Ki Religion Ou Bizin Choisir?

‘TOU la-rivière jette dans la mer.’ Oui, beaucoup dimoune pensé ki tou religions al vers enn seul ek mem Bondié. Pou zot, enn dimoune kapav suive n’importe ki religion ki li envie, pourvu ki li dans enn religion.

C’est enn raisonnement ki kapav parette logique, parski li vrai ki éna enn seul Bondié, le Tout-Puissant. (Isaïe 44:6; Jean 17:3; 1 Corinthiens 8:5, 6) Mais, nou pa kapav ferme lizié lor bann grand différences ek mem bann contradictions ki éna entre beaucoup religions ki prétann servi vrai Bondié. Zot bann pratiques, croyances, enseignements, la-loi ek principes, bien différent. Sa bann différences-la tellement grand, ki li difficile pou enn dimoune ki dans enn religion, pou comprend ou-soit accepté l’enseignements ek croyances lézot dimoune.

De so côté, Jésus ti dire: “Bondié Li enn l’esprit, et tou bann ki adore Li, bizin adore Li avec l’esprit ek la vérité.” (Jean 4:24) Eski nou kapav adore Bondié avec la vérité ek en mem temps accepté bann contradictions ki éna lor l’identité Bondié, lor so bann projets, ek lor façon ki Li envie nou adore Li? Eski ou trouve sa normal pou croire ki façon ki nou adore le Tout-Puissant péna okenn l’importance pou li?

Bann Vrai Chrétiens Dans Premier Siècle ek Dans Nou l’Époque

Dans premier siècle, bann Chrétiens ti éna parfois différent l’opinion lor plusieurs kitsoz. Par exemple, kan Paul ti koz avec bann Chrétiens dans Corinthe, li ti dire: “Mo bann frères, bann ki dans la maison Chloé finn informe moi ki éna bann désaccords parmi zot. Séki mo envi dire par là, séki éna pé dire: ‘Moi, mo appartenir à Paul,’ ‘Mais moi à Apollos,’ ‘Mais moi à Céphas,’ ‘Mais moi à Christ.’”—1 Corinthiens 1:11, 12.

Eski Paul ti ferme lizié lor sa bann différences-la? Eski chaque Chrétien sa l’époque-la ti pé simplement suive so propre chemin pou gagne faveur Bondié? Non, jamais! Paul ti donne sa conseil-la: “Frères, mo encourage zot au nom nou Seigneur Jésus Christ, pou d’accord lor séki zot dire. Fodé pa ki éna divisions parmi zot, mais zot bizin bien uni dans mem pensé ek mem l’opinion.”—1 Corinthiens 1:10.

Bien-sûr, pa kapav force bann dimoune pou éna mem pensée. Sa li possible si seulement zot analyse bann kitsoz avec soin ek si zot tou tire mem conclusion. Donc, pou kapav éna sa l’unité ki Paul inn encouragé-la, enn dimoune bizin étudié Parole Bondié régulièrement ek li bizin éna enn désir sincère pou applique séki li aprann. Eski sa l’unité-la existé zordi? Couma nou finn trouvé enn tipé avant, Bondié finn agir avec so peuple en-tant ki groupe pendant longtemps. Eski li possible pou identifié sa groupe-la zordi?

Bienfaits Ki Nou Gagné Kan Nou Associé Nou Avec Groupe Ki Bondié Approuvé

Dans enn so bann psaumes, David ti demandé: “A Bondié, kisannla pou invité dans to la-tente? Kisannla ki pou reste dans to montagne sacré?” C’est bann questions ki faire réfléchi. David ti réponn limem: “Celui ki reste sans défaut ek ki pratique la justice, ek ki dire la vérité dans so léker.” (Psaume 15:1, 2) C’est enn connaissance exacte lor la Bible ki pou permette enn dimoune identifié religion ki pé faire sa bann kitsoz ki Bondié pé demandé-la. Lerla, si li associé li ar sa groupe-la, li pou profite enn bonne compagnie encourageant parmi bann dimoune ki pa seulement pé adore Bondié dans l’unité, mais aussi avec “l’esprit ek la vérité.”

Bann Témoins de Jéhovah finn démontré ki li possible pou éna mem croyances ek mem conduite, malgré ki nou pé vive dans enn lé-monde divisé. Parmi bann Témoins de Jéhovah zordi, beaucoup sorti dans enn quantité religions ek groupe ethnique sa lé-monde-la. Éna ki ti doute l’existence Bondié, ou-soit zot pa ti croire dans Bondié ditou. Lézot pa ti trop casse la tête ar la religion. Oui, dans sa diversité de religions, cultures ek philosophies-la, zordi zot pé profite l’unité lor plan religieux, enn l’unité ki pa existé okenn place encore lor la terre.

Sa l’unité-la li basé lor Parole Bondié, la Bible. Bien-sûr, bann Témoins de Jéhovah conscient ki zot pa kapav dicté lézot séki zot bizin faire. Mais zot reconnaissant pou privilège ki zot éna pou encourage lézot pou aprann séki éna dans la Bible. Coumsa, sa pou donne zot enn base solide pou choisir couma zot pou adore Bondié. Et beaucoup plus dimoune pou kapav goûte bann bienfaits ki gagné kan adore Bondié “avec l’esprit ek la vérité.”

Zordi, si nou pa faire attention, nou kapav facilement laisse nou gagné par bann mauvais l’influences ek tentations. Alors, li bien important ki nou choisir bann bon fréquentations. La Bible dire ki “celui ki marche avec bann dimoune sage pou vinn sage” ek “bann mauvais fréquentations gâte bann bon l’habitudes.” (Proverbes 13:20; 1 Corinthiens 15:33) Kan nou fréquente bann vrai adorateurs Bondié, sa li enn protection pou nou. À-cause sa, la Bible donne nou sa rappel-la: “Anou considère sakenn nou camarade, pou encourage l’amour ek bann bon actions, sans ki nou néglige nou bann rassemblements, couma certains éna l’habitude, mais anou encourage sakenn parmi nou, ek encore plus, à mesure ki nou trouve jour-la pé approché.” (Hébreux 10:24, 25) Oui, li vraiment enn bénédiction kan bann camarades sincère, bann frères ek soeurs spirituelles, aide zot entre zotmem avec amour pou assume zot bann responsabilités devant Bondié.

Enn monsieur ki appelle Ottmar, partage sa l’opinion-la. Ottmar finn grandi dans enn famille Catholique en Allemagne. Mais depuis bien jeune, li ti’nn arrête al l’église. Li expliqué: “Avant mo rentre dans l’église, mo ressenti enn vide; et kan mo sorti, mo toujours ressenti mem vide.” Mais mem sa, li finn garde so la-foi en Bondié. Enn jour, li’nn rentre en contact avec bann Témoins de Jéhovah, ek li finn gagne la conviction ki c’est zot ki bann vrai serviteurs Bondié. Li’nn trouvé ki li bizin associé li avec zot. Zordi li dire: “Mo actif dans enn l’organisation international, et mo ressenti enn calme dans mo l’esprit ek dans mo léker. Mo pé gagne l’aide nécessaire pou gagne enn connaissance pli exacte lor la Bible. C’est enn kitsoz ki éna beaucoup valeur pou moi.”

Enn Invitation pou Bann Ki Pé Rodé

Kan bann dimoune ki d’accord entre zot, zot travaille ensemble couma enn groupe, zot kapav faire enn pli bon travail, ki bann ki travail tousel sans l’aide lézot. Par exemple, zis avant li quitte la terre, Jésus ti donne so bann disciples sa bann instructions-la: “Allé ek faire bann disciples parmi tou bann nations, baptise zot au nom du Père, au nom du Fils et au nom de l’esprit saint, enseigne zot pou suive tou séki mo finn dire zot.” (Matthieu 28:19, 20) Couma eski ti pou kapav accompli enn grand travail coumsa, si pa ti éna okenn direction, ni okenn organisation? Si enn dimoune ti servi Bondié tousel sans lézot, eski li ti pou kapav obéir sa bann instructions Jésus-la?

L’année passé, bann Témoins de Jéhovah finn distribué dans lé-monde entier 91,933,280 livres ek brochures ki basé lor la Bible. Et zot finn laisse plus ki 697,603,247 magazines, séki finn permette zot transmette message Parole Bondié à plusieurs centaines millions dimoune dans 235 pays. Sa montré bien ki quantité, enn groupe ki bien uni ek organisé kapav accompli, comparé ar zefforts individuel ki enn dimoune faire, sans l’aide personne.

Bann Témoins de Jéhovah pa finn zis distribué bann publications Biblique, mais zot finn dirige aussi bann cours Biblique gratuitement, pou aide bann dimoune bien comprend séki Bondié pé demann zot. L’année dernière, zot finn dirige en moyenne, 5,726,509 études Biblique toulé-semaine, soit avec enn dimoune ou avec plusieurs dimoune en mem temps. Sa l’instruction Biblique-la finn donne beaucoup dimoune enn base solide ki permette zot décidé couma zot bizin adore Bondié. Nou invite ou aussi pou aprann séki Bondié pé demann ou dans so Parole, la Bible. Lerla, ou pou kapav faire ou choix.—Éphésiens 4:13; Philippiens 1:9; 1 Timothée 6:20; 2 Pierre 3:18.

Si ou envie faire Bondié plaisir, li bien important ki ou adore Li en groupe, mais pa avec n’importe ki groupe religieux. Fodé pa ki ou laisse ou choix influencé par bann fausse doctrines ou-soit par séki ou tendé. Laisse ou guidé par enn connaissance exacte de la Bible. (Proverbes 16:25) Aprann ki Bondié pé atann de la vrai religion. Compare sa avec ou bann croyances. Lerla faire le bon choix.—Deutéronome 30:19.

[Zimage lor page 4]

Bann Témoins de Jéhovah profite l’unité dans enn lé-monde ki divisé