Proverb

1 Bann proverb Salomon, garson David lerwa Izrael: 2 Pou fer enn kikenn konn lasazes ek disiplinn; pou disern bann parol ki donn lintelizans; 3 pou gagn disiplinn ki fer nou vinn perspikas, pou gagn lazistis, bon zizman ek pou fer seki drwat; 4 pou donn bann dimounn ki pena lexperyans bon zizman; pou donn enn zenom konesans ek kapasite pou reflesi. 5 Enn dimounn ki ena sazes li ekoute ek li gagn plis konesans, ek enn zom ki ena lintelizans gagn kapasite pou diriz bien, 7 lakrint pou Zeova, se koumansman lakonesans. Zis bann dimounn bet ki mepriz sazes ek disiplinn. 8 Mo garson, ekout disiplinn to papa, ek pa abandonn linstriksion to mama. 9 Parski zot enn kouronn fler atiran pou to latet ek enn zoli kolie pou to likou. 10 Mo garson, si bann ki fer pese pe rod sedwir twa, pa sede. 18 Akoz sa, zot kasiet ek zot atak par sirpriz pou vers disan sa bann-la; zot kasiet pou tir lavi lezot dimounn. 20 Vre sazes pe kriye for lor semin. Dan bann plas piblik, li pe kontign fer tann so lavwa. 21 Dan kwin bann sime kot ena boukou dimounn, li kriye. Devan laport bann lavil, li dir: 22 “Ziska kan zot, bann ki pena lexperyans, zot pou kontign kontan seki san lexperyans? Ziska kan zot, bann ki boufonn dimounn, zot pou kontign pran plezir ar lezot? Ek ziska kan zot, bann ki bet, zot pou kontign ena laenn pou konesans? 23 Pran kont mo disiplinn. Lerla, mo pou vers mo lespri lor zot; mo pou fer zot konn mo parol. 24 Parski mo’nn kriye, me zot pa’le ekoute mem, mo’nn donn zot mo lame, me personn pa’nn pran kont, 25 Zot inn kontign rezet tou mo bann konsey ek zot pa’nn aksepte ki mo koriz zot, 31 Zot pou pey konsekans zot bann aksion, ek zot pou soufer akoz zot prop konsey. 32 ... manier ki bann dimounn bet pa kas latet ar nanye, samem ki pou detrir zot. 33 Me sa kikenn ki ekout mwa la pou res an sekirite. Ek li pou viv trankil san ki li per okenn maler.”