Sapit Diset
Pratik Latasman pu Bondye dan U Lakaz
1. Kuma kan bann kup finn aplik direksyon ki ena dan Parol Bondye, sa finn ena enn lefe lor zot maryaz?
ZEOVA Limem ki finn kre maryaz, ek so Parol ofer pli bon direksyon pu bann fami. Buku dimunn finn reysi zot maryaz parski zot finn swiv sa gid la. Wi, sertin ki avan ti pe viv ansam finn santi zot puse pu anrezistre zot maryaz devan lalwa. Ena finn aret gayn bann relasyon sexyel andeor maryaz. Bann zom vyolan ki ti pe maltret zot fam ek zot zanfan, ki li an parol uswa an aksyon, finn aprann pu vinn bon ek dus.
2. Ki enn lavi fami Kretyin inplike?
2 Enn lavi fami Kretyin inplik buku kitsoz, par egzanp nu lopinyon lor maryaz kuma enn laranzman permanan, seki nu fer pu asim nu bann responsabilite familyal, ek fason nu tret lezot manb nu fami. (Efezyin 5:33–6:4) Kone seki Labib dir lor lavi fami, sa li enn kitsoz, me aplik konsey Labib sa li enn lot kitsoz. Personn parmi nu pa ti pu kontan resanble bann ki Zezi ti kondane parski zot ti kas kontur ar bann komannman Bondye. Zot ti ena enn fos rezonnman; pu zot, enn sinp latasman relizye ti ase. (Matye 15:4-9) Nu pale ena enn form latasman ar Bondye, me selman nu pa pratik li ‘dan nu prop lakaz.’ Plito, nu anvi montre enn vre latasman pu Bondye, ki enn “mwayin gran profi” pu nu.—1 Timote 5:4; 6:6; 2 Timote 3:5.
Komye Letan Maryaz Pu Dire?
3. (a) Ki pe ariv buku maryaz, me nu, ki nu bizin byin deside pu fer? (b) Servi u Labib pu reponn bann kestyon ki ena apre sa paragraf la.
3 Pli ale, bann lyin maryaz pe vinn pli frazil. Sertin kup, ki finn marye depi plizir lane, desid pu divorse ek remarye avek enn lot dimunn. Ala kifer, li nepli drol pu tande ki bann zenn kup finn separe zis apre enn tigit letan maryaz. Ninport ki kitsoz dimunn fer, nu, nu bizin rod fer Zeova plezir. Alor, anu egzaminn bann kestyon ek verse Labib ki ena anba pu gete kuma Parol Bondye montre ki maryaz li enn laranzman permanan.
Kan enn zom ek enn fam marye, pu komye letan zot sipoze res ansam? (Mark 10:6-9; Romin 7:2, 3)
Devan Bondye, pu ki rezon selman enn kikenn kapav divorse avek posibilite pu remarye dapre bann prinsip Bondye? (Matye 5:31, 32; 19:3-9)
Ki Zeova resanti kan bann dimunn divorse pu bann rezon ki pa an akor avek Labib? (Malaki 2:13-16)
Eski Labib rekomann separasyon kuma enn mwayin pu regle bann problem ki leve dan maryaz? (1 Korintyin 7:10-13)
Ki bann sityasyon ki kapav zistifye enn separasyon? (Psom 11:5; Lik 4:8; 1 Timote 5:8)
4. Kifer eski ena maryaz ki dirab?
4 Sertin maryaz reysi; zot dirab. Kifer? Atann ziska ki de dimunn gayn lexperyans avan zot marye, sa li enn kitsoz inportan. Me, truv enn konzwin ki partaz mem lintere ki u ek avek ki u kapav diskit bann kitsoz fran-fran, sa usi li enn lot kitsoz inportan. Me, li pli inportan ankor ki u truv enn konzwin ki kontan Zeova ek ki konsider so Parol kuma enn baz pu regle bann problem. (Psom 119:97, 104; 2 Timote 3:16, 17) Enn dimunn kumsa pa pu panse ki demin apredemin li kapav tuzur separe uswa divorse si sa pa marse. Li pa pu servi bann febles so konzwin kuma enn pretex pu evit asim so bann prop responsabilite. Plito, li pu fer fas ar bann problem ek li pu truv bann solisyon pratik.
5. (a) Ki rol fidelite ar Zeova zwe dan maryaz? (b) Mem si enn kikenn gayn lopozisyon, ki bann benediksyon li kapav gayne si li kontiyn gard bann prinsip Zeova?
5 Satan pretann ki kan nu sufer, nu pu abandonn bann semin Zeova. (Zob 2:4, 5; Proverb 27:11) Me gran mazorite bann Temwin Zeova ki finn sufer akoz enn konzwin ki opoze pa finn kas zot langazman maryaz. Zot kontiyn res fidel ar Zeova ek so bann komannman. (Matye 5:37) Sertin ki finn persevere finn gayn lazwa pu truv zot konzwin vinn ansam avek zot pu servi Zeova—mem apre plizir lane lopozisyon! (1 Pyer 3:1, 2) Pu bann Kretyin ki zot konzwin pa montre okenn siyn pu sanze uswa ki finn abandonn zot parski zot servi Zeova, sa bannla usi kone ki zot pu beni parski zot pe montre latasman pu Bondye dan zot lakaz.—Psom 55:22; 145:16.
Sakenn Fer So Par
6. Pu enn maryaz reysi, ki laranzman bizin respekte?
6 Byinsir, pu reysi enn maryaz, li pa sifi zis viv ansam. Respekte lotorite ki Zeova finn etabli, sa li enn kitsoz inportan ki tulede bizin ena. Sa favoriz enn bon lord ek enn santiman sekirite dan lakaz. Dan 1 Korintyin 11:3, nu lir: “Kris li sef tu zom, enn zom li sef enn fam, ek Bondye Li sef Kris.”
7. Kuma eski enn mari bizin amenn so rol sef dan lakaz?
7 Eski u finn remarke seki sa verse la mansyone an premye? Wi, tu zom ena enn sef, setadir Kris, ar ki zot bizin sumet. Sa vedir ki enn mari bizin amenn so rol sef enn fason ki reflekte bann kalite Zezi. Kris sumet ar Zeova, li byin kontan kongregasyon, ek li pran li swin. (1 Timote 3:15) Li finn mem “ofer li pu kongregasyon.” Zezi pa vantar, ni li mank konsiderasyon, me li ‘dus ek li ena limilite dan so leker.’ Bann ki finn aksepte so lotorite “truv sulazman pu [zot] nam.” Kan enn mari tret so fami dan sa fason la, li montre ki li pe sumet ar Kris. Enn fam Kretyin bizin truv sa dan so lavantaz ek enn rekonfor kan li korper avek so mari ek sumet ar so lotorite.—Efezyin 5:25-33; Matye 11:28,29; Proverb 31:10,28.
8. (a) Kifer eski li paret ki dan sertin fami, bann metod Kretyin pa tuzur donn rezilta ki swete? (b) Ki bizin fer si nu dan enn sityasyon kumsa?
8 Me mem sa, pu ena problem. Li kapav arive ki avan ki enn kikenn dan fami kumans aplik bann prinsip Labib, li pa ti kontan kan kikenn dir li seki li bizin fer ek li finn les sa move santiman la pran rasinn dan so leker. Lerla, mem si nu demann bann kitsoz byin ek nu azir avek lamur, sa kapav paret pa donn okenn rezilta. Nu kone ki Labib dir ki nu bizin rezet “koler, kriye ek zure.” (Efezyin 4:31) Me si ena bann manb lafami ki pa konn nanyin apart sa bann move manyer la, ki bizin fer? Abe, Zezi li, li pa ti imit bann ki ti menas li ek ti insilte li, me li ti kont lor so Papa. (1 Pyer 2:22, 23) Alor, kan bann sityasyon difisil arive dan lakaz, priye Zeova pu gayn so led pu ki kumsa u montre latasman pu li, olye ki u imit bann manyer lemond.—Proverb 3:5-7.
9. Olye rod tu ti erer, ki buku mari Kretyin finn aprann fer?
9 Bann sanzman pa tuletan vinn vit-vit, me konsey Labib vremem marse kan aplik li avek swin ek pasyans. Buku mari finn truve ki zot maryaz finn kumans amelyore kan zot finn kumans konpran fason ki Zezi Kris tret kongregasyon. Dan kongregasyon pena bann dimunn parfe. Purtan, Zezi kontan kongregasyon la, li donn li bon legzanp, ek li servi Labib pu ed li pu amelyore. Li finn donn so lavi pu kongregasyon. (1 Pyer 2:21) So legzanp finn ankuraz buku mari Kretyin pu amenn zot rol sef kuma bizin ek pu ofer led avek lamur pu amelyor zot maryaz. Sa donn pli bon rezilta ki kan enn mari rod tu ti erer, uswa li refiz koze.
10. (a) Dan ki bann fason, enn mari uswa enn fam—mem enn kikenn ki dir li Kretyin—kapav rann lavi lezot amer dan lakaz? (b) Ki kapav fer pu amelyor sityasyon la?
10 Ki pu fer asterla, si enn mari pa pran kont bezwin afektif so fami uswa li pa fer okenn program pu etidye Labib an fami ek pu bann lezot aktivite? Uswa ki pu fer si enn fam pa korpere ek li pa montre sumisyon pu Bondye? Ena gayn bann bon rezilta kan zot diskit bann problem avek respe an fami. (Zenez 21:10-12; Proverb 15:22) Me, mem si pa gayn tu bann rezilta ki ti pe atann, sakenn parmi nu kapav fer so par pu amelyor latmosfer ki ena dan lakaz kan li devlop frwi lespri Bondye dan so lavi; kumsa avek lamur li montre konsiderasyon pu lezot manb so fami. (Galat 5:22, 23) Pu kapav ena progre, pa kan nu atann ki lezot fer kitsoz, me kan nu fer nu par ek lerla nu montre ki nu pratik latasman pu Bondye.—Kolosyin 3:18-21.
Kot pu Gayn Bann Repons
11, 12. Ki Zeova finn donn nu pu nu reysi lavi fami?
11 Dimunn turn zot inpe partu pu gayn bann konsey lor lafami. Me nu kone ki dan Parol Bondye ena pli bon konsey ki kapav ena, ek nu rekonesan ki atraver so lorganizasyon ki lor later, Bondye ed nu pu aplik sa konsey la. Eski u pe profit byin sa led la?—Psom 119:129, 130; Mika 4:2.
12 Apart asiste bann reynion kongregasyon, eski u rezerv letan pu etidye Labib an fami regilyerman? Bann fami ki fer sa kapav fer zefor pu ki tu bann lezot manb lafami ador Bondye dan linite. Zot lavi fami vinn pli ris kan zot aplik Parol Bondye dan zot bann sityasyon personel.—Deteronom 11:18-21.
13. (a) Si nu ena bann kestyon lor lafami, suvan ki kote nu kapav truv led ki nu bizin? (b) Ki tu nu bann desizyon bizin montre?
13 Kitfwa u ena bann kestyon lor lafami. Par egzanp, ki nu bizin panse lor bann mwayin kontrasepsyon? Eski kapav zistifye lavortman? Si enn zanfan pena lintere mem pu bann kitsoz spirityel, ziska ki pwin bizin demann li partisip ansam avek lafami dan ladorasyon? Buku bann kestyon kumsa finn deza egzamine dan bann piblikasyon ki bann Temwin Zeova pibliye. Aprann pu servi bann piblikasyon ki kapav ed u dan u letid Labib, kuma bann index, pu truv bann repons. Si u truve ki u pena bann piblikasyon ki l’index mansyone, verifye dan biblyotek Lasal DiRwayom. Uswa u kapav gayn zot lor u ordinater. U kapav usi diskit sa bann kestyon la ar bann zom ek fam Kretyin ki ena plis lexperyans. Me, pa atann tuletan enn wi uswa enn non pu sak kestyon. Suvan, u bizin desid par umem uswa ansam avek u konzwin. Pran bann desizyon ki montre ki u pratik latasman pu Bondye, pa zis an piblik me usi dan u lakaz.—Romin 14:19; Efezyin 5:10.
Kestyon Revizyon
• Kuma eski fidelite ar Zeova fer enn kup res fidel ant zot?
• Kan nu strese akoz bann problem familyal, ki pu ed nu pu fer seki Bondye kontan?
• Mem si lezot manb lafami fer erer, ki nu kapav fer pu amelyor sityasyon la?
[Zimaz paz 155]
Lotorite enn mari bizin reflekte bann kalite Zezi
[Zimaz paz 157]
Enn letid Labib regilye an fami ed fami la pu res ini