‘Trouve la joie avek femme ki ar toi depuis to jeunesse’
“Trouve la joie avek femme ar ki to’nn marié depuis to jeunesse . . . Mo garson, kifer to bizin al rod to plaisir avek enn femme etranger?”—PROVERBES 5:18, 20.
1, 2. Kifer nou kapav dire ki l’amour entre enn mari ek so femme, li beni?
Kan la bible koz lor bann relation sexuel, li dire bann kitsoz franc. Dan Proverbes 5:18, 19 nou lire sa bann parole-la: “Faire ki to la-source de l’eau li beni, ek trouve la joie avek femme ar ki to’nn marié depuis to jeunesse; li couma enn biche ki digne pou gagne to l’amour ek couma enn joli chevre ki vive dan montagne. Laisse so sein soule toi touletan. Laisse so l’amour faire toi ressenti enn grand plaisir touletan.”
2 Dan sa verset-la, “la source de l’eau” represente seki faire bann conjoint gagne enn satisfaction sexuel. Li beni parski l’amour ek grand plaisir ki bann conjoint ressenti, c’est enn don ki Bondié donné. Mais c’est zis entre bann dimoune marié ki bizin ena sa relation intime-la. A cause sa-mem ki le roi Salomon, ki ti ecrire enn partie dan livre Proverbes, ti dire: “Mo garson, kifer to bizin al rod to plaisir avek enn femme etranger, ou-soit kifer to bizin serre enn femme etranger dan to lé-bras?”—Proverbes 5:20.
3. (a) Malheureusement, ki pé arrivé dan beaucoup mariage zordi? (b) Couma Bondié considere l’adultere?
3 Jour zot mariage, enn zom ek enn femme faire serment pou content ek pou reste fidel envers zot camarade. Pourtant, beaucoup mariage cassé a cause l’adultere. Apré ki enn specialiste finn etudié plus ki vingt rapport, li finn trouvé ki “25 pourcent femme ek 44 pourcent mari finn ena bann relation sexuel avek enn lot dimoune apart zot conjoint.” L’apotre Paul ti dire: “Pa trompe zot-mem. Ni bann ki pratik fornication, ni bann ki pratik l’idolatrie, ni bann adultere, ni bann zom ki prostitué-zot, ni bann zom ki dormi avek bann zom . . . pa pou herite royaume Bondié.” (1 Corinthiens 6:9, 10) Li bien clair ki l’adultere li enn peché bien grave pou Bondié ek bann vrai chrétien bizin faire bien attention pou pa trompe zot conjoint. Ki nou kapav faire pou ki nou ‘mariage contigne ena valeur’ ek ki nou garde nou ‘lili pur’?—Hébreux 13:4.
Mefié enn leker ki traitre
4. Couma enn chrétien marié kapav developpe bann sentiment pou enn lot dimoune, sans mem ki li rann li compte?
4 Nou pé vive dan enn lé-monde immoral, ek beaucoup dimoune zot “lizié rempli ar l’adultere ek zot pa kapav arrete faire peché.” (2 Pierre 2:14) Par expré zot rod gagne bann liaison ar bann dimoune avek ki zot pa marié. Dan certain pays, beaucoup femme finn commence travail. Alors bann zom ek bann femme travail ensam, ek place travail inn vinn enn l’endroit kot li facile pou bann dimoune developpe bann sentiment ki pa bizin pou zot bann camarade travail. Lor Internet aussi li’nn vinn bien facile, mem pou bann ki bien timide, pou developpe enn grand l’amitié avek lezot dimoune grace a bann “chat.” Beaucoup dimoune marié tombe dan sa piege-la sans ki zot rann-zot compte.
5, 6. Couma eski enn jeune soeur finn mette li dan enn situation dangereux, ek ki sa montré nou?
5 Anou prend l’exemple enn soeur ki nou pou appel Corinne. Li finn trouve-li dan enn situation kot li ti pré pou commette l’immoralité sexuel. So mari, ki pa enn Témoin de Jéhovah, pa ti montré beaucoup l’affection pou so famille. Corinne rappel jour kot li ti joinde enn collegue so mari, deux-trois l’année avant. Sa missié-la ti ena bann bon maniere, ek plitar, li ti mem interessé ar bann croyance Corinne. Corinne dire: “Li ti bien gentil, bien different avek mo mari.” Bien vite, zot inn tombe amoureux ar zot camarade. Corinne ti ena sa raisonnement-la: “Mo pa pé commette l’adultere, ek en plus, li interessé avek la Bible. Kitfois mo kapav aide li.”
6 Avant ki so bann sentiment ti amenn li pou commette l’adultere, Corinne ti realisé dan ki situation dangereux li ti été. (Galates 5:19-21; Éphésiens 4:19) So conscience ti commence travail ek li ti faire tou pou redresse so situation. Seki’nn arrive Corinne montré ki quantité nou “leker pli traitre ki n’importe ki lezot kitsoz ek li bien mauvais.” (Jérémie 17:9) La Bible donne nou sa conseil-la: “Plus ki tou kitsoz ki to bizin protegé, protege to leker.” (Proverbes 4:23) Couma eski nou kapav faire sa?
‘Enn dimoune ki ena enn bon jugement al cachiette’
7. Kan nou pé aide enn kikenn ki pé gagne problem dan so mariage, ki conseil biblik li bon nou rappel?
7 L’apotre Paul ti ecrire: “Si enn kikenn croire li deboute, li bizin faire attention ki li pa tombé.” (1 Corinthiens 10:12) Ek Proverbes 22:3 dire: “Li ena enn bon jugement sa dimoune ki al cachiette kan li trouve malheur.” Au lieu ki ou ena trop confiance en ou-mem ek ou dire: ‘Pa pou arrive moi nanyin,’ li pou bon ki ou reflechi couma certain situation kapav faire ou gagne problem. Par exemple, evité ki enn dimoune enn lot sexe, ki pé gagne problem dan so mariage vinn confié-li zis ar ou tousel. (Proverbes 11:14) Dire li ki li pou pli bon si li koz so problem avek so conjoint. Si li enn soeur, dire li koz sa avek enn lot soeur mur, (enn frere pou koz so problem avek enn frere mur) ki envie ki so mariage reussi, ou-soit li kapav koz so problem avek bann ancien. (Tite 2:3, 4) Bann ancien ki dan congregation bann Témoins de Jéhovah donne enn bon l’exemple dan sa domaine-la. Kan enn ancien bizin koz avek enn soeur tousel, li koz avek li dan enn place publik, par exemple dan la Salle du Royaume.
8. Ki precaution nou bizin prend dan nou travail?
8 Dan ou travail ek dan lezot place, faire attention ar bann situation ki kapav faire ou vinn trop proche avek enn collegue. Par exemple, si ou passe beaucoup lé-temps pou travail overtime avek enn kikenn enn lot sexe, sa kapav mette ou devant enn tentation. Si ou marié, faire ou bann collegue bien comprend par ou parole ek par ou conduite ki ou pa libre. Parski ou enn dimoune ki attaché ar Bondié, surement ou pa pou envie ki ou bann camarade travail attiré ar ou, parski ou faire ou l’interessant ar zot ou-soit parski ou habille-ou dan enn fason indecent. (1 Timothée 4:8; 6:11; 1 Pierre 3:3, 4) Si ou mette photo ou conjoint ek ou bann zenfant kot ou travail, sa pou rappel ou-mem ek lezot aussi, ki ou famille li important pou ou. Li bon ki ou bien decidé pou pa encourage, ni mem tolere enn kikenn ki pé faire so l’interessant pou attire ou.—Job 31:1.
“Vive to la-vie avek femme ki to content”
9. Couma bann l’evenement kapav deroulé ek faire ki enn situation vinn enn tentation pou enn chrétien?
9 Pou nou protege nou leker, fodé pa ki nou zis evite bann situation dangereux. Si enn mari ou enn femme attiré ar enn lot dimoune, kitfois sa montré ki sakenn pa pé prend compte so camarade. Li possible ki enn mari pé touletan neglige so femme ou-soit enn femme pé touletan critik so mari. Ek lerla, femme-la ou mari-la trouve enn lot dimoune dan travail ou-soit mem dan congregation, ki parette ena exactement bann qualité ki so conjoint pena. Bien vite, li commence attaché ar sa dimoune-la, li nepli kapav sempasse li, ek sa vinn enn tentation pou li. Tousala deroule bien vite, sans li rann-li compte ek sa confirme seki la Bible dire: “Sakenn passe par enn tentation kan li laisse so prop desir entraine li ek attire li.”—Jacques 1:14.
10. Couma bann mari ek bann femme kapav faire zot mariage vinn pli solid?
10 Au lieu ki zot al rod l’affection, l’amitié ou-soit enn soutien kan zot pé gagne bann difficulté, en dehors zot mariage, bann mari ek bann femme bizin travail ensam pou faire zot l’amour vinn pli fort. Alors, faire tou seki zot kapav pou passe le temps avek zot conjoint ek pou vinn pli proche ar li. Rappel seki ti faire ou content li. Rappel couma ou leker ti batté pou li, ek essaye ena mem sentiment ki ou ti ena avant. Mazinn bann bon moment ki ou finn passé ensam. Koz avek Bondié lor sa sujet-la. David ti supplie Jéhovah avek sa bann parole-la: “Ah Bondié, crée enn leker pur dan moi ek mette enn nouveau l’esprit dan moi, enn l’esprit ki ferme.” (Psaume 51:10) Faire tou pou ki ou ‘vive ou la-vie avek femme ki ou content toute longue ou la-vie ki Bondié finn donne ou lor la terre.’—Ecclésiaste 9:9.
11. Couma eski connaissance, sagesse ek bon jugement kapav rann enn mariage solid?
11 Pou rann enn mariage solid, li important ki ena la connaissance, la sagesse ek enn bon jugement. Proverbes 24:3, 4 dire: “Par la sagesse enn famille pou fortifié, ek grace a enn bon jugement li pou vinn solid. Ek par la connaissance bann la-chambre ki endan pou rempli avek tou bann bon kitsoz ki ena grand valeur.” Parmi bann kitsoz ki ena enn grand valeur ek ki faire enn famille heureux, ena bann qualité couma l’amour, fidelité, la crainte pou Bondié, ek la foi. Pou nou gagne sa bann qualité-la nou bizin ena la connaissance lor Bondié. Alors, bann couple bizin etudié la Bible regulierement. Kifer li important pou ena la sagesse ek enn bon jugement? La sagesse, setadir bien konn servi connaissance biblik ki nou ena, kapav aide nou pou reussi faire face ar bann problem ki nou gagné toulé-jour. Enn dimoune ki ena enn bon jugement kapav comprend bann pensée ek bann sentiment so conjoint. (Proverbes 20:5) Jéhovah ti faire Salomon ecrire: “Mo garson, prend compte mo sagesse. Ouvert to zoreille ar mo bon jugement.”—Proverbes 5:1.
Kan ena “problem”
12. Kifer nou pa etonné ki bann couple gagne problem?
12 Okenn mariage pa parfait. La Bible dire ki bann mari ek bann femme pou gagne “problem dan zot la-vie.” (1 Corinthiens 7:28) Tracas, maladie, persecution ek lezot kitsoz encore kapav crée bann tension dan enn couple. Mais, kan zot gagne problem, zot bizin rod bann solution ensam couma enn couple fidel ki rod faire Jéhovah plaisir.
13. Dan ki domaine enn mari ek enn femme bizin examine zot-mem?
13 Mais si enn couple gagne problem a cause fason ki sakenn traite so camarade, ki zot kapav faire? Zot pou bizin faire zeffort pou trouve enn solution. Par exemple, li possible ki avek le temps, zot finn prend l’habitude pou koz brite ar zot camarade ek sa l’habitude-la inn resté. (Proverbes 12:18) Couma nou ti trouvé dan lartik avant, sa kapav ena bann mauvais consequence. Enn proverbe dan la Bible dire: “Vaut mieux reste dan enn desert ki vive agacé avek enn femme ki content laguerre.” (Proverbes 21:19) Si ou enn femme ki dan sa situation-la, demann ou-mem: ‘Eski mo ena tellement enn mauvais caractere ki mo mari pa envie passe le temps avek moi?’ La Bible dire bann mari: “Contigne content zot femme ek pa vinn amer ar zot.” (Colossiens 3:19) Si ou enn mari, demann ou-mem: ‘Eski mo pa assez montré mo l’affection ek mo femme riské al rod sa avek enn lot?’ Bien-sur, nou pena okenn pretexte pou al commette l’immoralité sexuel. Pourtant, parski enn malheur coumsa kapav arrivé, ou ena enn bon raison pou koz sa bann problem-la franc avek ou conjoint.
14, 15. Kifer nou pa pé reglé nou problem si nou quitte nou conjoint?
14 Si ou pé gagne problem dan ou menage, li pa enn solution ki ou al rod consolation dan lé-bras enn lot dimoune ki pa ou conjoint. Kot sa situation-la pou amenn-ou? Eski ou pensé ki ou pou refaire enn nouveau mariage ki pou pli bon? C’est seki certain kapav croire. Zot dire: ‘Apré tou, sa dimoune-la ena exactement bann qualité ki mo pé rodé dan enn conjoint.’ Mais sa li enn fausse raisonnement, parski enn kikenn ki quitte so conjoint—ou-soit ki encourage ou pou quitte ou conjoint—montré ki li pena respé pou mariage ki enn kitsoz sacré. Li pou enn erreur si ou pensé ki ou pou kapav refaire enn pli bon mariage.
15 Corinne, ki nou ti mentionné avant, ti prend le temps pou pense lor consequence ki so conduite ti kapav ena. Li ti reflechi ki ti ena enn risk ki li-mem ou-soit ki enn lot dimoune perdi faveur Bondié. (Galates 6:7) Li dire: “Kan mo’nn commence reflechi lor sentiment ki mo ti ena pou camarade mo mari, mo ti rann moi compte ki, si jamais ti ena enn possibilité ki sa missié-la gagne enn connaissance lor la verité, mo ti pé faire tou pou empeche sa. Mo mauvais conduite ti pou faire di-tort tou bann dimoune ki ti impliké, ek ti pou faire lezot tombé!”—2 Corinthiens 6:3.
Pli grand motivation
16. Cite certain consequence l’immoralité sexuel.
16 La Bible donne nou sa l’avertissement-la: “La levre enn femme etranger contigne coulé pareil couma enn pain-di-miel, ek so palais pli douce ki de l’huile. Mais seki li laissé apré, li amer couma l’absinthe; li fité couma enn l’epée ki coupe deux coté.” (Proverbes 5:3, 4) Bann consequence l’immoralité sexuel faire dimoune souffert beaucoup ek sa kapav amenn ziska la mort. Parmi sa bann consequence-la ena enn conscience troublé, bann maladie sexuel, ek enn conjoint innocent ki bien souffert. Oui, sa c’est bann raison pou pa prend enn chemin ki pou faire nou commette l’adultere.
17. Ki pli grand raison nou ena pou reste fidel dan nou mariage?
17 Principal raison kifer l’adultere li mauvais, c’est parski Jéhovah, ki’nn crée mariage ek ki’nn crée bann dimoune avek capacité pou gagne relation sexuel, condamne l’adultere. Par prophete Malaki, Li ti dire: “Mo pou vinn pré ar zot pou faire jugement, ek mo pa pou tardé pou temoigne kont . . . bann adultere.” (Malaki 3:5) Guette seki Proverbes 5:21 dire lor bann kitsoz ki Jéhovah trouvé: “Conduite enn dimoune, li devant lizié Jéhovah ek Li trouve tou seki li faire.” Oui, “tou kitsoz au clair ek bien exposé devant lizié sa Kikenn ar ki nou bizin rann compte-la.” (Hébreux 4:13) Alors, pli grand raison ki pou aide nou pou garde nou fidelité dan nou mariage, c’est kan nou rappel ki, mem si nou garde enn liaison bien secret, ou-soit mem si bann consequence physik ek social parette bien-bien minime, tou relation sexuel immoral, faire di-tort nou relation avek Jéhovah.
18, 19. Ki nou aprann ar seki ti arrive Joseph ek femme Potiphar?
18 L’exemple Joseph, garson Jacob montré nou ki, nou desir pou garde la paix avek Bondié pou donne nou enn grand la-force pou reste fidel. Potiphar, enn officier ki ti travail pou Pharaon ti bien content Joseph ek ti donne li enn grand position dan so lakaz. La Bible dire ki Joseph ti enn “joli garson” ek femme Potiphar ti remark sa bien. Toulé-jour li ti essaye tente Joseph pou gagne relation sexuel avek li, mais li pa ti reussi. Ki ti aide Joseph pou rejette tou so bann l’avance? La Bible dire nou: “Li ti refusé ek li ti dire femme so maitre: ‘Mo maitre . . . pa finn refuse moi nanyin, apart toi, parski to so femme. Alors, couma mo kapav faire enn mauvais kitsoz coumsa ek faire sa grand peché-la kont Bondié?’ ”—Genèse 39:1-12.
19 Joseph, ki ti enn celibataire, ti garde so pureté lor plan moral kan li ti refuse pou gagne relation avek femme enn lot zom. Proverbes 5:15 dire ar bann zom marié: “Boire de l’eau ki sorti dan to prop reservoir ek ki coule dan to prop puit.” Faire bien attention pou pa developpe bann sentiment pou enn lot dimoune apart ou conjoint, mem sans faire par expré. Faire tou pou fortifié l’amour ki ena entre ou ek ou conjoint ek pou reglé n’importe ki problem zot gagné. Oui, surtout, ‘trouve la joie avek femme ar ki ou’nn marié depuis ou jeunesse!’—Proverbes 5:18.
Ki ou finn aprann?
• Couma, sans faire expré, enn chrétien kapav tenté pou developpe bann sentiment pou enn lot dimoune?
• Ki precaution nou bizin prend pou pa developpe bann sentiment pou enn lot dimoune apart nou conjoint?
• Kan enn couple gagne problem, ki li bizin faire?
• Ki pli grand raison nou ena pou garde nou fidelité dan nou mariage?
[Zimage, page 12]
Malheureusement, place travail inn vinn enn l’endroit kot li facile pou bann dimoune developpe bann sentiment ki pa bizin pou zot bann camarade