2 Kronik
1 Salomon, garson David, ti gagn plis pouvwar antan ki lerwa, ek Zeova so Bondie ti avek li ek Bondie ti fer li vinn bien gran. 2 Salomon ti fer rasanble zot tou dan pep Izrael: bann sef 1,000 solda, bann sef 100 solda, bann ziz, tou bann sef dan Izrael, ek bann sef fami. 3 Lerla, Salomon ek zot tou ki ti rasanble ti al dan plas kot fer ladorasion ki ti dan Gabaon, parski laba ti ena latant vre Bondie, latant ki Moiz, serviter Zeova, ti fer dan dezer. 4 Me David inn pran Lars vre Bondie dan Kiryat-Zearim ek inn amenn li dan landrwa ki li’nn prepare pou sa. Li’nn fer enn latant pou sa Lars-la dan Zerizalem. 5 Ek inn met devan tabernak Zeova, lotel an kwiv ki Bezalel garson Ouri, garson Our finn fer. Salomon ek pep Izrael ti priye devan sa lotel-la. 6 Apre sa, Salomon ti fer bann sakrifis devan Zeova, ek li ti ofer 1,000 sakrifis ki brile net lor sa lotel an kwiv ki ti dan latant renion la. 7 Sa lanwit-la, Bondie ti aparet ar Salomon ek ti dir li: “Demann mwa seki to anvi.” 8 Alor Salomon ti dir Bondie: “To’nn montre enn gran lamour fidel anver mo papa David ek to’nn fer mwa vinn lerwa dan so plas. 9 Aster-la, A! Bondie Zeova, fer seki to ti promet mo papa David, parski to’nn fer mwa vinn lerwa lor enn pep ki boukou kouma lapousier later. 10 Alor donn mwa lasazes ek konesans pou diriz sa pep-la, parski kisann-la ki kapav ziz to pep ki extra gran-la?” 11 Lerla Bondie ti dir Salomon: “Parski samem ki to leker anvi ek to pa’nn demann dibien, larises, loner, ouswa lamor bann ki ena laenn pou twa, ni pou ki to viv lontan, me to’nn demann lasazes ek konesans pou ziz mo pep ki mo’nn fer twa vinn zot lerwa, 12 mo pou donn twa lasazes ek konesans. Mo pou osi donn twa dibien, larises, ek loner ki okenn lerwa avan twa zame inn ena ek okenn lerwa apre twa zame pa pou ena.” 13 Lerla, Salomon ti kit sa plas kot fer ladorasion dan Gabaon la, kot latant renion ti ete, ek li ti retourn Zerizalem; ek li ti diriz lor Izrael. 14 Salomon ti kontign gagn plis kales lager ek seval. Li ti ena 1,400 kales lager ek 12,000 seval. Li ti gard zot dan bann lavil pou bann kales ek dan Zerizalem pre kot li ti reste. 15 Lerwa ti fer larzan ek lor dan Zerizalem vinn boukou parey kouma bann ros, ek li ti fer bann dibwa sed vinn boukou parey kouma bann pie sikomor dan Sefela. 16 Salomon ti fer sa bann seval-la vini depi Lezip ek bann marsan lerwa ti aste sa troupo seval la pou enn pri fix. 17 Sak kales ki ti sorti Lezip ti kout 600 pies larzan, ek enn seval ti kout 150 pies larzan. Apre sa, zot ti revann zot avek bann lerwa Itit ek bann lerwa Siri.