‘Bondye, Kifer To’nn Les Sa Arive?’

RICARDO ankor rapel sa zur la. Ansam avek Maria, so madam, zot ti pe asize dan konsiltasyon kot dokter.a Maria ti fer enn tes medikal, me personn pa ti ena kuraz pu lir rezilta sa tes la. Alor, Ricardo finn uver lanvlop la ek vit-vit zot inn zet enn kudey lor rapor medikal la. Zot lizye inn tap lor sa mo “kanser” la. Letan zot finn realize ki savedir, tulede finn kumans plore.

Ricardo dir: “Dokter la ti byin bon. Me, li ti kone ki sityasyon la byin grav, parski li pa ti aret dir nu ki nu bizin met nu konfyans an Bondye.”

Avan mem ki ti kumans fer bann tretman par reyon lazer, dokter Maria ti remarke ki li pa ti kapav kontrol bann muvman so lipye drwat. Kan ti fer lezot tes, finn remarke ki kanser la inn ariv ziska so servo. Zis apre enn semenn, inn aret fer bann tretman avek reyon lazer. Maria ti tom dan koma ek de mwa plitar, li’nn mor. Ricardo dir: “Mo ti kontan ki so sufrans inn fini, me mo ti telman mank li, ki mo ti anvi aret viv mwa usi. Suvan, dan mo sufrans mo ti demann Bondye: ‘Kifer to’nn les sa arive?’”

Ena Buku Kestyon Ki Poze Kan Maler Arive

Parey kuma Ricardo, atraver lemond ena buku dimunn ki sufer. Suvan se bann dimunn inosan ki sufer. Zordi dan lemond, ena bann lager ki pale fini. Mazinn inpe ki kantite bann dimunn sufer akoz sa bann lager la. Uswa pans duler bann dimunn ki finn viktim bann vyol, uswa bann seki finn vyole kan zot ti ankor zanfan. Ena ki sufer akoz vyolans dan lakaz ek bann lezot move kitsoz ki dimunn fer zordi. Pandan bann lane ki dimunn inn viv lor later, zom ek fam inn fer zot kamarad byin sufer. Kantite linzistis ek sufrans ki zot inn anvi fer anver zot kamarad, zot inn fer, san okenn limit. (Eklezyast 4:1-3) Ena usi sufrans bann dimunn ki viktim bann katastrof natirel uswa bann ki ena enn maladi afektif, mantal ek fizik. Li pa etonan alor ki buku dimunn demande, “Kifer Bondye permet tu sa sufrans la?”

Li pa fasil, mem pu bann dimunn ki ena bann krwayans relizye, pu fer fas avek sufrans. Sirman u’si u demande ki rezon Bondye kapav ena pu les dimunn sufer kumsa, sirtu ki Li enn Bondye ki ena lamur ek enn gran puvwar. Li byin inportan ki nu gayn enn repons ki vre ek ki pu satisfer nu, pu sa kestyon konplike la. Sa repons la inportan parski nu bann bon relasyon avek Bondye depann lor la ek sa permet nu ena lespri trankil. Labib reponn sa kestyon la. Silvuple, get dan prosin lartik seki Labib ena pu dir lor la.

[Not anba paz]

[Zimaz lor paz 3]

Dokter la pa ti aret dir nu ki nu bizin met nu konfyans an Bondye