Lopinyon Ekilibre Ki Labib Done lor Lotorite

PRINSIP lotorite finn pran linportans kan Bondye ti kre bann premye imin. Li ti kre zom dan So resanblans. Premye zom ti lib pu azir; li ti ena swa ant fer seki bon ek fer seki move. Si li ti dispoze par limem pu obeir so Kreater avek lamur, li ti pu kapav donn Bondye loner ek laglwar. Avek so lintelizans, li ti kapav donn Bondye luanz pu So bann kalite extraordiner ek sutenir So drwa ki Li ena pu reyne.

Me, Adan ti ena enn liberte ki ti limite. Li ti pu kontiyn viv ere si selman li ti rekonet suverennte Zeova, setadir drwa ki Li ena pu reyn lor So bann kreatir. Se seki zarb konesans bon ek move ti indike. Adan pa ti gayn drwa manz frwi sa pye la. Sinon, li ti pu dezobeir Bondye ek li ti pu rebel kont So suverennte.—Zenez 2:9, 16, 17.

Pareyman, zordi li inportan ki bann adorater Bondye aksepte prinsip Bondye lor lotorite. Nu truv sa prinsip la dan 1 Korintyin 11:3: “Sef bann zom se Kris; sef bann fam se zom; ek Kris li, so sef se Bondye.”

Plas Ki Zezi Kris Okipe

Antan ki sef kongregasyon Kretyin, Zezi Kris ena drwa pu pran bann desizyon ki konsern kongregasyon. Li ena drwa usi pu montre so lotorite lor kongregasyon. (Efezyin 5:23) Me, sa pozisyon sef la donn li bann obligasyon. Li bizin aksepte pu pran swin kongregasyon ek pu port responsabilite so bann desizyon.

Zezi Kris finn tultan azir an akor avek prinsip lotorite. Par so bann parol ek so bann aksyon, li finn tuzur rekonet lotorite so Papa. Dayer, apre ki li pu reyn lor later pandan milan, li pu montre ki se Zeova ki sef dan liniver. Kuma? Ebyin, li pu remet so Rwayom ar Zeova, ek “li pu sumet li ar sa Kikenn ki finn met tu kitsoz anba so puvwar la, pu ki Bondye vinn tu kitsoz pu tu.”—1 Korintyin 15:24-28; Filipyin 2:5-8.

Plas Ki Zom Okipe

Mem si enn zom egzers lotorite dan lafami, li pa indepandan. Li usi li bizin rekonet so “sef.” Li oblize swiv direksyon ek model ki Kris, so sef, inn lese. (1 Zan 2:6) Sa pa konsern zis domenn relizye, me usi so lavi personel.

Par egzanp si li enn sef fami, par respe pu so sef, Kris, enn zom bizin swiv bann konsey ki Labib done. Li bizin res avek so fam an akor avek konesans ek ‘donn li loner, parey kuma li ti pu fer avek enn resipyan ki frazil.’ Li bizin usi fer enn gro zefor pu byin elve so bann zanfan.—1 Pyer 3:7; Efezyin 6:4.

Se zom ki ti’nn kre avan; ala kifer, li ena enn pozisyon sef. (1 Timote 2:12, 13) Se avek enn kot dan lekor zom ki Bondye ti kre fam. (Zenez 2:22, 23) Fam finn kre pu zom, se pa zom ki’nn kre pu fam. (1 Korintyin 11:9) Donk, dapre laranzman ki Bondye finn etabli dan lafami, enn fam bizin tultan sumet ar so mari. Fode pa ki li rod pran so pozisyon sef. (Efezyin 5:22, 23) Dan kongregasyon usi, enn fam pena drwa anseyn bann zom ki’nn batize, ni egzers lotorite lor zot.—1 Timote 2:12.

Dan lepase, bann Izraelit ti rekonet pozisyon sef ki enn zom ti okipe dan lafami ek usi alatet sak tribi. Par egzanp, Sara ti sumet ar Abraam; li ti apel li “senyer.” Plitar, Pyer ti sit Sara kuma legzanp enn kikenn ki ti sumet.—Zenez 18:12; 1 Pyer 3:5, 6.

Plas Ki enn Fam Okipe

Lontan ti ena bann sirkonstans kot enn fam ti bizin kuver so latet pu montre so sumisyon. (Zenez 24:65) Kan Pol ti pe koz lor prinsip lotorite ki egziste dan kongregasyon, li ti explike ki defwa enn fam bizin kuver so latet. Dan ki sirkonstans? Se kan li fer lapriyer uswa kan li profetize dan kongregasyon. Avredir, si li okip enn pozisyon ki normalman rezerve pu enn zom, li bizin kuver so latet.

Byinsir, sa arive zis kan pena okenn frer. Me mem si enn fam ena long seve, fode pa li panse ki sa ase pu montre so sumisyon. Non, li bizin montre par so bann aksyon ki li rekonet lotorite ki zom ena ek ki li sumet ar sa. Akoz sa, li kuver so latet kuma “enn siyn lotorite.”—1 Korintyin 11:5-16.

Li bizin fer sa “akoz bann anz” ki obzerv seki bann Kretyin fer. Ek pwiski bann anz servi kongregasyon Kretyin, zot usi zot konserne par seki pase dan kongregasyon. Kan enn ser kuver so latet kan bizin, pu bann rezon spirityel, li montre ki li rekonet lotorite ki Bondye finn etabli.—Ebre 1:14.

Sa bon lord teokratik ki Bondye inn etabli dan kongregasyon ek dan lafami la, pa priv enn fam. Sa pa anpes li servi Bondye, ni asim so bann responsabilite familyal. Li ena enn ful liberte an akor avek Labib pu servi dan plas kot Bondye inn met li. Li kapav tuzur fer Bondye plezir an akor avek sa prinsip la: “Bondye finn plas bann manb dan enn lekor, sakenn dan so plas, kuma Li, Li truv bon.”—1 Korintyin 12:18.

Dan lepase, buku fam ti rekonet lotorite bann zom ek sa pa ti anpes zot gut plizir gran privilez. Zot ti satisfe ek zot ti viv ere. Parmi ti ena Sara, Rebeka, Abigayl, ek bann fam Kretyin kuma Prisil ek Febe.

Profi Ki Tire kan Rekonet Prinsip Lotorite

Bann ki egzers lotorite ena sertin drwa, me zot ena usi bann devwar uswa bann obligasyon. Par egzanp, enn mari dan lakaz ena drwa pu pran bann desizyon final ek vey lor byinet so fami. Me an mem tan, se so devwar pu pran responsabilite so fami. So lobligasyon prinsipal se donn zot seki zot bizin lor plan materyel ek spirityel.—1 Timote 5:8.

Enn mari Kretyin bizin egzers so lotorite avek sazes; li bizin kontan so fam kuma limem. (Efezyin 5:33) Se kumsa ki Zezi Kris ti egzers so lotorite lor kongregasyon Kretyin. (Efezyin 5:28, 29) Antan ki papa, enn zom ena lotorite lor so bann zanfan. Me, fode pa li enerv zot. Li bizin plito elve zot “dan disiplinn ek bann manyer panse Zeova.”—Efezyin 6:4.

Bann berze dan kongregasyon ena responsabilite pu pran swin trupo Bondye. Me, fode pa zot dominn lor bann “muton” Bondye. Zot bizin rapel ki zot usi zot bizin sumet ar Zezi Kris ek Zeova. (1 Pyer 5:1-4) Bann Kretyin, disip Zezi Kris, rekonet usi lotorite siprem Zeova. Zot priye Li tusel ek zot rekonet Li kuma zot Papa ek Bondye Tu-Pwisan.—Matye 6:9; Revelasyon 1:8.

Wi, limanite tir profi kan respekte prinsip lotorite ki ena dan Labib. Sa amenn lape ek larmoni, ki an retur donn laglwar nu Kreater.