Bann Zenn Ki Kontan Laverite

ENA PLIZIR milye lane depi ki enn ekrivin Ebre ti demande: “Kuma eski enn zennzan pu gard enn kondwit prop?” (Psom 119:9) Sa kestyon la tuzur inportan pu nu zordi parski bann zenn pe bizin fer fas ar buku problem ki ena dan lemond. Buku zenn finn gayn SIDA akoz enn move lavi. Parmi bann ki’nn trap sa maladi la, anviron lamwatye ena ant 15 ek 21 an. Ladrog usi koz buku problem; buku zenn finn mor avan ler. Bann lamizik ki ena bann move lefe, bann fim, bann program televizyon vyolan ek sal, ek pornografi lor Internet ena enn byin move linflyans lor bann zenn. Ala kifer, zordi, buku paran ek buku zenn interese ar kestyon ki sa ekrivin Psom la ti poze.

Sa ekrivin la reponn kestyon la limem: “Kan fer seki to dir.” Byinsir, Labib, Parol Bondye, donn enn bon direksyon pu bann zenn. Buku zenn reysi dan lavi kan zot fer seki li dir. (Psom 119:105) Anu get legzanp detrwa zenn ki kontan Bondye ek ki fer zefor pu res for lor plan spirityel dan enn lemond ki ankuraz bann dimunn pu rod plezir ek bann kitsoz materyel.

Zot Apresye Direksyon Bann Paran

Jacob Emmanuel ti enn pyonye pandan plizir lane avan li al servi dan filyal bann Temwin Zeova dan Mexique. Li rapel kuma so lamur pu servis Bondye finn devlope: “Mo bann paran finn ena enn pli gran linflyans lor mwa, mem si mo ti gayn led bann frer ki ti ena lexperyans, avek ki mo ti fer kamarad. Mo bann paran ek sa bann frer spirityel la, ti pus mwa pu kontan predikasyon. Tigit par tigit zot finn diriz mwa lor bon semin; zame mo pa finn santi ki zot ti met presyon lor mwa.”

David, ki dan servis aplintan depi plizir lane, rapel ki li ti byin inpresyone kan so bann paran ti kumans fer pyonye spesyal alor ki li ek so frer ti ankor tipti. Kan so papa ti mor, so mama ti kontiyn so servis. Anplis so predikasyon, li ti pran zot swin. David dir: “Zame zot pa ti obliz mwa pu fer pyonye. Me antan ki fami, nu finn telman truv lazwa dan sa servis la, ki sa konpayni la ek sa lanbyans la finn pus mwa pu fer parey.” Pu montre komye direksyon ek latansyon ki bann paran done, bon, David dir: “Tuleswar, mo mama ti lir bann zistwar ki dan liv Du paradis perdu au paradis reconquis,a avek nu. Manyer li ti rakont sa bann zistwar la, ti ed nu pu devlop lapeti pu manze spirityel ki Zeova done.”

Apresye Bann Reynion

Sertin zenn truv difisil pu apresye bann reynion. Zot asiste parski zot paran amenn zot. Me, si zot kontiyn asiste, avek letan zot pu truv valer ki bann reynion ena. Get legzanp Alfredo: Li ti kumans servis aplintan kan li ti ena 11 an. Li rekonet ki kan li ti ena apepre 5 an, li pa ti rod al reynion parski reynion ti fer li gayn somey. Me so bann paran zame pa ti les li dormi dan bann reynion. Li rakonte: “Kan mo’nn grandi, dusma-dusma mo’nn pli interese ar bann reynion, sirtu kan mo’nn konn lir ek ekrir parski lerla mo ti kumans reponn dan mo prop mo.”

Cintia ena 17 an ek li pyonye permanan. Li rakonte kuma bon frekantasyon li inportan pu devlop lamur pu servis Bondye. Li dir: “Bon relasyon avek bann frer ek asiste regilyerman bann reynion anpes mwa pu regret bann kitsoz dan lemond—bann kamarad lemond, bann divertisman ki bann zenn ena, kuma par egzanp al diskotek. Kan mo ekut bann komanter ek bann lexperyans dan reynion, sa fer mwa anvi donn Zeova tu seki mo ena. Mo panse ki pli bon kitsoz ki mo ena, se mo zenes. Donk, mo finn desid servi mo zenes dan so servis.”

Me, Cintia rekonet enn kitsoz: “Ti ena enn moman, avan mo pran batem, kot mo ti pe rat fasilman bann reynion. Mo ti tir pretex, ki mo ena buku devwar uswa bann lezot aktivite lekol. Mo ti rat plizir reynion, ek sa ti kumans afekte mo kondisyon spirityel. Mo ti kumans frekant enn garson ki pa ti etidye Labib. Erezman, avek led Zeova, mo finn sanze atan.”

Enn Desizyon Personel

Kan ti demann Pablo, enn lot zenn ki dan servis aplintan, ki kitsoz pli inportan pu devlop lamur pu laverite ki ena dan Labib, li ti reponn: “Mo panse, ena de kitsoz: letid personel regilye ek byin devwe pu predikasyon. Mo rekonesan anver mo bann paran ki finn anseyn mwa laverite lor Zeova. Mo panse ki sa mem pli bon kitsoz ki zot finn kapav donn mwa. Me mem sa, mo ti bizin sir ki vremem mo kontan Zeova. Pu sa, li neseser konn ‘larzer ek profonder’ laverite ki ena dan Labib. Se zis kumsa ki nu kapav kontan Parol Bondye, ki lerla fer ‘enn dife brile’ dan nu pu nu koz sa ar lezot. Kan nu byin devwe dan predikasyon, sa pu ogmant nu rekonesans pu laverite.”—Efezyin 3:18; Zeremi 20:9.

Nu ti koz lor Jacob Emmanuel avan, li’si li rapel linportans pran enn desizyon personel pu servi Zeova. Li dir ki so bann paran zame pa’nn obliz li pu pran batem. “Mo panse ki mo bann paran finn byin fer, parski mo pe truv so bann bon rezilta. Par egzanp, sertin zenn avek ki mo ti pros, ti desid pu batize ansam. Mem si sa ti bon, sertin ti fer li zis par lemosyon, parski zot ti truv lezot batize. Me, inpe letan apre, zot zel pu bann aktivite spirityel finn diminye. Me dan mo ka, mo bann paran pa finn met presyon lor mwa pu ki mo angaz mwa ar Zeova. Mo ti pran mo desizyon par momem.”

Rol Ki Kongregasyon Zwe

Sertin zenn finn aprann laverite ki truv dan Labib par zotmem, san led zot bann paran. Li vremem difisil dan bann kondisyon kumsa pu aprann ek kontiyn fer seki bon.

Noé rakonte kuma laverite finn servi li. Li ti ena move karakter depi tipti. Li ti ena 14 an, kan li ti kumans etidye Labib. Dusma-dusma, so karakter ti kumans amelyore. Mem so bann paran ti rekonesan pu sa sanzman la, malgre ki zot pa ti interese avek Labib sa lepok la. Amezir ki Noé ti pe progrese lor plan spirityel, li ti anvi servi so lavi plis dan servis Bondye. Asterla li dan servis aplintan.

Alejandro usi ti kumans interese avek laverite kan li ti byin zenn, mem si so bann paran pa ti interese. Pu montre so lapresyasyon pu laverite, li dir: “Mo ti grandi dan enn fami Katolik. Me parski legliz pa ti kapav reponn bann kestyon ki mo ti ena depi mo tipti, mo ti kumans adopte latitid ate bann Kominis. Me, lorganizasyon Zeova finn ed mwa pu gayn enn konesans lor Bondye. Li finn vremem sap mo lavi. Parski si mo pa ti etidye Labib, sirman mo ti pu amenn move lavi, mo ti pu tom dan lalkol, uswa ladrog. Kitfwa mo ti pu fer parti dan enn grup revolisyoner, ek sa ti pu amenn bann move konsekans.”

Kuma eski enn zenn kapav kontiyn rod laverite ek res atase ar sa, san led so bann paran? Bann ansyin ek lezot manb dan kongregasyon zwe enn rol inportan ladan. Noé rakonte: “Zame mo finn santi mwa tusel, parski Zeova ti tuletan akote mwa. Mo ti ena usi led bann frer ek ser. Zot ti’nn vinn kuma bann papa, mama ek frer pu mwa.” Asterla, li servi dan Betel ek li servi so letan dan servis Bondye. Alejandro usi rakonte: “Mo pu tuletan rekonesan ki mo’nn fer parti enn kongregasyon avek enn kolez ansyin ki ti interes ar mwa personelman. Mo sirtu rekonesan pu sa, parski kan mo ti kumans etidye Labib, mo ti ena 16 an ek kuma tu bann zenn, mo’si mo ti trakase. Me, bann fami dan kongregasyon zame pa ti abandonn mwa. Ti tuzur ena enn kikenn ki ti resevwar mwa kot li, ki pa ti partaz zis so lakaz avek mwa, me so manze ek so lafeksyon.” Asterla, sa fer 13 an depi ki Alejandro dan servis aplintan.

Ena dimunn panse ki larelizyon li zis pu bann vye dimunn. Me, buku zenn finn aprann laverite Labib kan zot ti ankor tipti, ek zot finn arive kontan Zeova ek res fidel ar Li. Bann parol Psom 110:3 kapav aplik ar sa bann zenn la: “To pep pu volonter zur to rasanble to larme. Kuma bann gut laroze gramatin, to ena to larme zennzan lor bann montayn sakre.”

Wi, bann zenn bizin fer zefor ek zot bizin byin determine, pu ki zot aprann laverite ek res atase ar sa. Li vremem enn lazwa pu truve ki buku finn reysi devlop enn vre lamur pu Parol Bondye ek pu so servis! Zot finn reysi parski zot finn res pros ar so lorganizasyon, zot finn asiste bann reynion regilyerman ek zot finn fer zefor pu etidye Labib!—Psom 119:15, 16.

[Not anba paz]