Eski ou fidel dan tou kitsoz?
“Enn dimoune ki fidel dan enn ti kitsoz, li fidel aussi dan enn grand kitsoz.”—LUC 16:10.
1. Cite enn parmi bann fason ki Jéhovah montré ki Li fidel.
PENDANT ki l’heure pé passé, eski ou finn remarké ki arrivé ar l’ombrage enn pié? Li change grandeur ek direction! Souvent, projet bann dimoune ek zot promesse, ressemblé sa l’ombrage-la, parski zot aussi, zot changé touletan. Mais Jéhovah Li, Li pa changé avek le temps. Disciple Jacques ti koz lor Jéhovah couma “Papa tou la-lumiere ki dan le ciel,” ek li ti dire ki “avek Li, pena okenn changement dan mouvement l’ombrage [ou: “changement ou-soit l’ombrage ki provoké par enn kitsoz ki tourné,” note].” (Jacques 1:17) Jéhovah Li pa changé ek nou kapav faire Li confiance, mem dan bann ti detail. Li “enn Bondié fidel.”—Deutéronome 32:4.
2. (a) Kifer nou bizin examine nou-mem pou guetté si nou fidel? (b) Ki bann question nou pou examiné lor la fidelité?
2 Kan so bann serviteur montré ki zot digne de confiance, ki Bondié pensé lor la? Li ena mem sentiment ki David, ki ti dire lor bann serviteur Bondié: “Mo lizié lor bann dimoune ki fidel lor la terre, pou ki zot kapav reste avek moi. Enn kikenn ki marche dan l’integrité, c’est li ki pou servi moi.” (Psaume 101:6) Oui, Jéhovah content kan so bann serviteur montré ki zot fidel. C’est a cause sa ki Paul ti ecrire: “Bann ki ena responsabilité bizin montré ki zot fidel.” (1 Corinthiens 4:2) Mais, montré ki nou fidel, ki sa vedir sa? Dan ki domaine dan nou la-vie, eski nou bizin montré ki nou fidel? Ki benediction nou pou gagné si nou “marche dan l’integrité”?
Seki fidelité vedir
3. Ki montré si nou fidel?
3 Hébreux 3:5 dire ki “Moïse, en tant ki enn serviteur, ti fidel.” Couma prophete Moïse ti montré ki li fidel? Kan li ti construire ek li ti installe tabernacle, “Moïse ti faire dapré tou seki Jéhovah ti’nn donne li l’ordre pou faire. Li ti faire exactement seki finn dire li.” (Exode 40:16) En tant ki bann serviteur Jéhovah, nou montré nou fidelité kan nou servi Li avek obeissance, surtout kan nou reste fidel dan bann moment difficile ou-soit kan nou pé passe par bann l’epreuve bien dur. Seulement, c’est pa zis kan nou reste fidel dan bann grand difficulté ki montré nou fidelité. Jésus ti dire: “Enn dimoune ki fidel dan enn ti kitsoz, li fidel aussi dan enn grand kitsoz, ek enn dimoune ki pa droite dan enn ti kitsoz, li pa pou droite aussi dan enn grand kitsoz.” (Luc 16:10) Nou bizin reste fidel, mem dan bann ti kitsoz, ki pa parette important.
4, 5. Kan nou fidel dan “enn ti kitsoz,” ki sa montré?
4 Ena deux raison kifer li important ki nou montré nou fidelité chaque jour dan ‘bann ti kitsoz.’ Premierement, sa montré seki nou pensé lor domination Jéhovah. Reflechi couma fidelité Adam ek Ève ti testé. Jéhovah pa ti demann zot faire enn kitsoz ki difficile. Zot ti kapav mange tou seki ti ena dan jardin Éden, a part fruit enn sel pié—“pié connaissance bon ek mauvais.” (Genèse 2:16, 17) Si zot ti montré-zot fidel ar sa l’ordre simple-la, zot ti pou montré ki zot soutenir domination Jéhovah. Kan nou suive bann instruction Jéhovah toulé-jour dan nou la-vie, nou montré ki nou pé soutenir domination Jéhovah.
5 Deuxiemement, nou conduite dan “enn ti kitsoz” ena enn l’effet lor fason ki nou agir ‘dan bann grand kitsoz,’ setadir kan nou bizin faire face ar bann situation pli grave dan nou la-vie. Lor sa sujet-la, anou guette seki ti arrive Daniel ek so trois fidel camarade hébreux, Hanania, Mishaël ek Azaria. Bann Babylonien ti amenn zot en exil en 617 a.n.l. Kan zot ti encore jeune, kitfois zot ti encore bann adolescent, zot ti servi dan palais le roi Neboukadnetsar. La-bas, le roi ti “fixé pou chaque jour, enn ration bann bon mangé ki lé-roi li-mem ti mangé, ek di-vin ki li ti boire, oui pou nourri zot bien pendant trois an, pou ki apré sa [trois an-la] zot kapav parette devant le roi.”—Daniel 1:3-5.
6. Ki l’epreuve Daniel ek so trois camarade ti gagné kan zot ti dan palais le roi Babylone?
6 Mais, sa quatre jeune hébreux-la ti dan enn situation difficile kan ti donne zot, mem mangé ki le roi Babylone. Kifer? Parski dan sa mangé-la, surement ti ena bann kitsoz ki ti interdit par la Loi mosaïk. (Deutéronome 14:3-20) Kitfois pa ti verse di-sang bann zanimo couma bizin, ek si zot ti mange sa la-viande-la, zot ti pou desobeir la Loi Bondié. (Deutéronome 12:23-25) Li possible aussi ki bann Babylonien ti offert sa mangé-la ar bann idole, parski zot ti ena l’habitude pou faire sa avant zot mangé ensam.
7. Ki l’obeissance Daniel ek so trois camarade ti montré?
7 Pou bann dimoune ki ti reste dan palais Babylone, bann interdiction ki ti ena lor certain mangé pa ti enn problem pou zot. Mais, Daniel ek so trois camarade zot, zot ti bien decidé dan zot leker pou pa contamine-zot avek bann mangé ki ti interdit par la Loi ki Bondié ti donne nation Israël. Sa ti concerne zot fidelité envers Bondié. Alors, zot ti demann pou mange zis legume ek pou boire de l’eau, ek bann responsable ti d’accord pou donne zot sa. (Daniel 1:9-14) Zordi, kitfois certain dimoune pa trouve important seki sa bann jeune-la ti faire. Mais zot l’obeissance envers Bondié ti montré zot position concernant domination Jéhovah.
8. (a) Couma fidelité sa trois hébreux-la ti testé? (b) Couma zot l’epreuve ti fini, ek ki sa montré nou?
8 Parski Daniel ek so trois camarade ti reste fidel dan bann kitsoz ki pa ti parette important, sa finn prepare zot pou faire face avek enn pli grand l’epreuve. Ouvert ou la-Bible dan Daniel chapitre 3, ek lire pou ou-mem couma sa trois jeune hébreux-la ti agir kan ti condamne zot a mort parski zot ti refuse pou adore enn zimage en or ki le roi Neboukadnetsar ti faire. Kan ti amenn zot devant le roi, zot ti dire dan enn fason bien ferme ek avek courage: “Si necessaire, nou Bondié ki nou servi, Li kapav sauve nou. Li pou sap nou dan sa four difé-la, ek dan to la-main, ô roi. Sinon, nou faire toi koné, ô roi, ki c’est pa to bann bondié ki nou servi, ek sa zimage l’or ki to’nn faire-la, nou pa pou adore li.” (Daniel 3:17, 18) Eski Jéhovah ti sauve zot? Bann garde ki ti jette sa trois jeune-la dan four, zot, zot ti mort, mais sa trois fidel jeune hébreux-la, ti sorti vivant, sans mem ki zot finn brulé! Fidelité ki zot finn gardé depuis commencement finn prepare zot pou reste fidel pendant sa l’epreuve-la. Eski sa l’exemple-la pa montré l’importance pou reste fidel dan bann ti kitsoz?
Fidel en rapport avek bann “richesse injuste”
9. Dan ki contexte Jésus ti dire bann parole ki trouve dan Luc 16:10?
9 Avant ki Jésus ti dire ki enn kikenn ki fidel dan bann kitsoz ki parette sans importance, li pou fidel aussi dan bann grand kitsoz, li ti donne sa conseil-la bann dimoune ki ti pé ecoute li: “Servi bann richesse injuste pou faire bann camarade, pou ki kan [sa bann richesse-la] pou disparette, bannla kapav recevoir zot dan bann place eternel.” Apré sa, li ti koz lor la fidelité dan bann ti kitsoz. Ensuite, Jésus ti dire: “Alors, si zot pa finn montré ki zot fidel en rapport avek bann richesse injuste, kisannla pou confié zot bann kitsoz ki vrai? . . . Okenn domestik pa kapav vinn esclave deux maitre; soit li pou ena la haine pou enn, ek li pou content lot-la, ou-soit li pou attache-li avek enn ek li pou meprise lot-la. Zot pa kapav vinn esclave Bondié ek la Richesse toulé-deux.”—Luc 16:9-13.
10. Couma nou kapav montré ki nou fidel dan fason ki nou servi bann “richesse injuste”?
10 Kan nou guette contexte Luc 16:10, bann parole ki Jésus ti prononcé dan sa verset-la concerne avant tou la fason ki nou servi bann “richesse injuste,” setadir nou bann kitsoz materiel ou-soit nou bann di-bien. Appel zot ‘injuste’ parski bann richesse materiel, surtout l’argent, zot controlé par bann dimoune imparfait. En plus, desir pou gagne beaucoup richesse kapav pousse enn dimoune pou faire bann kitsoz injuste. Nou montré ki nou fidel si nou servi nou bann kitsoz materiel avek sagesse. Plutot ki nou servi zot dan enn fason egoïste, nou envie servi zot pou favorise bann l’interet Royaume Bondié, ek pou aide bann dimoune ki dan le besoin. Kan nou montré nou fidelité dan sa fason-la, nou faire camarade ar Jéhovah ek Jésus Christ, ki proprietaire “bann place eternel.” Zot pou recevoir nou dan sa bann place-la ek zot pou donne nou la vie eternel soit dan le ciel, soit dan Paradi lor la terre.
11. Kifer fodé pa nou hesité pou explik bann dimoune ki zot kapav faire enn contribution pou travail ki bann Témoins de Jéhovah pé faire dan le monde entier?
11 Mazinn aussi l’occasion ki nou donne bann dimoune avek ki nou place bann la-Bible ou-soit bann publication ki basé lor la Bible. Kan nou preche la bonne nouvelle avek zot ek explik zot ki zot kapav faire enn contribution pou soutenir travail ki bann Témoins de Jéhovah pé faire dan le monde entier, eski sa pa donne zot l’occasion pou servi avek sagesse zot richesse materiel? Mem si Luc 16:10 concerne avant tou la fason ki nou servi nou bann kitsoz materiel, sa principe-la applik aussi dan bann lezot domaine.
Li vrai-mem important ki nou honnete
12, 13. Cite bann domaine kot nou kapav montré ki nou honnete.
12 L’apotre Paul ti ecrire: “Nou sur ki nou ena enn conscience droite, a cause nou envie reste honnete dan tou kitsoz.” (Hébreux 13:18) L’expression “tou kitsoz” concerne aussi tou seki ena enn rapport avek maniere nou servi nou l’argent. Nou paye nou bann dette ek nou bann taxe sans tardé ek dan enn fason honnete. Kifer? Parski nou envie garde enn bon conscience ek parski nou content Bondié ek nou envie obeir so bann instruction. (Romains 13:5, 6) Ki nou faire kan nou trouve enn kitsoz ki pa pou nou? Nou faire tou pou retourne li so proprietaire. Ek kan nou expliké kifer nou finn agir coumsa, sa donne enn bon temoignage.
13 Pou montré ki nou fidel ek honnete dan tou kitsoz, nou bizin montré ki nou fidel dan nou travail. Kan nou fidel dan travail, sa montré lezot ki qualité Bondié nou representé. Si nou faire paresse dan travail, nou pé “kokin” le temps, mais nou, nou pa pou faire sa. Au contraire, nou travail dur, coumadir nou pé travail pou Jéhovah. (Éphésiens 4:28; Colossiens 3:23) Dan enn pays en Europe, enn tiers bann employé prend ‘sick-leave,’ mem si zot pa malade. Bann vrai chrétien pa invente bann pretexte pou pa al travail. Parfois, bann Témoins de Jéhovah gagne bann promotion dan travail parski zot bann patron remarké ki zot honnete ek zot travail dur.—Proverbes 10:4.
Fidel dan nou ministere
14, 15. Par ki fason eski nou kapav montré nou fidelité dan nou ministere?
14 Couma eski nou montré nou fidelité dan ministere ki Jéhovah finn confié nou? La Bible dire: “Anou touletan offert Bondié enn sacrifice louange, setadir fruit nou la-levre ki faire declaration publik pou so nom.” (Hébreux 13:15) Pli bon fason pou montré nou fidelité dan nou ministere, c’est kan nou sorti regulierement dan predication. Kifer eski nou bizin laisse enn mois entier passé sans ki nou rann temoignage lor Jéhovah ek lor seki Li pou faire dan l’avenir? Kan nou sorti regulierement dan predication, sa aide nou aussi pou ameliore-nou ek pou vinn plus efficace.
15 Enn lot fason pou montré nou fidelité dan ministere, c’est kan nou mette en pratik bann suggestion ki ena dan La Tour de Garde ek dan Ministère du Royaume. Kan nou prepare-nou bien ek nou servi sa bann presentation-la ou lezot presentation ki realiste, eski nou pa remarké ki nou gagne bann pli bon resultat? Kan nou joinde enn dimoune interessé, eski nou revisite li sans tardé? Ki nou kapav dire lor bann l’etude la Bible ki nou kapav commencé avek bann dimoune ki interessé? Eski nou montré ki nou serieux ek fidel pou al conduire sa bann l’etude-la regulierement? Nou fidelité dan nou ministere kapav faire nou, ek bann dimoune ki ecoute nou, gagne la vie.—1 Timothée 4:15, 16.
Reste separé avek le monde
16, 17. Dan ki fason eski nou kapav montré ki nou separé ar le monde?
16 Dan enn la-priere ki Jésus ti faire concernant so bann disciple, li ti dire: “Mo finn donne zot to parole, mais le monde finn ena la haine pou zot, parski zot pa faire partie dan le monde, pareil couma moi mo pa faire partie dan le monde. Mo pa pé demann toi pou tire zot dan le monde, mais pou veille lor zot, a cause sa kikenn ki mauvais-la. Zot pa faire partie dan le monde, pareil couma moi mo pa faire partie dan le monde.” (Jean 17:14-16) Kitfois, nou bien decidé pou reste separé ar le monde dan bann grand kitsoz, couma par exemple pou garde nou neutralité, pou pa participe dan bann fête religieux, ek pou pa commette l’immoralité. Mais couma nou agir dan bann ti kitsoz? Eski li kapav arrivé ki sans mem nou rann-nou compte, nou laisse-nou influencé par fason ki le monde agir? Par exemple, si nou pa faire attention, li facile ki nou habille enn fason ki pa digne ek ki pa convenable pou bann chrétien. Pou nou montré ki nou fidel, nou l’habillement ek nou coiffure bizin montré ki nou ena “modestie ek bon jugement.” (1 Timothée 2:9, 10) Oui, “dan okenn fason, nou pa donne okenn raison pou faire [lezot] tombé, pou ki personne pa critik nou ministere; mais dan tou fason, nou recommande nou-mem couma bann ministre Bondié.”—2 Corinthiens 6:3, 4.
17 Parski nou envie donne l’honneur Jéhovah, nou habille dan enn fason digne kan nou assisté reunion dan nou congregation ek kan nou al l’assemblée. Nou bizin habille enn fason presentable ek ki adapté ar sa bann l’occasion-la. Sa donne enn bon temoignage pou bann dimoune ki observe nou. Mem bann ange prend compte seki nou faire, pareil couma zot ti prend compte seki Paul ek so bann camarade ti faire. (1 Corinthiens 4:9) Avredir, touletan nou bizin habille enn maniere convenable. Certain kapav pensé ki li pa important pou montré fidelité dan fason ki nou habillé, mais pou Jéhovah sa ena enn grand l’importance.
Bann benediction ki nou gagné parski nou fidel
18, 19. Ki bienfait nou gagné kan nou fidel?
18 La Bible koz lor bann vrai chrétien couma bann “bon serviteur ki Bondié servi pou montré so faveur ki nou pa merité, dan different fason.” En tant ki sa bann serviteur-la, nou “depann lor la force ki Bondié donné.” (1 Pierre 4:10, 11) En plus, Bondié finn confié nou bann kitsoz ki pa pou nou—Li permette nou koz lor so faveur ki nou pa merité, ek Li finn donne nou responsabilité pou preche la bonne nouvelle. Kan nou compte lor la force ki Bondié donne nou, setadir “la puissance ki depasse seki normal,” nou montré ki nou bann bon serviteur Bondié. (2 Corinthiens 4:7) C’est enn bon formation ki nou gagné pou aide nou faire face ar n’importe ki l’epreuve nou kapav gagné dan l’avenir!
19 Ecrivain enn Psaume ti chanté: “Content Jéhovah, zot tou so bann fidel. Jéhovah protege bann dimoune fidel.” (Psaume 31:23) Anou prend determination pou montré ki nou fidel, ek ki nou ena confiance ki Jéhovah, Li “enn Sauveur pou tou sorte qualité dimoune, surtout pou bann ki fidel.”—1 Timothée 4:10.
Eski ou rappel
• Kifer nou bizin montré ki nou “fidel dan enn ti kitsoz”?
• Couma nou kapav montré nou fidelité
kan nou amenn enn la-vie honnete?
dan nou ministere?
kan nou reste separé ar le monde?
[Zimage, page 13]
Fidel dan enn ti kitsoz, fidel aussi dan enn grand kitsoz
[Zimage, page 16]
‘Nou reste honnete dan tou kitsoz’
[Zimage, page 16]
Enn bon fason pou montré nou fidelité c’est kan nou bien prepare-nou pou predication
[Zimage, page 1]7
Montré modestie dan nou fason habillé ek coiffé