‘Depuis commencement, Jéhovah faire konn la fin’

“Mo-mem ki depuis commencement faire konn la fin, ek depuis bien longtemps avant, bann kitsoz ki pankor faire.”—ISAÏE 46:10.

1, 2. Ki kitsoz extraordinaire ti arrivé concernant destruction Babylone, ek ki sa montré nou lor Jéhovah?

AU MILLIEU la nuit, bann soldat ennemi pé avance en cachiette dan la riviere Euphrate pou zot prend Babylone, enn la-ville bien puissant. Kan zot vinn pré ar la ville-la, zot trouve enn kitsoz etonnant, ki zot pa ti attann. Bann Babylonien finn laisse zot grand la-porte deux-battant ouvert! Bann soldat sorti dan la riviere, zot grimpé ek zot rente dan la ville. Zot pa tardé pou prend la ville-la. Bien vite, Cyrus zot chef, prend control Babylone ek plitar li donne enn l’ordre pou delivré bann prisonnier israélite. Plusieurs millier Israélite gagne l’occasion pou retourne dan zot pays pou recommence adore Jéhovah dan Jérusalem.—2 Chroniques 36:22, 23; Ezra 1:1-4.

² Zordi bann historien reconette ki sa bann l’evenement ki’nn passé en 539-537 avant nou lepok-la, finn arrivé vrai-mem. Seki extraordinaire, c’est ki 200 an a l’avance Jéhovah ti fini faire koné ki sa bann l’evenement-la ti pou arrivé. Bien longtemps a l’avance, Li ti inspire prophete Isaïe pou decrire destruction Babylone. (Isaïe 44:24–45:7) Bondié pa ti zis dire couma Babylone ti pou tombé, mais Li ti aussi donne nom sa chef ki ti pou prend la ville-la.a Jéhovah ti dire bann Israélite, ki ti so bann temoin dan sa lepok-la: “Rappel bann premier kitsoz ki finn arrivé dan le passé, ki mo-mem Bondié, ek ki pena okenn lot Bondié ni personne couma moi; Mo-mem ki depuis commencement faire konn la fin, ek depuis bien longtemps avant, bann kitsoz ki pankor faire.” (Isaïe 46:9, 10a) Oui, Jéhovah vrai-mem enn Bondié ki kapav konn seki pou arrivé bien longtemps a l’avance!

3. Ki bann question nou pou examiné asterla?

³ Ki quantité kitsoz Bondié koné lor l’avenir? Eski Li fini koné a l’avance ki sakenn parmi nou pou faire? Eski nou l’avenir inn fini marké a l’avance? Dan sa lartik-la ek dan prochain lartik aussi, nou pou guetté ki la Bible dire lor la ek lor bann lezot question encore.

Jéhovah—Enn Bondié ki inspire bann prophetie

4. Kisannla ki’nn inspire bann prophetie ki’nn ecrire dan la Bible?

⁴ Jéhovah koné ki pou arrivé dan l’avenir. A cause sa, Li’nn inspire so bann serviteur dan le passé pou ecrire beaucoup prophetie ki faire nou koné a l’avance seki Li pou faire. Guette ki Jéhovah dire: “Bann kitsoz ki mo ti annoncé avant—guetté zot finn arrivé, mais mo pé annonce bann nouveau kitsoz. Avant zot commence germé, mo faire zot tann sa bann kitsoz-la.” (Isaïe 42:9) Peuple Bondié ena vrai-mem enn grand privilege, pa vrai?

5. Kan enn kikenn finn koné a l’avance ki Jéhovah pou faire, ki responsabilité li ena?

⁵ Prophete Amos donne nou sa l’assurance-la: “Souverain Seigneur Jéhovah pa pou faire nanyin sans ki Li faire so bann prophete konn so secret.” Sa connaissance ki Li donné a l’avance-la, amenn bann responsabilité. Guette sa l’exemple bien puissant ki Amos servi apré-la: “Ena enn lion ki’nn crié! Kisannla ki pa pou peur?” Kan enn lion crié, bann dimoune ek bann zanimo ki pré pa tardé pou reagir. Bann prophete couma Amos aussi, pa ti tardé pou annonce bann declaration Jéhovah. Amos ti dire: “Souverain Seigneur Jéhovah Li-mem finn kozé! Kisannla ki pa pou prophetisé?”—Amos 3:7, 8.

“Parole” Jéhovah vrai-mem ‘pou reussi’

6. Couma “conseil” Jéhovah ti reussi en rapport avek destruction Babylone?

⁶ Guette ki Jéhovah ti dire par prophete Isaïe: “Mo conseil pou realisé, ek mo pou faire tou seki faire moi plaisir.” (Isaïe 46:10b) Bondié ti ena enn “conseil” setadir enn volonté ou-soit enn projet concernant Babylone. Li ti pou faire Cyrus sorti dan Perse pou vinn prend la ville Babylone ek pou detruire li. Jéhovah ti annonce sa projet-la bien longtemps a l’avance. Couma nou finn trouvé, sa finn arrivé exactement couma ti predire, en 539 a.n.l.

7. Kifer nou kapav ena confiance ki “parole” Jéhovah touletan reussi?

⁷ Environ 400 an avant ki Cyrus prend Babylone, l’armée Ammôn ek Moab ti vinn laguerre kont Yehoshaphat, le roi Juda. Avek confiance le roi Yehoshaphat ti faire sa la-priere-la: “Ah Jéhovah, Bondié nou bann grand dimoune, eski pa to-mem ki Bondié dan le ciel, eski to pa domine lor tou bann royaume bann nation, ek eski dan to la-main pena la force ek puissance, sans ki ena enn kikenn ki kapav resisté kont toi?” (2 Chroniques 20:6) Plitar, Isaïe ti exprime mem confiance en Jéhovah kan li ti dire: “Jéhovah des armée Li-mem ki finn donne enn conseil, ek kisannla kapav empeche sa arrivé? Li’nn dresse so la-main, ek kisannla ki kapav faire Li ramasse so la-main?” (Isaïe 14:27) Ti ena enn lepok kot le roi Neboukadnetsar ti’nn vinn fou. Plitar, kan li ti regagne so l’esprit, li ti reconette avek humilité: “Pena personne ki kapav arrete la main [Bondié] ou-soit ki kapav dire li: ‘Ki to finn faire?’ ” (Daniel 4:35) Oui, Jéhovah donne sa l’assurance-la so bann serviteur: “Mo parole . . . pa pou retourne vers moi sans resultat, mais . . . li pou vrai-mem reussi là kot mo finn envoye li.” (Isaïe 55:11) Nou kapav sur ki “parole” Jéhovah pou touletan realisé. Pena nanyin ki kapav empeche so bann projet reussi.

“Projet eternel” ki Bondié ena

8. Ki été “projet eternel” Bondié?

⁸ Dan lettre ki l’apotre Paul ti ecrire bann chrétien en Éphèse, li ti dire ki Bondié ena enn “projet eternel.” (Éphésiens 3:11) Sa pa vedir ki Bondié bizin organise en detail seki Li pou faire. Au contraire, sa expression-la montré ki Jéhovah bien decidé pou realise seki Li ti envie au commencement pou bann dimoune ek pou la terre. (Genèse 1:28) Pou aide nou comprend ki nanyin pa kapav empeche Bondié realise so projet, anou examine premier prophetie ki’nn ecrire dan la Bible.

9. Couma eski Genèse 3:15 concerne projet Bondié?

⁹ Genèse 3:15 montré ki dé-suite apré ki Adam ek Ève ti faire peché, Jéhovah ti decidé ki so femme symbolik pou produire enn descendance, enn garson. Jéhovah ti fini trouvé aussi seki pou arrivé a cause la haine ki ti ena entre so femme ek Satan, ek entre zot descendance. Mem si Jéhovah ti pou permette ki Descendance la femme crase so talon, mais dan lepok ki Li’nn fixé, sa Descendance-la ti pou crase la tête sa serpent-la, setadir Satan le Diable. Entre-temps, projet Jéhovah inn contigne avancé a travers descendance ki Li ti choisir, ziska ki Jésus ti apparette couma Messie ki Jéhovah ti’nn promette.—Luc 3:15, 23-38; Galates 4:4.

Seki Jéhovah decidé a l’avance

10. Eski Jéhovah ti fini decidé ki Adam ek Ève pou faire peché? Expliké.

¹⁰ L’apotre Pierre ti koz lor role ki Jésus ti pou joué dan projet Bondié. Li ti ecrire: “Avant fondation le monde, [Bondié] ti konn li [Jésus] a l’avance, mais a cause zot, li finn apparette a la fin bann lé-temps.” (1 Pierre 1:20; note) Eski Jéhovah ti fini decidé a l’avance ki Adam ek Ève ti pou faire peché ek ki Jésus Christ ti pou bizin donne so la-vie en ranson? Non. En grec, mot ki’nn traduire par “fondation” vedir “jette en bas [enn semence.]” Eski finn deja ‘jette en bas [enn semence]’ setadir enn zenfant ki finn né avant ki Adam ek Ève ti faire peché? Non. C’est apré zot desobeissance ki Adam ek Ève finn gagne bann zenfant. (Genèse 4:1) Alors c’est apré rebellion Adam ek Ève, mais avant ki zot ti gagne bann zenfant, ki Jéhovah ti decidé ki pou ena enn “semence” ki pou apparette lor la terre. La mort Jésus, ek so résurection finn rann la ranson possible. Grace a sa ranson-la, peché pou disparette ek tou bann zeffort ki Satan pé faire pou dan vide.—Matthieu 20:28; Hébreux 2:14; 1 Jean 3:8.

11. Ki developpement Jéhovah ti decidé a l’avance, pou realise so projet?

¹¹ Depuis avant, Bondié ti decide enn lot kitsoz pou realise so projet. C’est seki Paul ti ecrire bann Éphésiens kan li ti dire ki Bondié pou “rassemblé tou kitsoz encore dan Christ, bann kitsoz ki dan le ciel ek bann kitsoz ki lor la terre.” Apré sa, en rapport avek “bann kitsoz ki dan le ciel,” setadir bann dimoune ki Bondié finn choisir pou al règne avek Jésus Christ, l’apotre Paul dire: “Ti fini choisir nou a l’avance, en accord avek projet sa kikenn ki dirige tou kitsoz-la, dapré so prop volonté.” (Éphésiens 1:10, 11) Oui, Jéhovah ti fini decidé bien a l’avance ki pou ena enn ti group dimoune ki pou forme deuxieme partie descendance femme Bondié, ek ensam avek Jésus Christ, zot pou faire bann dimoune gagne bann benediction grace a la ranson. (Romains 8:28-30) L’apotre Pierre ti dire ki zot “enn nation saint.” (1 Pierre 2:9) Dan enn vision, l’apotre Jean ti gagne privilege pou koné ki ti pou ena 144,000 dimoune ki Bondié finn choisir pou al règne avek Jésus Christ. (Révélation 7:4-8; 14:1, 3) Dan l’unité avek le Roi Jésus Christ, zot servi “pou loué la gloire [Bondié].”—Éphésiens 1:12-14.

12. Couma nou koné ki Jéhovah pa ti fini decidé a l’avance kisannla bann 144,000 ti pou été personnellement?

¹² C’est vrai ki depuis avant, Bondié ti fini decidé ki pou ena 144,000 dimoune ki pou al règne avek Jésus Christ dan le ciel. Mais sa pa vedir ki Bondié ti’nn fini decidé a l’avance chaque dimoune ki pou servi Li dan sa fason-la. Au contraire, tou bann conseil ki finn ecrire dan bann Écritures grecques chrétiennes, finn ecrire surtout pou guide bann chrétien oint ek pou fortifié zot pou zot garde zot fidelité ek pou ki zot kapav merité gagne la vie dan le ciel. (Philippiens 2:12; 2 Thessaloniciens 1:5, 11; 2 Pierre 1:10, 11) Jéhovah koné a l’avance ki pou ena 144,000 dimoune ki pou rempli bann condition pou realise so projet. Mais Li pa finn decide a l’avance l’identité chaque membre dan sa group-la. Tou depann lor fason ki sakenn parmi sa bann ki gagne sa privilege-la, choisir pou amenn so la-vie, ek sa decision-la, sakenn bizin prend sa personnellement. —Matthieu 24:13.

Seki Jéhovah koné a l’avance

13, 14. Mem si Jéhovah ena capacité pou konn bann kitsoz bien a l’avance, Li agir toujours en accord avek ki kitsoz, ek kifer?

¹³ Jéhovah Li enn Bondié ki annonce bann prophetie ek ki realise so bann projet. Mais couma eski Li servi so capacité pou konn bann kitsoz a l’avance? Premierement, nou sur ki tou seki Jéhovah faire, li vrai ek droite, ek Li faire sa parski Li content nou. Kan l’apotre Paul ti ecrire bann chrétien hébreux dan premier siecle, li ti dire ki serment ek promesse Bondié, c’est “deux kitsoz ki pa kapav changé, ek kot li impossible pou Bondié koz menti.” (Hébreux 6:17, 18) Dan lettre ki Paul ti ecrire Tite, enn disciple chrétien, li ti dire mem kitsoz, setadir ki Bondié “pa kapav koz menti.”—Tite 1:2.

¹⁴ En plus, mem si Bondié ena enn pouvoir ki pena limite, jamais Li pa agir dan enn fason injuste. Moïse ti dire ki Jéhovah Li “enn Bondié fidel ki pa faire okenn l’injustice, Li juste ek droite.” (Deutéronome 32:4) Tou seki Jéhovah faire, li en accord avek so personnalité extraordinaire. Tou so bann action reflete so bann qualité principal, setadir so l’amour, so sagesse, so justice ek so puissance.

15, 16. Ki choix Jéhovah ti mette devant Adam dan jardin Éden?

¹⁵ Guetté couma Jéhovah ti manifesté so bann qualité principal dan jardin Éden. Couma enn bon Papa, Li ti donne bann dimoune lor la terre tou seki zot ti bizin. Li ti donne Adam capacité pou li reflechi, pou raisonne lor enn kitsoz ek apré pou tire enn conclusion. Adam pa ti couma bann zanimo ki plus souvent agir par zot instinct. Li, li ti ena capacité pou faire bann choix. C’est a cause sa ki apré creation Adam, Bondié ti kapav guette lor la terre depuis so trone ek Li ti trouvé ki “tou seki Li ti’nn faire ti bien bon.”—Genèse 1:26-31; 2 Pierre 2:12.

¹⁶ Kan Jéhovah ti donne Adam l’ordre pou pa mange fruit ki dan “pié connaissance bon ek mauvais,” Li ti donne Adam assez l’information pou li kapav decidé ki li pou faire. Li ti permette Adam pou mange fruit “tou pié ki [ti] ena dan jardin” excepté enn sel. Li ti averti Adam ki mauvais consequence li ti pou gagné si li ti mange fruit sa pié ki Li ti defann-la. (Genèse 2:16, 17) Li ti faire Adam koné ki ti pou arrive li si li desobeir. Ki Adam ti pou faire?

17. Kifer nou kapav dire ki Jéhovah pa toujours choisir pou servi so capacité pou koné a l’avance seki pou arrivé?

¹⁷ Mem si Jéhovah ena capacité pou konn tou kitsoz a l’avance, Li ti choisir pou pa servi so capacité pou koné ki Adam ek Ève pou faire. Alors, sa montré ki Jéhovah ena capacité pou konn l’avenir, mais Li kapav choisir pou pa servi sa capacité-la. En plus, nou comprend ki, parski Jéhovah ena l’amour, Li pa ti pou decidé a l’avance, par expré, ki Adam ek Ève ti pou rebellé ek ki ti pou ena tou sa bann mauvais consequence-la. (Matthieu 7:11; 1 Jean 4:8) Sa montré nou ki Jéhovah pa toujours choisir pou servi so capacité pou koné a l’avance seki pou arrivé.

18. Kifer nou pa kapav dire ki Jéhovah pena assez pouvoir parski Li pa toujours choisir pou servi so capacité pou konn l’avenir?

¹⁸ Eski sa vedir ki, parski Jéhovah pa toujours choisir pou servi so capacité pou konn l’avenir, ki a cause sa Li pena assez pouvoir? Non. Kan Moïse ti dire ki Jéhovah couma “enn Roche,” li ti ajouté ki “tou seki [Jéhovah] faire, li parfait.” Nou pa kapav blame Jéhovah pou bann consequence ki nou gagné a cause peché. Si zordi nou tou nou pé souffert, c’est parski Adam finn desobeir. L’apotre Paul ti dire ki “par enn sel zom, peché finn rente dan le monde ek peché finn amenn la mort, ek depuis sa, tou dimoune konn la mort parski zot tou ti faire peché.”—Deutéronome 32:4, 5; Romains 5:12; Jérémie 10:23.

19. Ki bann question nou pou examiné dan prochain lartik?

¹⁹ Dan sa lartik-la, nou finn trouvé ki jamais Jéhovah agir dan enn fason injuste. (Psaume 33:5) Au contraire, Jéhovah servi so capacité, so bann qualité ek so bann principe pou realise so projet. (Romains 8:28) Parski Li enn Bondié ki donne bann prophetie, ‘depuis commencement Li faire konn la fin, ek depuis bien longtemps avant, bann kitsoz ki pankor faire.’ (Isaïe 46:9, 10) Nou finn trouvé aussi ki Li pa toujours choisir pou servi so capacité pou koné a l’avance seki pou arrivé. Couma eski sa concerne nou? Couma nou kapav sur ki nou bann decision zot en accord avek projet Bondié? Ek ki benediction nou pou gagné si nou faire sa? Nou pou examine sa bann question-la dan prochain lartik.

[Note]

Eski ou kapav expliké?

• Ki bann l’exemple dan le passé montré nou ki “parole” Bondié finn toujours “reussi”?

• Ki Jéhovah ti decidé a l’avance en rapport avek so “projet eternel”?

• Dan ki fason eski Jéhovah servi so capacité pou konn l’avenir?

[Zimage, page 20]

Yehoshaphat ti ena confiance en Jéhovah

[Zimage, page 21]

Bondié ti annonce la mort ek la resurrection Jésus

[Zimage, page 22]

Eski Jéhovah ti fini decidé a l’avance seki Adam ek Ève ti pou faire?