsoz fausse, habitué faire sa par expré, avek l’intention pou faire di-tort ek si zot pou bizin faire enn comité judiciaire. Ou-soit si zot zis bizin donne li bann conseil biblik bien ferme, avek bonté.
Dire la verité dan travail
13, 14. (a) Couma certain dimoune pa montré ki zot honnete avek zot patron? (b) Ki bon resultat sa kapav amené kan nou honnete ek serieux dan nou travail?
13 Nou pé vive enn lepok kot partout beaucoup dimoune malhonnete, alors sa kapav difficile pou montré-nou honnete avek enn patron. Kan bann dimoune faire enn application pou enn travail, beaucoup koz menti. Par exemple, zot kapav donne bann renseignement exageré lor zot l’experience ou-soit lor l’education ki zot inn gagné, zis pou zot kapav gagne enn pli bon travail, ou-soit enn pli bon la paye. De lot coté, beaucoup employé faire semblant zot pé travail alors ki en realité zot pé faire bann kitsoz personnel, mem si sa contraire ar la loi compagnie-la. Kitfois zot lire bann kitsoz ki pena okenn rapport avek zot travail, zot faire bann call telephone personnel, zot envoye bann e-mail personnel, ou-soit zot al lor Internet.
14 Pou bann vrai chretien, montré ki zot honnete ek dire la verité, li pa enn choix ki zot faire si zot envie. (Lire Proverbes 6:16-19.) Paul ti dire: “Nou envie reste honnete dan tou kitsoz.” (Héb. 13:18) Alors, bann vrai chretien donne zot patron enn full journée travail pou enn full journée la paye. (Éph. 6:5-8) Kan nou enn travailleur ki bien serieux, sa kapav aussi donne la gloire nou Papa ki dan le ciel. (1 Pierre 2:12) Par exemple, patron Roberto, ki vive en Espagne, ti felicite li parski li ti enn travailleur honnete ek responsable. Grace a bon conduite Roberto, compagnie kot li travail ti employe lezot Témoins. Zot aussi zot ti bann bon travailleur. Avek le temps, c’est 23 frere baptisé ek 8 etudiant la Bible ki’nn reussi gagne travail dan compagnie kot Roberto travail!
15. Couma enn chretien ki faire business montré ki li dire la verité?
15 Si nou travail pou nou-mem, eski nou honnete dan tou transaction ki nou faire, ou-soit eski parfois nou pa koz la verité avek nou prochain? Fodé pa ki enn chretien ki faire business donne fausse renseignement lor enn produit ou-soit enn service zis pou li kapav vann sa vite. Fodé pa aussi ki li donne bribe ou-soit accepté zot. Nou envie traite lezot pareil couma nou-mem nou ti pou content lezot traite nou.—Prov. 11:1; Luc 6:31.
Dire la verité ar bann representant gouvernement
16. Ki bann chretien donne (a) gouvernement? (b) Jéhovah?
16 Jésus ti dire: “Rann César bann kitsoz ki pou César, mais rann Bondié bann kitsoz ki pou Bondié.” (Mat. 22:21) Ki qualité “kitsoz” nou doit César, setadir bann gouvernement? Kan Jésus ti dire sa bann parole-la, li ti pé koz lor taxe. Alors, pou garde enn bon conscience devant Bondié ek devant bann zom, bann chretien obeir bann la loi zot pays, parmi ena bann la loi lor taxe. (Rom. 13:5, 6) Mais nou reconette ki Jéhovah Li Pli Grand Souverain, sel vrai Bondié, ki nou content avek tou nou leker, nou nâme, nou l’esprit ek nou la force. (Marc 12:30; Rév. 4:11) A cause sa, nou soumette ar Jéhovah sans okenn reserve.—Lire Psaume 86:11, 12.
17. Couma bann serviteur Jéhovah considere l’aide ki gouvernement donné?
17 Dan beaucoup pays ena bann service social pou bann dimoune ki bizin l’aide lor plan materiel. Pena nanyin mauvais ki enn chretien gagne sa qualité l’aide-la—a condition ki li merite sa. Dire la verité nou prochain pou empeche nou pou donne bann fausse renseignement bann representant gouvernement pou nou kapav gagne enn l’aide materiel ar zot.
Bann bienfait ki nou gagné
18-20. Ki bienfait nou gagné kan nou honnete ek nou dire la verité nou prochain?
18 Nou gagne beaucoup bienfait kan nou honnete ek nou dire la verité. Nou garde enn bon conscience, grace a sa, nou l’esprit en paix ek nou leker calme. (Prov. 14:30; Phil. 4:6, 7) Kan nou ena enn bon conscience, sa ena enn grand valeur devant Bondié. Ek aussi, kan nou honnete dan tou kitsoz, nou pa bizin tracassé pangar bann dimoune maye nou pé faire bann kitsoz ki pa bizin.—1 Tim. 5:24.
19 Anou examine enn lot bienfait. Paul ti dire: “Dan tou fason, nou recommande nou-mem couma bann ministre Bondié, . . . par bann parole ki vrai.” (2 Cor. 6:4, 7) C’est seki ti arrive enn Temoin ki reste en Angleterre. Li ti pé vann enn l’auto ar enn missié ki ti interessé, ek li ti dire tou bann bon coté mais aussi bann kitsoz ki pa marche bien dan l’auto-la, mem bann kitsoz ki pa ti kapav trouvé. Apré ki zot finn faire enn test ar l’auto-la, missié-la ti demann sa frere-la si li enn Témoin de Jéhovah. Kifer li’nn tire sa conclusion-la? Parski missié-la ti remarké ki sa frere-la ti honnete ek aussi ki li ti bien habillé. Apré sa, zot inn gagne enn bon conversation kot frere-la inn kapav donne li enn bon temoignage.
20 Eski nou aussi nou donne la gloire nou Createur parski nou touletan honnete ek nou dire la verité? Paul ti dire: “Nou finn rejette bann kitsoz ki faire en cachiette ek ki faire honté. Nou pa trik personne.” (2 Cor. 4:2) Alors, anou faire tou nou possible pou dire la verité nou prochain. Coumsa, nou pou donne la gloire nou Papa ki dan le ciel ek so peuple.
Couma ou pou reponn?
• Kisannla ki nou prochain?
• Ki sa vedir dire la verité nou prochain?
• Couma kan nou honnete ek nou dire la verité sa kapav donne la gloire Bondié?
• Ki bienfait nou gagné kan nou honnete ek nou dire la verité?
[Zimage lor page 23]
Eski ou reconette desuite ou bann ti erreur?
[Zimage lor page 24]
Eski ou dire la verité kan ou faire enn application pou enn travail?