666​—Pa Zis enn Puzzle

“Pu ki donn zot enn mark lor zot lamin drwat uswa lor zot fron, ek pu ki personn pa kapav aste uswa vande eksepte selwi ki ena mark la bet sovaz, so non, uswa nimero so non. Se isi ki bizin ena la sazes: Les selwi ki ena lintelizans kalkil nimero sa bet sovaz-la, parski se enn nimero imin, ek so nimero se sis-san-swasant-sis.” —Révélation 13:17, 18.

PENA buku size Biblik ki finn interes otan bann dimunn ki la profesi lor la mark, uswa lor non la “bet sovaz”—nimero 666. Pu sertin sa mark-la se enn mister! Dan televizyon, lor Internet, dan bann fim, liv ek magazinn, finn ena buku sipozisyon lor sa mark-la.

Sertin dimunn panse ki nimero 666 idantifye ‘l’antichrist’ mansyone dan la Bib. Lezot dir ki se enn mark idantite obligatwar lor enn dimunn, swa enn tatwaz uswa enn puce électronique codée, pu idantifye li kuma enn serviter sa bet sovaz-la. Ena lezot ankor ki krwar ki nimero 666 idantifye bann pap dan la relizyon Catholique. Kifer? An latin, tit ofisyel le pap se Vicarius Filii Dei (Vicaire du Fils de Dieu). Zot inn ranplas bann let alfabet dan sa tit-la par bann sif Romain ek zot inn aranz bann sif-la inpe pu gayn 666. Dapre sertin, kapav usi kalkil sa mem nimero-la apartir non Latin Lanperer Romain Dioclétien ek apartir non César Néron an Hébreu.a

Dan prosin lartik, nu pu truve ki sa bann interpretasyon egzazere ki dimunn finn invante-la, zot byin diferan avek seki la Bib dir konsernan mark la bet sovaz. La Bib dir ki bann dimunn ki ena sa mark-la, zot pu detrir kan Bondye pu amenn la fin lor sa lemond-la. (Révélation 14:9-11; 19:20) Donk, kan nu konpran seki nimero 666 vedir, nu pa pe sinpleman eklersi enn mister. Erezman, dan so gran lamur, Jéhovah, ki lasurs lalimyer spirityel, pa’nn les so bann serviter dan nwarte lor sa size inportan-la.—2 Timothée 3:16; 1 Jean 1:5; 4:8.

[Notes]