Zot Haïr Nous pou Nanyin

“Zot inn haïr moi pou nanyin.”​—JEAN 15:25.

1, 2. (a) Kifer certains pa comprend kan koz en mal lor bann Chrétiens, mais kifer fodé pa nous étonné? (b) Mot “haïr” éna plusieurs sens; lequel nous pou examiné dans sa l’article-la? (Guette note en bas de page.)

PARSKI bann Témoins de Jéhovah faire tou pou vive en accord avec bann principes Biblique, zot éna enn bon réputation dans beaucoup pays. Mais parfois éna dimoune ki dire bann faussetés lor zot. Par exemple, enn fonctionnaire gouvernement ki travail Saint-Pétersbourg, en Russie, ti dire: “Certains finn dire ki bann Témoins de Jéhovah, c’est enn secte bizarre, ki rassemblé en secret, ki touye bann zenfants ek ki suicide zot.” Mais après ki li’nn travail avec bann Témoins de Jéhovah pou enn l’assemblée internationale, fonctionnaire-la ti dire: “Mais moi mo trouvé ki zot bann dimoune normal, zot souriant . . . Zot vive en paix, zot calme ek zot bien content zot camarade.” Li ti ajouté: “Mo pa comprend kifer dimoune koz menti coumsa lor zot.”—1 Pierre 3:16.

² Sa pa faire bann serviteurs Bondié plaisir kan dimoune koz menti lor zot ek dire ki zot faire bann mauvais kitsoz. Pourtant, zot pa étonné kan dimoune koz contre zot. Jésus ti averti so bann disciples: “Si le monde éna la haine pou zot, zot koné ki li’nn haïr moi avant ki li’nn haïr zot. . . . Tou sa c’est pou réalise séki’nn écrire dans zot la-Loi, ‘Zot inn haïr moi pou nanyin.’ ”a (Jean 15:18-20, 25; Psaume 35:19; 69:4) Enn tipé avant, li ti dire so bann disciples: “Si dimoune inn appelle maître de maison, Béelzéboub, zot pou donne encore plus sa nom-la, bann ki reste dans so lakaz.” (Matthieu 10:25) Bann Chrétiens comprend ki zot bizin endure sa bann accusations-la, parski sa faire partie zot “poteau de supplice” ki zot inn accepté kan zot inn vinn bann disciples Christ.—Matthieu 16:24.

3. Ziska ki point bann vrai adorateurs inn gagne persécution?

³ Depuis longtemps bann serviteurs Bondié gagne persécution; oui, sa remonte depuis l’époque “Abel, ki ti enn dimoune droite.” (Matthieu 23:34, 35) Aussi persécution bann vrais adorateurs pa’nn arrive zis rarement. Jésus ti dire ki “partout dimoune pou éna la haine” pou so bann disciples à cause so nom. (Matthieu 10:22) En plus, l’apôtre Paul ti écrire ki tou bann serviteurs Bondié bizin atann pou gagne persécution, sa concerne nous aussi. (2 Timothée 3:12) Kifer?

Kisannla Responsable la-Haine Injustifié

4. Couma la Bible faire nous koné kisannla ki responsable la haine injuste contre bann serviteurs Bondié?

⁴ La Bible montré ki depuis commencement finn éna enn kikenn invisible ki responsable la haine contre bann vrais adorateurs. Éna l’exemple Abel, premier dimoune ki ti éna la foi ek ki ti assassiné par so frère Caïn. La Bible dire ki Caïn “ti sorti ar sa kikenn ki mauvais-la,” Satan le Diable. (1 Jean 3:12) Caïn ti éna même l’attitude ki Satan, ek Satan ti servi li pou réalise so projet diabolique. La Bible faire nous koné aussi ki c’est Satan ki ti responsable bann malheurs atroces ki ti abatte lor Job ek lor Jésus Christ. (Job 1:12; 2:6, 7; Jean 8:37, 44; 13:27) Livre Révélation montré clairement kisannla ki derrière persécution bann disciples Jésus. Li dire: “Le Diable pou contigne jette certains parmi zot dans prison, pou testé zot complètement.” (Révélation 2:10) Oui, Satan ki responsable sa la haine injustifié ki éna contre bann serviteurs Bondié-la.

5. Kifer Satan éna la haine pou bann vrais adorateurs Bondié?

⁵ Kifer Satan éna la haine pou bann adorateurs Bondié? Satan ti montré à ki point li éna enn l’arrogance extraordinaire, kan li ti faire enn complot pou oppose Jéhovah, “le Roi d’éternité.” (1 Timothée 1:17; 3:6) Li prétann ki par façon ki Bondié gouverné, Li trop prive so bann créatures. D’après Satan, personne pa pé servi Jéhovah par amour, mais seulement par intérêt. Li prétann aussi ki, si donne li l’occasion pou testé bann dimoune, li pou kapav détourne zot tou ar Jéhovah. (Genèse 3:1-6; Job 1:6-12; 2:1-7) Satan koz en mal lor Jéhovah ek prétann ki Li enn dominère, enn menteur ek ki Li pa pé réussi dirige so création. Satan faire sa parski li envie dirige l’univers couma enn chef rival ar Jéhovah. Donc, si li éna enn grand colère contre bann serviteurs Bondié, c’est parski li éna enn grand désir pou dimoune adore li.—Matthieu 4:8, 9.

6. (a) Couma eski question lor souveraineté Jéhovah, concerne sakenn parmi nous? (b) Si nous comprend bien sa question-la, couma sa kapav aide nous pou reste fidèle? (Guette l’encadré, page 12.)

⁶ Eski ou trouvé couma sa question-la concerne ou? Sûrement ou finn remarqué ki ou bizin faire bann grand zefforts pou faire volonté Jéhovah, mais li vaut la peine, parski ou trouvé ki ou gagne bann grand bienfaits en retour. Mais ki ou pou faire si, à cause ou situation, li difficile pou servi Jéhovah, ou-soit même, ou bizin souffert pou contigne suive so bann principes? Ek en plus, ki ou pou faire si ou pensé ki ou pa pé gagne okenn bienfait en retour? Eski ou pou dire ki li pa vaut la peine contigne servi Jéhovah? Ou-bien, eski ou l’amour pou Jéhovah ek ou grand l’appréciation pou so bann qualités, pou pousse ou faire so volonté? (Deutéronome 10:12, 13) Si Jéhovah permette ki Satan faire nous gagne problèmes, c’est parski Li’nn donne sakenn parmi nous possibilité pou réponn personnellement bann l’accusations Satan.—Proverbes 27:11.

‘Kan Dimoune Maltraite Zot’

7. Cite enn tactique ki Satan servi pou essaye détourne nous ar Jéhovah?

⁷ Asterla, anou examine enn tactique ki Satan servi pou essaye prouvé ki seki li’nn dire contre Jéhovah et contre so bann serviteurs, li vrai. Li servi bann fausse accusations. Jésus ti appelle Satan “le père du mensonge.” (Jean 8:44) Nom Diable, veut dire “Calomniateur,” c’est-à-dire enn kikenn ki koz en mal pou gâte réputation enn l’autre dimoune. Sa nom ‘Diable’-la montré ki Satan li-même pli grand calomniateur Bondié, so Parole ek so nom saint. Pou défié souveraineté Jéhovah, li crée bann doutes, li servi bann fausse accusations, ek li koz menti carrément. Li servi même tactiques pou calomnié bann serviteurs Jéhovah ki reste fidèle. Kan Satan faire toute sortes accusations lor zot, li kapav faire enn l’épreuve difficile vinn encore pli dur pou supporté.

8. Couma Satan ti faire Job passe pou mauvais, ek ki l’effet sa inn éna lor li?

⁸ Guetté ki ti arrive Job. So nom veut dire: “Objet de Haine.” Satan ti faire li perdi tou séki li ti bizin pou vive, li ti perdi aussi so bann zenfants, ek so la-santé. Mais en plus, li ti faire Job passe pou enn kikenn ki’nn faire péché ek ki pé gagne punition Bondié. Même si avant Job ti enn dimoune bien respecté, mais avec le temps, bann dimoune, même bann membres so famille ek so bann bon camarades ti commence méprise li. (Job 19:13-19; 29:1, 2, 7-11) En plus, Satan ti servi bann fausse consolateurs pou essaye ‘craze Job avec bann paroles.’ D’abord, zot ti prétann ki Job inn bizin commette bann péchés bien grave, ek après zot ti carrément accuse li, ki li’nn faire le mal. (Job 4:6-9; 19:2; 22:5-10) Sans doute, tousala ti bien décourage Job!

9. Couma Satan ti faire Jésus passe pou enn pécheur?

⁹ Personne pa’nn soutenir souveraineté Jéhovah couma so garçon, Jésus Christ. À cause sa, Satan inn haïr li plus ki tou. Kan Jésus ti vinn lor la terre, Satan ti rode faire li passe pou mauvais lor plan spirituel, pareil couma li ti faire avec Job. Li ti rode faire li passe pou enn pécheur. (Isaïe 53:2-4; Jean 9:24) Dimoune ti dire ki li ti enn kikenn ki boire ziska sou, ki gourmand ek ki li ‘ti éna enn démon.’ (Matthieu 11:18, 19; Jean 7:20; 8:48; 10:20) Zot ti accuse li à tort ek zot ti dire ki li ti blasphème Bondié. (Matthieu 9:2, 3; 26:63-66; Jean 10:33-36) Sa ti faire Jésus beaucoup la peine, parski li ti koné ki sa ti jette l’opprobre lor so Papa. (Luc 22:41-44) Finalement, zot ti attache li lor enn poteau couma enn criminel ki’nn maudit. (Matthieu 27:38-44) Jésus inn garde enn fidélité parfait; grâce à sa, li ti kapav supporte beaucoup “kozé contraire de la part bann pécheurs.”—Hébreux 12:2, 3.

10. Couma eski dans nou l’époque, Satan inn manifesté so la-haine contre le reste oints?

¹⁰ Dans l’époque moderne, Satan inn manifesté la haine contre le reste bann Chrétiens oints aussi. La Bible décrire Satan couma “l’accusateur bann frères [Christ] . . . , ki accuse zot, jour et nuit devant nou Bondié.” (Révélation 12:9, 10) Depuis ki’nn tire Satan dans le ciel ek ki’nn jette li lor la terre, li’nn intensifié so zefforts pou faire bann Chrétiens oints passe pou bann dimoune méprisable, ki péna place dans la société. (1 Corinthiens 4:13) Dans certains pays, éna finn même accuse zot ki zot enn secte dangereux, pareil couma ti accuse bann premiers Chrétiens. (Actes 24:5, 14; 28:22) Couma nous finn trouvé dans l’introduction, finn éna enn fausse propagande lor zot. Pourtant, “à travers la gloire ek à travers déshonneur, à travers bann bon rapports ek bann mauvais rapport,” bann frères Christ, inn faire zefforts pou ‘observe bann commandements Bondié ek pou rann témoignage lor Jésus.’ (2 Corinthiens 6:8; Révélation 12:17) Dans sa travail-la, zot gagne soutien zot bann compagnons, bann membres “les autres brebis.”—Jean 10:16.

11, 12. (a) Pou ki raison dimoune koz en mal lor bann Chrétiens? (b) Dans ki façons enn Chrétien kapav souffert injustement à cause so la-foi?

¹¹ Bien-sûr, c’est pa touletan “à cause la justice” ki dimoune koz en mal lor bann serviteurs Bondié. (Matthieu 5:10) Parfois, nous gagne certains problèmes à cause nou propre l’imperfection. Nous pa kapav plaigné, si kan nous ‘faire péché, dimoune batte nous, ek nous bizin supporte sa.’ Mais, kan enn Chrétien “supporte bann mauvais kitsoz ek souffert injustement pou garde enn bon conscience devant Bondié, sa c’est enn kitsoz agréable” devant Jéhovah. (1 Pierre 2:19, 20) Dans ki circonstances sa kapav arrivé?

¹² Certains finn gagne beaucoup problèmes parski zot finn refuse participe dans bann coutumes ki pa Biblique, à l’occasion enn l’enterrement. (Deutéronome 14:1) Bann jeunes Témoins, bizin supporte zot camarades ki pé bouffonne zot touletan, parski zot reste attaché ar bann principes moral ki Jéhovah inn fixé. (1 Pierre 4:4) Dimoune finn accuse à tort certains parents Chrétiens ek dire ki zot “néglige” zot zenfants, ou-soit faire zot ‘di-tort’. Kifer? Parski sa bann parents-la inn rode bann traitements médical ki pa servi du sang pou zot zenfants. (Actes 15:29) Éna lezot Témoins encore ki’nn rejeté par zot famille ek zot voisins, zis parski zot inn vinn bann serviteurs Jéhovah. (Matthieu 10:34-37) Tou sa bann Témoins ki pé souffert injustement-la, pé suive l’exemple bann prophètes ek l’exemple Jésus li-même.—Matthieu 5:11, 12; Jacques 5:10; 1 Pierre 2:21.

L’Endurance Malgré la Haine

13. Ki kapav aide nous pou garde nou l’équilibre spirituel kan dimoune haïr nous?

¹³ Kan dimoune haïr nous à cause nou la-foi, sa kapav décourage nous, pareil couma Jérémie ek nous kapav pensé ki nous pa pou kapav contigne servi Bondié. (Jérémie 20:7-9) Ki kapav aide nous pou garde nou l’équilibre spirituel? C’est kan nous trouve la situation pareil couma Jéhovah. Pou Li, bann ki reste fidèle kan zot persécuté, zot bann vainqueurs, pa bann victimes. (Romains 8:37) Essaye mazinn bann ki’nn soutenir souveraineté Jéhovah malgré toute sortes affronts ki Satan inn faire zot gagné. Pense à bann zom ek bann femmes couma Abel, Job, Marie, mama Jésus ek lézot serviteurs fidèle dans le passé, ek bann ki’nn vive dans nou l’époque aussi. (Hébreux 11:35-37; 12:1) Médite lor zot conduite fidèle. Sa la-foule Témoins-la invite nous pou gagne la victoire ki réservé pou bann ki pé vaincre le monde par zot la-foi.—1 Jean 5:4.

14. Couma la-prière sincère kapav donne nous la force pou reste fidèle?

¹⁴ Parfois, ‘bann pensées ki tracasse nous pé multiplié dans nous l’esprit.’ Si sa arrivé, nous kapav prié Jéhovah avec tou nou léker; Li pou console nous ek Li pou donne nous la force nécessaire. (Psaume 50:15; 94:19) Li pou donne nous la sagesse ki nous bizin pou faire face avec sa l’épreuve-la. Jéhovah pou aide nous pou rappelle ki dimoune éna la haine injuste pou so bann serviteurs à cause question ki concerne So souveraineté. (Jacques 1:5) Jéhovah kapav aussi donne nous “la paix Bondié ki supérieur à tou [séki enn dimoune] pensé.” (Philippiens 4:6, 7) Sa tranquillité-la pou aide nous reste calme ek ferme dans bann situations bien-bien difficile. Lerla, nous pa pou commence éna bann doutes ek nous pa pou peur. Par so l’esprit, Jéhovah pou soutenir nous dans n’importe ki l’épreuve ki Li permette.—1 Corinthiens 10:13.

15. Ki kapav aide nous pou pa vinn amère kan nous souffert?

¹⁵ Ki kapav aide nous pou pa vinn amère envers bann dimoune ki haïr nous sans raison? C’est kan nous rappelle ki nou bann vrai l’ennemis c’est Satan ek so bann démons. (Éphésiens 6:12) C’est vrai, certains dimoune persécute nous par exprès, mais beaucoup faire sa par ignorance, ou-soit zot manipulé par lézot. (Daniel 6:4-16; 1 Timothée 1:12, 13) Jéhovah envie ki “tou sortes qualités dimoune” gagne possibilité pou “sauvé ek gagne enn connaissance exacte lor la vérité.” (1 Timothée 2:4) Oui, certains ki ti persécute nous avant, zordi zot nou bann frères spirituel parski zot finn remarque nou bon conduite. (1 Pierre 2:12) Nous kapav aussi tire enn bon leçon dans l’exemple Joseph, garçon Jacob. Même si li ti bien souffert à cause so bann demi-frères, li pa ti garde rancune envers zot. Kifer? Parski li ti’nn comprend ki Jéhovah ti pé dirige bann l’événements pou réalise So volonté. (Genèse 45:4-8) Pareillement, nous kapav pé souffert dans enn façon injuste zordi, mais Jéhovah kapav tourne la situation dans enn façon ki pou glorifié so nom.—1 Pierre 4:16.

16, 17. Kifer fodé pa nous tracassé par séki nou bann adversaires kapav faire pou empêche prédication la bonne nouvelle?

¹⁶ Fodé pa ki nous trop tracassé si li parette ki, pendant enn certaine temps, nou bann adversaires pé réussi empêche progrés prédication la bonne nouvelle. Grâce à témoignage ki pé donné dans le monde entier, coumadire Jéhovah pé sakouye bann nations ek pé faire bann kitsoz désirables vinn dans so l’organisation. (Haggaï 2:7) L’Excellent Berger, Christ Jésus ti dire: “Mo bann brebis écoute mo la-voix ek mo konn zot bien, ek zot suive moi. Mo donne zot la vie éternelle, . . . ek personne pa pou rasse zot dans mo la-main.” (Jean 10:27-29) Bann anges aussi pé participe dans sa grand moisson spirituel-la. (Matthieu 13:39, 41; Révélation 14:6, 7) Donc, n’importe ki nou bann adversaires dire ou-soit faire, zot pa pou kapav empêche l’accomplissement volonté Jéhovah.—Isaïe 54:17; Actes 5:38, 39.

¹⁷ Souvent, bann actions nou bann adversaires produire enn l’effet contraire. Par exemple, dans enn région en Afrique, ti éna beaucoup mauvais rumeurs ki ti fané lor bann Témoins de Jéhovah. Bann opposants ti même dire ki zot adore le Diable. À cause sa, chaque fois ki bann Témoins al prêche là-bas, Grace ti cachiette derrière so lakaz ziska zot allé. Enn jour, so prêtre ti montré enn publication bann Témoins de Jéhovah, ek ti dire zot tou ki là, pa lire sa, sinon zot pou kapav perdi zot la-foi. Mais sa ti faire Grace ti envie konn plus. La prochaine fois ki bann Témoins ti passé, au lieu li al cachiette, li ti koz ar zot ek li ti gagne enn copie sa publication-la. Li’nn commence étudié la Bible, ek en 1996, li ti prend baptême. Zordi, Grace consacré so lé-temps pou prêche ar bann dimoune ki, peut-être inn mal-informé zot aussi, lor bann Témoins de Jéhovah.

Fortifié Ou la-⁠Foi Asterla-Même

18. Kifer li bien important ki nous fortifié nou la-foi avant nous gagne bann l’épreuves, ek couma nous kapav faire sa?

¹⁸ Enn coup Satan kapav attaqué ek déclenche la haine injuste contre nous. À cause sa, li bien important ki nous fortifié nou la-foi asterla-même. Couma nous kapav faire sa? Dans enn pays kot bann Témoins inn gagne persécution, guetté ki enn rapport dire: “Éna enn kitsoz ki sûr: Bann Témoins ki éna bann bon l’habitudes spirituel ek ki bien content la vérité, pa gagne problème pou reste fidèle pendant bann l’épreuves. Mais, éna certains ki, même dans ‘l’époque favorable,’ c’est-à-dire kan péna persécution, zot habitué manque réunions, zot pa presque sorti en prédication, ek zot faire compromis dans bann ti kitsoz. Sa bann-la, souvent zot tombé kan zot gagne enn grand l’épreuve.” (2 Timothée 4:2) Si éna bann domaines dans ou la-vie kot ou bizin amélioré, pa tardé pou faire bann changements nécessaire.—Psaume 119:60.

19. Ki fidélité bann serviteurs Bondié prouvé, malgré la haine Satan?

¹⁹ L’intégrité bann vrais adorateurs malgré la haine Satan, prouvé ki souveraineté Jéhovah juste, légitime ek droite. Zot fidélité faire léker Bondié content. Même si bann dimoune dire toute sortes faussetés lor zot, Celui ki pli grand ki la terre ek le ciel, “pa honté kan bannla dire ki Li zot Bondié.” Oui, lor tou sa bann fidèles-la, nous kapav dire sans faute: “Le monde pa ti digne de zot.”—Hébreux 11:16, 38.

[Note]

Eski Ou Kapav Expliqué?

• Kisannla ki responsable la haine injuste ki éna contre bann vrais adorateurs?

• Couma Satan inn servi bann fausses accusations pou essaye détourne Job ek Jésus?

• Couma eski Jéhovah fortifié nous pou nous reste ferme kan nous bizin affronte la haine Satan?

[Encadré/Zimage lor page 12]

Zot Inn Comprend la Véritable Question

En Ukraine, ti éna l’interdiction lor l’activité prédication pendant plus ki 50 ans. Enn Témoin ki reste là-bas ti dire: “Fodé pa ki nous juge situation ki bann Témoins de Jéhovah ti koné, avec enn point de vue humain. . . . La plupart bann officiers gouvernement, ti pé zis faire zot travail. Kan gouvernement inn changé, zot aussi zot inn changé, alors ki nous, nous finn reste pareil. Grâce à la Bible, nous ti comprend kisannla ki ti vrai-même derrière nou bann problèmes.”

“Nous pa ti considère nous zis couma bann victimes innocent ki pé passe misère par bann dimoune dominère. Séki ti aide nous pou enduré, c’est parski nous ti bien comprend question ki ti soulevé dans jardin Éden, ki concerne droit Bondié pou gouverné. . . . Nous ti’nn prend nou position lor enn question ki ti concerne bann l’intérêts Souverain l’univers, ek pa seulement l’intérêts bann dimoune. Nous ti bien comprend ki questions ki ti vrai-même en jeu. Sa ti rann nous forts ek ti aide nous pou garde nou fidélité même dans bann situations bien difficile.”

[Zimage]

Victor Popovych, arrêté en 1970

[Zimage, page 9]

Kisannla ki ti véritable responsable la haine ki ti éna contre Jésus?

[Zimage, page 11]

Job, Marie, ek bann serviteurs Bondié dans l’époque moderne, couma Stanley Jones, inn soutenir souveraineté Jéhovah