Solomon ena sivarai ese Iehova e tomadiho heniamu taudia ediai baine vara diba ḡauna e hahedinaraiamu. Reana kara dika badana ta be karaiamu murinai be laloamu ḡau iboudiai na e vara haraḡa. Eiava reana be gwaumu, “Una na e vara kava.” To, e vara ḡaudia be haeromu neganai, be dibamu ia na abi hidi kereredia e kara guna dainai kara dika badana e karaia. Reana ia na Iehova asie lalokau heniamu taudia e bamodia, moale karadia kereredia ai e vareai, eiava intanet ai websait dikadia e ita o Kristen taudia basiela gabudia ela. Danu reana ia na ḡuriḡuri karana e hadokoa, Baibul se duahiava, hebou se laova, bona se harorova. Hereva Lada-isidia ai e gwauraia eregabe tauna heḡereḡerena, abi hidi kereredia momo e kara murinai kara dika badana e karaia. Ina sivarai amo dahaka ta dibamu? Namona na kara dika bona kara dika baine havara karadia bona gabudia baita dadarai. Solomon ese una na e gwauraia.—Mat. 5:​29, 30. w24.07 rau 16 par. 10-11

Una kohu namona be dahaka? Basileia sivaraina iharorolaina ḡaukarana. (2 Kor. 4:1) Bona hodu be dahaka e laulaulaia? Dirava ena hesiai taudia, idia na sivarai namona e loalaiamu taudia. Paulo ena nega ai, hoihoi taudia ese aniani, wain, bona moni na hodu lalodiai e udava. Una heḡereḡerena, Iehova ese e henida kohu namona na sivarai namona. Iehova ena heduru dainai mai goadada ida sivarai namona ta harorolaiamu. Nega haida, ita na taunimanima ta gari henidiamu. To dahaka baita kara unu amo basita gari? Aposetolo taudia e taravatudia basie haroro neganai e gwauraia ḡuriḡurina mani a laloa. Idia na se gari to Iehova e noia baine durudia mai goadadia ida bae hereva. Bena maoromaoro Iehova ese edia ḡuriḡuri na e haerelaia. (Apos. 4:​18, 29, 31) Ita danu ta garimu negadiai, Iehova baita noia baine duruda taunimanima baita lalokau henidia, unu amo baita haroro henidia. w24.04 rau 16 par. 8-9

Ita ese Iehova ta lalokau heniamu dainai ia ladana ta hahelaḡaiamu. Ta uramu taunimanima baita hadibadia Satana ese Iehova latanai e gwaurai herevadia na koikoi. (Gen. 3:​1-5; Iob. 2:4; Ioa. 8:44) Ta haroromu neganai, ita na ta uramu Iehova ena kara na kamonai taudia baita hadibadia. Danu ta uramu bae diba iena kara badana na lalokau, ena lohia dalana na maoromaoro, bona kahirakahira iena Gavamani ese taunimanima edia hisihisi iboudiai be haorediamu bena maino bona moale be havaraiamu. (Sal. 37:​10, 11, 29; 1 Ioa. 4:8) Haroro ḡaukara ai unu ta kara tomamu neganai, ita ese Iehova ladana ta hahelaḡaiamu. Bona ta moalemu badina ita na ina lada, Iehova ena Witnes anina heḡereḡerena ta ḡaukaramu. w24.05 rau 18 par. 12