LESON 07

Kouma Zeova Ete?

Version Inprime

Kan ou pans Zeova, ki premie kitsoz vinn dan ou lespri? Eski pou ou, Li telman inpresionan ki ou pa kapav vinn pros avek Li? Ouswa Li enn kikenn ki bien pwisan, me ki pena okenn santiman? Kouma Zeova vremem ete? Gras-a Labib, ou pou aprann ki bann kalite Zeova ena ek ki Li interese avek ou personelman.

1. Kifer nou pa kapav trouv Bondie?

‘Bondie Li lespri.’ (Zan 4:24) Zeova pena enn lekor fizik. Li enn Lespri ki viv dan lesiel, enn plas ki nou pa kapav trouve.

2. Ki bann zoli kalite Zeova ena?

Mem si nou pa kapav trouv Zeova, so bann kalite telman zoli ki sa fer nou anvi aprann konn Li. Labib dir ki Zeova ‘kontan lazistis, e Li pa abandonn so serviter fidel.’ (Psom 37:28) Li osi “ranpli ar lafeksion ek Li ena mizerikord,” sirtou anver bann dimounn ki pe soufer. (Zak 5:11, NW) “LESEGNER li toultan pre ar seki pe perdi kouraz; li replant lespwar kot lespwar finn mor.” (Psom 34:18) Ek eski ou ti kone ki seki nou fer kapav afekte Zeova? Enn dimounn ki swazir pou fer bann move kitsoz kapav desevwar Li ek fer so leker fermal. (Psom 78:40, 41) Me enn kikenn ki fer seki bon kapav fer so leker kontan.—Lir Proverb 27:11.

3. Kouma Zeova montre ki Li kontan nou?

Pli zoli kalite ki Zeova ena se lamour. Ofet, Labib dir ki ‘Bondie Limem lamour.’ (1 Zan 4:8) Zeova montre so lamour pa zis atraver Labib, me osi par bann kitsoz ki Li’nn kree. (Lir Zistwar Bann Apot 14:17.) Par exanp, anou get fason ki Li’nn kree nou. Li’nn donn nou kapasite pou trouv bann zoli kouler, pou ekout bann zoli lamizik, ek pou apresie bann bon manze. Li anvi ki nou profit lavi.

ANOU GET INPE PLIS

Nou pou gete ki kitsoz Zeova servi pou fer bann kitsoz extraordiner ek osi kouma Li montre so bann zoli kalite.

4. Lespri sin se lafors aktif Bondie

Zimaz: Bann kitsoz ki Bondie inn fer gras-a so lespri sin. 1. Liniver ek bann planet. 2. Enn ekrivin Labib pe ekrir bann panse Bondie lor enn roulo.

Labib montre ki lespri sin se pa Bondie. Ofet, parey kouma nou servi nou lame pou fer enn travay, lespri sin se lafors ki Zeova servi pou fer bann kitsoz. Lir Lik 11:13 ek Zistwar Bann Apot 2:17, ek apre sa, get sa bann kestion-la ansam:

Bondie pou “repann” so lespri sin lor bann dimounn ki demann Li. Alor, eski lespri sin li Bondie, ouswa se lafors ki Bondie servi pou azir? Kifer ou pans koumsa?

Zeova servi so lespri sin pou fer bann kitsoz extraordiner. Lir Psom 33:6a ek 2 Pier 1:20, 21, ek apre sa, get sa kestion-la ansam:

Sit bann diferan fason ki Zeova inn servi so lespri sin.

5. Zeova ena enn zoli personalite

Mem si Moiz ti servi Bondie depi bien lontan, li ti anvi konn so Kreater pli bien. Alor, Moiz ti dir Bondie: “Fer mwa konn to bann fason azir. Koumsa mo kapav konn twa.” (Exod 33:13) Lerla, Zeova ti dir Moiz ki kalite Bondie Li ete. Lir Exod 34:4-6, ek apre sa, get sa bann kestion-la ansam:

Ki kitsoz konsernan so personalite Zeova ti dir Moiz?
Parmi bann kalite ki Zeova ena, lekel ou pli kontan?

6. Zeova gagn nou traka

Dan lepase, kan pep Bondie, setadir bann Ebre, ti bann esklav dan Lezip, zot ti bien soufer. Ki Zeova ti resanti kan Li ti trouv zot pe soufer? Ekout lektir Exod 3:1-10, ouswa lir sa bann verse-la. Apre sa, get sa bann kestion-la ansam:

ODIO: Zeova Ti Resanti Zot Soufrans (2:45)

Dapre sa bann verse-la, ki Zeova resanti kan bann dimounn soufer?—Get verse 7 ek 8.
Eski ou panse ki Zeova vremem anvi ed bann dimounn, ek ki Li kapav fer li? Kifer ou pans koumsa?