1 Kronik
29 Apre sa, Lerwa David ti dir tou bann ki ti rasanble: “Mo garson Salomon, sa kikenn ki Bondie inn swazir la, li zenn ek li pena lexperyans. Se enn gran travay pou fer, parski li pa enn tanp pou bann dimounn me pou Bondie Zeova. 3 Anplis ki tou seki mo’nn prepare pou sa lakaz sin la, mo pou tir lor ek larzan dan mo dibien personel ek mo pou donn sa pou lakaz mo Bondie, parski mo kontan lakaz mo Bondie. 4 Ala seki mo pe done: 3,000 talan lor depi Ofir ek 7,000 talan larzan rafine, pou kouver bann miray bann diferan lasam-la, 5 pou fer bann travay ar lor ek pou fer bann travay ar larzan, ek pou tou travay ki bann zouvriye pou bizin fer. Aster, kisann-la ki volonter zordi pou vinn avek enn kado dan so lame pou Zeova?” 9 Ek lepep ti bien kontan pou fer sa bann don volonter-la, parski zot ti fer sa bann don-la pou Zeova avek tou zot leker, ek Lerwa David osi ti bien kontan. 10 Lerla, David ti loue Zeova devan tou bann ki ti rasanble. Li ti dir: “A! Zeova, Bondie nou papa Izrael, ki nou loue twa pou touletan. 11 A! Zeova, to ena grander, pwisans, bote, laglwar ek dignite, parski tou seki dan lesiel ek lor later pou twa. Rwayom li pou twa, A! Zeova. To tousel ki Sef lor tou kitsoz. 12 Larises ek laglwar sorti kot twa, ek to diriz lor tou kitsoz. Dan to lame ena lafors ek pwisans, ek to lame kapav fer vinn gran ek donn zot tou lafors. 13 Ek aster-la, A! nou Bondie, nou remersie twa ek nou loue to nom ki bien zoli. 14 “Ek mwa, ki mo ete ek ki mo pep ete pou ki nou kapav fer bann don volonter koumsa? Parski tou kitsoz sorti kot twa, ek seki nou’nn donn twa sorti dan to lame mem. 17 A! mo Bondie, mo bien kone ki to examinn leker ek ki to kontan bann dimounn ki fidel. Avek enn leker sinser, mo’nn donn tou sa bann kitsoz-la volonterman, ek mo extra kontan pou trouv to pep ki la pe ofer twa sa bann don volonter la. 20 Lerla David ti dir lepep: “Aster-la, loue Zeova zot Bondie.” Alor, zot tou ti loue Zeova, Bondie zot bann anset, ek zot ti bes zot latet ek zot ti tom azenou devan Zeova ek devan lerwa. 23 Ek Salomon ti asiz lor tronn Zeova kouma lerwa dan plas David so papa. Li ti pe reisi dan tou, ek tou bann Izraelit ti pe obeir li. 25 Ek Zeova ti fer Salomon vinn extra gran devan lizie tou bann Izraelit. Li ti osi donn li plis laglwar antan ki lerwa ki tou lerwa Izrael inn deza gagne avan li. 26 Alor, David, garson Zese, ti diriz lor pei Izrael antie, 27 ek li ti diriz lor Izrael pandan 40 an. Li ti diriz lor Ebronn pandan 7 an ek li ti diriz lor Zerizalem pandan 33 an. 28 David ti ariv enn bon ti laz kan li ti mor. Li ti satisfe parski li ti viv lontan, li ena bann gran rises, ek laglwar. Apre sa, so garson Salomon ti vinn lerwa dan so plas.