Seki Sertin Krwar

Bann Indou

Dapre zot krwayans, soufrans se konsekans ki enn dimounn rekolte pou bann aksion ki li’nn fer swa dan sa lavi-la swa dan so lavi avan. Enn dimounn kapav gagn moksha, setadir libere ar sik reinkarnasion, kan li pa viv kouma lezot dimounn.

Bann Mizilman

Dapre zot krwayans, soufrans se enn pinision ki enn dimounn gagne kan li fer pese ek sa teste osi lafwa bann dimounn. Prezidan Islamic Society of North America, Dr. Sayyid Syeed, dir ki bann maler rapel nou ki nou “bizin ena rekonesans anver Bondie pou tou bann benediksion ki nou gagne, ek realize ki nou bizin soutenir bann ki bizin led.”

Bann tradision Zwif

Dapre zot krwayans, soufrans se rezilta bann aksion ki enn dimounn fer. Sertin Zwif dir ki pou ena enn rezireksion ek ki apre sa, bann inosan ki’nn soufer pou gagn lazistis. Dapre lansegnman Kabal dan relizion Zwif, enn dimounn repran nesans plizir fwa ek a-sak fwa sa donn li lokazion pou repanti pou so bann erer.

Bann Boudis

Dapre zot krwayans, enn dimounn mor ek repran nesans plizir fwa, ek li pou soufer pandan so bann diferan lavi tanki so bann move aksion, bann santiman negatif, ek bann move dezir pa disparet. Si enn dimounn fer bann bon travay, ena sazes, ek arive kontrol so fason panse, li pou ariv enn staz ki apel nirvana, setadir enn staz kot nepli ena okenn soufrans.

Bann ki swiv lansegnman Confucius

Dapre A Dictionary of Comparative Religion, bann ki swiv lansegnman Confucius krwar ki nou soufer akoz ‘erer ki bann imin fer.’ Dapre zot krwayans, mem si enn dimounn kapav diminie so soufrans kan li amenn enn bon lavi, li soufer sirtou akoz “bann kreatir spiritiel, ki boukou pli for ki bann imin. Dan sa ka-la, bann dimounn bizin zis aksepte seki sa bann kreatir spiritiel la finn deside.”

Sertin relizion ki ena dan bann tribi

Dapre zot krwayans, bann dimounn soufer akoz sorselri. Zot panse ki bann longanis kapav swa amenn lasans swa bann maler, ek bann dimounn kapav diminie ditor ki bann longanis fer kan zot fer bann diferan sistem. Zot osi krwar ki bann sistem ek medsinn ki bann longanis done kan enn dimounn malad, kapav geri bann soufrans ki gagne akoz enn lot longanis.

Bann Kretien

Dapre zot krwayans, bann dimounn soufer akoz pese ki de premie imin ti fer, parey kouma inn ekrir dan Zenez, enn liv Labib. Me selman, bann diferan group Kretien finn azout zot prop lide ar sa lansegnman-la. Par exanp, sertin Katolik panse ki enn dimounn kapav donn Bondie so soufrans pou ki li beni legliz ouswa pou ki li donn enn lot dimounn delivrans.