Igerekanie na Winyiia bwa Jehova

1. Nĩkĩ winyiia bwa Jehova bũrĩ bwa mwanya mono?

Ntukũne cietũ, antũ babaingĩ barĩa barĩ na wathani nthĩgũrene batĩthagĩrwa na winyiia. Amwe nou, kinya kethĩra Jehova nĩ mwene inya yonthe, we nĩ mwinyiia. (Zb. 113:5-8) Nonagia winyiia mantũne jonthe jarĩa athithagia na atĩciũkagĩĩria kinya aniini. Kĩthomone gĩkĩ tũkaarĩĩria nkuma inya ciawe na twone ũrĩa cionanagia atĩ we nĩ mwinyiia. Kinya tũkairitana ũrĩa Jesũ aaigerekanĩrie na winyiia bwa Jehova. Gũcũnkũũna mantũ jau gũgatũtetheeria gũkuĩĩria Jehova na kwigerekania na winyiia bwawe nkũrũki.

RĨONTHE JEHOVA NENDAGA TŨMŨKUĨĨRIA

2. Nĩmbi Zaburi 62:8 ĩguũraga bwegie Jehova? (Tega kinya karatacine ka mbere.)

² Tĩ bũbũũthũ kwaranĩria na muntũ mwikumia. Antũ aikumia bathithagĩria bangĩ na njĩra ĩtĩ ya kĩao bagĩcionaga teka bo barĩ ba gĩtũmi nkũrũki ya bangĩ, na bũu bũgatũma antũ baciebania nabo. Jehova atĩkari ta antũ bau! Tontũ we nĩ mwinyiia, natũgwataga ũgeni tũmũkuĩĩrie na tũmwĩre mantũ jonthe jarĩa jagũtwinyĩĩria. (Thoma Zaburi 62:8.) O ta ũrĩa mũciari ũmwega endaga kũmenya mobatu ja aana baawe, Jehova nagwataga ũgeni barĩa bamũthathaayia bamwĩra mobatu jaao na akabathikĩĩra bamũromba. Nkũrũki, naatongeererie maromba jamaingĩ ja nthũmba ciawe jaandĩkwa Bibiriene. Bũu nĩbũkwonanĩa ũrĩa ethagĩrwa na wendi bwa gũtũthikĩĩra. (Jos. 10:12-14; 1 Sam. 1:10-18) Ĩndĩ rĩ, nĩatĩa tũũmba kũthithia tũkeeja kwigua teka tũtĩkwagĩra kũmũkuĩĩria tontũ bwa maatia jamaingĩ jarĩa tũthithagia?

3. Nĩmbi bigũkũrikithĩria atĩ Jehova nendaga ũmũkuĩĩria gũkũrũkĩĩra maromba?

³ No tũkuĩrie Jehova gũkũrũkĩĩra maromba kinya rĩrĩa twaigua teka atĩũmba gũtwenda. Nĩkĩ tũkuuga ũu? Kĩrĩ ngerekano ya mũtaana ũrĩa waũrĩte, Jesũ nangˈuanithanĩrie Jehova na baaba ũrĩ na kĩao, wa mũtaana ũrĩa wathithĩtie maatia jamaingĩ na araigua teka ĩthe atĩngĩmwĩtĩkĩĩria gũcoka nja kaĩrĩ. Nĩatĩa ĩthe aathithĩrie rĩrĩa mũtaana acokere nja? Jesũ aaugĩre atĩ arĩkũmwona arĩ kũraaja, o rĩo ‘nogĩĩre na aramũcũnca.’ (Luk. 15:17-20) Jehova nĩ ta baaba ũu. Rĩrĩa twamũromba tuuni nkoro nĩ mĩthangĩko kana maatia jeetũ, winyiia bwawe nĩbũtũmaga agatũthikĩĩra. (Kir. 3:19, 20) Nethagĩrwa na kĩao mono gũtwerekera, na o ta baaba ũrĩa wogĩĩre kĩrĩ mũtaana waawe natũrikithagĩria atĩ natwendete na natũboragĩria. (Isa. 57:15) Nĩatĩa Jehova athithagia ũu? Kaingĩ natumagĩra akũrũ ba kĩũthũrano, antũ beetũ ba nja, na acoore barĩa bamwendete gũtũboreria. (Jak. 5:14, 15) Jehova atwejaga ũtethio bũu tontũ nendaga twĩthĩrwa akuĩ nawe.

4. Nĩkĩ antũ boonaga bũrĩ bũbũũthũ kwaranĩria na Jesũ?

⁴ Jesũ naigerekanagia na Ĩthe. Nĩ mwiyiia o ta Ĩthe. Nĩkĩo antũ bataakĩraga kwĩja kĩrĩwe rĩrĩa aarĩ nthĩgũrũne. Kinya nĩboonaga bũrĩ bũbũũthũ kũmũũria biũria. (Mar. 4:10, 11) Kwou rĩrĩa aaranagĩria nabo nĩbaamũcokagĩria kuuma nkorone batĩkwitha. (Mat. 16:13-16) Na kinya rĩrĩa baatagia, bataakĩraga abathũũrĩĩra, tontũ nĩbaaijĩ arĩ kĩao na weteeri. (Mat. 17:24-27) Athingati baawe nĩbaamenyere Jehova nkũrũki tontũ bwa ũrĩa boonaga Jesũ akigerekania nawe bwega. (Joh. 14:9) Nĩbaairitanĩre atĩ Jehova aatakari ta atongeeria ba ndini ya Kĩyaundi barĩa baarĩ aikumia, aciĩkĩĩri na ainyanĩĩria. We nĩ mwinyiia na nĩbwarĩ bũbũũthũ kũmũkuĩĩria.

5. Nĩatĩa winyiia bũũmba gũtũtethia kwĩthĩrwa tũrĩ antũ bagũkinyĩrĩka?

⁵ Nĩatĩa tũũmba kwigerekania na Jehova? Twethĩrwa tũrĩ ainyiia, antũ bakoona bũrĩ bũbũũthũ kwaranĩria natuĩ. Winyiia bũgatũtethia tũtĩkethĩrwe na rũriitho, rwikumio, na kũrega kũrekanĩra, na twĩthĩrwe na nkuma irĩa igatũma bangĩ benda gutũkuĩĩria ta kĩao, weteeri, na ũrekanĩri. (Akol. 3:12-14) No mwanka akũrũ ba kĩũthũrano baciũmie kwĩthĩrwa bagĩkinyĩrĩkaga nĩkenda bangĩ batĩgakĩre kwaranĩria nabo. Gũtumĩra kaanya amwe na ataana na aarĩ ba baaba gũkabatethia kũthithia ũu. Kwou, rĩrĩa gũkũmbĩka, nĩbaciũmagia gwĩta mĩcemanione antũ a kũthikĩĩra na thimũ kana kompiuta. Kinya nĩbaciũmagia ũrĩa bakũũmba gũtũmĩĩria amwe na bangĩ nyomba kwa nyomba. O ũrĩa ataana na aarĩ ba baaba bakabamenya bwega, bakaigua bangʼanĩri kwaranĩria nabo rĩonthe rĩrĩa bakabatara ũtethio.

JEHOVA NETHAGĨRWA NA ŨNGʼANĨĨRU

6-7. Ejana ngerekano irĩa ikwonania Jehova neetĩkĩrĩĩrie kũthithia ũrĩa atumĩkĩri baawe beendaga.

⁶ Kaingĩ antũ aikumia bathũgaanagia nĩbaijĩ mono na batĩendaga kũgarũra mwonere jwao. Ĩndĩ kinya kethĩra Jehova naijĩ mantũ bwega nkũrũki, nĩ mwinyiia na nethagĩrwa na wendi bwa kũthikĩĩra bangĩ na akagarũra matua jaawe kũringana na jarĩa bakuuga. Thũgaanĩria ũrĩa aathithĩĩrie Miriamu, mwarongʼina wa Musa. Barĩna Haruni nĩbaanungʼunĩĩre Musa ũrĩa watũmi nĩ Jehova. Bũu bũrĩonania Miriamu ataatĩĩaga Jehova. Ta maumĩĩra, Jehova naathũũrĩre na aramũringa na mũtigiri. Nĩatĩa Jehova aathithĩrie rĩrĩa Haruni erencere Musa aromba nĩkenda Miriamu oorua? Mũrungu ataakarĩre agwatĩrĩĩte ĩgamba rĩrĩa aarĩ akũmũgitĩĩra. Tontũ Jehova nĩ mwinyiia, naathikĩĩrĩre Musa na arooria Miriamu.—Gut. 12:1-15.

⁷ Jehova kinya noonanĩrie winyiia kuumania na ũrĩa aathithĩrie Mũnene Hezekia. Naatũmĩre kĩroria kĩawe kwĩra Mũnene ũu atĩ arĩngĩkua. Hezekia naarĩrĩĩre Jehova na aramwerenca amworie. Jehova naamwigĩrĩĩrue kĩao na aramwongeera mĩaka 15 ya gũtũũra. (2 An. 20:1, 5, 6) Kamma, winyiia bwa Jehova nĩbũtũmaga ethĩrwa na kĩao na wendi bwa kũthikĩĩra bangĩ.

8. Nĩmbi bikwonania Jesũ nethagĩrwa na ũngʼanĩĩru? (Mariko 3:1-6)

⁸ Jesũ naigerekanagia na Ĩthe. Rĩrĩa aarĩ nthĩgũrũne, naathithagĩria antũ mantũ jameega rĩrĩa jeetanagĩria na wendi bwa Jehova. Ngerekano, noorerie antũ ntukũ ya Sabatũ ũntũ bũrĩa atongeeria ba kĩndini boonaga bũtaabuĩrĩte kũthithua. (Thoma Mariko 3:1-6.) Kinya nandĩ, no etĩte na mbere kwonania ũngʼanĩĩru arĩ kĩongo gĩa kĩũthũrano kĩa Gĩkristũ. Ngerekano, rĩrĩa muntũ athithia wĩyia bũũrito, namũtethagĩĩria na njĩra ya weteeri, na akamwa kaanya ga kwirira.—Kug. 2:2-5.

9. Nĩatĩa tũũmba gũkũria na kwonania ũngʼanĩĩru? (Tega kinya mbica.)

⁹ Nĩatĩa tũũmba kwigerekania na Jehova? O ta Jehova, nĩtũbuĩrĩte kwĩthĩrwa na ũngʼanĩĩru bwa kĩmathũgaanio na rĩrĩa tũkũthithia mantũ. (Jak. 3:17) Ngerekano, aciari barĩ na ũngʼanĩĩru, batĩĩrĩgagĩĩra aana baao bathithia mantũ jarĩa batĩkũũmba. Kinya nĩbaciũmagia batĩkaringithanie ũũmbi bwa mwana ũmwe na bwa ũngĩ. Kiambiriria 33:12-14 nĩonanagia atĩ Jakubu naarĩ na ũngʼanĩĩru. Akũrũ ba kĩũthũrano kinya bo no mwanka bethĩrwe na ũngʼanĩĩru. Bomba kũthithia ũu rĩrĩa betĩkĩĩria maoni ja akũrũ bangĩ kethĩra nĩjagwĩtanĩria na mooritani ja Bibiria. (1 Tim. 3:2, 3) Twinthe nĩtũbuĩrĩte gũciũmia nĩkenda tũciũkĩrwa nĩ maoni ja bangĩ kinya rĩrĩa jarĩ mwanya na jeetũ. (Aro. 14:1) Kinya nĩtũbuĩrĩte gũciũmia nĩkenda ũngʼanĩĩru bwetũ ‘bũmenyewa nĩ antũ bonthe.’—Afl. 4:5.

JEHOVA NETHAGĨRWA NA WETEERI

10. Nĩatĩa Jehova onanĩtie weteeri?

¹⁰ Mbuga nwonete antũ aikumia batĩendete gweteera. Nĩbendete gũciũkĩĩria mono. Mwanya nabo, Jehova nonanagia weteeri na njĩra ĩnene nkũrũki! Ngerekano, ntukũne cia Nuhu, Jehova naaugĩre atĩ ageteera mĩaka 120 mbere ya kũthiria antũ baathũũku. (Kia. 6:3) Nuhu naarĩ na kaanya ga kũmenyeera aana baawe na baramũtethia gwaka Sabina barĩ amwe ta nja. Nyumene, Jehova noonanĩrie weteeri rĩrĩa Iburahimu aamũũragia biũria biegie kũthirua kwa Sodomu na Gomora. Muntũ mwikumia arĩngĩ mũcokeria, ‘Ũrĩthũgaania ntĩkũmenya ũrĩa nkũthithia!’ Ĩndĩ tontũ Jehova nĩ mwinyiia, naathikĩĩrĩre Iburahimu na njĩra ya weteeri.—Kia. 18:20-33.

11. Kũringana na 2 Petero 3:9, nĩkĩ Jehova etĩte na mbere kwonania weteeri ntukũne cietũ?

¹¹ Kinya ntukũne cietũ Jehova nonanagia weteeri. Neteerete ĩgiita rĩrĩa ekĩte nĩkenda areta mũthiro. Nĩkĩ arĩ na weteeri? Tontũ ‘atĩendaga kinya muntũ ũmwe wenka aũra, nonga bũrĩa endaga nĩ atĩ antũ bonthe bairire.’ (Thoma 2 Petero 3:9.) Rĩ, weteeri bwawe nĩ bwa ũtheri? Arĩ! Tontũ nĩbũtethetie babaingĩ kũmũkuĩria. Na nĩtũkwĩrĩgĩĩra babaingĩ nkũrũki bakathithia ũu. Amwe nou, weteeri bwawe bũrĩ mĩanka. Kinya kethĩra Jehova nendete antũ, atĩrekeeria batũũra kũthithia ũrĩa bakwenda. Akathiria ũthũũku bunthe buru.—Hab. 2:3.

12. Nĩatĩa Jesũ onanagia weteeri o ta Jehova?

¹² Jesũ naigerekanagia na Ĩthe. Jesũ nonanĩtie weteeri o ta Jehova mĩaka ĩmiingĩ. Nonete Shaitani agĩtambia mantũ jatĩ ja mma jegie Jehova na atumĩkĩri baawe etĩkua. (Kia. 3:4, 5; Ayu. 1:11; Kug. 12:10) Kinya nacionerete antũ babaingĩ bakĩthangĩka mono. No mwanka ethĩrwe nakwenda mono ‘kwĩnyangia ngũgĩ cia nkoma’! (1 Joh. 3:8) Nĩmbi bitethetie Jesũ gweteera mwanka aewa rũũtha nĩ Jehova rwa kũthiria buru ngũgĩ cia nkoma? Nĩ tontũ we nĩ mwinyiia, na naijĩ atĩ Jehova nĩwe ũkũmenya rĩrĩa mũthiro jũkeeja.—Atum. 1:7

13. Nĩkĩ Jesũ oonerie aritwa baawe weteeri, na nĩatĩa aathithĩrie ũu?

¹³ Rĩrĩa Jesũ aarĩ nthĩgũrũne, noonerie aritwa baawe weteeri. Ngerekano, rĩrĩa baakararanagia kaĩrĩ na kaĩrĩ bwegie ũrĩa waarĩ ũmũnene gatĩgatĩne kaao, Jesũ ataabagereere njara. Mwanya nou, neetĩre na mbere kwĩthĩrwa na weteeri. (Luk. 9:46; 22:24-27) Neerĩgagĩĩra atĩ barĩngĩthithia mogarũrũku jarĩa jaabatarĩkaga. Rĩ, nwĩthĩrĩtwe ũgĩcokera ĩatia o rĩrĩa kaĩrĩ na kaĩrĩ? Rĩ, ũtĩkwigua ũrĩ na nkaatho kũmenya atĩ Mũnene weetũ nĩ mwinyiia na arĩ weteeri?

14. Nĩmbi bigatũtethia kwĩthĩrwa na weteeri nkũrũki?

¹⁴ Nĩatĩa tũũmba kwigerekania na Jehova? Nĩkenda tũthũgaania na tũthithia mantũ ta Jehova, no mwanka twiritane kũthũgaania ta Jesũ. (1 Ako. 2:16) Nĩatĩa tũũmba kũmenya bwega mũthũgaanĩrie jwa Jesũ? Njĩra ĩrĩa nene ya kũthithia ũu nĩ kũthoma mauku ja Bibiria ja Injili. Nĩtũkũbatara kũjũkia kaanya kũthũgaanĩria kĩndeene bwegie mantũ jarĩa Jesũ aathithagia na nĩkĩ aajathithĩrie. Kinya nĩtũbuĩrĩte kũromba Jehova atũtethie kwĩthĩrwa na winyiia na weteeri o ta Jesũ. O ũrĩa tũgeeta na mbere kũthũgaania ta Jesũ, nou tũkoonia bangĩ weteeri tũkiigerekanagia na Jehova na kinya tũgaciũkĩrwa atĩ nĩtũkabatara ĩgiita kwiritana na kũthithia mantũ jamwe.—Mat. 18:26-30, 35.

JEHOVA NONAGA BARĨA BAINYIĨTIE

15. Nĩatĩa Jehova ethĩrĩtwe akĩũjũria biugo birĩa birĩ kĩrĩ Zaburi 138:6?

¹⁵ Thoma Zaburi 138:6. Nĩ gĩtĩĩo gĩkĩnene mono kuuma kĩrĩ Mwene Inya Yonthe Jehova kwona antũ barĩa bonthe bainyiagia! Thũgaanĩria ngerekano cia antũ ba karaaja barĩa batoonagwa barĩ ba gĩtũmi, ĩndĩ Jehova naabonaga barĩ ba gĩtũmi. Bamwe baao tũtĩbaijĩ bwega, ĩndĩ Jehova naatũmĩre mariĩtwa jaao jaandĩkwa Bibiriene. Jehova naatongererie Musa kwandĩka riĩtwa ria Debora ũrĩa watũngatagĩra mantũ jegie ũgima bwa mwĩrĩ, na aatũũraga ĩgiita rĩa karaaja. Debora naarĩ mwĩtĩkĩkua tontũ natũmĩkagĩra nja ya Isaka na Jakubu nkũrũki ya mĩaka 125! Kinya kethĩra tĩ jamaingĩ jaijĩkene jegie mwekũrũ ũjũ, Musa naandĩkĩre bũmwegie tontũ Jehova naamwendete. (Kia. 24:59; 35:8.) Mĩaka ĩmiingĩ nyumene, Jehova naathuurĩre Daudi ũrĩa waarĩ ũmũniini na mũrĩĩthĩ nĩkenda aa Mũnene wa Isiraeli. (2 Sam. 22:1, 36) Ĩgiita rĩĩkai nyuma ya Jesũ gũciarwa, Mũrungu naatũmĩre mũraĩka waawe kĩrĩ gĩkundi kĩa arĩĩthi na arabamenyithia barĩ ba mbere atĩ Mesiya naaciari Bethilehemu. (Luk. 2:8-11) Rĩrĩa Maria na Jusufu baaikĩrie Jesũ kĩũrũne, Jehova naaere Simioni na Anna barĩa baarĩ baakũrũ wendeeri bwa kwona Mũtaana Waawe. (Luk. 2:25-30, 36-38) Kamma, ‘kinya kwethĩrwa Mwathani arĩ ĩgũrũ mono naraithagĩĩria ũrĩa winyiĩtie’!

16. Nĩatĩa Jesũ aigerekanagia na Ĩthe kĩrĩ ũrĩa athithagĩria antũ?

¹⁶ Jesũ naigerekenagia na Ĩthe. O ta Ĩthe, nonaga antũ barĩ ba gĩtũmi. Naaritanaga ‘barĩa bataritani na barĩa bataarĩ na ũmenyo bũbwingĩ’ ũmma bwegie Ũnene bwa Mũrungu. (Atum. 4:13; Mat. 11:25) Kinya nooragia barĩa baajĩtue na aathithagia ũu na njĩra ĩrĩa yaatũmaga baigua beendi na batĩi. (Luk. 5:13) Ũtukũ bwa mũthia mbere ya akua, naathambĩrie aritwa baawe magũrũ ngũgĩ ĩrĩa yoonagwa ĩrĩ ya nkombo. (Joh. 13:5) Mbere ya aitia ĩgũrũ, naaere athingati baawe bonthe ngũgĩ ĩrĩa ĩrĩ ya gĩtũmi nkũrũki—tayo gũtetheeria bangĩ boone mwoyo jwa kenya na kenya.—Mat. 28:19, 20.

17. Nĩatĩa tũũmba kwonia bangĩ wendo na gĩtĩĩo? (Tega kinya mbica.)

¹⁷ Nĩatĩa tũũmba kwigerekania na Jehova? Nĩtwonagia antũ gĩtĩĩo rĩrĩa tũgũtũmĩĩria nkuma ĩnjega, ĩtĩkũmakania narĩa baumĩte, rangi yaao, kana kĩthomo kĩrĩa barĩ nakĩo. Kinya nĩtwonanagia wendo na gĩtĩĩo kĩrĩ ataana na aarĩ ba baaba rĩrĩa twaboona barĩ ba gĩtũmi nkũrũki yeetũ, ĩtĩkũmakania nĩ wendeeri bũrĩkũ barĩ nabu. (Afl. 2:3) Jehova nagwĩragua rĩrĩa twainyiia na ‘twajũkia kaanya ka mbere’ kwonia bangĩ gĩtĩĩo.—Aro. 12:10; Zef. 3:12.

18. Nĩkĩ ũbuĩrĩte kwigerekania na winyiia bwa Jehova?

¹⁸ Rĩrĩa twaciũmia kwigerekania na winyiia bwa Baaba weetũ wa ĩgũrũ, tũkethĩrwa tũrĩ antũ ba gũkinyĩrĩka, ba kũthikĩĩra maoni ja bangĩ, na barĩ na weteeri nkũrũki. Na bũu bũgatũma twende na tũtĩĩe bangĩ o ta ũrĩa Jehova athithagia. Riikana twathithia jonthe jarĩa tũkũũmba ta Mũrungu weetũ ũrĩa nĩ mwinyiia, bũu bũgatũma twĩthĩrwe tũrĩ ba gĩtũmi kĩrĩ we!— Isa. 43:4.