Bann Adilt​—Bann Bon Gid

KI SAVEDIR GID BANN ZANFAN?

Bann zanfan bizin ki bann adilt gid zot ek donn zot bann konsey. Antan ki paran, ou dan pli bon pozision ki ena pou ranpli sa rol-la; avredir, se ou responsabilite. Me selman, bann lezot adilt kapav osi bann bon gid pou ou bann zanfan.

KIFER LI INPORTAN GID BANN ZANFAN?

Dan boukou pei, bann zenn pa pas boukou letan avek bann adilt. Reflesi lor la:

• Bann zanfan pas laplipar zot lazourne dan lekol, kot ena pli boukou zelev ki profeser ek lezot adilt.

• Apre lekol, kan sertin zenn retourn kot zot, zot tousel parski toulede paran bizin travay.

• Enn sondaz dan l’États-Unis montre ki bann zanfan ant 8 ek 12 an pas anviron sis-er-t-an par zour lor bann laparey elektronik pou diverti zot.a

Liv Hold On to Your Kids dir: “Kan bann zenn rod enn model pou swiv, bann lexplikasion, ek bann konsey zot nepli tourn zot ver zot mama, papa, profeser, ek bann lezot adilt ki responsab me ver . . . zot bann kamarad.”

GID OU BANN ZANFAN

Pas letan avek ou bann zanfan.

PRINSIP LABIB: “Ansegn enn zanfan ki semin li bizin pran; mem kan li pou vinn vie, li pa pou kit li.”​—Proverb 22:6, not.

Bann zanfan ena tandans pou tourn zot ver zot bann paran pou gid zot ek ed zot. Avredir, bann exper dir ki kan zot rant dan ladolesans, bann zanfan ena tandans pou donn plis valer konsey ki zot paran done, plito ki konsey zot bann kamarad. Dan liv You and Your Adolescent, Profeser Laurence Steinberg ekrir: “Bann paran res bann dimounn ki ena enn pli gran linflians lor latitid ek konportman zot bann zanfan pandan zot ladolesans, ziska ki zot vinn bann zenn adilt.” Li azoute: “Bann adolesan anvi kone ki ou panse ek ekout seki ou ena pou dir, mem si zot pa touletan aksepte ouswa dakor avek tou seki ou dir.”

Ou zanfan anvi ki ou gid li, fer seki ou kapav pou gid li. Pas letan avek ou bann zanfan ek partaz seki ou panse, ou bann valer, ek ou bann lexperyans avek zot.

Rod enn kikenn pou gid zot.

PRINSIP LABIB: “Enn kikenn ki mars avek bann dimounn ki ena lasazes pou gagn lasazes.”​—Proverb 13:20.

Eski ou konn enn adilt ki ou panse pou enn bon lexanp pou ou adolesan? Kifer ou pa fer bann laranzman pou ki li pas letan avek ou zanfan? Biensir, sa pa vedir ki ou pe renons ou bann responsabilite antan ki paran. Me si se enn adilt ki ou kapav fer konfians, so bann lankourazman kapav enn led ki pou azout ar formasion ki ou pe donn ou zanfan. Dan Labib, koz lor Timote, ki mem si li ti enn adilt, ti gagn bann gran bienfe kan li ti frekant lapot Pol, ek Pol osi ti gagn bann bienfe ar lamitie ki li ti ena ar Timote.​—Filipien 2:20, 22.

Azordi, boukou fami nepli viv ansam ouswa dan lezanviron, ek souvan bann gran-paran, bann tonton, bann matant, ek bann lezot fami viv dan enn lot pei. Si ou dan sa sitiasion-la, esey fer ou bann adolesan frekant lezot adilt ki ena bann kalite ki ou ti pou kontan ki ou zanfan ena.