Ki Direction Ou la-Vie Pé Prend?

• Beaucoup dimoune tellement absorbé par séki zot faire toulé-jours, ki zot pa vraiment conscient ki direction zot la-vie pé prend.

• La Bible faire nou koné ki éna bann événements extraordinaire ki pé atann nou devant. Li averti nou aussi ki bientôt l’humanité pou konn enn grand changement. Mais, pou nou profite séki nou aprann dans la Bible ek pou nou évite sa malheur ki pé vini-la, nou bizin agir sans tardé.

• Éna dimoune koné séki la Bible dire et zot faire zefforts pou applique sa dans zot la-vie. Mais tigit par tigit, zot laisse bann tracas pousse zot dans enn mauvais direction.

• Eski ou satisfait avec direction ki ou la-vie pé prend? Chaque fois ki ou décide faire enn kitsoz, eski ou réfléchi ki l’effet sa pou éna plitar lor bann l’objectifs ki ou’nn fixé dans ou la-vie?

[L’encadré/Zimage page 9]

Ki Pli Important pou Ou?

Dans la liste en bas, ki kitsoz d’après ou, bizin passe en premier dans ou la-vie? Écrire enn chiffre (entre 1-10) à côté chaque kitsoz, selon séki ou considère pli important pou ou.

Beaucoup sa bann kitsoz-la éna zot place dans nou la-vie. Mais si bizin faire enn choix, ki ou pou choisir en premier? second? etc . . .

․․․ Détentes/divertissements6

․․․ Mo travail/mo carrière

․․․ Mo la-santé

․․․ Mo propre bonheur

․․․ Mo conjoint

․․․ Mo parents

․․․ Mo zenfants

․․․ Joli lakaz, joli linges

․․․ Mo bizin meilleur ki lézot

․․․ L’adoration Bondié

[L’encadré page 10, 11]

Eski Ou Bann Choix Pé Amenn Ou Vrémem Kot Ou Envie Allé?

RÉFLÉCHI LOR SA BANN QUESTIONS-LA

DÉTENTES/DIVERTISSEMENTS: Eski mo bann détentes faire moi vrémem dibien? Ou-bien, eski c’est bann activités ki kapav affecté mo la-santé, ou-soit mem blesse moi pou la-vie? Eski c’est enn “l’amusement” ki donne moi dé-trois lertan plaisir, mais ki après faire moi souffer toute longue mo la-vie? Mem si divertissement-la en limem li pa mauvais, eski li prend tou mo lé-temps, ek lerla mo pa kapav faire bann kitsoz ki pli important?

MO TRAVAIL/MO CARRIÈRE: Eski mo travail pou gagne mo la-vie, ou-soit eski mo enn dimoune ki esclave travail? Eski mo touye mo lé-corps dans travail si bien ki sa affecté mo la-santé? Ki mo préféré: Faire overtime ou-soit passe lé-temps avec mo famille? Si mo patron dire moi faire enn kitsoz ki fatigue mo conscience, ou-soit ki souvent empêche moi occupe bann zaffaires spirituel, ki mo faire? Eski mo obéir li zis pou mo pa perdi mo travail?

MO LA-SANTÉ: Eski mo néglige mo la-santé, ou-bien mo touletan prend li soin? Eski tou mo bann conversations tourne autour mo la-santé? Par façon ki mo prend soin mo la-santé, eski mo montré ki mo famille compté pou moi?

MO PROPRE BONHEUR: Eski c’est sa ki compte plus pou moi? Eski sa li pli important ki bonheur mo conjoint ou-soit mo famille? Eski façon ki mo pé rode mo bonheur li approprié pou enn dimoune ki adore Bondié?

MO CONJOINT: Eski mo considère mo conjoint couma mo partner zis kan sa faire moi plaisir? Eski mo donne li l’honneur ek dignité ki li mérité? Eski mo croyance en Bondié influence façon ki mo considère mo conjoint?

MO PARENTS: Si mo encore enn mineur: Eski mo obéir mo bann parents? Eski mo réponn zot avec respect? Eski mo faire mo bann l’ouvrages lakaz? Eski mo respecté l’heure ki mo bann parents finn fixé pou mo rentre lakaz? Kan mo bann parents mette moi en garde kont certaines fréquentations ek activités, eski mo écoute zot? Si mo enn adulte: Eski mo écoute mo bann parents avec respect et aide zot kan c’est nécessaire? Eski mo agir avec zot d’après séki faire moi plaisir, ou-soit d’après conseil Parole Bondié?

MO ZENFANTS: Eski mo prend la responsabilité pou enseigne mo bann zenfants bann valeurs moral, ou-bien mo laisse l’école faire sa dans mo place? Eski mo passe lé-temps avec mo bann zenfants, ou-bien mo laisse zouzou, télévision, ou-soit computer garde zot occupé? Eski mo discipline mo bann zenfants parski zot désobéir Bondié, ou-soit zis parski mo en colère ar zot?

JOLI LAKAZ, JOLI LINGES: Ki motive moi pou prend compte mo l’apparence ek pou entretenir bann kitsoz matériel ki mo possédé? Eski c’est l’impression ki mo envie faire lor mo bann voisins? Eski c’est bien-être mo famille? Ou-bien eski c’est à cause mo enn adorateur Bondié?

MO BIZIN MEILLEUR KI LÉZOT: Eski mo enn dimoune ki touletan content ki bann kitsoz bien faire? Eski mo faire latête-lipié pou parette meilleur ki lézot? Eski mo contrarié kan enn kikenn faire pli bien ki moi?

L’ADORATION BONDIÉ: Ki pli important pou moi: faveur Bondié ou-soit faveur mo conjoint, mo zenfants, mo parents, ou-bien mo patron? Eski mo disposé pou sacrifié mo service pou Bondié zis pou mo vive inpé pli dans bien?

RÉFLÉCHI BIEN LOR SA BANN CONSEILS LA BIBLE-LA

Ki place Bondié occupé dans ou la-vie?

Ecclésiaste 12:13: “Gagne la crainte pou vrai Bondié et garde so bann commandements. Parski sa-mem obligation pli important ki enn dimoune éna.”

DEMANN OUMEM: Eski façon ki mo pé vive mo la-vie, li en accord avec séki Ecclésiaste 12:13 dire? Eski c’est l’obéissance à bann commandements Bondié ki décide manière ki mo assume bann responsabilités dans lakaz, dans travail ou-soit dans l’école? Ou-bien, eski mo laisse bann pressions ki éna dans la vie, ou-soit lézot kitsoz, décidé si mo bizin réserve le temps pou Bondié ou non?

Ki qualité relation ou éna avec Bondié?

Proverbes 3:5, 6: “Faire Jéhovah confiance avec tou to léker, et pa compte lor to propre l’intelligence. Dans tou séki to faire, prend Li compte, et Li, Li pou faire toi marche lor enn chemin droite.”

Matthieu 4:10: “C’est Jéhovah to Bondié ki to bizin adoré, et c’est ar Li tousel ki to bizin donne enn service sacré.”

DEMANN OUMEM: Eski c’est coumsa ki mo considère Bondié? Eski mo montré ki mo faire Bondié confiance et ki mo bien dévoué pou Li dans tou séki mo faire et dans façon ki mo affronte bann difficultés?

Ki quantité, la lecture ek l’étude de la Bible, li important pou ou?

Jean 17:3: “Ala séki védir la vie éternelle: C’est aprann konn toi, seul vrai Bondié, ek Jésus Christ ki to’nn envoyé.”

DEMANN OUMEM: Eski le temps ki mo réservé pou lire ek médite lor Parole Bondié, montré ki vrémem mo croire dans bann paroles Jean 17:3?

Assisté réunions dans la congrégation, ki quantité sa li important pou ou?

Hébreux 10:24, 25: “Anou considère sakenn nou camarade, pou encourage l’amour ek bann bon actions, sans ki nou néglige nou bann rassemblements, . . . ek encore plus à mesure ki nou trouve jour-la pé approché.”

Psaume 122:1: “Mo ti bien content kan zot ti pé dire moi: ‘Anou al dans la maison Jéhovah.’”

DEMANN OUMEM: Eski mo façon vive montré ki mo reconnaissant pou sa conseil la Bible-la? Eski le mois dernier, mo’nn rate enn réunion parski mo ti laisse lézot kitsoz prend mo lé-temps?

Eski ou participe avec zèle dans la prédication, pou koz lor Bondié ek lor séki Li pou faire?

Matthieu 24:14: “Sa bonne nouvelle du Royaume-la pou prêché partout kot dimoune resté lor la-terre, en témoignage . . . , et lerla la fin pou vini.”

Matthieu 28:19, 20: “Donc, allé et faire bann disciples dans tou bann nations, . . . et enseigne zot pou suive tou séki mo’nn dire zot faire.”

Psaume 96:2: “Chante pou Jéhovah, béni so nom. Jour après jour, annonce la bonne nouvelle lor délivrance [ki Li pou amené].”

DEMANN OUMEM: Eski mo donne sa travail-la place ki li mérité dans mo la-vie? Eski mo montré par mo participation dans sa travail-la ki mo convaincu ki nou pé vive l’époque la fin?