Ki Tousala Montré Nou?

JÉSUS CHRIST ti dire: ‘L’époque la fin’ pou marqué par la guerre, la famine, bann épidémies, ek tremblements de terre.—Matthieu 24:1-8; Luc 21:10, 11.

Depuis 1914, nation pé kont nation, tribu kont tribu, enn race kont enn l’autre race. Souvent c’est la religion ki derrière sa bann la-guerres-la, par zot l’influence lor bann politiciens. Et, alors ki la guerre pé contigne mine la-vie bann dimoune, zordi nou pa fini tann koz bann attaques terroriste inpé partout dans le monde.

Malgré bann progrès ki la Science inn faire, dimoune par millions pé souffer la famine partout dans le monde. Chaque l’année, beaucoup pé mort parski zot péna assez pou mangé.

Dans signe ki li ti donné, Jésus ti mentionne aussi bann épidémies. Après Première Guerre Mondiale, enn épidémie la-grippe ti touye plus ki 21,000,000 dimoune. Contrairement ar lézot épidémies dans le passé ki ti affecté zis certain régions, sa la-grippe-la ti affecté le monde entier, mem bann îles isolé. Et zordi, SIDA pé faire de plus en plus victimes à travers la terre, sans compte aussi lézot épidémies—par exemple, tuberculose, malaria, la cécité des rivières (ou onchocercose), ek la maladie de Chagas—ki pé encore toujours menace la vie bann dimoune dans bann pays en développement.

Toulé-l’années, enregistré enn grand quantité tremblements de terre ki éna différent l’intensité. Malgré ki éna bann nouveau l’appareils ek méthodes pou étudié bann tremblements de terre, souvent sa bann catastrophes-la faire beaucoup fracas dans bann pays surpeuplé.

La Bible finn prédire aussi: “Mazinn sa bien, ki dans dernier jours, le temps pou critique ek difficile pou supporté. Parski dimoune pou content zotmem, zot pou content l’argent, zot pou faire vantard, zot pou éna l’orgueil, zot pou insulté lézot, zot pou désobéir zot parents, zot pa pou éna reconnaissance, zot pou infidèle, zot pa pou éna l’affection, zot pa pou d’accord [entre zot], zot pou koz lézot en mal, zot pa pou maîtrise zot, zot pou sans pitié, zot pa pou content séki bon, zot pou traître, zot pou têtu, fier, zot pou content plaisir plus ki Bondié; zot pou éna enn forme l’attachement ar Bondié, mais zot pou trahir so puissance; et [toi], reste loin ar zot.”—2 Timothée 3:1-5.

Eski ou pa d’accord ki vrémem nou pé vive dans enn ‘lé-temps critique ek difficile pou supporté’?

Eski ou pa remarqué ki pli allé, dimoune pé faire zotmem plaisir, zot content l’argent et zot motivé par l’orgueil?

Eski nou kapav nié ki le monde li rempli avec bann dimoune ki nek konn prend mais pa konn dire merci, ki touletan pé rode dernier mot, ek ki infidèle?

Eski ou trouvé ki quantité, bann zenfants zot désobéissant à zot parents, et ziska ki point dimoune manque l’affection pou zot prochain? Et sa, c’est pa enn kitsoz ki pé passé zis dans dé-trois pays, mais dans le monde entier.

Sûrement, ou pé rann ou compte ki nou pé vive dans enn lé-monde ki plus content plaisir plutôt ki faire séki bon. D’après la Bible, c’est coumsa ki bann dimoune pou été dans “dernier jours.”

Eski bizin encore preuve pou montré ki nou pé vive l’époque la fin? Jésus ti prédire aussi ki dans sa mem période-la, la bonne nouvelle du Royaume pou prêché partout lor la terre. (Matthieu 24:14) Eski sa pé réalisé?

La Tour de Garde li enn magazine Biblique ki éna pou seul objectif annonce la bonne nouvelle lor Royaume Jéhovah. Li imprimé régulièrement dans pli beaucoup langues ki n’importe ki lézot magazine.

Chaque l’année, bann Témoins de Jéhovah passe plus ki 1 milliard d’heures pou koz lor Royaume Bondié personellement avec lézot.

Zordi, zot pé imprime bann publications Biblique dans environ 400 langues, mem dans bann pli tipti langues. Bann Témoins de Jéhovah finn faire la bonne nouvelle touche tou nations; zot finn mem prêche dans beaucoup l’îles ek territoires ki com-di-kozé, trop tipti pou parette lor map. Dans la plupart pays lor la terre, zot pé dirige régulièrement enn programme pou enseigne bann dimoune la Bible.

Oui, la bonne nouvelle du Royaume pé prêché partout lor la terre, pa pou converti le monde, mais pou donne enn témoignage. Tou dimoune pé gagne l’occasion pou montré si c’est important pou zot, pou koné kisannla inn crée le ciel ek la terre. Eski li important pou zot, pou respecté bann la-lois ki le Créateur inn établi? Et eski li important pou zot pou montré l’amour pou zot prochain?—Luc 10:25-27; Révélation 4:11.

Très bientôt, Royaume Bondié pou enlève tou séki mauvais lor la terre et li pou établi enn paradis.—Luc 23:43.

[L’encadré page 6]

Dernier Jours Ki Kitsoz?

Pa dernier jours l’humanité. Pou bann ki faire volonté Bondié, la Bible offer zot l’espoir pou vive éternellement.—Jean 3:16, 36; 1 Jean 2:17.

Pa dernier jours la terre. Parole Bondié promette nou ki la terre pou touletan habité par bann humains.—Psaumes 37:29; 104:5; Isaïe 45:18.

Plutôt, c’est dernier jours sa lé-monde rempli ar violence ek la haine-la. C’est dernier jours bann dimoune ki bien attaché avec bann pratiques ki populaire dans le monde.—Proverbes 2:21, 22.

[L’encadré/Zimage page 7]

Eski la Bible Li Vrémem Parole Bondié?

Plusieurs places dans la Bible, bann prophètes finn écrire: “C’est séki Jéhovah inn dire.” (Isaïe 43:14; Jérémie 2:2) Mem Jésus Christ, Garçon Bondié ti précisé ki séki li ti dire ‘pa ti sorti dans so la-tête.’ (Jean 14:10) La Bible limem dire clairement: “Tou séki finn écrire [dans la Bible], finn inspiré par Bondié.”—2 Timothée 3:16.

D’après United Bible Societies, la Bible finn publié dans plus ki 2,200 langues. Okenn l’autre livre pa finn publié dans sa quantité langues-la, et ni finn éna enn aussi grand tirage—plus ki quatre milliards copies zordi. Si la Bible li enn livre exceptionnel, eski sa bizin étonne nou? Pa ditou, étant donné ki li renferme message Bondié pou tou dimoune lor la terre!

Si ou envie examine en détails bann preuves ki montré ki la Bible li inspiré par Bondié, guette livre La Bible : Parole de Dieu ou des hommes ?, publié par bann Témoins de Jéhovah.

Si ou lire la Bible avec la conviction ki li vrémem Parole Bondié, ou pou tire beaucoup profit.

[L’encadré/Zimage page 8]

Ki Été Royaume Bondié?

C’est enn gouvernement dans le ciel ki vrai Bondié Jéhovah, Créateur le ciel ek la terre, finn établi. —Jérémie 10:10, 12.

La Bible montré ki c’est Jésus Christ ki Bondié finn établi couma le roi dans sa Royaume-la. (Révélation 11:15) Kan li ti lor la terre, Jésus ti montré ki li ti’nn déjà fini gagne enn l’autorité extraordinaire avec Bondié. Li ti éna pouvoir, par exemple, lor bann forces de la nature, li ti éna pouvoir pou guéri toute sorte qualité maladie, et mem pou ressuscite bann dimoune mort. (Matthieu 9:2-8; Marc 4:37-41; Jean 11:11-44) Bann prophéties Biblique ti prédire ki Bondié ti pou donne li aussi “l’autorité, grandeur, ek royaume, pou ki tou bann peuples ek nations ek langues servi li.” (Daniel 7:13, 14) Zordi, Christ pé régné depuis dans le ciel.

[Zimage, page 7]

Prédication de la bonne nouvelle dans le monde entier