Eski Pwindevi Dimunn Finn Sanze lor Lasarite?

APRE bann latak le 11 Septam 2001 dan lavil New York ek lavil Washington, bann dimunn finn sutenir bann viktim dan enn fason extraordiner. Bann lorganizasyon saritab ti deborde avek donasyon. Zot ti gayn 78 milyar rupi pu ed fami bann viktim. Bann dimunn partu ti telman soke par lanpler sa latak la, ki zot ti anvi fer tu pu ede.

Me, byin vit sertin dimunn finn sanz latitid. Zot finn vinn amer. Kifer? Parski zot finn tande ki aparaman bann gran lorganizasyon saritab ti pe pran pu zot larzan ki bann dimunn ti pe done. Bann dimunn ti fer enn vole skandal kan zot finn aprann ki enn gran lorganizasyon saritab ti ena lintansyon pu gard preske lamwatye dan sa 15,360 milyon rupi ki zot ti gayne pu ed bann viktim World Trade Center la. Zot ti pu servi sa kas la pu bann lezot kitsoz. Plitar, sa lorganizasyon la finn sanz so desizyon ek finn demann exkiz. Me malgre sa, get seki enn reporter finn dir: “Bann kritik truve ki sa sanzman la finn arive inpe tro tar pu retabli konfyans” ki bann dimunn ti ena anver sa lorganizasyon la avan sa bann latak la. Me u, ki u panse? Eski resaman u konfyans dan bann lorganizasyon saritab finn gayn enn bon ku?

Itil uswa Initil?

An zeneral, kan bann dimunn donn larzan bann lorganizasyon saritab, sa li konsidere kuma enn bon kitsoz. Me, pa tu dimunn ki dakor avek sa. Plis ki 200 an desela, Samyel Johnson, enn ekrivin Angle ti ekrir: “U pli sir ki u pe fer enn bon kitsoz kan u rekonpans bann dimunn ki pe travay dir par enn lapey, ki kan u donn lasarite.” Zordi, sertin ena mem ezitasyon pu fer bann don. Apretu, bann rapor lor bann lorganizasyon saritab ki pe mal servi sa bann don la, pa pe fer nanyin pu ogmant konfyans bann dimunn. Anu get de legzanp ki finn fek arive.

Direkter enn lorganizasyon saritab relizye dan San Francisco ti perdi so plas. Kifer? Aparaman parski li ti avoy so lazans, bil ki li ti peye pu loperasyon estetik ki li ti fer, plis so bann bil restoran ki ti kut 144,000 rupi sak semenn pandan enn peryod dezan. Li ti kont sa kuma so bann depans personel ki lorganizasyon la ti sipoze ranburs li. An Angleter, bann organizater enn gran program sarite lor televizyon ti byin anbarase kan bann dimunn ti dekuver ki lor 288 milyon rupi ki ti avoye pu ranz bann nuvo lorfelina dan Roumanie, bannla ti ranz zis 12 ti lakaz kraz-kraze. Ek pa kapav explike ki zot finn fer avek sa santenn milye dolar la. Bann move rapor kumsa finn pus bann dimunn ki fer bann don pu fer atansyon lor ki kantite zot done ek ar kisannla zot done.

Done Uswa Pa Done

Me, li pa pu bon si nu les aksyon sertin dimunn uswa sertin lorganizasyon detrir nu lintere ek nu konpasyon sinser pu lezot. Labib dir: “Form ladorasyon ki prop ek ki san inpirte devan lizye nu Bondye ek nu Papa, se pran swin bann orfelin, bann vev dan zot difikilte.” (Zak 1:27) Wi, fer kitsoz pu bann pov ek bann ki dan difikilte, sa li form enn parti inportan dan vre relizyon Kretyin.

Me kitfwa u pe demande, ‘Eski mo bizin kontiyn donn lasarite, uswa mo zis bizin sey ed bann dimunn kan mo donn zot bann kado?’ Kuma eski Bondye anvi ki nu done? Prosin lartik pu reponn sa bann kestyon la.