“Bann specialiste” donne conseil—Zordi enn, demain lot!
Si ou al lor Internet ek ou tape mot “parent” ek “conseil,” dé-suite ou pou gagne plus ki 26 million reference en anglais ek 20 million reference en français. Si ou prend zis enn minute pou lire chaque reference, avant ki ou arrivé lire tou, ou zenfant pou fini gagne le temps grandi, vinn enn adulte ek quitte lakaz.
Kot-sa bann parent ti gagne conseil avant ki ti ena pediatre, psychologue pou zenfant ek Internet? En general, zot ti rod l’aide zot famille. Bann mama, papa, tonton, tantine ti offert zot l’aide—zot ti donne conseil, l’aide financier, ek veille ti-baba. Mais dan beaucoup pays, enn grand quantité dimoune inn quitte la campagne pou al vive dan la ville, ek a cause sa nepli ena sa qualité relation-la dan bann famille. Zordi trop souvent bann mama ek papa retrouve-zot tousel kan zot gagne bann difficulté pou elevé zot zenfant.
Pena doute ki c’est enn raison kifer l’industrie ki donne conseil bann parent inn grandi bien vite. Enn lot raison, c’est ki pli allé dimoune ena plus confiance dan la science. Vers la fin l’année 1800, bann Américain ti deja sur ki la science ti pou kapav ameliore la vie bann dimoune dan tou domaine. Alors zot ti croire ki la science ti pou kapav aidé pou elevé bann zenfant aussi. C’est a cause sa ki en 1899, kan Congrès américain pou bann mère de famille ti dire en publik ki zot regretté ki “bann parent pena assez capacité,” enn sel coup enn quantité “specialiste scientifik” ti apparette. Zot ti promette pou aide bann mama ek bann papa ki ti pé lutté pou elevé zot zenfant.
Seki bann livre dire
Pourtant, ki sa bann specialiste-la inn reussi faire? Eski bann parent moins tracassé ek zot pli bien equipé pou elevé zot zenfant zordi, ki dan sa bann dernier l’année-la? Pa dapré sondage ki’nn fek faire en Grande Bretagne, ek ki montré ki apepré 35 % parent ki ena bann ti-zenfant pé toujours rod bann conseil lor ki zot kapav compté. Certain pensé ki zot pena lezot choix apart suive seki zot, zot pensé bon.
Dan so livre L’éducation des enfants en Amérique : des spécialistes aux parents—un siècle de conseils au sujet des enfants (angl.), Ann Hulbert faire enn l’etude lor bann livre ki finn ecrire par bann professionnel ek ki koz lor fason elevé bann zenfant. Li-mem li enn mama deux zenfant ek li dire ki bien tigit kitsoz ki bann specialiste finn trouvé, ti basé vrai-mem lor bann l’etude scientifik ki’nn prouvé. Li parette ki zot finn base zot bann conseil plus lor zot prop l’experience ki lor bann renseignement concernant seki passé dan la realité. Kan nou ré-guette le passé, li parette ki enn bon partie seki zot ti ecrire, reflete bann l’idée ki ti en vogue, ki contradictoire ek ki parfois mem bien bizarre.
Alors dan ki situation bann parent été zordi? Pou dire franc, beaucoup dan confusion parski zot trouve-zot devant encore plus conseil, plus l’opinion ek plus debat ki avant. Mais, pa tou parent pensé ki zot pena okenn guide. Couma prochain lartik pou montré nou, bann parent, dan le monde entier pé profite enn source sagesse ki existé depuis bien longtemps, ek lor ki nou encore toujours kapav compté.