Iritane Gũkĩra Mũrungu O ta Obadia

Obadia aarĩ mũrũngamĩĩri wa nyomba ya Ahabu, Mũnene ũmũũĩ ũrĩa wetĩkĩĩrĩrie ũthathayia bwa Baali bwĩta na mbere Isiraeli. Amwe nou, Obadia naatwĩre akĩraga Mũrungu kuuma ‘arĩ ũmwĩthĩ.’ (1 An. 18:1-13) Kwou, rĩrĩa Jezebeli mwekũrũ wa Ahabu aathanĩre iroria bionthe bia Jehova biũragwe, Obadia noonanĩrie ũcamba nĩkenda abitethia bitĩkooragwe. Naaithĩre iroria 100 na arabiaa biakũrĩa ĩgiita rĩu rĩa mpara ĩnene, kinya kethĩra bũu bũrĩngĩ ũũmba kũmũtonyia ũgwatine bũbũnene! No mwanka bwĩthĩrwe nĩ bwarĩ bũbũũmũ gũkara abaithĩte nĩkenda ũntũ bũu bũtĩkamenyekane nĩ iroria bibiingĩ bia ũrongo bia Ahabu na Jezebeli.—1 An. 18:19.

Nĩmbi tũkwiritana kuumania na muntũ ũu mũkĩri Mũrungu? Kinya kethĩra Obadia naakĩraga Ahabu, ũrĩa aakĩrĩte nkũrũki nĩ Jehova. Na bũu nĩbwamweere ũcamba bwa gwĩkĩra ũtũũro bwawe ũgwaatine nĩkenda onokia athathayia bangĩ. Kethĩra ũthathayia bwa mma nĩbũringi marubuku narĩa tũkaraga, kinya tuĩ twomba gũkũria nkuma ĩu ya gũkĩra Jehova. Gũkĩra kũu gũgatũtethia kwigĩka ataana na aarĩ ba baaba barĩa bagũkũrũkĩĩra mĩthangĩko.