2 Kronik
2 Amazia ti kontign fer seki bon devan lizie Zeova, me li pa ti fer sa avek tou so leker. 5 Ek Amazia ti rasanble tou bann zom dan Zida, ek li finn rasanble zot dapre zot fami, dapre sef bann group mil ek sef bann group san, dan tribi Zida ek Benzamin. Li ti anrezistre tou bann ki ti ena 20 an ouswa plis, ek li’nn gagn 300,000 solda bien antrene ki kapav al lager avek enn lans ek enn gran boukliye. 6 Li ti osi angaz 100,000 zom ki sorti dan Izrael pou 100 talan larzan. 7 Me enn reprezantan vre Bondie ti vinn get li ek ti dir: “A! lerwa, pa les larme Izrael al lager ansam avek twa, parski Zeova pa avek Izrael, ek Li pa avek okenn zom ki sorti Efraim. 8 Ale san zot, pran kouraz ek al lager. Vre Bondie ena pouvwar pou ed twa... Sinon, li kapav permet to lennmi gagn laviktwar lor twa.” 9 Alor, Amazia ti demann reprezantan vre Bondie: “Me ki mo pou fer pou sa 100 talan ki mo’nn fini donn bann solda Izrael la?” Reprezantan vre Bondie ti reponn: “Zeova ena kapasite pou donn twa boukou plis ki sa.”