Met U Konfyans an Zeova

“A Senyer Zeova! Tomem mo lespwar, tomem ki mo’nn fer konfyans depi mo zenes.”—PSOM 71:5.

1. Ki defi zenn berze David ti releve?

KAN get li, li kumadir enn kolonn 9 pye. Pa pu nanyin ki bann solda Izraelit ti per pu afront li! Sa zom la ti apel Golyat; li ti enn solda Filistin. Semenn apre semenn, lanwit lizur, li pa finn aret provok bann solda Izraelit, ek dir ki zot bann kapon. Li finn lans zot enn defi pu zot avoy enn sanpyon ki pu kapav lager kont li. Finalman, enn kikenn finn aksepte relev sa defi la. Kisannla u krwar? Pa enn solda, me tu sinpleman enn zenn garson. Devan sa zean la, David, ki ti ankor enn zenn berze, ti paret ankor pli tipti. Avredir, mem bann zarm ek bann ekipman lager Golyat ti pez kitfwa pli lur ki David! Me malgre sa, David finn afront sa zean la. Ek ziska zordi, nu ankor koz lor so kuraz.—1 Samyel 17:1-51.

2, 3. (a) Kifer David ti kapav afront Golyat avek enn gran konfyans? (b) Ki de etap ki neseser pu met nu konfyans an Zeova, nu pu al egzamine asterla?

² Ki ti donn David sa kantite kuraz la? Not seki David limem ti sirman ekrir inpe plitar dan so vyeyes: “A Senyer Zeova! Tomem mo lespwar, tomem ki mo’nn fer konfyans depi mo zenes.” (Psom 71:5) Wi, dan so zenes, David ti met tu so konfyans an Zeova. Kan li ti fas-a-fas avek Golyat, li ti dir li: “To pe vinn ver mwa avek enn lepe, avek enn lans ek enn zavlo. Me, mwa mo pe vinn ver twa avek non Zeova ki ena bann larme. Limem Bondye ki lager pu Izrael ek ki twa to’nn provoke.” (1 Samyel 17:45) Alor ki Golyat ti ena konfyans dan so gran lafors ek dan so bann zarm, David li, li ti ena konfyans an Zeova. Apretu, eski se pa Suverin Senyer liniver ki ti avek David? Alor, kifer li ti pu bizin per enn sinp zom, mem si li ti byin gran ek byin arme?

³ Kan u lir bann resi lor David, eski u’si, u pa ti pu swete ena enn pli gran konfyans an Zeova? Byinsir, nu tu nu ti pu kontan. Donk, anu egzaminn ansam de etap ki nu bizin fer pu met nu konfyans an Zeova. Premyerman, nu bizin anlev enn baryer ki anpes buku dimunn pu ena konfyans an Zeova. Ek enn fwa ki nu’nn reysi, nu bizin gard sa byin dan nu lespri. Dezyeman, nu bizin aprann ki vedir egzakteman fer Zeova konfyans.

Anlev Baryer Ki Anpes Buku Dimunn Met Zot Konfyans an Zeova

4, 5. Kifer buku dimunn truv sa difisil pu met zot konfyans an Bondye?

⁴ Ki anpes bann dimunn met zot konfyans an Bondye? Byin suvan, sertin pa tro konpran kifer bann move kitsoz arive. Buku finn aprann ki se Bondye ki responsab sufrans. Par egzanp, kan enn maler arive, pret dan legliz kapav dir ki Bondye “finn pran” bann viktim la ar Li dan lesyel. Buku sef relizye anseyn usi ki Bondye finn fini mark byin alavans tu kitsoz ki pe arive dan lemond—mem bann maler ek move aksyon ki dimunn fer. Byinsir, li difisil pu met konfyans dan enn Bondye ki kumsa, ki ena enn leker ros. Me anrealite, sa se “bann lanseynman demon” ki Satan byin kontan pu propaze. Wi, li anvi avegle lespri bann dimunn ki pa krwayan.—1 Timote 4:1; 2 Korintyin 4:4.

⁵ Satan anvi ki dimunn perdi konfyans an Zeova. Sa lennmi Bondye la pa anvi ki nu konn vre rezon kifer limanite pe sufer. Ek si nu finn aprann sa atraver Labib, ebyin li ti pu kontan ki nu bliye sa. Ala kifer, li bon ki detanzantan nu reget sa trwa rezon prinsipal kifer ena sufrans dan lemond. Kumsa, nu pu kapav rasir numem ki Zeova pa responsab bann problem ki nu gayne dan lavi.—Filipyin 1:9, 10.

6. Kuma eski 1 Pyer 5:8 fer nu truv enn rezon kifer bann imin sufer?

⁶ Premye rezon: Si limanite pe sufer, se parski Satan anvi kas fidelite bann serviter Bondye. Li ti rod kas fidelite Zob, me li pa ti reysi. Pa pu sa ki li’nn abandone! Antan ki sef sa lemond la, li pe rod “devor” bann fidel serviter Zeova, wi, sakenn parmi nu! (1 Pyer 5:8) Satan anvi fer nu aret servi Zeova. Alor, li provok bann persekisyon. Me mem si nu bizin sufer buku, nu ena bann bon rezon pu andire. Kan nu fer sa, nu pu pruve ki Satan enn manter, ek sa pu fer Zeova plezir. (Zob 2:4; Proverb 27:11) Amezir ki Zeova fortifye nu pu siport bann persekisyon, nu konfyans an Li, ogmante.—Psom 9:9, 10.

7. Dapre Galat 6:7, pu ki rezon ankor bann dimunn sufer?

⁷ Dezyem rezon kifer ena sufrans, truv dan sa prinsip la: “Seki enn zom seme, se sa mem ki li pu rekolte.” (Galat 6:7) Parfwa, dimunn seme kan zot fer bann move swa. Ek lerla, an retur, zot rekolte bann move konsekans, setadir sufrans. Par egzanp, ena ki swazir pu rul brit lor larut. Rezilta: aksidan. Buku swazir pu fim sigaret. Rezilta: malad leker uswa kanser pumon. Sertin swazir pu amenn enn lavi imoral. Konsekans: Zot rwinn zot lavi fami, zot perdi respe pu zotmem, zot trap bann maladi sexyelman transmisib, uswa zot tom ansint alor ki zot pa ti anvi. Kan zot konn sa bann sufrans la, dimunn ena tandans zet sa lor ledo Bondye. Me anverite, zot viktim bann move desizyon ki zotmem zot inn pran.—Proverb 19:3.

8. Dapre Eklezyast 9:11, kifer bann dimunn sufer?

⁸ Nu truv enn trwazyem rezon kifer ena sufrans, dan Eklezyast 9:11: “Mo’nn remarke ki isi lor later, pa seki pli rapid ki gayn lekurs, pa seki pli for ki gayn lager, pa seki saz ki gayn so dipin pli fasilman, pa seki ena lintelizans ki vinn ris, ek ni seki ena konesans ki gayn faver. Wi, zot tu pas par bann moman ek bann sityasyon ki zot pa ti pe atann.” Parfwa, dimunn retruv zot dan move landrwa, dan move moman. Malgre ki talan uswa febles nu ena, ninport ki ler, nu kapav konn sufrans uswa lamor san ki nu atann. Par egzanp, dan lepok Zezi, enn latur dan Zerizalem ti tonbe ek 18 dimunn ti mor. Zezi ti montre ki si sa bann dimunn la inn mor, se pa parski Bondye finn pini zot pu bann pese ki zot inn fer avan. (Lik 13:4) Non, Zeova pa responsab sa bann kalite sufrans la.

9. Ki kitsoz dimunn pa arive konpran an rapor avek sufrans?

⁹ Wi, li inportan ki nu konpran sertenn rezon kifer ena sufrans. Me ena enn kestyon ladan ki buku gayn difikilte pu konpran: Kifer Bondye Zeova les dimunn sufer?

Kifer Zeova Les Dimunn Sufer?

10, 11. (a) Dapre Romin 8:19-22, ki finn ariv “tut lakreasyon”? (b) Kuma nu kapav kone kisannla ki’nn fer lakreasyon tom enn lavi ki pena sans?

¹⁰ Dan let ki Pol ti ekrir bann Kretyin dan Rom, ena enn pasaz ki ekler nu lor sa size inportan la. Pol ti ekrir: “Tut lakreasyon pe atann avek gran inpasyans sa moman kan Bondye pu fer konn laglwar so bann garson. Parski lakreasyon finn tom dan [enn lavi] ki pena sans, pa par zot volonte, me par volonte sa kikenn ki’nn met zot ladan la. Sa kikenn la finn donn enn lespwar ki zot pu libere ar lesklavaz pese ek zot pu konn liberte extraordiner ki zis bann zanfan Bondye kone. Parski nu kone ki ziska asterla, tut lakreasyon ansam pe kontiyn sufer ek pleyne ar duler.”—Romin 8:19-22.

¹¹ Pu byin konpran sa bann verse la, dabor nu bizin reponn detrwa kestyon byin inportan. Par egzanp, Kisannla ki’nn met lakreasyon dan enn lavi ki pena sans? Sertin dir ki se Satan; lezot dir ki se Adan. Me, pa kapav Satan ek pa kapav Adan usi. Kifer? Parski sa kikenn ki’nn met lakreasyon dan enn lavi ki pena sans, li’nn donn usi “enn lespwar.” Wi, li donn lespwar ki bann dimunn fidel pu “libere ar lesklavaz pese.” Ni Adan ni Satan pa ti kapav donn sa lespwar la. Selman Zeova ki kapav fer sa. Donk, li kler ki se Zeova ‘ki’nn fer lakreasyon tom dan enn lavi ki pena sans.’

12. Dapre sertin, ki reprezant “tut lakreasyon”? Kuma nu kapav kone seki li reprezante vremem?

¹² Enn lot kestyon asterla: Ki “tut lakreasyon” reprezante? Sertin dir ki “tut lakreasyon” reprezant tu seki finn kre lor later, dimunn, zanimo ek plant. Me, eski zanimo ek plant kapav gard lespwar pu gayn “liberte extraordiner ki zis bann zanfan Bondye kone”? Non. (2 Pyer 2:12) Donk, “tut lakreasyon” reprezant selman limanite. Se sa kreasyon la ki pe konn pese ek lamor akoz rebelyon an Edenn. Wi, se zot ki vremem byin bizin enn lespwar.—Romin 5:12.

13. Kuma eski rebelyon an Edenn finn afekte limanite?

¹³ Kuma egzakteman, rebelyon an Edenn finn afekte limanite? Pol dir ki zot “finn tom dan [enn lavi] ki pena sans.”a Dapre enn liv referans, ‘enn zafer ki pena sans se enn zafer ki pa pe fonksyone kuma li ti sipoze.’ Bondye ti kre dimunn pu viv pu tuletan. Zot ti pu travay ansam kuma enn sel fami parfe ki ini, pu okip later ki ti pu transforme an paradi. Me olye sa, dimunn pe viv enn lavi kurt, ki ranpli ar duler ek ki suvan pa donn okenn satisfaksyon. Wi, kuma Zob finn dir, “zom, ki pran nesans dan vant enn fam, ena enn lavi byin kurt ek ki ranpli ar difikilte.” (Zob 14:1) Lakreasyon pe viv vremem enn lavi ki pena sans!

14, 15. (a) An ki sans Zeova finn azir avek lazistis kan Li finn kondann limanite? (b) Kifer Pol ti dir ki se “pa par zot volonte,” ki lakreasyon finn tom dan enn lavi ki pena sans?

¹⁴ Asterla, nu ariv ar kestyon prinsipal: Kifer Bondye, “Ziz later antye,” finn les limanite konn enn lavi ranpli ar duler ek problem? (Zenez 18:25) Eski se sa lazistis Bondye? Rapel seki nu bann premye paran inn fer. Kan zot inn rebel kont Bondye, zot inn pran pozisyon pu Satan. Ek Satan li, li’nn lans enn gran defi an rapor avek suverennte Zeova. Par zot bann aksyon, Adan ek Ev finn sutenir bann mansonz ki Satan ti dir. Wi, li’nn pretann ki bann imin pu viv pli byin si pena Zeova, ek si zot diriz zotmem avek linflyans Satan. Kan Zeova finn kondann sa bann rebel la, avredir Li finn donn zot seki zot ti pe rode. Li’nn les zom diriz limem avek linflyans Satan. Ala kuma Zeova finn les lakreasyon konn enn lavi ki pena sans, me avek enn lespwar kanmem. Bondye finn pran vremem enn desizyon zis. Eski u panse ki Bondye ti pu kapav pran enn desizyon pli zis ki sa?

¹⁵ Byinsir, se “pa par zot volonte” ki lakreasyon finn tom dan sa kondisyon la. Kuma nu pran nesans, nu vinn esklav pese. Apre sa, nu vinn vye, nu malad ek nu mor. Nu pena swa, lavi li kumsa! Me, dan so mizerikord, Zeova ti permet Adan ek Ev viv ziska ki zot vinn vye, ek sa finn permet zot gayn zanfan. Ek nu asterla, bann desandan Adan ek Ev, nu konn enn lavi ki ranpli ar pese ek lamor, enn lavi ki pena sans. Malgre sa, nu kapav fer enn kitsoz ki nu bann premye paran pa ti fer. Nu kapav ekut Zeova ek aprann ki so suverennte li drwat ek parfe. Nu pe kapav truve usi ki kan dimunn diriz zotmem san led Zeova, zot rekolte duler, problem ek enn lavi ki pena sans. (Zeremi 10:23; Revelasyon 4:11) Anplis ki nu finn erit pese ek lamor, Satan rann nu lavi ankor pli difisil. Se seki nu truve kan nu analiz listwar imin.—Eklezyast 8:9.

16. (a) Kifer nu kapav sir ki Zeova pa responsab sufrans ki nu truve dan lemond zordi? (b) Ki lespwar Zeova finn donn so bann fidel serviter?

¹⁶ Zeova ti ena bann bon rezon pu les limanite konn enn lavi ki pena sans. Me, si zordi nu dan sa sityasyon la ek nu pe sufer, eski se Zeova ki lakoz? Anu pran enn legzanp. Fer kumadir enn ziz pronons enn santans kont enn kriminel. Petet kriminel la pu sufer buku pandan ki li pey so santans. Me, eski li kapav dir ki se sa ziz la ki lakoz so sufrans? Paditu! Nu kone usi ki Zeova zame pa lasurs bann move kitsoz. Zak 1:13 dir: “Bondye pa teste Limem par bann move kitsoz ek Li pa teste lezot usi kumsa.” Fode pa ki nu bliye usi ki si Zeova inn pronons sa santans la, se parski ena “enn lespwar.” Dan so lamur, Li finn fer laranzman pu ki bann fidel desandan Adan ek Ev kapav sorti dan sa move kondisyon la. Lerla, zot pu kapav “konn liberte extraordiner ki zis bann zanfan Bondye kone.” Lerla, pandan tut leternite, bann dimunn fidel pa pu bizin trakase pangar lakreasyon retom dan sa lavi ki pena sans la. Wi, fason ki Zeova pu regle sa sityasyon la, pu montre ki Li ena tu drwa pu egzers so suverennte pu tuletan.—Izai 25:8.

17. Kan nu reegzaminn bann rezon kifer ena sufrans dan lemond, ki lefe sa bizin ena lor nu?

¹⁷ Apre ki nu finn truve kifer limanite pe sufer, eski nu ankor truv kit rezon pu blam Zeova uswa pu perdi konfyans an Li? Non, okontrer sa legzamin la pus nu pu dir, parey kuma Moiz: “[Bondye enn proteksyon sir pu so pep]; tu seki Li fer, parfe. Dan tu so bann manyer azir ena lazistis. Li enn Bondye fidel ki pa fer okenn linzistis. Li enn Bondye drwat.” (Deteronom 32:4) Li bon ki nu medit lor sa bann kitsoz la. Ek kan nu fer sa, li bon ki detanzantan nu sey fer enn ti tes pu gete si nu kapav reponn bann kestyon an rapor avek sufrans limanite. Kumsa, kan nu dan leprev, nu pu kapav anpes Satan met dut dan nu lespri. Me, ena enn dezyem etap ki neseser pu kapav met nu konfyans an Zeova. Nu bizin kone ki sa vedir egzakteman, fer Zeova konfyans.

Ki Vedir Fer Zeova Konfyans

18, 19. Kuma Labib ankuraz nu pu fer Zeova konfyans? Me, ki bann fos lide sertin finn devlope an rapor avek sa?

¹⁸ Parol Bondye donn nu sa konsey la: “Fer Zeova konfyans avek tu to leker ek pa kont lor to prop lintelizans. Dan tu seki to fer, pran Li kont, ek Li, Li pu fer to semin vinn drwat.” (Proverb 3:5, 6) Ala bann zoli parol ki rasir nu, pa vre? Wi, dan tu liniver se selman Zeova ki nu kapav ferm lizye fer konfyans. Li fasil pu lir sa bann parol dan Proverb la, me pu met zot an pratik, li pa tuzur fasil.

¹⁹ Buku dimunn ena bann fos lide lor seki vedir fer Zeova konfyans. Pu sertin, sa li tu sinpleman enn santiman agreab ki nu ena natirelman dan nu leker. Lezot krwar ki fer Bondye konfyans vedir ki nu kapav atann ki Li protez nu dan ninport ki sityasyon, ek ki Li pu regle tu nu problem ek difikilte, tutswit, egzakteman kuma nu ti pu swete. Me, tu sa bann lide la, se bann lide anler-anler ki pena sans. Avredir, konfyans li plis ki enn sinp santiman, ek li realis. Ant bann adilt, fer konfyans inplik usi pran bann desizyon ki’nn byin kalkile alavans, san negliz konsekans ki sa kapav ena apre.

20, 21. Ki vedir fer Zeova konfyans? Donn enn legzanp.

²⁰ Remarke ankor seki Proverb 3:5 dir. Li montre ki ena de posibilite devan nu: Swa nu fer Zeova konfyans, swa nu fye lor nu prop lintelizans. Nu pa kapav fer tulede. Eski sa vedir ki nu pena drwa servi nu lintelizans? Non, okontrer Zeova anvi ki nu servi sa lintelizans ki Li’nn donn nu la, pu ador Li. (Romin 12:1) Me, kan nu ena bann desizyon pu pran, lor kisannla nu fye? Si nu fason panse pa an armoni avek fason panse Zeova, eski nu aksepte so sazes, parski li buku pli siperyer ki nu lintelizans? (Izai 55:8, 9) Fer Zeova konfyans vedir les so panse diriz nu panse.

²¹ Anu pran enn legzanp: Pans enn ti zanfan ki’nn asiz deryer dan enn loto, so bann paran inn asiz devan, ek se so papa ki lor volan. Pandan zot vwayaz sertenn difikilte kapav leve. Kitfwa, zot pa tro sir ki semin bizin pran. Petet, letan kapav move uswa semin pabon. Si se enn zanfan obeisan ek ki fer so bann paran konfyans, kuma eski li pu reazir dan sa bann difikilte la? Eski li pu kumans kriye depi deryer pu donn so papa lord kuma li bizin rule? Eski li pu met an dut desizyon so bann paran? Ek, si so bann paran dir li pa larg so sintir sekirite, eski li pu dezobeir? Non. Kuma tu zanfan, li fer so bann paran konfyans malgre ki zot inparfe. Li kone ki zot pu reysi regle sa bann difikilte la. Asterla nu, nu ena enn Papa ki parfe, Zeova. Eski nu pa bizin met tu nu konfyans an Li, sirtu kan nu konn bann sityasyon difisil?—Izai 30:21.

22, 23. (a) Kifer nu bizin met nu konfyans an Zeova kan nu gayn problem, ek kuma eski nu kapav fer sa? (b) Ki nu pu egzamine dan prosin lartik?

²² Me, Proverb presize ki nu bizin ‘pran Zeova kont dan tu seki nu fer,’ pa zis dan difikilte. Donk, dan sak desizyon ki nu pran tulezur, nu bizin montre ki nu fer Zeova konfyans. Kan problem leve, fode pa ki nu dezespere ek nu panike. Ek kan Zeova montre nu meyer fason pu fer fas ar nu sityasyon, fode pa nu al kont so konsey. Nu bizin konsider bann leprev kuma enn lokazyon pu sutenir suverennte Zeova, pu pruve ki Satan enn manter, ek pu devlop lobeisans ek lezot kalite ki fer Zeova plezir.—Ebre 5:7, 8.

²³ Nu kapav montre ki nu fer Zeova konfyans malgre ninport ki problem ki menas nu. Nu fer sa dan nu bann lapriyer ek dan fason ki nu les Parol Zeova ek So lorganizasyon diriz nu. Me, kuma eski nu kapav fer Zeova konfyans kan nu truv nu devan bann problem ki arive dan sa lemond la? Nu prosin lartik pu koz lor la.

[Notes]

Kuma U Pu Reponn?

• Kuma eski David ti montre ki li ti met so konfyans an Zeova?

• Sit trwa rezon kifer bann dimunn sufer zordi. Kifer li bon ki detanzantan nu egzaminn sa bann rezon la?

• Ki santans Zeova ti pronons lor limanite, ek kifer nu kapav dir ki sa ti enn desizyon zis?

• Ki vedir fer Zeova konfyans?

[Zimage page 23]

David ti met so konfyans an Zeova