Kan Volonte Bondye Pu Fer lor Later

KAN Jésus ti anseyn so bann disip pu priye, “Ki to volonte fer lor later, parey kuma dan lesyel,” li ti pe dir sa par experyans, parski li ti’nn viv dan lesyel avek so Papa. (Matthieu 6:​10) Pandan sa letan-la, li ti gayn lokazyon viv enn lepok, kot tu kitsoz lor later ek dan lesyel ti an armoni avek volonte Bondye. (Jean 1:​18; 3:​13; 8:​42) Sa lepok-la, Bondye ek so Garson ti byin satisfe avek seki zot ti akonpli.​—Proverbes 8:​27-​31.

Bann premye kreasyon Bondye ti bann kreatir spirityel, “so bann anz, byin pwisan, ki realiz so parol.” Zot ti bann ‘minis Bondye, ki ti fer so volonte,’ ek zot pe fer parey zordi. (Psaumes 103:20, 21) Eski bann anz ti lib pu exprim zotmem ek pu fer zot prop swa? Wi. Apre kreasyon later, “bann garson Bondye ti kriye pu felisit [Bondye].” (Job 38:7) Sa ti montre ki zot ti apresye personelman volonte Bondye, ek zot ti viv an akor avek sa volonte-la.

Apre ki Li’nn kre later, Bondye ti prepar li pu ki dimunn kapav res lor la. Ek lerla, Li ti kre premye zom ek premye fam. (Genèse, sapit 1) Eski Bondye ti merit felisitasyon pu sa usi? La Bib dir nu: ‘Apre sa, Bondye truve ki tu seki Li’nn fer, ti byin bon,’ wi, pa ti ena okenn defo, tu ti parfe.​—Genèse 1:​31.

Ki volonte Bondye ti ete pu nu premye paran ek pu zot bann desandan? Dapre Genèse 1:28, sa volonte-la usi ti byin bon. Nu lir: “Bondye finn beni zot ek Li finn dir zot: ‘Gayn buku zanfan, ranpli later ek egzers enn kontrol lor la, ek egzers enn kontrol usi lor bann pwason dan lamer, lor bann kreatir ki anvole dan lesyel, ek lor tu kreatir vivan ki buze lor later.’ ” Pu fer seki Bondye pe demann zot, nu premye paran ti pu bizin kontiyn viv, pu tuletan, pa zis zot, me zot bann desandan usi. Zot pa ti pu konn maler, ni linzistis, ni sagrin, ni lamor.

Wi, sa ti enn lepok kot volonte Bondye ti pe fer dan lesyel ek lor later. Tu seki ti viv an armoni avek volonte Bondye ti pu pran buku plezir pu fer sa. Me malerezman ki’nn arive?

Enn kikenn finn defye volonte Bondye. Mem si Bondye ti kapav relev sa defi-la, sa finn amenn sufrans ek tristes, ki bann dimunn pe ankor kone ziska zordi. Ek sa finn usi met bann dimunn dan konfizyon konsernan volonte Bondye pu limanite. Nu tu, nu pe konn sa mem sufrans ek tristes-la. Me ki sa defi-la sa?

Volonte Bondye Pandan enn Peryod Rebelyon

Enn parmi bann kreatir spirityel Bondye, finn al truve ki li kapav boykot volonte Bondye, pu li gayn bann lavantaz personel. Plis li reflesi lor la, plis li remarke ki se enn kitsoz posib, ek sa kumans atir li deplizanpli. (Jacques 1:14, 15) Sirman li finn rezonn kumsa: ‘Si mo fer premye zom ek premye fam ekut mwa olye ki Bondye, ebyin Bondye pu oblize toler mwa kuma so rival.’ Kitfwa usi, sa kreatir-la finn panse ki Bondye pa pu kapav tuy zot, parski si Li fer sa, so proze pu tom dan delo. Alor dapre li, Jéhovah pu bizin modifye so proze, toler lotorite sa kreatir spirityel-la, ar ki bann dimunn pu kumans sumet asterla. Donk, se pa pu nanyin ki sa kreatir spirityel-la, li apel Satan, setadir, “Opozan.”​—Job 1:6, not.

Dan lintansyon pu realiz so dezir, Satan apros Ève. Li ankuraz li pu inyor volonte Bondye ek viv indepandan ar Bondye. Li dir li: “Zot pa pu mor, zot. . . . Zot pu vinn parey kuma Bondye, zot pu konn seki bon ek seki move.” (Genèse 3:1-5) Kan li tann sa, Ève inn panse ki sa pu donn li plis liberte. Donk li’nn aksepte seki Satan pe ofer li, avek lespwar ki li pu viv pli byin. Apre sa, li finn reysi konvink so mari usi.​—Genèse 3:6.

Se pa sa ki ti volonte Bondye pu Adam ek Ève. Sa ti plito zot volonte; zot inn fer seki zot ti anvi. Asterla, sa pu ena bann konsekans byin grav. Bondye ti averti zot ki, si zot dezobeir, zot pu konn lamor. (Genèse 3:3) Zot pa finn kre pu viv indepandan ar Bondye; akoz sa, zot pa pu kapav viv ere. (Jérémie 10:23) Pa fini, zot pu vinn inparfe, ek zot pu transmet sa linperfeksyon-la ek lamor ar zot bann desandan. (Romains 5:12) Satan pa pu kapav anpes tusala arive.

Eski sa bann kitsoz ki’nn arive-la, finn sanz proze Bondye, setadir so volonte pu limanite ek later? Non. (Isaïe 55:​9-​11) Me sa finn sulev sertenn kestyon ki pu bizin reponn: Eski dimunn kapav vremem “vinn kuma Bondye, ek konn seki bon ek seki move,” parey kuma Satan ti pretann? Nu kapav poz sa kestyon-la kumsa: Mem si donn nu kantite letan ki bizin, eski vremem nu pu kapav fer la diferans ant seki bon ek seki move, ant seki pu fer nu dibyin ek seki pu fer nu ditor, dan tu domenn nu lavi? Eski Bondye merit ki nu obeir Li dan tu kitsoz, parski se selman so reyn ki pli bon? Eski Li merit ki nu viv konpletman an armoni avek so volonte? Kuma u pu reponn sa bann kestyon-la?

Devan tu so bann kreatir intelizan ki ti pe asiste sa bann evennman-la, ti ena enn sel fason ki Bondye ti kapav reponn sa bann kestyon-la: Se les tu bann ki anvi viv indepandan ar Bondye, gete si zot pu reysi. Si Bondye ti sinpleman tuy zot, sa pa ti pu regle sa bann kestyon-la. Parkont, si Bondye ti les bann dimunn viv zot lavi pandan enn sertenn letan, li ti pu kler lerla, si vremem limanite kapav viv indepandan ar Bondye. Ebyin, se seki Bondye ti desid fer. Nu konpran sa kan Li ti dir Ève ki li pu gayn zanfan. Donk, la famille humaine ti pu pran nesans, ek grasa sa desizyon Bondye-la, nu existe zordi!​—Genèse 3:​16, 20.

Me, sa pa vedir ki Bondye ti pu permet bann dimunn ek Satan fer tu seki zot anvi. Bondye pa’nn renons a so suverennte, ni Li’nn les so proze tonbe. (Psaume 83:18) Li ti fer konpran sa klerman, kan Li ti predir ki latet Satan pu kraze, ek tu bann move konsekans so rebelyon pu anleve. (Genèse 3:15) Donk, depi okumansman-mem, Bondye ti promet ki Li pu amenn enn sulazman pu bann dimunn.

Apre zot pese, nu premye paran finn elwayn zotmem ek zot bann fitir desandan ar reyn Bondye. Pu anpes limanite konn tu bann move konsekans ki ti pu vini apre, Bondye ti pu bizin inpoz so volonte lor tu seki bann dimunn fer. Ek si Li fer sa, se kumadir Li pe anpes zot sey viv indepandan ar Li.

Byinsir, sak dimunn ti kapav swazir pu sumet ar reyn Bondye. Zot ti kapav aprann kone seki volonte Bondye vedir pu zot, dan zot lepok. Ek zot ti kapav viv an armoni avek sa volonte-la, otan ki posib. (Psaume 143:10) Me, zot ti pu kontiyn gayn bann problem, osi lontan ki pa regle kestyon ki ti suleve an Éden, ki swadizan dimunn kapav viv indepandan ar Bondye.

Apre Adam ek Ève, pa finn bizin atann lontan pu truv bann konsekans kan dimunn desid par limem. Premye garson Adam ek Ève, Caïn, ti tuy so frer Abel, parski “bann aksyon [Caïn] ti move, me so frer ti fer seki drwat.” (1 Jean 3:​12) Sa pa ti volonte Bondye, parski Li ti averti Caïn ek plitar Li ti pini li. (Genèse 4:​3-​12) Caïn ti swazir lindepandans ki Satan ti ofer; donk li “ti sorti [ar Satan].” Lezot dimunn usi ti fer parey.

Plis ki 1,500 ans apre kreasyon bann dimunn, “later ti gate devan lizye vre Bondye ek later ti ranpli ar vyolans.” (Genèse 6:​11) Bondye ti bizin azir vit pu anpes later gate konpletman. Alor, Li finn amenn enn deliz partu lor later. Selman enn fami ki ti pe fer Bondye plezir, ti’nn sape—Noé, so madam, so bann garson, ek zot bann madam. (Genèse 7:1) Nu tu nu zot bann desandan.

Depi lepok Noé ziska zordi, Bondye finn donn bann dimunn sinser, la posibilite pu aprann konn so volonte. Pu sa, Li finn fer ekrir so parol pu bann ki rod so direksyon. Sa bann parol inspire-la truv dan la Bib. (2 Timothée 3:​16) Li finn donn bann dimunn fidel, privilez pu ena bann relasyon avek Li, ek mem pu vinn so kamarad. (Isaïe 41:8) Pa fini, Li finn donn zot la-fors ki zot bizin pu siport bann grav difikilte ki limanite finn kone, pandan tu sa letan ki zot pe viv indepandan ar Bondye. (Psaume 46:1; Philippiens 4:​13) Nu vreman rekonesan pu tusala, pa vre?

“Ki To Volonte Fer”​—Konpletman

Mem si Bondye inn fer buku kitsoz ziska ler, Li pankor akonpli so volonte pu limanite konpletman. Lapot Pierre ti ekrir: “Dapre so promes, nu pe atann bann nuvo lesyel ek enn nuvo later kot pu ena la zistis.” (2 Pierre 3:​13) Sa bann parol sinbolik-la fer referans ar enn nuvo guvernman ki pu reyn lor limanite, ek enn nuvo sosyete dimunn ki sumet ar sa guvernman-la.

Dan enn langaz pli kler, profet Daniel ti ekrir: “Dan lepok sa bann le-rwa-la, Bondye ki dan lesyel pu etabli enn rwayom ki zame pa pu ranverse. .  . . [Sa rwayom-la] pu kraz tu bann lezot rwayom ek li pu detrir zot. Apre sa, li pu egziste pu enn peryod letan indefini.” (Daniel 2:​44) Sa profesi-la pe predir la fin sa sistem zordi-la, enn sistem ki inposib pu redrese. Li pu ranplase par Rwayom, uswa guvernman Bondye. Eski sa li pa enn bon nuvel sa? Zordi, lager ek latitid egois bann dimunn ki finn ranpli lemond ar vyolans, pe menas pu gat later ankor. Me tre byinto, tusala pu fini.

Kan sa bann kitsoz-la pu arive? Bann disip Jésus ti demann li: “Kan sa bann kitsoz-la pu arive, ek ki siyn pu montre to prezans ek [ki nu pe viv] lepok la fin sa lemond-la?” Parmi bann kitsoz ki ti pu ena, Jésus ti dir: “Sa bonn nuvel lor rwayom-la pu prese partu kot dimunn reste lor later kuma enn temwaynaz pu tu bann nasyon; ek lerla la fin pu vini.”—Matthieu 24:3, 14.

Partu, bann dimunn konn byin travay predikasyon ki bann Temwin Jéhovah pe fer dan lemond antye. Sirman, u’nn remark zot dan u vwazinaz. Dan so liv These Also Believe [Sa Bann-la Usi, Zot Krwar], Profeser Charles S. Braden finn ekrir: “Bann Temwin Jéhovah finn ranpli later konpletman avek zot temwaynaz. . . . Pena enn lot grup relizye, apart zot, ki finn montre otan zel ek perseverans pu propaz la bonn nuvel lor Rwayom Bondye.” Zordi, bann Temwin pe pres dan plis ki 230 peyi ek dan anviron 400 lang. Sa travay profetik-la zame pa finn akonpli, fason ki li pe akonpli zordi, atraver later. Sa se enn parmi enn kantite prev ki montre, ki ler finn aprose pu ki Rwayom Bondye ranplas bann guvernman ki lor later.

Jésus ti dir so bann disip pres la bonn nuvel lor Rwayom Bondye. Ebyin, se pu sa Rwayom la-mem ki Li ti anseyn zot pu priye, kan li ti dir: “Ki to rwayom vini. Ki to volonte fer lor later, parey kuma dan lesyel.” (Matthieu 6:​10) Wi, se atraver sa Rwayom-la ki Bondye pu realiz so proze, setadir so volonte pu limanite ek later.

Ki sa vedir? Anu les Révélation 21:​3, 4 reponn nu sa: “Mo finn tann enn lavwa for ki sorti kot tronn [Bondye], dir: ‘Gete! Latant Bondye li avek bann dimunn, ek Li pu res avek zot, ek zot pu vinn so pep. Ek Bondye Limem pu avek zot. Lerla, Li pu suy tu larm dan zot lizye, ek lamor nepli pu egziste. Nepli pu ena dey, plore, ek duler. Bann kitsoz avan finn disparet.’ ” Wi, volonte Bondye pu fer lor later ek dan lesyel​—dan enn fason konple.a Eski u pa ti pu kontan profit sa bann byinfe-la?

[Notes]

[Zimaz lor paz 6]

Kan viv indepandan ar Bondye, maler!