Jéhovah protege bann ki ena confiance en Li
“Laisse to l’amour fidel ek to verité protege moi touletan.” —Psaume 40:11.
1. Ki le roi David ti demann Jéhovah, ek zordi couma Jéhovah pé realise sa demann-la?
LE ROI David, ki ti regne en Israël dan le passé, ti ‘ena enn grand confiance en Jéhovah.’ Sa ti pousse li pou dire ki Jéhovah ‘ti ecoute li ek ti tann li crié au secours.’ (Psaume 40:1) Plusieurs fois li ti trouvé personnellement couma Jéhovah ti protege bann dimoune ki ti content Li. C’est pou sa ki li ti kapav demann Jéhovah pou protege li touletan. (Psaume 40:11) Zordi, David en securité dan memoire Jéhovah, ek li faire partie parmi bann zom ek bann femme fidel ki pé attann “enn pli bon resurrection.” (Hébreux 11:32-35) So l’avenir assuré dan pli bon fason ki ena, parski so nom finn ecrire dan “livre souvenir” Jéhovah.—Malaki 3:16.
2. Couma la Bible aide nou pou comprend couma Jéhovah protege nou?
2 Bann serviteur fidel Jéhovah ki mentionné dan Hébreux chapitre 11, ti vive avant lepok Jésus, mais kan-mem, zot ti vive en harmonie avek sa l’enseignement Jésus-la: “Enn kikenn ki attaché ar so la-vie, pé detruire li, mais enn kikenn ki ena la haine pou so la-vie dan sa lé-monde-la, pou protege li pou la vie eternel.” (Jean 12:25) Alors, kan Jéhovah protege nou, sa pa vedir ki nou pa pou souffert, ni nou pa pou gagne persecution, mais plutot, sa vedir ki Li protege nou lor plan spirituel, pou nou kapav garde enn bon reputation devant Li.
3. Couma nou koné ki Jéhovah ti protege Jésus Christ, ek ki resultat sa finn ena?
3 Jésus li-mem ti gagne persecution dan enn fason bien cruel, ek finalement, so bann l’ennemi ti reussi faire li souffert ek mort couma enn criminel maudit. Mais, sa pa vedir ki Bondié pa ti garde promesse ki Li ti faire pou protege le Messie. (Isaïe 42:1-6) Kan Jéhovah ti ressuscité Jésus troisieme jour apré so la-mort, sa ti montré ki Jéhovah ti tann li crié pou gagne secours—pareil couma Li ti tann aussi David. Jéhovah ti reponn Jésus kan Li ti donne li la force pou reste fidel. (Matthieu 26:39) Grace a protection Jéhovah, Jésus ti gagne la vie immortel dan le ciel, ek plusieurs million dimoune ki finn ena la foi dan la ranson, ena possibilité pou gagne la vie eternel.
4. Ki l’assurance bann chrétien oint ek bann “lezot brebis” ena?
4 Nou kapav sur ki, pareil couma Jéhovah ti protege David ek Jésus, Li envie ek Li kapav protege aussi so bann serviteur zordi. (Jacques 1:17) Sa tigit frere oint Jésus ki encore lor la terre zordi-la, kapav compte lor sa promesse ki Jéhovah finn faire-la: “Enn l’heritage ki pa kapav pourri, ni vinn impur, ni fletri . . . finn reservé pou zot dan le ciel. Puissance Bondié pé protege zot, grace a la foi, pou enn delivrance ki’nn paré pou devoilé dan dernier period.” (1 Pierre 1:4, 5) “Lezot brebis” ki ena l’esperance pou vive lor la terre, kapav aussi mette zot confiance en Jéhovah, ek dan sa promesse ki enn ecrivain Psaume ti ecrire-la: “Content Jéhovah, zot tou so bann fidel. Jéhovah pé protege bann dimoune fidel.”—Jean 10:16; Psaume 31:23.
Enn protection spirituel
5, 6. (a) Couma Bondié finn protege so bann serviteur dan lepok modern? (b) Ki relation bann chrétien oint ena avek Jéhovah, ek ki nou kapav dire lor bann chrétien ki ena l’espoir pou vive lor la terre?
5 Dan lepok modern, Jéhovah finn prend bann disposition pou protege so bann serviteur lor plan spirituel. C’est vrai ki Li pa protege zot kont persecution ou-soit kont bann difficulté ek bann malheur ki ena dan la vie. Mais Li finn donne zot l’aide ek l’encouragement necessaire pou zot garde bann bon relation avek Li. C’est grace a zot la-foi dan la ranson ki zot finn kapav ena sa bann bon relation-la avek Jéhovah. Certain parmi sa bann chrétien fidel-la, finn oint par l’esprit [saint] Bondié pou zot regne ensam avek Jésus Christ dan le ciel. Bondié finn declare zot juste, en tant ki so bann garson spirituel, ek sa bann parole-la applik ar zot: “Li finn tire nou dan noirté, ek Li finn transfere nou dan royaume so Garson ki Li content, ek a travers li, nou finn gagne nou delivrance par la ranson, ek pardon pou nou bann peché.”—Colossiens 1:13, 14.
6 Plusieurs million chrétien fidel ena l’assurance ki zot aussi, zot kapav profite la ranson. Nou lire sa bann parole-la: “Fils de l’homme finn vini, pa pou lezot servi li, mais pou li servi lezot ek pou li donne so nâme en ranson en echange pou beaucoup.” (Marc 10:45) Sa bann chrétien-la ena l’espoir ki, dan moment ki Jéhovah choisir, zot pou gagne “liberté extraordinaire en tant ki bann zenfant Bondié.” (Romains 8:21) Entre temps, zot attache beaucoup valeur ar zot l’amitié personnel avek Bondié, ek zot faire zeffort pou fortifié sa l’amitié-la.
7. Zordi, couma Jéhovah protege so bann serviteur lor plan spirituel?
7 Enn fason ki Jéhovah protege so bann serviteur lor plan spirituel, c’est kan tigit par tigit, Li donne zot enn formation. Sa finn permette zot gagne enn connaissance encore plus exact lor la verité. Jéhovah contigne guide zot aussi a travers so Parole, so l’organisation ek so l’esprit saint. Partout dan le monde bann serviteur Bondié forme enn famille international enba direction “l’esclave fidel et avisé.” Sa group esclave-la prend soin bann besoin spirituel, ek mem bann besoin materiel si necessaire, bann serviteur Jéhovah dan le monde entier, n’importe ki l’origine zot été ou-soit zot position dan la societé.—Matthieu 24:45.
8. Ki confiance Jéhovah ena dan so bann serviteur fidel, ek ki l’assurance Li donne zot?
8 Jéhovah pa ti protege Jésus lor plan physik kont so bann l’ennemi. Zordi aussi Li pa protege bann chrétien dan sa fason-la. Mais sa pa vedir ki zot pena faveur Bondié. Au contraire! Sa montré ki Jéhovah ena confiance ki zot pou prend so part concernant question lor so droit pou dirige l’univers. (Job 1:8-12; Proverbes 27:11) Jamais Jéhovah pou abandonne bann ki fidel envers Li, “parski Jéhovah content la justice, ek Li pa pou quitte so bann fidel. Li pou veille lor zot pou touletan.”—Psaume 37:28.
Protegé par l’amour fidel ek la verité
9, 10. (a) Couma eski la verité ki Jéhovah manifesté, protege so bann serviteur? (b) Dapré la Bible, couma Jéhovah protege so bann serviteur par so l’amour fidel?
9 Dan so la-priere ki nou trouve dan Psaume 40, David ti demann Jéhovah pou protege li grace a So l’amour fidel ek la verité ki Li manifesté. Jéhovah content la verité ek la justice, ek a cause sa Li faire konn so bann principe dan enn fason bien clair. Bann dimoune ki vive en accord avek so bann principe, zot protegé kont beaucoup malheur, tracas, ek problem ki bann dimoune ki ignore sa bann principe-la, gagné. Par exemple, nou kapav protege nou-mem ek nou famille kont bann grand problem, kan nou pa prend la drogue, nou pa abuse lalkol, nou pa commette l’immoralité sexuel ek nou pa violent. Mem bann ki finn eloigne zot ar la verité ki Jéhovah enseigné—couma sa ti arrive David parfois—zot kapav sur ki Bondié, Li ‘enn place’ kot bann ki repenti ar zot peché, kapav ‘al cachiette’. Zot kapav crié avek la joie: “To pou protege moi dan bann malheur.” (Psaume 32:7) Sa c’est vrai-mem enn grand preuve ki Bondié ena l’amour fidel pou nou, pa vrai?
10 Bondié manifesté aussi so l’amour fidel kan Li averti so bann serviteur pou reste separé ar sa lé-monde mauvais ki Li pré pou detruire-la. La Bible donne nou sa conseil-la: “Pa content le monde, ni bann kitsoz ki ena dan le monde. Si enn kikenn content le monde, li pena l’amour [nou] Papa en li; parski, tou seki ena dan le monde, desir la chair, desir lizié, ek faire l’etalage ar bann kitsoz ki [nou] ena, tousala pa sorti kot [nou] Papa, mais sorti dan le monde.” Si nou prend compte sa conseil-la, ek si nou mette li en pratik, nou kapav protege nou la-vie pou touletan, parski verset-la ajouté: “En plus, le monde pé al fini, ek so desir aussi, mais celui ki faire volonté Bondié, pou reste pou toujours.”—1 Jean 2:15-17.
Capacité pou reflechi, bon jugement, ek la sagesse protege nou
11, 12. Expliké couma capacité pou reflechi, bon jugement ek la sagesse kapav protege nou.
11 Pou bann ki envie gagne protection Jéhovah, Salomon, garson David ti inspiré par Bondié pou ecrire: “Capacité pou reflechi pou veille lor toi, bon jugement pou protege toi.” Li ti aussi dire: “Gagne la sagesse . . . Pa abandonne li, ek li pou garde toi bien. Content li ek li pou protege toi.”—Proverbes 2:11; 4:5, 6.
12 Nou servi nou capacité pou reflechi si nou medite lor seki nou aprann dan Parole Bondié. Sa pou aide nou ena enn pli bon jugement, pou ki nou fixé bann bon priorité dan nou la-vie. C’est enn kitsoz bien important. Nou tou koné, kitfois par l’experience personnel, ki souvent nou gagne problem parski nou pa fixé bann bon priorité dan nou la-vie, mem si nou pa toujours faire sa par expré. Le monde Satan mette devant nou bann objectif couma la richesse, enn desir pou gagne l’importance ek pouvoir, mais Jéhovah Li, Li mette l’accent lor bann kitsoz spirituel, ki pli important. Si nou donne priorité bann kitsoz dan le monde plutot ki bann kitsoz spirituel, nou la-vie famille kapav deterioré, nou kapav perdi nou bann camarade, ek nou kapav commence blié nou bann l’objectif spirituel. Finalement, kapav arrive nou seki Jésus ti dire: “Ki profit enn dimoune ena, si li gagne le monde entier, ek li paye sa avek so nâme?” (Marc 8:36) La sagesse dire nou ecoute sa conseil Jésus-la: “Alors, avant tou kitsoz, contigne rod le royaume ek so justice, ek zot pou gagne aussi tou sa bann lezot kitsoz-la.”—Matthieu 6:33.
Danger ki ena kan nou guette zis nou-mem
13, 14. Ki sa vedir égocentrique, ek kifer li pa sage ki nou vinn coumsa?
13 Bann dimoune ena tendance pou interessé ar zot-mem. Seulement, si nou bann desir ek nou bann l’interet passe avant tou dan nou la-vie, nou pou gagne problem. Alors, pou nou kapav garde nou l’amitié avek Jéhovah, Li donne nou bann conseil pou nou pa vinn égocentrique. Enn dimoune ki égocentrique ena “tendance pou guette li-mem, so prop desir, seki li bizin ek so prop l’interet.” Eski pa coumsa-mem ki beaucoup dimoune été zordi? La Bible dire ki dan “dernier jour” sa lé-monde Satan-la, “bann dimoune pou content zot-mem,” setadir zot pou guette zis zot-mem.—2 Timothée 3:1, 2.
14 Bann chrétien comprend ki li sage pou suive commandement ki la Bible donné pou interessé avek lezot, pou content zot prochain couma zot content zot-mem. (Luc 10:27; Philippiens 2:4) La plupart dimoune kapav pensé ki li difficile pou applik sa conseil-la; pourtant li bien important ki nou suive li si nou envie ena enn mariage heureux, bann bon relation dan la famille, ek bann bon camarade. Alors fodé jamais ki enn vrai serviteur Jéhovah interesse-li tellement avek li-mem ki li neglige bann kitsoz ki pli important, setadir bann kitsoz ki ena enn rapport avek so l’adoration pou Jéhovah.
15, 16. (a) Ki kapav arrivé si nou guette zis nou-mem, ek ki l’exemple montré sa? (b) Kan enn dimoune juge lezot, en realité ki li pé faire?
15 Si nou guette zis nou-mem, nou kapav vinn trop satisfait ar nou-mem, ek lerla nou kapav vinn enn dimoune ki ena enn ti-l’esprit ek ki croire li trop important. La Bible dire bien: “N’importe ki to été, pena okenn excuse pou toi si to pé jugé, parski lor sa point ki to pé juge enn lot-la, to pé condamne to-mem, parski to-mem, to pé pratik sa bann kitsoz-la.” (Romains 2:1; 14:4, 10) Bann chef religieux dan lepok Jésus, ti tellement ena enn grand l’opinion lor zot prop justice, ki zot ti permette zot critik Jésus ek so bann disciple. Kan zot ti faire sa, zot ti pé faire zot passe pou bann juge. Zot pa ti trouve zot prop defaut, ek en realité, zot ti pé condamne zot-mem.
16 Judas, disciple ki ti trahir Jésus, ti permette li pou juge lezot. Kan enn fois, dan la ville Béthanie, Marie, soeur Lazare ti mette enn de l’huile parfumé lor la tête Jésus, Judas ti bien protesté. Li ti dire: “Kifer pa ti vann sa de l’huile parfumé-la pou trois cent denier, ek donne sa bann pauvre?” Mais la Bible donne sa l’explication-la: “Li ti dire sa, pa parski li ti tracasse-li pou bann pauvre, mais parski li ti enn voleur, li ti garde la caisse, ek li ti habitué kokin l’argent ki ti mette ladan.” (Jean 12:1-6) Anou faire attention pou ki jamais nou pa ressemblé ni Judas, ni bann chef religieux ki ti content juge lezot, mais ki en realité, ti pé condamne zot-mem.
17. Montré par enn l’exemple kifer li dangereux si enn kikenn faire vantard, ek li ena enn trop grand confiance en li-mem.
17 Malheureusement, certain parmi bann premier chrétien ti commence ena l’orgueil ek ti vinn vantard, mem si zot pa ti vinn bann voleur couma Judas. Jacques ti ecrire lor zot: “Zot fiere kan zot faire zot vantard.” Lerla li ti dire: “Sa qualité fierté-la, li mauvais.” (Jacques 4:16) Nou pou faire nou-mem di-tort si nou vante-nou pou seki nou finn faire, ou-soit a cause bann privilege ki nou finn gagné dan service Jéhovah. (Proverbes 14:16) Nou rappel ki ti arrive l’apotre Pierre, ki enn fois ti ena enn trop grand confiance en li-mem, ek li ti vante-li. Li ti dire: “Mem si zot tou tombé en rapport avek toi, moi jamais mo pa pou tombé! . . . Mem si mo bizin mort avek toi, jamais mo pa pou renié toi.” En realité, nou pena okenn raison pou faire vantard. Tou seki nou ena, c’est grace a l’amour fidel ki Jéhovah ena envers nou. Si nou rappel sa, nou pa pou vinn vantard. —Matthieu 26:33-35, 69-75.
18. Ki Jéhovah pensé lor l’orgueil?
18 La Bible dire: “Avant la ruine, ena l’orgueil, ek avant enn mauvais pas, ena enn l’esprit vantard.” Kifer? Jéhovah reponn: ‘Mo detesté kan faire vantard ek kan ena l’orgueil.’ (Proverbes 8:13; 16:18) Nou pa etonné ki Jéhovah ti bien en colere parski “leker le roi l’Assyrie, ti arrogant; so lizié ti vantard, ek ti rempli ar l’orgueil”! (Isaïe 10:12) Jéhovah ti demann li rann bann compte. Bientot, tou sa lé-monde Satan-la, avek so bann chef ki ena l’orgueil ek ki fiere seki zot été, bann ki nou trouvé, ek bann ki nou pa trouvé aussi, pou bizin rann compte Jéhovah. Anou faire bien attention pou pa imite mauvais l’attitude bann l’ennemi Jéhovah!
19. En ki sens bann serviteur Bondié zot fiere, mais pourtant zot ena l’humilité aussi?
19 Bann vrai chrétien ena bann bon raison pou fiere ki zot servi Jéhovah. (Jérémie 9:24) Mais en mem temps, zot ena aussi bann bon raison pou ena l’humilité. Kifer? Parski “tou dimoune faire peché ek zot pa reussi gagne la gloire Bondié.” (Romains 3:23) Alors, pou nou garde nou position en tant ki serviteur Jéhovah, nou bizin ena mem l’attitude ki l’apotre Paul, ki ti dire: “Jésus Christ inn vinn dan le monde pou sauve bann dimoune ki faire peché,” ek li ti ajouté: “Mo-mem premier parmi zot.”—1 Timothée 1:15.
20. Couma Jéhovah protege so bann serviteur zordi, ek couma Li pou protege zot dan l’avenir?
20 Parski bann serviteur Jéhovah mette bann l’interet spirituel avant zot prop l’interet, nou kapav sur ki Jéhovah pou contigne protege zot lor plan spirituel. Nou kapav sur aussi ki pendant la grande tribulation, Jéhovah pou protege zot, pa zis lor plan spirituel mais aussi lor plan physik. Kan zot pou rente dan le monde nouveau, zot pou kapav crié: ‘Guetté! Sa c’est nou Bondié. Nou finn mette nou confiance en Li, ek Li pou sauve nou. Sa c’est Jéhovah. Nou finn mette nou confiance en Li. Anou ena la joie ek content ki Li pou delivré nou.’—Isaïe 25:9.
Eski ou rappel?
• Couma eski Bondié ti protege le roi David ek Jésus?
• Ki protection bann serviteur Jéhovah gagné zordi?
• Kifer fodé pa ki nou donne nou-mem trop l’importance?
• Kifer nou kapav fiere, mais nou contigne ena l’humilité aussi?
[Zimage, page 19]
Couma eski Jéhovah ti protege David ek Jésus?
[Zimage, page 21]
Dan ki fason bann serviteur Bondié gagne protection spirituel zordi?
[Zimage, page 22]
Mem si nou fiere pou servi Jéhovah, nou bizin toujours ena l’humilité