‘Servi Parol Bondye Kuma Bizin’

“Fer tu to posib pu paret devan Bondye kuma enn zom apruve, enn zuvriye ki pena nanyin pu onte, ki konn servi parol la verite kuma bizin.”—2 TIMOTE 2:15.

1, 2. (a) Kifer bann travayer bizin zuti? (b) Ki travay bann Kretyin ena pu fer, ek kuma zot montre ki zot rod Rwayom Bondye avan tu kitsoz?

BANN travayer bizin zuti pu fer zot travay. Me selman, li pa sifi ki ena ninport ki zuti. Pu fer enn travay, li neseser ki enn travayer ena zuti ki bizin, ek ki li servi li dan enn bon fason. Par egzanp, si u pe ranz enn godam ek u anvi kulut de plans ansam, u pu bizin plis ki enn marto ek inpe kulu. U pu bizin kone kuma met enn kulu dan dibwa, san ki u kabos kulu-la. Li pu byin difisil pu met enn kulu dan dibwa, si u pa kone kuma pu servi enn marto; sa kapav mem agas u. Me kan nu konn servi byin bann zuti, sa ed nu fer bann bon travay ki donn nu satisfaksyon.

² Antan ki Kretyin, nu ena enn travay pu fer. Se enn travay ki ena pli gran linportans ki tu kitsoz. Zezi Kris ti ankuraz so bann disip pu ‘rod rwayom avan tu kitsoz.’ (Matye 6:33) Kuma nu kapav fer sa? Enn fason, se kan nu zele dan predikasyon ek dan laktivite pu fer bann disip. Enn lot fason, se kan nu baz nu minister antyerman lor Parol Bondye. Ek enn trwazyem fason, se kan nu ena enn bon kondwit. (Matye 24:14; 28:19, 20; Akt 8:25; 1 Pyer 2:12) Pu nu efikas ek nu truv lazwa dan nu laktivite spirityel, nu bizin ena bann bon zuti ek kone kuma pu servi zot byin. Dan sa domenn-la, lapot Pol finn les enn legzanp remarkab, parski antan ki Kretyin, li ti enn bon travayer. Li ti ankuraz lezot Kretyin pu imit li. (1 Korintyin 11:1; 15:10) Donk, ki nu kapav aprann lor Pol, ki ti fer mem travay ki nu pe fer zordi?

Pol—Enn Proklamater Zele

3. Kifer nu kapav dir ki lapot Pol ti enn travayer zele pu pres Rwayom Bondye?

³ Ki kalite travayer Pol ti ete? Li ti sertennman enn travayer zele. Li ti fer bann gran zefor pu fer buku dimunn konn la bonn nuvel dan enn gran rezyon otur lamer Méditerranée. Li ti donn enn rezon kifer li ti pres Rwayom Bondye avek zel kumsa. Sa travayer infatigab-la ti dir: “Si mo pe anons la bonn nuvel, mo pa pe fer sa pu glorifye mwa, me se enn nesesite ki’nn inpoze lor mwa. Wi, maler lor mwa si mo pa anons la bonn nuvel!” (1 Korintyin 9:16) Eski Pol ti interese pu sov zis so lavi? Non. Li pa ti enn dimunn egois. Okontrer, li ti anvi ki lezot usi profit la bonn nuvel. Li ti ekrir: “Me, mo fer tu kitsoz akoz la bonn nuvel, pu ki mo kapav ena enn par ladan ansam avek lezot.”—1 Korintyin 9:23.

4. Ki zuti ena plis valer pu bann Kretyin?

⁴ Lapot Pol ti enn travayer modes; li ti kone ki li pa kapav kont zis lor so prop kapasite. Parey kuma enn sarpantye bizin enn marto, Pol ti bizin ena zuti apropriye pu grav lanseynman Parol Bondye dan leker bann dimunn ki ti pe ekut li. Ki zuti prinsipal li ti servi? Se Parol Bondye, Labib. Zordi usi parey, Labib se zuti prinsipal ki nu servi pu fer bann disip.

5. Pu nu vinn bann minis efikas, ki nu bizin fer, anplis ki nu sit bann tex Labib?

⁵ Pol ti kone ki, pu li kapav servi Parol Bondye kuma bizin, li ti bizin fer plis ki zis sit bann tex. Li ti servi la “kapasite pu konvink bann dimunn.” (Akt 28:23) Kuma li ti fer sa? Pol ti servi Parol Bondye dan enn fason efikas pu konvink buku dimunn, pu ki zot aksepte la verite lor Rwayom Bondye. Li ti rezonn avek zot. Pandan trwa mwa dan enn sinagog dan lavil Efez, Pol “ti fer bann diskur ek li ti servi la kapasite pu konvink bann dimunn an rapor avek rwayom Bondye.” Byin ki “sertin ti ena enn leker dir ek zot pa ti krwar,” lezot ti ekute. Ki rezilta minister Pol ti ena dan Efez? “Parol Zeova ti kontiyn progrese ek buku dimunn ti ekut li.”—Akt 19:8, 9, 20.

6, 7. Kuma Pol ti glorifye so minister, ek kuma eski nu kapav fer parey?

⁶ Pol ti pres Rwayom Bondye avek zel ek li ti ‘glorifye so minister.’ (Romin 11:13) Kuma li ti fer sa? Li pa ti interese pu elev limem, ni li ti onte pu fer tu dimunn kone ki li enn serviter Bondye. Okontrer, pu Pol, pa ti ena pli gran loner ki akonpli so minister. Pol ti konn servi Parol Bondye dan enn fason efikas. Bann bon rezilta ki li ti gayne dan so laktivite ti ankuraz lezot, ek sa ti donn zot enn motivasyon pu akonplir zot minister afon. Dan sa fason-la usi, Pol ti glorifye so minister.

⁷ Parey kuma Pol, nu’si nu kapav glorifye nu minister. Kuma? Kan nu servi Parol Bondye suvan ek kan nu fer sa dan enn fason efikas. Dan tu domenn nu minister, nu bizin ena lobzektif pu partaz enn pasaz Labib avek pli buku dimunn posib. Kuma eski nu kapav fer sa ek servi nu kapasite pu konvink bann dimunn? Ena trwa fason inportan: (1) Diriz latansyon bann dimunn lor Parol Bondye dan enn fason ki zot pu respekte li. (2) Avek takt, explike seki Labib dir ek montre kuma sa aplik avek seki nu pe anseyne. (3) Rezonn lor Labib dan enn fason ki pu konvink bann ki pe ekut nu.

8. Ki zuti nu ena zordi pu pres Rwayom Bondye, ek kuma u finn servi zot?

⁸ Bann proklamater ki pres Rwayom Bondye zordi, zot ena bann zuti ki Pol pa ti ena kan li ti akonpli so minister. Sa bann zuti-la se bann liv, peryodik, brosir, fey invitasyon, trak, ek bann kaset odyo ek video. Dan syek pase, ti servi usi bann kart temwaynaz, fonograf, loto avek oparler, ek ti pas bann program dan radyo. Byinsir, Labib res nu zuti prinsipal ek nu bizin servi byin sa zuti-la.

Nu Minister Bizin Baze Antyerman lor Parol Bondye

9, 10. Ki nu kapav aprann dan konsey ki Pol ti donn Timote, lor fason ki nu bizin servi Parol Bondye?

⁹ Parol Bondye, li enn zuti efikas. Kuma nu kapav servi li byin? Nu kapav fer sa, kan nu pran kont konsey ki Pol ti donn so konpaynon Timote. Li ti dir li: “Fer tu to posib pu paret devan Bondye kuma enn zom apruve, enn zuvriye ki pena nanyin pu onte, ki konn servi parol la verite kuma bizin.” (2 Timote 2:15) Ki sa vedir “servi parol la verite kuma bizin”?

¹⁰ An Grek, “servi kuma bizin” vedir “kup drwat,” uswa “tras enn semin drwat.” Se zis dan sa konsey Pol-la ki nu truv sa lexpresyon-la dan bann Lekritir Grek Kretyenn. Kapav servi mem lexpresyon pu dekrir enn laburer ki tras enn laliyn drwat dan so karo. Si enn laburer ki ena lexperyans, tras enn laliyn an traver, sa pu fer li gayn onte. Pu ki Timote vinn “enn zuvriye ki pena nanyin pu onte,” Pol ti rapel li, ki li bizin pa ekarte ar bann vre lanseynman Parol Bondye. Fode pa li les so lopinyon personel inflyans so lanseynman. Li ti bizin baz so predikasyon ek so lanseynman zis lor Labib. (2 Timote 4:2-4) Dan sa fason-la, li ti pu ed bann dimunn sinser pu ena mem fason panse ki Zeova, ek pu rezet bann lanseynman lemond. (Kolosyin 2:4, 8) Zordi usi, nu bizin fer parey.

Nu Bizin Ena enn Bon Kondwit

11, 12. Ki lefe nu kondwit ena lor fason ki nu servi Parol Bondye kuma bizin?

¹¹ Kan nu anseyn la verite ki ena dan Labib, nu pe servi Parol Bondye kuma bizin. Me, nu bizin fer plis ki sa. Nu bizin ena enn kondwit ki an armoni avek Parol Bondye. “Nu bann ki travay ansam avek Bondye,” donk, fode pa ki nu bann travayer ipokrit. (1 Korintyin 3:9) Labib dir: “Me, twa ki pe anseyn enn lot dimunn, eski to pa anseyn tomem? Twa, ki pe prese: ‘Pa kokin,’ eski tomem to kokin? Twa, ki dir: ‘Pa komet ladilter,’ eski tomem to komet ladilter? Twa, ki ena degu pu bann zidol, eski tomem to al kokin dan tanp?” (Romin 2:21, 22) Antan ki bann travayer Bondye dan nu lepok, enn fason ki nu servi Parol Bondye kuma bizin se kan nu pran kont sa konsey-la: “Fer Zeova konfyans avek tu to leker, ek pa kont lor to prop lintelizans. Dan tu seki to fer, pran Li kont, ek Li, Li pu fer to bann semin vinn drwat.”—Proverb 3:5, 6.

¹² Ki rezilta nu kapav atann si nu servi Parol Bondye kuma bizin? Anu egzaminn puvwar ki Parol Bondye kapav ena lor lavi bann dimunn sinser.

Parol Bondye Ena Puvwar pu Transform Lavi

13. Ki rezilta enn dimunn gayne dan so lavi kan li aplik Parol Bondye?

¹³ Kan dimunn aksepte lotorite ki mesaz Parol Bondye ena, sa inflyans zot dan enn fason extraordiner. Sa pus zot pu fer bann sanzman remarkab dan zot lavi. Pol ti truve kuma Parol Bondye ti azir ek ki bon lefe sa ti ena dan lavi bann dimunn ki ti vinn Kretyin dan lavil Tesalonik. Pu sa rezon-la li ti dir zot: “Nu’si, nu pa fini remersye Bondye, parski kan zot finn tann Parol Bondye ki nu finn anonse, zot pa finn aksepte li kuma parol bann zom, me kuma li ete vremem, kuma Parol Bondye, ki azir dan zot lavi, zot ki bann krwayan.” (1 Tesalonisyin 2:13) Pu sa bann Kretyin-la—anrealite, pu tu bann vre disip Kris—pa kapav konpar rezonnman feb bann imin, avek gran sazes Bondye. (Izai 55:9) Bann Kretyin Tesalonik ti “aksepte la parol atraver buku leprev, avek lazwa ki lespri sin done.” Zot ti vinn bann legzanp pu buku krwayan.—1 Tesalonisyin 1:5-7.

14, 15. Ki puvwar mesaz ki sorti dan Parol Bondye ena, ek kifer?

¹⁴ Zeova enn Bondye ki ena enn gran puvwar. So Parol usi ena enn gran puvwar. Sa Parol-la sorti ar enn “Bondye vivan,” enn Kikenn ki, par so parol, “lesyel ti kre.” Se enn parol ki tuzur ‘reysi dan kitsoz ki finn avoy li fer.’ (Ebre 3:12; Psom 33:6; Izai 55:11) Enn Biblis ti fer sa komanter-la: “Pu Bondye, so Parol se enn kitsoz ki form parti an Limem. Li pa rezet sa parol-la, kumadir Li pena okenn rapor avek li. . . . Donk, se pa enn parol mor, ki insansib avek seki arive apre ki finn pronons li. Okontrer li form enn lyin avek Bondye.”

¹⁵ Ki puvwar mesaz ki sorti dan Parol Bondye ena? Li ena enn gran puvwar. Se pu sa rezon-la ki Pol ti ekrir: “Parol Bondye vivan ek li ena puvwar; li pli fite ki enn lepe ki kup de kote ek li perse ziska ki li diviz nam ek lespri, ek bann zwin ek zot lamwel, ek li kapav dekuver bann panse ek bann lintansyon ki ena dan leker.”—Ebre 4:12.

16. Ki kantite Parol Bondye kapav sanz enn dimunn?

¹⁶ Mesaz ki ena dan Parol Bondye “pli fite ki enn lepe ki kup de kote.” Donk, li ena enn puvwar telman extraordiner pu tus enn dimunn dan pli profon limem, ki li pli pwisan ki ninport ki instriman uswa zuti ki bann imin finn fer. Parol Bondye pers bann parti pli profon ki ena dan enn dimunn ek kapav sanz seki li ete ofon limem. Sa inflyans seki dimunn-la panse ek seki li kontan, ek fer li vinn enn travayer ki Bondye apruve. Se enn zuti byin pwisan, pa vre?

17. Explike kuma Parol Bondye ena puvwar pu transform dimunn.

¹⁷ Parol Bondye fer kone seki enn dimunn ete anrealite, ofon limem. Li fer diferans ant seki enn dimunn ete vremem, ek seki dimunn-la panse li ete, uswa zis seki li permet lezot truve. (1 Samyel 16:7) Mem enn move dimunn kapav parfwa kasyet seki li ete vremem, ek fer sanblan li bon uswa li enn dimunn ki kontan Bondye. Bann move dimunn fer sanblan ki zot bon, pu kasyet zot move lintansyon. Bann ki ena lorgey, fer krwar zot ena limilite, me anrealite, zot anvi gayn ladmirasyon ek konpliman lezot. Me, kan Parol Bondye revel seki ena vremem dan leker enn dimunn, si sa dimunn-la ena limilite, sa kapav pus li pu rezet so vye personalite ek ‘met lor li enn nuvo personalite ki finn kre dapre volonte Bondye dan vre zistis ek vre fidelite.’ (Efezyin 4:22-24) Lanseynman Parol Bondye kapav usi transform dimunn timid ek fer zot vinn bann Temwin Zeova ki pres Rwayom Bondye avek kuraz ek zel.—Zeremi 1:6-9.

18, 19. Servi lexperyans ki ena dan sa de paragraf-la, uswa seki u’nn gayne personelman dan predikasyon, pu montre kuma la verite ki ena dan Labib kapav sanz latitid enn dimunn.

¹⁸ Puvwar ki Parol Bondye ena pu transform lavi, ena enn bon lefe lor bann dimunn partu. Par egzanp, bann proklamater ki res Cambodge, dan lavil Phnom Penh, ti al pres dan distrik Kompong Cham, de fwa par mwa. Se enn fam ki ti pret dan sa landrwa-la, ek li ti tann lezot pret koz kont bann Temwin Zeova. Alor, li ti fer laranzman pu ki li kapav zwenn bann Temwin, prosenn fwa ki zot vinn vizit so distrik. Kan li ti zwenn zot, li ti poz kestyon enn deryer lot lor selebrasyon bann fet. Li ti ekut zot avek atansyon pandan ki bannla ti servi Labib pu fer li rezone. Apre sa, li ti dir avek lazwa: “Asterla mo kone ki seki lezot pret inn dir lor zot, pa vre ditu! Zot pretann ki bann Temwin pa servi Labib, me zordi, se zis samem ki zot finn servi!”

¹⁹ Sa madam-la ti kontiyn gayn konversasyon lor Labib avek bann Temwin. Mem kan li ti gayn menas ki pu tir so fonksyon pret, sa pa ti aret li. Li ti koz avek enn kamarad lor bann konversasyon ki li ti pe gayne lor Labib. Kamarad-la usi ti kumans etidye Labib avek bann Temwin. Kamarad-la ti telman kontan seki li ti aprann dan Labib, ki pandan enn lames ki li ti asiste, li ti dir: “Etidye Labib avek bann Temwin Zeova!” Enn tipe apre, ansyin pret-la ek lezot dimunn ankor ti kumans etidye Labib avek bann Temwin Zeova.

20. Kuma lexperyans enn madam ki res Ghana, montre puvwar ki Parol Bondye ena?

²⁰ Nu truv puvwar ki Parol Bondye ena, dan seki’nn ariv Paulina, enn madam ki res Ghana. Enn proklamater aplintan ti etidye Labib avek li dan liv Konesans Ki Amenn ver Lavi pu Tuletan.a Paulina ti marye ar enn mari poligam, setadir so mari ti ena plizir madam. Paulina ti anvi fer sanzman dan so lavi, me so mari ek tu so fami ti byin opoze ar li. So granper, enn ziz lakur siprem ek enn paster, ti esey fer li sanz so desizyon. Zot ti montre li tex Matye 19:4-6, me zot ti fer enn move aplikasyon ar sa tex-la. Ziz-la ti paret byin sir lor seki li ti pe dir, me Paulina ti realize byin vit ki zot ti pe fer parey kuma Satan, ki ti deform Parol Bondye, kan li ti tant Zezi. (Matye 4:5-7) Paulina ti rapel seki Zezi ti dir klerman lor maryaz, ki Bondye ti kre enn zom ek enn fam, pa enn zom ek plizir fam. Tulede ti bizin vinn enn sel laser, pa tule trwa. Paulina ti res ferm ar so desizyon ek finalman li ti gayn divors ar so mari. Pa lontan apre, li’nn vinn enn proklamater batize.

Kontiyn Servi Parol Bondye Kuma Bizin

21, 22. (a) Ki determinasyon nu anvi ena antan ki bann proklamater Rwayom Bondye? (b) Ki nu pu egzamine dan prosin lartik?

²¹ Parol Bondye, se vremem enn zuti ki ena enn gran puvwar. Nu bizin servi li pu ed lezot dimunn pu fer bann sanzman dan zot lavi, pu zot kapav vinn pros ar Zeova. (Zak 4:8) Parey kuma bann travayer kalifye servi bann zuti pu gayn bann bon rezilta, nu’si, anu determine pu servi Parol Bondye, Labib, dan enn fason efikas. Anu fer bann gran zefor pu byin servi Labib dan travay ki Bondye inn donn nu antan ki bann proklamater so Rwayom.

²² Kuma eski nu kapav servi Labib pli byin dan laktivite pu fer bann disip? Enn fason, se kan nu devlop nu kapasite pu vinn bann anseynan ki konn konvink lezot. Nu ankuraz u pu egzaminn prosin lartik, parski li donn bann konsey kuma pu anseyn ek ed lezot pu aksepte mesaz lor Rwayom Bondye.

[Notes]

Eski U Rapel?

• Ki zuti ki disponib pu bann proklamater Rwayom Bondye?

• Dan ki fason Pol ti enn legzanp antan ki enn travayer Rwayom Bondye?

• Ki sa vedir servi Parol Bondye kuma bizin?

• Ki puvwar Parol Zeova, ki kuma enn zuti, ena?

[Zimage page 10]

Sertin zuti ki bann Kretyin servi dan predikasyon