“Garde toujours zot bon jugement”

“Enn kikenn ki mank l’experience, croire tou seki li tendé, mais enn dimoune ki ena enn bon jugement, faire attention kot li mette so lipié.”—PROVERBES 14:15.

1, 2. (a) Ki leson nou kapav tiré ar seki ti arrive Lot dan Sodome? (b) Ki vedir l’expression “garde nou bon jugement”?

KAN Abraham ti laisse Lot choisir kot-sa li ti envie al resté, Lot ti admire enn joli l’endroit ki ti bien vert ek ki ti “pareil couma jardin Jéhovah.” Pou Lot, sa l’endroit-la ti parette enn place ideal pou so famille vive, parski li “ti choisir tou District Jourdain” ek li ti monte so la-tente pré kot Sodome. Seulement, li ti’nn laisse l’apparence sa l’endroit-la embete li, parski pa trop loin, ti ena bann zom Sodome, ki ti pé reste là. ‘Sa bann zom-la ti mauvais ek zot ti pé faire bann grand peché kont Jéhovah.’ (Genèse 13:7-13) Lot ek so famille ti bien souffert a cause decision ki li ti prend pou al reste la-bas. Finalement, li ek so deux tifi ti bizin al vive dan enn la-cave. (Genèse 19:17, 23-26, 30) Seki li ti trouve bien bon au commencement, ti finalement le contraire.

² Bann serviteur Bondié zordi kapav tire enn leson ar seki ti arrive Lot. Kan nou ena enn decision pou prend, nou bizin bien reflechi lor bann risk ki kapav ena, ek pa laisse-nou embeté par l’apparence. C’est a cause sa ki Parole Bondié donne nou sa conseil-la: “Garde toujours zot bon jugement.” (1 Pierre 1:13) Mot grec ki’nn traduire par “garde zot bon jugement” vedir “reflechi bien.” Dapré enn bibliste ki appel Richard Lenski, enn dimoune ki reflechi bien, li “calme ek avek enn l’esprit posé, li examine tou kitsoz ki impliké ek sa permette li prend bann bon decision.” Anou examine certain situation kot nou bizin bien reflechi avant nou agir.

Kan nou faire business

3. Kifer nou bizin faire attention kan enn kikenn propose nou pou rente dan enn business avek li?

³ Supposé ki enn kikenn ki ena enn bon reputation, kitfois mem enn serviteur Jéhovah, propose-ou pou rente dan enn business avek li. Li sur ki zot pou reussi ek li encourage ou pou decide vite, pou pa rate sa l’occasion-la. Kitfois lerla, ou commence rêve enn pli bon la-vie pou ou ek ou famille, kitfois-mem ou commence pensé ki sa pou permette ou gagne plus lé-temps pou bann kitsoz spirituel. Mais faire attention, parski Proverbes 14:15 dire: “Enn kikenn ki mank l’experience, croire tou seki li tendé, mais enn dimoune ki ena enn bon jugement, faire attention kot li mette so lipié.” Souvent, kan bann dimoune commence enn business, zot tellement excité ki zot pa assez prend compte tou bann risk ki kapav ena, tou bann kitsoz ki kapav mal tourné apré, ek bann imprevu ki ena kan faire business. (Jacques 4:13, 14) Dan enn situation coumsa, li bien important ki nou garde toujours nou bon jugement, pa vrai?

4. Couma nou kapav ‘faire bien attention kot nou mette nou lipié’ kan kikenn propose nou pou rente dan enn business avek li?

⁴ Enn dimoune prudent pou reflechi bien avant li prend enn decision si enn kikenn propose li pou rente dan enn business. (Proverbes 21:5) Si li bien reflechi, souvent li pou kapav trouve bann danger ki li pa ti trouvé avant. Anou mazinn enn situation: Enn kikenn vinn demann ou l’argent preté pou so business, ek li dire ou ki ou pou faire enn grand profit si ou prete li sa l’argent-la. Sa kapav tente ou, mais ki risk ena? Eski li d’accord pou retourne-ou ou l’argent n’importe ki arrive so business, ou-soit eski li pou rembourse ou seulement si so business marché? Sa vedir, eski ou riské perdi ou l’argent si sa business-la pa marché? Ou kapav aussi demann ou-mem: “Kifer li’nn vinn demann moi l’argent pou so business? Eski bann la-banque finn refuse li parski li pé faire enn zaffaire trop riské?” Si ou prend le temps pou examine bann risk, sa pou aide ou pou juge bien enn proposition avant ou prend enn decision.—Proverbes 13:16; 22:3.

5. (a) Ki precaution bien sage Jérémie ti prend kan li ti acheté enn terrain? (b) Kifer li bon ki nou faire enn contrat pou n’importe ki transaction commercial nou faire?

⁵ Kan prophete Jérémie ti acheté enn terrain ar so cousin, ki ti enn serviteur Jéhovah pareil couma li, li ti ecrire sa transaction-la devant bann temoin. (Jérémie 32:9-12) Zordi, enn dimoune ki ena la sagesse, pou faire enn contrat legal kan li faire n’importe ki transaction commercial, mem avek bann membre so famille ek lezot serviteur Jéhovah.a Enn document precis ek bien preparé pou empeche ena bann malentendu ek pou garde l’unité. Parkont, kan bann problem developpé entre bann serviteur Jéhovah ki finn faire business ensam, souvent nou remarké ki zot pa finn faire okenn papier entre zot. Sa bann problem-la kapav faire zot chagrin, vinn amer, ek mem perdi zot spiritualité.

6. Kifer nou bizin faire attention pou pa vinn gourmand l’argent?

⁶ Nou bizin faire attention aussi pou pa vinn gourmand l’argent. (Luc 12:15) Li possible ki enn kikenn tellement envie faire enn gros profit, ki li pa trouve bann danger ki ena dan enn transaction commercial riské. Mem certain serviteur Jéhovah ki finn gagne bann grand privilege dan l’organisation, finn tombe dan sa piege-la. La Bible donne nou sa conseil-la: “Pa laisse l’amour pou l’argent domine zot la-vie. Mais plutot, contente-zot ar seki zot ena.” (Hébreux 13:5) Kan enn chrétien decide pou faire enn business, li bizin demann li-mem: ‘Eski li vrai-mem necessaire ki mo faire sa?’ Si nou amenn enn la-vie simple, ki centré lor service Jéhovah, sa pou protege nou ar “tou sorte qualité mauvais kitsoz.”—1 Timothée 6:6-10.

Difficulté ki bann celibataire gagné

7. (a) Dan ki situation difficile beaucoup chrétien celibataire été? (b) Kan enn celibataire rod enn dimoune pou li marié, couma li kapav montré ki li fidel envers Bondié?

⁷ Beaucoup serviteur Jéhovah envie marié, mais zot pankor trouve enn kikenn ki al ar zot. Dan certain pays, ena enn grand pression lor bann jeune pou zot marié, ek parfois pena beaucoup possibilité pou trouve enn kikenn parmi bann serviteur Jéhovah. (Proverbes 13:12) Mais bann chrétien koné ki, kan zot obeir conseil pou marié “seulement dan le Seigneur,” zot montré zot fidelité envers Jéhovah. (1 Corinthiens 7:39) Pou resisté kont bann pression ek bann tentation, bann chrétien celibataire bizin toujours garde zot bon jugement.

8. Ki pression ti ena lor enn jeune Shoulammite, ek dan ki qualité situation enn soeur chrétienne kapav retrouve-li, li aussi?

⁸ Le Chant de Salomon raconte zistoire enn jeune tifi ordinaire ki ti reste dan la campagne. Li ti enn Shoulammite, ek le roi Salomon ti attiré ar sa tifi-la. Li ti rod impressionne li par so richesse, so grand position, ek so charme, mem si sa tifi-la ti content enn lot garson. (Le Chant de Salomon 1:9-11; 3:7-10; 6:8-10, 13) Si ou enn soeur chrétienne, kitfois ou aussi, sans ki ou envie, enn kikenn finn attiré par ou. Enn kikenn dan ou travail, kitfois enn parmi bann chef, kapav commence faire ou bann compliment, bann faveur, ek rod bann l’occasion pou passe le temps avek ou. Faire bien attention, ek mefié sa bann kitsoz-la. Parski bien souvent, mem si c’est pa touletan, sa bann dimoune-la kapav developpe bann sentiment pou ou, ou-soit mem ena bann l’intention immoral. Pareil couma sa Shoulammite-la, ou aussi, ou bizin vinn pareil couma “enn muraille.” (Le Chant de Salomon 8:4, 10) Montré-ou ferme ek rejette bann proposition deplacé. Depuis commencement-mem, faire ou bann collegue koné ki ou enn Témoin de Jéhovah, ek saisi tou l’occasion pou preche avek zot. Sa pou protege ou.

9. Ki danger ena si ou commence frequente enn kikenn ki ou pa koné, par Internet? (Guette l’encadré page 30.)

⁹ Zordi ena certain site Internet ki propose pou aide bann celibataire pou trouve enn kikenn pou marié, ek sa bann site-la pé vinn bien populaire. Certain considere sa couma enn moyen pou konn bann dimoune ki jamais zot ti pou kapav joinde. Mais en realité, li bien dangereux pou servi sa moyen-la pou faire connaissance avek enn kikenn ki ou pa koné. Lor Internet, li difficile pou koné seki vrai, ek seki fausse. (Psaume 26:4) Enn dimoune kapav pretann ki li enn Témoin de Jéhovah, mais ki preuve nou ena? En plus, kan nou frequenté par Internet, bann sentiment kapav developpé bien vite, ek sa kapav aveuglé nou jugement. (Proverbes 28:26) Ki li par Internet, ou par lezot moyen, li pa sage pou commence frequente enn kikenn ki nou pa koné.—1 Corinthiens 15:33.

10. Couma eski nou kapav encourage bann celibataire?

¹⁰ Jéhovah ‘ena beaucoup l’affection’ pou so bann serviteur. (Jacques 5:11) Li koné ki difficulté ek ki souffrance bann chrétien celibataire ki envie marié mais ki pa pé trouve personne, bizin enduré. Fidelité sa bann chrétien-la ena enn grand valeur pou Li. Couma eski nou, nou kapav encourage sa bann celibataire-la? Nou bizin felicite zot souvent pou zot l’obeissance ek zot l’esprit sacrifice. (Juges 11:39, 40) Nou kapav aussi invite zot kan nou organise bann moment detente. Eski ou’nn faire sa dernierement? En plus, nou kapav prié pou zot, ek demann Jéhovah pou aide zot pou garde zot l’equilibre spirituel ek pou trouve la joie pou servi Li. Anou interesse-nou sincerement ar sa bann chrétien fidel-la, lerla nou pou montré ki nou apprecié zot pareil couma Jéhovah aussi apprecié zot.—Psaume 37:28.

Problem la santé

11. Ki difficulté nou kapav gagné kan nou bien malade?

¹¹ Surement nou bien tracassé kan nou, ou-soit enn membre nou famille gagne enn maladie grave. (Isaïe 38:1-3) Kan nou rod enn bon traitement, li bien important ki nou reste attaché ar bann principe la Bible. Par exemple, bann chrétien faire tou pou obeir l’ordre ki la Bible donné pou pa mette di-sang. Zot rejette n’importe ki method ki ena enn rapport avek spiritisme pou koné ki maladie zot gagné, ou-soit pou soigne zot. (Actes 15:28, 29; Galates 5:19-21) Li vrai ki kan nou pena beaucoup connaissance medical, li kapav bien compliké ek difficile pou choisir ki traitement nou pou accepté. Ki pou aide nou pou garde toujours nou bon jugement?

12. Couma enn chrétien kapav garde so l’equilibre kan li choisir enn traitement medical?

¹² Si nou faire bann recherche dan la Bible ek dan bann publication ki basé lor la Bible, nou pou montré ki nou ‘bann dimoune ki ena enn bon jugement ek ki faire attention kot nou mette nou lipié.’ (Proverbes 14:15) Dan bann pays kot pena beaucoup docteur ek l’hopital, li possible ki sel solution c’est servi bann plante pou traite enn maladie. Si ou pé pense pou servi sa qualité traitement-la, ou pou gagne bann bon renseignement dan La Tour de Garde 15 avril 1987, page 26-9. Sa lartik-la averti nou lor bann risk ki kapav ena. Par exemple, kitfois nou pou bizin pose nou-mem sa bann question-la: ‘Eski sa guerisseur ki servi bann plante-la habitué faire la sorcellerie? Eski sa traitement-la basé lor certaine croyance, couma par exemple: si nou malade ek nou mort c’est parski nou finn offense certain bondié (ou l’esprit nou bann grand dimoune), ou-soit mem parski nou bann l’ennemi finn al guette enn traiteur pou faire nou mechanceté? Eski nou pou bizin faire bann sacrifice, recite certain la-priere, ou-soit faire lezot pratik ki ena enn rapport avek la sorcellerie kan nou prepare sa medecine-la, ou-soit kan nou prend li? (Deutéronome 18:10-12) Sa bann recherche-la pou aide nou pou suive sa conseil la Bible-la: “Verifié tou kitsoz, tini ferme ar seki bon.”b (1 Thessaloniciens 5:21) Sa pou aide nou pou garde nou l’equilibre.

13, 14. (a) Couma nou kapav montré-nou raisonnable concernant nou la-santé? (b) Kifer nou bizin raisonnable kan nou koz lor la santé ek lor bann question medical avek lezot?

¹³ Nou bizin raisonnable dan tou domaine nou la-vie, mem dan domaine la-santé. (Philippiens 4:5) Kan nou prend soin nou la-santé dan enn fason equilibré, nou montré ki nou apprecié la vie ki Bondié inn donne nou. Kan nou malade, li normal ki nou soigne-nou. Mais seulement, nou pa pou ena enn la-santé parfait tant ki pa’nn arrive l’heure pou Bondié ‘gueri bann nation.’ (Révélation 22:1, 2) Nou bizin faire attention pou pa laisse nou la-santé tellement tracasse-nou ki nou neglige bann kitsoz spirituel, ki beaucoup pli important.—Matthieu 5:3; Philippiens 1:10.

¹⁴ Li important aussi ki nou raisonnable ek equilibré kan nou koz lor la santé ek lor bann question medical avek lezot. Fodé pa ki sa bann sujet-la domine nou conversation kan nou joinde nou bann frere dan reunion ek dan l’assemblée. En plus, kan nou prend bann decision medical, souvent nou bizin prend compte bann principe la Bible, nou conscience, ek nou relation avek Jéhovah. Alors, nou pa pou montré ki nou ena l’amour, si nou rod impose nou fason pensé lor nou frere, ou-soit si nou pousse li pou pa ecoute so conscience. Mem si enn chrétien al guette bann chrétien mur dan congregation pou aide li, sakenn bizin “sarié so prop charge” kan li prend bann decision, ek “sakenn pou rann enn compte pou li-mem devant Bondié.”—Galates 6:5; Romains 14:12, 22, 23.

Kan nou lor pression

15. Ki danger ena kan bann situation difficile mette nou lor pression?

¹⁵ Bann situation difficile kapav mette bann serviteur fidel Jéhovah lor pression, ek mem faire zot koz sans reflechi ou-soit faire bann kitsoz ki pa bizin. (Ecclésiaste 7:7) Kan Job ti gagne bann problem bien grave, li ti perdi so l’equilibre ek Jéhovah ti bizin corrige so fason pensé. (Job 35:2, 3; 40:6-8) Mem si “Moïse ti beaucoup pli humble ki tou bann dimoune ki ti ena lor la terre,” enn fois, li ti bien en colere ek li ti koz sans reflechi. (Nombres 12:3; 20:7-12; Psaume 106:32, 33) David ti montré ki li ti bien konn control li-mem kan li pa ti touye le roi Saül. Mais kan Nabal ti insulté li ek ti maltraite so bann zom, là David ti tellement en colere ki li ti perdi so bon jugement. C’est seulement kan Abigaïl ti vinn koz ar li, ki li ti realisé ki li ti pé al faire, ek li ti reussi evite pou al faire enn erreur terrible zis a temps.—1 Samuel 24:2-7; 25:9-13, 32, 33.

16. Ki pou aide nou pou evite faire bann kitsoz sans reflechi?

¹⁶ Nou aussi nou kapav perdi nou bon jugement kan nou lor pression. Si, pareil couma David, nou prend compte fason pensé lezot, sa kapav aide nou pou evite faire bann kitsoz sans reflechi, ek faire enn peché. (Proverbes 19:2) Parole Bondié donne nou sa conseil-la: “Zot kapav agacé, mais pa faire peché. Koz dan zot leker lor zot lili, ek reste trankil.” (Psaume 4:4) Tant ki possible, li bon ki nou attann ki nou calmé avant nou faire enn kitsoz ou-soit nou prend enn decision. (Proverbes 14:17, 29) Nou bizin aussi prié Jéhovah avek tou nou leker, ek “la paix ki Bondié donné ek ki pli grand ki tou pensée, pou veille lor [nou] leker ek lor [nou] bann capacité mental, par moyen Jésus Christ.” (Philippiens 4:6, 7) Sa la-paix-la pou aide nou pou garde nou calme ek pou garde toujours nou bon jugement.

17. Kifer nou bizin compte lor Jéhovah pou garde toujours nou bon jugement?

¹⁷ Malgré tou nou bann zeffort pou evite bann danger ek agir avek sagesse, nou tou nou faire erreur. (Jacques 3:2) Li kapav arrivé ki, sans mem nou rann-nou compte, nou pré pou al faire enn erreur ki pou faire nou di-tort. (Psaume 19:12, 13) En plus, parski nou imparfait, nou pena ni capacité, ni droit pou dirige nou la-vie sans Jéhovah. (Jérémie 10:23) Nou bien reconnaissant ki Li donne nou sa l’assurance-la: “Mo pou donne toi capacité pou comprend, ek mo pou montré toi dan ki chemin to bizin marché. Mo pou donne toi conseil pendant ki mo lizié pou reste lor toi.” (Psaume 32:8) Oui, avek l’aide Jéhovah nou kapav garde toujours nou bon jugement.

[Note]

Couma ou pou reponn?

• Couma eski nou kapav garde nou bon jugement

• kan enn kikenn faire nou enn proposition pou rente dan enn business avek li?

• kan nou rod enn kikenn pou marié?

• kan nou malade?

• kan nou lor pression?

[L’encadré, page 30]

Eski ou kapav ena confiance ladan?

Nou trouve sa bann avertissement-la dan bann site Internet pou bann celibataire:

“Malgré tou nou bann precaution, nou pa kapav donne garanti lor vrai l’identité enn kikenn.”

“Nou pa donne okenn garanti ki bann l’information ki trouve lor sa site-la, zot vrai, zot complet ou-soit zot pratik.”

“Bann l’opinion, conseil, declaration, proposition, ek tou lezot renseignement ki trouve lor [sa] site-la, c’est bann dimoune ki finn ecrire sa ki responsable sa . . . ek nou pa kapav dire si zot exact ou-soit non.”

[Zimage, page 29]

“Enn dimoune ki ena enn bon jugement, faire attention kot li mette so lipié”

[Zimage, page 31]

Couma bann soeur chrétienne kapav imite sa jeune tifi Shoulammite-la?

[Zimage, page 32]

“Verifié tou kitsoz, tini ferme ar seki bon”