Vinn bann dimoune ki disposé pou cedé ek ki raisonnable

“Contigne rappel zot ki zot bizin . . . vinn bann dimoune ki disposé pou cedé.”—TITE 3:1, 2, note.

1, 2. Ki la Bible dire lor l’importance pou cedé, ek kifer sa li approprié?

JÉHOVAH, nou bon Papa ki dan le ciel, Li bien sage. Parski c’est Li ki finn crée nou, nou rod so direction dan nou la-vie. (Ps. 48:14) Disciple Jacques dire nou ki “sagesse ki sorti la-haut li avant tou pur, apré li pacifik, li raisonnable [“disposé pou cedé,” note], li disposé pou obeir, li rempli ar misericorde ek bann bon fruit, li pa faire preference, li pa hypocrite.”—Jacq. 3:17.

² L’apotre Paul ti donne sa conseil-la bann chretien: “Laisse zot tou koné ki zot bann dimoune raisonnable [“ki cedé,” Kingdom Interlinear].”a (Phil. 4:5) Christ Jésus li Seigneur ek Chef congregation chretien. (Éph. 5:23) Alors, li bien important ki sakenn parmi nou agir dan enn fason raisonnable kan nou soumette-nou ar direction Christ ek kan nou disposé pou cedé dan nou rapport avek lezot dimoune.

3, 4. (a) Donne bann l’exemple pou montré bann bienfait ki nou gagné kan nou disposé pou cedé. (b) Ki nou pou examiné?

³ Kan nou disposé pou cedé dan enn fason raisonnable, nou gagne bann bienfait. Par exemple, en Angleterre, apré ki ti’nn decouvert enn complot terroriste pou attak enn l’aeroport, la plupart passager ti disposé pou obeir bann instruction pou pa amenn avek zot bann kitsoz ki zot ti gagne droit amené avant. Kan nou conduire enn l’auto, nou trouve l’importance pou cedé ek laisse lezot chauffeur passé, par exemple kan nou faire enn rond-point; lerla sa permette nou pou evite bann accident ek pa bloque trafik lor chemin.

⁴ Pou beaucoup parmi nou, li pa facile pou cedé. Pou aide nou, anou considere trois question. Premierement, nou pou examiné ki bann mobile nou bizin ena, deuxiemement, nou l’attitude envers bann l’autorité, ek troisiemement, ziska ki point nou bizin disposé pou cedé.

Kifer nou bizin disposé pou cedé?

5. Dapré la Loi mosaïk, ki ti kapav pousse enn esclave pou choisir pou reste kot so maitre?

⁵ Enn l’exemple dan lepok bann Israélite montré nou avek ki mobile nou bizin disposé pou cedé. Dapré la Loi mosaïk, bann Hébreux ki ti vinn esclave ti bizin gagne zot liberté apré ki zot ti servi couma esclave pendant sept an, ou-soit kan arrive l’année jubilé, tou depend seki ti vinn avant. Mais enn esclave ti kapav reste enn esclave si li ti envie. (Lire Exode 21:5, 6.) Ki ti pou kapav pousse enn esclave pou faire sa? C’est l’amour ki li ti ena pou so bon maitre.

6. Couma l’amour kapav aide nou pou cedé?

⁶ Nou aussi pareil, nou l’amour pou Jéhovah pousse nou pou voué nou la-vie pou servi Li ek pou vive en accord avek sa promesse ki nou’nn faire-la. (Rom. 14:7, 8) L’apotre Jean ti ecrire: “Ala seki vedir l’amour pou Bondié: suive so bann commandement; ek pourtant so bann commandement pa lourd.” (1 Jean 5:3) Sa qualité l’amour-la pa guette so prop l’interet. (1 Cor. 13:4, 5) Dan nou rapport avek nou prochain, l’amour pou pousse nou pou renonce ar nou bann droit ek pou mette zot l’interet avant nou prop l’interet. Au lieu ki nou montré-nou egoïste, nou prend compte zot l’interet.—Phil. 2:2, 3.

7. Kan nou renonce ar nou bann droit ki l’importance sa ena dan nou ministere?

⁷ Fodé pa ki nou bann parole ek nou bann action faire lezot tombé lor plan spirituel. (Éph. 4:29) Au contraire, l’amour pou pousse nou pou evite faire n’importe ki kitsoz ki kapav empeche bann dimoune ki ena different l’origine ek culture progressé pou servi Jéhovah. Sa vedir ki souvent nou bizin renonce ar nou bann droit. Par exemple, bann soeur missionnaire ki habitué maquillé ou-soit mette lé-bas, pa insisté pou contigne faire sa dan bann l’endroit kot sa kapav faire bann dimoune pensé ki zot bann dimoune immoral ek faire lezot tombé lor plan spirituel.—1 Cor. 10:31-33.

8. Couma l’amour pou Bondié kapav aide nou pou agir couma ‘bann pli tipti’?

⁸ Nou l’amour pou Jéhovah aide nou pou tire l’orgueil dan nou leker. Kan Jésus ti trouve so bann disciple discuté pou koné kisannla ki pli grand, li ti mette enn zenfant au milieu zot. Li ti explik zot: “Seki accueillir sa ti-zenfant-la a cause mo nom, pé accueillir moi aussi, ek seki accueillir moi pé accueillir aussi sa kikenn ki’nn envoye moi-la. Parski seki agir couma enn kikenn ki pli tipti parmi zot tou, li-mem ki grand.” (Luc 9:48; Marc 9:36) Personnellement, li possible ki nou trouve sa vrai-mem difficile pou agir couma “enn pli tipti.” Nou l’imperfection ek nou tendance pou ena l’orgueil kapav pousse nou pou rod grandeur, mais l’humilité pou aide nou pou cedé ek honore nou prochain.—Rom. 12:10.

9. Pou nou kapav cedé, ki nou bizin prend compte?

⁹ Pou ki nou disposé pou cedé, nou bizin reconette l’autorité ki Bondié inn donne certain dimoune. Tou bann vrai chretien reconette principe bien important lor l’autorité. L’apotre Paul ti montré l’importance pou obeir sa principe-la kan li ti dire bann Corinthien: “Mo envie ki zot koné ki chef tou bann zom c’est Christ; chef enn femme c’est enn zom; ek chef Christ c’est Bondié.”—1 Cor. 11:3.

10. Kan nou soumette ar l’autorité Jéhovah, ki sa montré?

¹⁰ Kan nou soumette ar l’autorité Bondié, sa montré ki nou ena confiance en nou Papa ki ena l’amour pou nou. Li konn bien tou seki passé ek Li kapav recompense nou couma bizin dapré seki nou faire. C’est enn kitsoz ki li bon nou rappel kan lezot pa traite nou avek respé ou-soit kan zot commence en colere ek perdi control. Paul ti ecrire: “Si possible, autant ki sa depann lor zot, vive en paix avek tou dimoune.” Paul ti mette l’accent lor sa conseil-la kan li ti donne sa l’ordre-la: “Pa tire vengeance zot-mem, mo bann frere ki mo bien content, mais laisse place pou colere; parski finn ecrire: ‘Jéhovah dire: Vengeance pou moi; moi ki pou faire zot payé.’ ”—Rom. 12:18, 19.

11. Couma nou kapav montré ki nou soumette-nou ar l’autorité Jésus Christ?

¹¹ Bondié inn aussi donne l’autorité certain dimoune dan congregation. Révélation chapitre 1 montré Jésus Christ ki pé tini bann “zetoile” ki dan congregation, dan so la-main droite. (Rév. 1:16, 20) Dan enn sens general, sa bann ‘zetoile-la’ represente bann college ancien ou-soit bann surveillant dan bann congregation. Sa bann ancien ki’nn nommé-la zot soumette-zot ar l’autorité Christ ek imite so bonté dan zot rapport avek lezot. Zot tou dan congregation soumette ar disposition ki Jésus inn prend pou ki “l’esclave fidele et avisé” donne nourriture spirituel dan l’heure ki bizin. (Mat. 24:45-47) Zordi, kan nou disposé pou etudié ek pou mette en pratik seki nou aprann, sa montré ki personnellement nou pé soumette-nou ar direction Christ ek sa favorise la paix ek l’unité parmi nou.—Rom. 14:13, 19.

Cedé—Ziska ki point?

12. Kifer nou pa kapav cedé dan tou domaine?

¹² Selman, cedé pa vedir ki nou bizin agir kont nou la-foi, ou-soit kont bann principe biblik. Ki bann premier chretien ti faire kan bann chef religieux ti donne zot l’ordre pou arrete enseigne lor nom Jésus? Pierre ek lezot zapotre ti dire avek courage: “Nou bizin obeir Bondié couma enn chef plutot ki bann zom.” (Actes 4:18-20; 5:28, 29) Alors zordi, kan bann l’autorité essaye force nou pou arrete preche la bonne nouvelle, nou pa arreté, mem si kitfois nou bizin faire bann changement dan nou bann methode pou ki nou kapav faire face ar sa situation-la avek tact. Si zot empeche nou preche de porte en porte, nou pou rod bann lezot fason pou joinde bann dimoune ek contigne faire sa travail ki Bondié inn donne nou-la. Li pareil aussi kan “bann l’autorité superieur” empeche nou pou faire nou bann reunion. Nou pou joinde dan bann ti groupe, sans ki nou faire lezot remark nou.—Rom. 13:1; Héb. 10:24, 25.

13. Ki Jésus ti dire concernant l’importance pou soumette ar bann ki ena l’autorité?

¹³ Dan so Sermon ki li ti faire lor montagne, Jésus Christ ti montré l’importance pou soumette ar bann ki ena l’autorité: “Si enn kikenn envie al avek toi devant la cour ek prend to linge ki to metté endan, donne li aussi linge ki to metté la-haut; ek si enn kikenn ki ena l’autorité appel toi pou faire enn service obligatoire lor enn mille, al avek li lor deux mille.” (Mat. 5:40, 41)b Kan nou ena consideration pou lezot ek nou envie aide zot, sa pou pousse nou coumadir pou faire enn mille en plus avek zot.—1 Cor. 13:5; Tite 3:1, 2.

14. Kifer fodé jamais nou cedé ar l’apostasie?

¹⁴ Mais selman, fodé jamais ki nou desir pou cedé amenn nou pou faire bann compromis avek bann apostat. Dan sa domaine-la, li bien important ki nou prend enn position bien ferme ek clair pou garde la verité pur ek l’unité dan la congregation. Concernant bann “fausse frere,” Paul ti ecrire: “Ar sa bannla, nou pa finn cedé par soumission, non, mem pa pou enn heure-temps, pou ki la verité lor la bonne nouvelle kapav reste parmi zot.” (Gal. 2:4, 5) Kan, dan bann cas rare, ena l’apostasie, bann chretien fidele reste attaché ar seki droite.

Bann ancien bizin disposé pou cedé

15. Couma bann ancien kapav montré ki zot disposé pou cedé kan zot faire zot reunion?

¹⁵ Enn parmi bann condition ki bann ancien bizin rempli c’est ki zot bizin disposé pou cedé. Paul ti ecrire: “Alors, enn surveillant bizin enn dimoune ki . . . raisonnable [“disposé pou cedé,” note].” (1 Tim. 3:2, 3) C’est enn kitsoz ki bien important surtout kan bann ancien joinde pou discute bann kitsoz ki concerne congregation. Avant zot prend enn decision, sakenn libre pou dire seki li pensé, mem si li pa toujours necessaire ki chaque ancien donne so l’opinion. Pendant zot reunion, li possible ki enn parmi, change so l’opinion kan li tann lezot attire l’attention lor bann principe biblik ki impliké. Au lieu ki li resisté ek li persisté pou garde so l’opinion personnel, enn ancien ki mur, pou cedé. Kitfois au commencement zot ena plusieurs l’opinion different, mais si zot reflechi bien ek zot prié, sa kapav favorise l’unité parmi bann ancien ki modeste ek ki pré pou cedé.—1 Cor. 1:10; Lire Éphésiens 4:1-3.

16. Ki l’attitude enn ancien bizin manifesté?

¹⁶ Dan tou seki li faire, enn ancien bizin faire zeffort pou soutenir bann disposition theocratik. Nou bizin trouve sa l’attitude-la mem dan fason ki li prend soin troupeau Bondié, setadir la congregation; sa pou aide li pou manifesté consideration ek douceur envers lezot. Pierre ti ecrire: “Prend soin troupeau Bondié ki lor zot charge, pa par obligation, mais volontairement, ni parski zot content enn profit malhonnete, mais parski zot ena sa desir-la.”—1 Pierre 5:2.

17. Couma zot tou dan congregation kapav manifesté enn l’attitude ki montré ki zot disposé pou cedé?

¹⁷ Bann membre dan congregation ki pli agé bien apprecié l’aide bann ki pli jeune ek zot traite bannla avek dignité. En retour, bann jeune respecté bann agé ki ena plusieurs l’année l’experience dan service Jéhovah. (1 Tim. 5:1, 2) Bann ancien guetté ki bann frere ki rempli bann condition spirituel ki kapav gagne certain responsabilité, ek zot forme bannla pou zot kapav prend soin congregation Bondié. (2 Tim. 2:1, 2) Chaque chretien bizin prend serieux sa conseil ki Paul ti donné-la: “Obeir bann ki pé dirige zot ek soumette [“cedé,” note] ar zot, parski bannla pé veille lor zot nâme couma bann ki pou rann compte; pou ki zot kapav faire sa avek la joie ek sans plaigné, sinon sa pou faire zot-mem di-tort.”—Héb. 13:17.

Disposé pou cedé dan la famille

18. Kifer li necessaire ki bann membre enn famille zot disposé pou cedé?

¹⁸ Bann membre enn famille aussi bizin disposé pou cedé sakenn envers so camarade. (Lire Colossiens 3:18-21.) La Bible montré ki role sakenn ena dan la famille. Enn papa, en mem temps li chef so femme ek c’est li-mem ki surtout responsable pou donne enn direction so bann zenfant. Enn femme bizin respecté l’autorité so mari, ek bann zenfant bizin faire tou pou obeir zot parent, parski sa faire le Seigneur plaisir. Chaque membre la famille kapav contribué pou ena l’unité ek la paix dan lakaz kan zot disposé pou cedé dan enn fason raisonnable. Dan la Bible, ena bann l’exemple ki montré sa.

19, 20. (a) Ki difference ena entre fason ki Éli ek Jéhovah ti cedé? (b) Ki bann leson bann parent kapav tiré ar sa bann l’exemple-la?

¹⁹ Kan Samuel ti encore enn jeune garson, c’est Éli ki ti grand pretre en Israël. Selman, bann garson Éli, Hophni ek Phinéas ti bann “bon-nanyin” ki “pa ti reconette l’autorité Jéhovah.” Éli ti tann bann mauvais rapport lor zot, par exemple li ti tann dire ki so bann garson ti pé commette fornication avek bann femme ki ti pé servi dan l’entrée la tente reunion. Couma li ti reagir? Li ti dire zot ki si zot faire peché kont Jéhovah, personne pa pou kapav prié pou zot. Mais li pa ti ni corrige zot ni discipline zot. Alors, bann garson Éli ti contigne faire le mal. Finalement, avek justice Jéhovah ti decidé ki zot ti merite la mort. Kan Éli ti gagne nouvelle ki so bann garson ti’nn mort, li-mem li ti mort. Enn la-fin bien triste, pa vrai? Li clair ki, kan Éli ti laisse so bann garson contigne faire le mal, li ti cedé dan enn mauvais fason.—1 Sam. 2:12-17, 22-25, 34, 35; 4:17, 18.

²⁰ Parkont, guette fason ki Bondié ti agir avek so bann garson spirituel, bann ange. Prophete Mikaïa ti gagne enn vision extraordinaire lor enn reunion entre Jéhovah ek So bann ange. Jéhovah ti demandé kisannla parmi zot ti pou kapav al embete Ahab, mauvais lé-roi Israël ek faire so Royaume tombé. Jéhovah ti ecoute plusieurs suggestion. Lerla, enn ange ti dire ki li pou kapav faire sa. Jéhovah ti demann li couma, ek Li ti satisfait avek reponse sa ange-la. Apré sa, Jéhovah ti donne li l’autorisation pou faire seki li ti dire. (1 Rois 22:19-23) Kan nou considere sa cas-la dan enn fason humain, eski nou pa trouve bann leson ki bann famille kapav tiré lor fason ki zot kapav cedé dan zot famille? Enn chretien pou faire bien si li prend compte bann l’idée ek bann suggestion so femme ek so bann zenfant. Selman bann femme ek bann zenfant bizin comprend ki, si zot inn donne zot l’opinion ou-soit inn dire seki zot preferé, kitfois zot pou bizin cedé pou respecté decision sa kikenn ki dapré la Bible ena l’autorité pou decidé.

21. Ki nou pou examiné dan prochain lartik?

²¹ Nou vrai-mem bien reconnaissant envers Jéhovah pou so bann rappel ki sage ek ki rempli ar l’amour ki encourage nou pou cedé! (Ps. 119:99) Dan prochain lartik nou pou trouvé kifer kan nou cedé dan enn fason raisonnable, sa permette nou pou vive heureux dan nou couple.

[Note]

Couma ou pou reponn?

• Ki bann bon resultat nou kapav gagné kan nou cedé?

• Couma bann ancien kapav montré ki zot disposé pou cedé?

• Kifer li important ki bann membre enn famille disposé pou cedé?

[Zimage lor page 10]

Bann ancien imite fason ki Jésus ti traite lezot avek bonté

[Zimage lor page 12]

Kan bann ancien joinde pou zot reunion, si zot reflechi bien, zot prié, ek zot cedé, sa pou favorise l’unité