Enn Vre Remed

Bann milyon dimounn finn aplik bann prinsip ki ena dan bann lartik avan ek sa finn bien ed zot pou tir bann prezize dan zot leker. Me selman nou bizin onet ar noumem, nou pa pou kapav tir tou prezize par noumem. Me, eski savedir ki prezize zame pou disparet?

Enn Gouvernman Parfe

Bann gouvernman imin pa finn reisi tir bann prezize. Me eski savedir ki okenn gouvernman pa pou reisi fer sa?

Pou ki enn gouvernman kapav tir prezize li pou bizin

1. 1. Motiv bann dimounn pou ena dezir pou sanz zot fason panse ek zot santiman anver lezot.

2. 2. Geri bann douler ki anpes bann dimounn tret lezot dan enn fason zis.

3. 3. Ena bann bon dirizan ki pou tret sak sitwayen parey.

4. 4. Fer ki ena linite partou dan lemond.

Labib rasir nou ki Bondie finn kree enn gouvernman koumsa. Sa gouvernman-la apel “Rwayom Bondie.”​—Lik 4:43.

Anou gete ki sa gouvernman-la pou fer.

1. Ansegn Bann Bon Prinsip

“Bann dimounn ki res lor later pou aprann lazistis.”​—IZAI 26:9.

“Vre lazistis pou fer gagn lape, ek vre lazistis pou fer gagn enn trankilite ek sekirite ki dire.”​—IZAI 32:17.

Ki savedir? Rwayom Bondie pou ansegn bann dimounn bann kitsoz ki bon. Kan bann dimounn aprann fer diferans ant seki bon ek seki pa bon, ant seki zis ek seki inzis, sa sanz latitid ki zot ena anver lezot. Tou dimounn pou konpran ki seki bizin fer se kontan tou sort kalite dimounn.

2. Rwayom Bondie Pou Tir Linzistis

Bondie “pou souy tou zot larm. Pa pou ena ni lamor, ni dey, ni lamantasion, ni douler. Tousa parski vie lemonn finn disparet.”​—REVELASION 21:4.

Ki savedir? Rwayom Bondie pou tir tou soufrans ki finn ena akoz linzistis. Bann dimounn ki finn sibir linzistis pou nepli ena okenn rezon pou ena laenn.

3. Enn Bon Dirizan

“Li pa pou ziz dapre seki li trouve avek so lizie, li pa pou koriz zis dapre seki li tande avek so zorey. Li pou ziz bann ti dimounn avek lazistis, ek li pou rann lazistis an faver bann dimounn inb lor later.”​—IZAI 11:3, 4.

Ki savedir? Zezi Kris, Lerwa dan Rwayom Bondie ki dan lesiel, pou diriz lor later dan enn fason ki zis ek li pa pou fer okenn preferans. Zezi pa plis kontan enn pep ki enn lot, ek li pou fer sir ki bann dimounn lor later antie obeir so bann lalwa.

4. Linite

Rwayom Bondie ansegn bann dimounn pou “ena mem fason panse ek mem lamour, [pou] vremem ini kan zot ena enn sel panse.”​—FILIPIEN 2:2, NW.

Ki savedir? Bann sitwayen Rwayom Bondie pa pou zis dir ki zot ini. Zot pou “vremem ini” parski zot pou vremem kontan sakenn zot kamarad.