Bann ki ena “l’attitude ki bizin” pé accepté nou message
“Tou bann ki ti ena l’attitude ki bizin pou gagne la vie eternel ti vinn bann croyant.”—ACTES 13:48.
1, 2. Jésus ti annoncé ki la bonne nouvelle pou preché partout lor la terre. Ki l’effet sa prophetie-la ti ena lor bann premier chretien?
JÉSUS ti annoncé ki la bonne nouvelle pou preché partout lor la terre. (Mat. 24:14) Livre Actes raconte bien l’effet ki sa prophetie-la finn ena lor bann premier chretien. Bann predicateur zelé finn coumadir ouvert chemin pou tou bann ki ti pou imite zot. Grace a temoignage zelé ki bann disciple Jésus ti donné dan Jérusalem, plusieurs millier dimoune, parmi ti ena “enn grand quantité pretre,” ti vinn membre dan congregation premier siecle.—Actes 2:41; 4:4; 6:7.
2 Bann missionnaire dan premier siecle ti aide beaucoup dimoune pou accepté religion chretien. Par exemple, Philippe ti al Samarie kot bann la-foule ti ecoute seki li ti dire. (Actes 8:5-8) Paul ti voyage beaucoup ek different frere ti accompagne li. Li ti preche la bonne nouvelle dan Chypre, dan certain partie dan l’ouest l’Asie, en Macédoine, en Grèce, ek en Italie. Dan bann la-ville kot li ti preché, beaucoup Juif ek Grec ti vinn bann chretien. (Actes 14:1; 16:5; 17:4) Tite li, li ti accompli so service dan Crète. (Tite 1:5) Pierre ti bien occupé dan Babylone. Kan li ti ecrire so premier lettre, vers 62-64 nou lepok, bann dimoune ti bien konn l’activité ki bann chretien ti faire dan bann l’endroit couma Pont, Galatie, Cappadoce, l’Asie ek Bithynie. (1 Pierre 1:1; 5:13) Sa lepok-la ti vrai-mem enn lepok interessant kot beaucoup kitsoz ti pé arrivé! Bann chretien premier siecle ti bann predicateur tellement zelé ki dapré zot bann l’ennemi, zot ti’nn “bouleverse le monde entier.”—Actes 17:6; 28:22.
3. Ki resultat bann proclamateur Royaume Bondié pé gagné zordi dan zot l’activité predication, ek ki sentiment sa donne ou?
3 Dan nou lepok aussi congregation chretien finn gagne enn l’accroissement extraordinaire. Eski sa pa encourage ou kan ou examine rapport ki nou gagné toulé-l’année lor l’activité bann Témoins de Jéhovah ek resultat ki pé gagné dan le monde entier? Eski sa pa faire ou plaisir pou koné ki pendant l’année service 2007, bann proclamateur finn conduire plus ki six million l’etude la Bible? En plus, l’assistance pou Mémorial la mort Jésus Christ l’année derniere montré ki apepré dix million dimoune ki pa Témoins de Jéhovah ti ena assez l’interet pou vinn assisté sa l’evenement important-la. Sa montré ki ena encore beaucoup travail pou faire.
4. Kisannla pé accepté message lor Royaume Bondié?
4 Zordi, pareil couma dan premier siecle, ‘tou bann ki ena l’attitude ki bizin pou gagne la vie eternel’ pé accepté message la verité. (Actes 13:48) Jéhovah pé attire sa bann qualité dimoune-la dan so l’organisation. (Lire Haggaï 2:7.) Ki l’attitude nou bizin contigne ena envers nou ministere pou ki nou kapav coopere cent pour cent dan sa l’activité ki pé rassemblé bann dimoune-la?
Preché sans faire preference
5. Ki qualité dimoune ki gagne faveur Jéhovah?
5 Bann chretien premier siecle ti comprend ki “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.” (Actes 10:34, 35) Pou ki enn dimoune ena bann bon relation avek Bondié, li bizin ena la foi dan sacrifice Jésus. (Jean 3:16, 36) En plus, c’est volonté Jéhovah ki “tou sorte qualité dimoune sauvé ek gagne enn connaissance exact lor la verité.”—1 Tim. 2:3, 4.
6. Ki fodé pa bann proclamateur faire, ek kifer?
6 Li pa pou bon ki enn proclamateur la bonne nouvelle fini juge enn dimoune a cause so race, so position social, so l’apparence, so croyance religieux, ou-soit a cause enn lot kitsoz ki concerne sa dimoune-la depuis avant-mem. Reflechi enn coup: Eski ou pa reconnaissant ki sa dimoune ki ti rann ou temoignage premier fois-la pa ti fini juge ou avant? Alors, kifer ou laisse ou jugement empeche ou pou annonce enn message ki kapav sauve la-vie enn dimoune ki kitfois kapav ecoute ou?—Lire Matthieu 7:12.
7. Kifer fodé pa nou juge bann dimoune avek ki nou preché?
7 Jéhovah finn etabli Jésus couma juge; alors nou pena droit juge personne. C’est enn bon kitsoz, parski nou pa pareil couma Jésus, nou kapav juge zis “dapré seki parette devant [nou] lizié,” ou-soit “dapré seki [nou] zoreille tendé.” Mais Jésus li, li kapav lire bann pensée ek bann raisonnement ki enn dimoune ena dan fond so leker.—Is. 11:1-5; 2 Tim. 4:1.
8, 9. (a) Ki qualité dimoune Saul ti été avant li vinn enn chretien? (b) Ki l’exemple l’apotre Paul bizin enseigne nou?
8 Tou sorte qualité dimoune finn vinn bann serviteur Jéhovah. Enn grand l’exemple ki nou ena c’est Saul de Tarse, ki plitar ti vinn l’apotre Paul. Saul, ti enn Pharisien ki ti enn grand l’ennemi bann chretien. Li ti persecute congregation chretien parski li ti sur ki bannla pa ti bann vrai adorateur Jéhovah. (Gal. 1:13) Si nou en tant ki humain nou considere so cas, pa ti ena beaucoup chance ki enn jour li vinn enn chretien. Pourtant, Jésus ti trouve enn kitsoz ki bon dan so leker ek ti choisir li pou accompli enn mission special. Alors apré sa, Saul ti vinn enn parmi bann chretien ki ti pli actif ek pli zelé dan congregation premier siecle.
9 Ki l’exemple Paul enseigne nou? Kitfois dan nou territoire ena bann dimoune ki parette opposé ar nou message. Mem si li parette ki parmi sa bann dimoune-la, jamais personne pa pou vinn enn vrai chretien, fodé pa ki nou arrete essaye raisonne avek zot. Parfois, mem bann dimoune ki nou pa ti pensé pou interessé, zot ecoute nou message. Nou mission c’est pou contigne preche ar tou dimoune “sans arreté.”—Lire Actes 5:42.
Bann ki preché “sans arreté” pou gagne bann benediction
10. Kifer fodé pa nou hesité pou preche avek bann dimoune ki parette faire gagne peur? Raconte bann fait local.
10 L’apparence kapav embete nou. Ignacioa par exemple, ti commence etudié la Bible avek bann Témoins de Jéhovah alors ki li ti dan prison dan enn pays en Amérique du Sud. Dimoune ti peur li parski li ti violent. Alors, bann prisonnier ki ti fabrik ek vann bann kitsoz avek lezot prisonnier, ti envoye Ignacio pou ramasse l’argent ar bann ki ti tardé pou payé. Selman, a mesure ki Ignacio ti faire bann progré lor plan spirituel ek ti applik seki li ti pé aprann, li ti arrete agir avek violence ek li ti vinn enn bon dimoune. Li vrai ki asterla personne nepli servi li pou al ramasse bann dette, mais Ignacio content ki bann verité biblik ek l’esprit saint Bondié finn transforme so personnalité. Li bien reconnaissant aussi envers bann proclamateur ki finn faire bann zeffort pou etudié la Bible avek li sans ki zot ti juge li avant.
11. Kifer nou retourne kot bann dimoune?
11 Enn parmi bann raison kifer nou retourne visite bann dimoune avek ki nou finn deja koz lor la bonne nouvelle, c’est parski zot situation ek zot l’attitude kapav changé. Kitfois depuis ki nou finn visite zot dernier fois, certain finn gagne enn maladie bien grave, finn perdi zot travail, ou-soit finn perdi enn membre zot famille dan la mort. (Lire Ecclésiaste 9:11.) Bann probleme ki ena dan le monde kapav pousse lezot dimoune pou reflechi serieux-serieux lor zot l’avenir. Sa bann situation-la kapav faire enn dimoune ki ti indifferent avant, kitfois mem opposé, accepté nou message. Alors, fodé pa ki nou hesité pou partage la bonne nouvelle a chaque fois ki nou gagne l’occasion.
12. Couma nou bizin considere bann dimoune ki nou joinde dan predication, ek kifer?
12 En tant ki humain, nou ena tendance pou classe bann dimoune dan enn categorie ek pou juge zot. Pourtant, Jéhovah trouve sakenn couma enn dimoune a part. Li trouve possibilité ki sakenn ena. (Lire 1 Samuel 16:7.) Dan nou ministere, nou bizin faire tou pou ressemblé Jéhovah. Beaucoup l’experience montré bann bon resultat ki nou gagné kan nou ena enn l’attitude positif lor tou dimoune avek ki nou preché.
13, 14. (a) Kifer enn pionnier ti ena enn l’attitude negatif envers enn madame ki li ti joinde dan predication? (b) Ki nou kapav aprann ar sa l’experience-la?
13 Sandra, enn soeur pionnier ki ti pé preché lor enn l’île ki trouve dan les Antilles, ti joinde Ruth, enn femme ki ti touletan participe dan bann fête carnaval. Deux fois Ruth ti gagne titre Miss Carnaval dan so pays. Li ti bien interessé ar seki Sandra ti dire li, alors, Sandra ti faire bann l’arrangement pou faire enn l’etude la Bible avek li. Sandra raconté: “Kan mo ti rente dan so salon, mo ti trouve enn grand photo Ruth dan so costume carnaval, ek ti ena aussi tou bann prix ki li ti gagné. Mo ti pensé ki enn dimoune populaire couma li ek ki tellement attaché ar bann fête carnaval pa ti pou kapav vrai-mem interessé ar la verité. Alors, mo ti arrete visite li. Mais mo ti ena tort.”
14 Inpé lé-temps plitar, Ruth ti vinn la Salle du Royaume, ek apré reunion, li ti demann Sandra: “Kifer ou’nn arrete etudié avek moi?” Sandra ti demann li excuse ek ti faire bann l’arrangement pou recommence so l’etude. Ruth ti faire bann progré bien vite, li ti tire so bann photo carnaval, li ti commence participe dan tou bann l’activité congregation ek li ti voué so la-vie ar Jéhovah. Bien sur, Sandra plitar ti reconette ki li pa ti’nn ena enn bon reaction au commencement.
15, 16. (a) Ki resultat enn proclamateur inn gagné kan li ti donne temoignage ar enn membre so famille? (b) Kifer fodé pa nou hesité pou preche ar enn membre nou famille malgré so situation?
15 Bann frere ek soeur inn gagne bann bon resultat kan zot inn donne temoignage ar bann membre zot famille mem si li ti parette ki jamais bannla pa ti pou accepté la verité. Anou prend l’exemple, Joyce, enn soeur américain. So beau-frere ti touletan allé-vini dan prison depuis ki li ti adolescent. Joyce raconté: “Dimoune ti dire ki li ti enn kikenn ki pa vaut nanyin parski li ti pé vann la drogue, li ti enn voleur ek li ti pé faire beaucoup lezot mauvais kitsoz encore. Mais, mo ti contigne koz lor la Bible avek li pendant 37 an, mem si so cas ti parette desesperé.” Joyce ti gagne bann grand recompense pou bann zeffort ki li ti faire avek patience. Finalement so beau-frere ti accepté pou etudié la Bible avek bann Témoins de Jéhovah ek li ti faire bann grand changement dan so la-vie. Pa trop longtemps, alors ki li ti ena 50 an, beau-frere Joyce ti prend bapteme pendant enn l’assemblée district dan Californie. Joyce dire: “Mo ti ploré tellement mo ti content. Mo vrai-mem content ki mo pa’nn arrete faire zeffort pou aide li!”
16 Kitfois ou hesité pou rann temoignage ar ou bann famille a cause zot situation. Pourtant, Joyce pa ti hesité pou koz ar so beau-frere. Apré tou, couma enn kikenn kapav koné ki ena dan leker enn lot dimoune? Ki koné si sa dimoune-la pa pé faire bann zeffort sincere pou rod la verité. Alors, pa hesité pou donne tou dimoune l’occasion pou trouve la verité.—Lire Proverbes 3:27.
Enn livre ki bien efficace pou etudié la Bible
17, 18. (a) Ki bann rapport ki sorti dan plusieurs pays montré lor valeur livre Ki la Bible enseigné vrai-mem? (b) Ki bann bon resultat ou finn gagné avek sa livre-la?
17 Bann rapport ki sorti dan beaucoup pays a travers le monde montré ki nou pé gagne bann bon resultat grace a livre Ki la Bible enseigné vrai-mem? Sa livre-la pé faire beaucoup dimoune sincere accepté la verité. Penni, enn pionnier américain ti commence plusieurs l’etude dan sa livre-la. Deux parmi ti bann dimoune agé ki ti bien actif dan zot religion. Penni pa ti trop sur couma bannla pou reagir ar bann verité biblik ki trouve dan livre Ki la Bible enseigné? Mais guette ki li ecrire: “Parski livre-la ti explik bann l’enseignement dan enn fason clair, logik ek precis, li pa ti difficile pou zot trouvé ki seki zot ti pé aprann, ti la verité. Pa ti ena bann discussion inutile ek sa pa ti trop bouleverse zot.”
18 Pat, enn proclamatrice ki reste l’Angleterre ti commence enn l’etude la Bible avek enn madame ki ti enn refugié ki sorti dan enn pays l’Asie. Sa madame-la ti’nn obligé sauvé ek quitte so pays apré ki so mari ek so bann garson ti’nn enlevé par bann soldat rebelle, ek jamais li pa ti retrouve zot encore. So lakaz ti’nn detruire par enn difé, enn groupe zom ti’nn viol li ek so la-vie ti en danger dan so pays. A cause tousala, li ti senti-li desesperé, li ti pensé ki li pa ti ena okenn raison pou vive ek plusieurs fois li ti pense pou suicide-li. Mais l’etude la Bible inn donne li enn l’espoir. Pat ecrire: “Bann explication ek bann l’exemple simple ki ena dan livre Ki la Bible enseigné? ti ena enn grand l’effet lor li.” Sa madame-la ti progressé bien vite, li ti rempli bann condition pou vinn enn proclamatrice ek li ti dire ki li envie prend bapteme dan prochain l’assemblée. Vrai-mem li enn la-joie pou aide bann dimoune sincere pou comprend ek pou apprecié l’esperance ki la Bible donne nou!
“Fodé pa nou renoncé pou faire seki bien”
19. Kifer li tellement urgent ki nou preché?
19 Chaque jour ki passé, li vinn encore pli urgent ki nou preché ek faire bann disciple. Chaque l’année, plusieurs millier dimoune sincere pé accepté nou message. Mais, “grand jour Jéhovah bien pré,” seki vedir ki bann dimoune ki encore dan noirté spirituel ‘pé . . . al vers la mort.’—Tseph. 1:14; Prov. 24:11.
20. Ki sakenn parmi nou bizin bien decidé pou faire?
20 Nou encore toujours kapav aide sa bann dimoune-la. Mais pou nou kapav faire sa, li bien important ki nou imite bann chretien premier siecle ki ti “contigne enseigne ek annonce la bonne nouvelle lor Jésus Christ, sans arreté.” (Actes 5:42) Suive zot l’exemple kan ou perseveré malgré l’opposition, kan ou veille bien lor ou “l’art pou enseigné,” ek kan ou preche avek tou dimoune sans faire preference. “Fodé pa nou renoncé pou faire seki bien” parski si nou perseveré, nou pou recolté beaucoup benediction grace a faveur Jéhovah.—2 Tim. 4:2; lire Galates 6:9.
[Note]
a Nou finn change certain nom.
Couma ou pou reponn?
• Kisannla ki pé accepté la bonne nouvelle?
• Kifer fodé pa ki nou fini juge bann dimoune ki nou joinde dan predication?
• Ki bann resultat nou pé gagné avek livre Ki la Bible enseigné vrai-mem?
[Zimage, page 17]
Plusieurs millier dimoune sincere pé accepté nou message