Eski enn Jour Nous Pou Vive en Sécurité?

KISANNLA ki pa content kan li trouve bann zenfants pé joué ensemble avec zot parents dans la joie? Bann zenfants-la senti zot complètement en sécurité en présence zot bann parents ki content zot. Mais, malheureusement, beaucoup jeunes jamais finn konn sa bann bon moments. Au contraire, éna beaucoup zenfants ki toulé-jour bizin par zot-même rode enn place pou zot kapav passe la nuit. Eski éna enn l’espoir pou sa bann zenfants-la ek bann lézot dimoune encore ki péna enn place pou zot resté ek ki vive dans l’insécurité?

Même si l’avenir parette sombre, Parole Bondié donne nous enn l’espoir. Prophète Isaïe ti annoncé ki enn jour tou dimoune pou vive en sécurité. Li ti écrire: “Vrai-même zot pou range bann lakaz ek zot pou reste ladan, ek vrai-même zot pou plante bann karo raisins ek zot pou mange [zot] bann fruit. Zot pa pou construire pou ki enn l’autre resté, zot pa pou planté pou ki enn l’autre mangé.”—Isaïe 65:21, 22.

Mais eski c’est enn promesse sûr? Après tou, sa mot “l’espoir”-la, pa touletan veut dire ki nous cent pou cent sûr. Par exemple, en Brésil souvent nous tann bann dimoune dire: “A esperança é a última que morre,” ki signifie “Dernier kitsoz ki mort c’est l’espoir.” Sa veut dire ki beaucoup dimoune contigne garde l’espoir même kan péna okenn raison pou faire li. Mais, promesse ki Bondié faire nous, li différent. L’apôtre Paul ti écrire: “Enn dimoune ki mette so la foi en [Bondié], pa pou déçu.” (Romains 10:11) Bann prophéties Biblique ki finn fini réalisé donne nous confiance ki tou bann lézot promesses ki Jéhovah finn faire pou réalisé. Kan sa pou arrivé, bann conditions ki oblige bann zenfants pou vive lor chemin, pou disparaite.

D’ailleurs, asterla-même bann conseils pratique ki trouve dans la Bible kapav aide bann dimoune ki péna okenn l’espoir. La Bible kapav aide zot pou améliore zot la-vie ek trouve enn vrai sécurité. Couma? Bann Témoins Jéhovah ki vive dans ou l’endroit pou bien content pou faire ou trouve la réponse.