Questions Bann Lecteurs

Couma la congrégation Chrétienne considère la gourmandise?

Parole Bondié condamne l’ivrognerie ek la gourmandise toulé-deux. C’est bann conduite ki pa acceptable pou enn kikenn ki servi Bondié. Donc, la congrégation Chrétienne considère enn gourmand ki pa oulé changé, pareil couma li considère enn ivrogne. Dans la congrégation Chrétienne péna place ni pou enn ivrogne ni pou enn gourmand.

Proverbes 23:20, 21 dire: “Pa retrouve toi parmi bann grand buveurs du vin ek bann gourmands la viande. Parski bann ivrognes ek bann gourmands pou konn la misère, ek à cause zot paresse zot pou éna zis bann chiffons pou habille zot.” Dans Deutéronome 21:20 nous lire ki ti éna enn dimoune ki ti “têtu ek rebelle,” ek d’après la Loi Mosaïque, li ti mérite la mort. D’après sa verset-la, sa dimoune rebelle ek ki pa’nn répenti-la ti éna deux défaut: Li ti “enn gourmand ek enn ivrogne.” Donc, li clair ki dans ancien Israël, la gourmandise ti considéré couma enn pratique ki pa ti acceptable pou bann ki ti envie servi Bondié.

Mais, ki été la gourmandise, ek ki bann Écritures Grec Chrétienne dire nous lor sa sujet-la? Enn gourmand c’est enn dimoune ki “mangé ek boire plis ki necessaire couma enn vorace.” Donc, la gourmandise c’est enn défaut ki comdamné par Parole Bondié ki dire ki “bann dimoune ki rode toujours gagne plis” pa pou hérite Royaume Bondié. (1 Corinthiens 6: 9, 10; Philippiens 3:18, 19; 1 Pierre 4:3) En plus, kan l’apôtre Paul ti averti bann Chrétiens contre la pratique “bann oeuvres de la chair,” li ti cite “bann soûleries, orgies, ek bann lézot kitsoz ki pareil.” (Galates 5:19-21) Souvent dans bann soûleries ek bann orgies, bann dimoune mange à l’excès. D’ailleurs, c’est sûr ki la gourmandise forme parti dans séki Paul ti appelle “bann lézot kitsoz ki pareil.” Enn Chrétien ki connu couma enn gourmand ek ki refuse change so l’attitude, li pareil ar enn Chrétien ki pratique “bann oeuvres de la chair.” Donc, bizin envlève li dans la congrégation.—1 Corinthiens 5:11, 13.a

Même si Parole Bondié considère enn ivrogne ek enn gourmand pareil, li plus facile pou identifié enn ivrogne ki enn gourmand. Bann signes l’ivrognerie li plus visible. Mais, pou déterminé ki enn kikenn li enn gourmand, li beaucoup plus difficile parski nous pa kapav zis base lor l’apparence extérieur. Donc, kan bann anciens bizin traite lor bann sujet coumsa, zot bizin faire bien attention ek servi bien zot discernement.

Par exemple, l’obésité kapav enn signe ki enn kikenn li enn gourmand. Mais pa touletan ki enn gourmand li obèse. Enn kikenn kapav obèse parski li éna enn problème la santé. Bann facteurs héréditaire aussi kapav faire ki enn kikenn li obèse. Donc, nous bizin pa blié ki l’obesité c’est enn condition physique, alors ki la gourmandise c’est enn l’attitude mental. Enn dimoune obèse c’est enn dimoune ki éna beaucoup la graisse dans so lé-corps. Mais enn gourmand c’est enn kikenn ki mange plus ki bizin ek li rode zis so plaisir. Donc, nous pa kapav dire ki nous pou reconnaite enn gourmand par so grosseur, mais plutôt par l’attitude ki li éna envers la nourriture. Enn dimoune kapav pa gros, li kapav même bien mince, ek pourtant li kapav enn gourmand. D’ailleurs enn dimoune so poids idéal ou-soit so grosseur idéal pa pareil dans tou pays.

Ki bann signes la gourmandise? Enn gourmand c’est enn kikenn ki souvent pa kapav retenir li. Li tellement mangé ki après li pa senti li bien, ou-soit li tombe malade. So manque de maitrise de soi montré ki li pa casse la tête ki so conduite pé sali nom Jéhovah ek gâte bon réputation So peuple. (1 Corinthiens 10:31) De l’autre côté, c’est pa parski enn dimoune inn mange enn tipé trop dé-trois fois ki li automatiquement “enn gourmand.” (Éphésiens 5:5) Mais, d’après principe ki trouve en Galates 6:1, kitfois sa Chrétien-la bizin l’aide. Paul dire: “Frères, si avant ki li rann li compte, enn kikenn faire enn faux pas, zot ki éna bann qualification spirituels, essaye redresse sa dimoune-la avec douceur.”

Kifer conseil Biblique pou évite mangé à l’excès li important surtout zordi? Parski, c’est surtout pou nou l’époque ki Jésus ti donne sa l’avertissement-la: “Faire attention ar zot-même, pou ki zot léker pa vinn lourd avec enn l’excès mangé ek boire ek tracas dans la vie; lerla enn coup sa jour-la vinn lor zot couma enn piège.” (Luc 21:34, 35) Enn façon pou évite enn mode de vie ki kapav dangereux lor plan spirituel, c’est kan nous évite mange à l’excès.

La modération c’est enn qualité Chrétienne. (1 Timothée 3:2, 11) Donc, Jéhovah pou aide bann ki faire zefforts pou applique bann conseil Biblique concernant la modération en séki concerne mangé ek boire.—Hébreux 4:16.

[Note]