Mũtana ũmwĩthĩ akiigagua agĩkucĩĩrua rĩrĩa ona mũtana na mwarĩ ũmwe bakĩonanagia wendo, atana baĩrĩ bagĩtegaga thimũ yaao, na kũrĩna mwarĩ akũrũkĩĩrĩĩte akuĩ nabo

ANTŨ BABEETHĨ BORAGIA

Nĩatĩa Mpũũmba Kũregana na Magerio?

Mũtũmwa Paũlũ aandĩkĩre ũjũ: “riria ni mpendaga kuthithia buria bwagirite, ui nabu bwithagirwa buri kirini.” (Aroma 7:21) Rĩ, kũrĩ rĩo waigua o ta mũtũmwa Paũlũ? Kethĩra ũraigua tawe, kĩthoomo gĩkĩ gĩgagũtethia kũregana na kĩgerio gĩa kwenda kũthithia kũringana na mairirĩĩria jamathũũku.

Bũrĩa ũkũbatara kũmenya

Kaingĩ rĩrĩa waatĩkwa nĩ antũ ba nthukĩ yaaku, bomba gũtũma ũthithia mantũ jamathũũku. Bibiria yugaga “muuru jumui niju juthuukagia miitire iria miega.” (1 Akorintho 15:33) Gwatĩkwa nĩ bangĩ kana ituo bia mwingĩ bia kwaranĩria, kwomba gũtũma wambia kwirirĩĩria mantũ jarĩa jomba gũgũtongeeria kũthithia mantũ jamathũũku na kinya no jatũme ‘ũthingata ntundu ya antũ wĩta kũthithia ũthũũku.’—Kuuma 23:2.

“Kwigua waatĩki nĩ wirirĩĩria bwa kwendwa, na gwĩtĩkĩrwa nĩ bangĩ kwomba gũtũma ũthithia o bunthe bũrĩa bangĩ bakũthithia, nĩkenda akĩ bagwĩtĩkĩĩria.”—Jeremy.

Ũntũ bwa kũthũgaanĩria: Nĩkĩ bũmba kwĩthĩrwa bũrĩ ũntũ bũbũũmũ gũciinda kĩgerio, ũkeeja kwĩthĩrwa birĩa ũkũmakĩra mono nĩ ũrĩa antũ bangĩ bagũkwona?—Njuno 29:25.

Ũntũ bwa gĩtũmi: Menya wĩtĩkĩĩria antũ bangĩ babeethĩ bagwatĩka ũtiganĩria ithimi biaku.

Bũrĩa ũũmba kũthithia

Ciũkĩrwa nĩ mantũ jarĩa wĩtĩkĩtie. Ũkeeja kwĩthĩrwa ũtĩkũmenya mantũ jarĩa wĩtĩkĩtie, womba gũkara ta muntũ wa gũtongagĩĩrua nĩ bangĩ o ũrĩa bakwenda. Nĩ bwega kĩthingata ũntũ bũbũ bũrĩ Bibiriene: “Geragieni mantu jonthe, na jaria meega buyagwatage.” (1 Athesalonike 5:21) O ũrĩa ũgeta na mbere gũciũkĩrwa nĩ jarĩa wĩtĩkĩĩtie, nou gũkethĩrwa bũrĩ bũbũũthũ nkũrũki gũtũũra kũringana na mantũ jau, na kũregana na jarĩa jomba gũtũma ũtĩkathingate jarĩa wĩtĩkĩĩtie.

Ũntũ bwa kũthũgaanĩria: Nĩkĩ wĩtĩkagia atĩ ithimi bia Mũrungu bia wagĩru biĩki nĩkenda bikũguna?

“Nĩmbonete atĩ rĩonthe rĩrĩa ndathingata jarĩa mbĩtĩkĩtie na ndaciinda kĩgerio, bangĩ nĩbantĩĩaga nkũrũki.”—Kimberly.

Ngerekano ĩnjega Bibiriene: Danieli. : Kwombĩka Danieli aarĩ tinenja rĩrĩa “[aatuĩre] nkorone yawe” atĩ arĩngĩathĩkĩra mawaatho ja Mũrungu.—Danieli 1:8.

Mũtana ũmwĩthĩ aogi na mĩrigi agĩĩtithagua nĩ bangĩ o ũrĩa bakwenda — Kethĩra ũtĩkũmenya mantũ jarĩa wĩtĩkĩtie, womba gũkara ta muntũ wa gũtongagĩĩrua nĩ bangĩ o ũrĩa bakwenda

Menya gũtaũkĩrwa gwaku. Bibiria nĩtaragĩĩria bwegie ‘maiririiria’ ja wĩthĩne—jarĩa jethagĩrwa na inya, mono mono rĩrĩa muntũ arĩ ũmwĩthĩ. (2 Timotheo 2:22) Jamwe jaajo nĩ mairirĩĩria ja kũmenyana kĩmwĩrĩ, ja kwenda gwĩtĩkĩrwa nĩ bangĩ, na ja kwenda kwithithĩria matua wengwa kinya mbere ya ũũmba kũthithia ũu.

Ũntũ bwa kũthũgaanĩria: Bibiria yugaga atĩ “o muntu ageragua ni kwiririiria kwawe, riria kuri gukui, na akaiirua.” (Jakubu 1:14) Rĩ, nĩ wirirĩĩria bwa mantũ jarĩkũ wigagua bũgĩgũkucĩĩria nkũrũki?

“Menya ũciaĩĩria, ciũkĩrwa nĩ wirirĩĩria bwa mantũ jarĩa wigagua jagĩgũkucĩĩria nkũrũki. Thithia ũcũnkũũni bwegie ũrĩa ũũmba kũrwa na mairirĩĩria jau, na wandĩke mantũ jarĩa ũũmba gũtumĩra. Wathithia ũu, ũkoomba gũciinda kĩgerio kĩu, wacemania nakĩo ĩgiita rĩĩjĩte.”—Sylvia.

Ngerekano ĩnjega Bibiriene: Daudi. Magiita jamwe, naathithagia matua tontũ bwa gwatĩkwa nĩ bangĩ kana tontũ bwa mairirĩĩria jaawe wengwa. Ĩndĩ Daudi naairitanĩre kuumania na maatia jaawe, na araciũmia kwagĩrithia mantũ. Naarombere Jehova ũjũ: “mpumbira nkoro injeru, uncokerie nkoro injeru ndene yakwa.”—Zaburi 51:10.

Ciinda kĩgerio. Bibiria yugaga: “Bukoombweni ni mantu jaria mai.” (Aroma 12:21) Kũu nĩ kwonania, to mwanka ũciindwe rĩrĩa wagerua. Womba kũthuura kũthithia ũntũ bũrĩa bwagĩrĩte.

Ũntũ bwa kũthũgaanĩria: Nĩatĩa ũũmba kwimenyeera, na gũtigĩĩra atĩ ũkũthithia ũntũ bũrĩa bwagĩrĩte rĩrĩa wacemania na magerio?

“Nthũgaanagĩria ũrĩa nkaigua kethĩra nkathithia jarĩa nkwirirĩĩria. Rĩ, nkaigua bwega? Mbuga, ĩndĩ nkaigua ũu ĩgiita rĩĩkai. Ĩndĩ rĩ, ngeeta na mbere kwigua bwega kinya nyuma ya ĩgiita rĩraaja gũkũrũka? Arĩ, mwanya nou, neka nkaigua bũbũũi nkũrũki. Rĩ, nkagunĩka kuumania na ũntũ bũu? Arĩ!”—Sophia.

Ngerekano ĩnjega Bibiriene: Paũlũ. Kinya kethĩra neetĩkĩrĩrie naarĩ na mwerekera jũmũũi, Paũlũ naajũciindĩre. Aandĩkĩre atĩ: “nthangikagia mwiri jwakwa na kujwethia nthumba yakwa.”—1 Akorintho 9:27.

Ũntũ bwa gĩtũmi: Gwe gwengwa nĩwe ũkathuura ũrĩa ũkathithia wagerua.

Riikana atĩ, magerio nĩ ja ĩgiita rĩĩkai. Melissa ũrĩa ũrĩna mĩaka 20 ariuga ũjũ: “Mantũ jamaingĩ jarĩa ndoonaga jarĩ magerio jamanene rĩrĩa ndaarĩ cukuru, nandĩ ntĩjoonaga jarĩ mantũ jagũncumbũra. Kũriikana ũntũ bũu nĩkũndikithagĩria atĩ kinya magerio jarĩa ngũkũrũkĩĩra nandĩ, jagakũrũka, na ntukũ ĩmwe nkariikana ũntũ bũu na mbone atĩ, ũtũũro bwakwa nĩbwagĩrĩte nkũrũki tontũ ntagwĩre kĩrĩjo.”

Ũrĩa antũ ba nthukĩ yaaku bakuuga

“Nkeeja gũtua ĩtua na nkethĩrwa na ũcamba bwa kũrĩthingatĩĩra, nĩgũntethagia gũciinda kĩgerio. Ngerekano, nkeeja gũtua atĩ ntĩthithia ũntũ bũnna, nthingatagĩra ĩtua rĩu, na ntĩthũgaanagĩria kũgarũra mũrũngamo jwakwa kana mbĩtĩkĩĩria gũtongeerua nĩ ĩtua rĩa muntũ ũngĩ.”—Olivia.

“Antũ barĩa tinenja nĩbaatĩkagwa mono nĩkenda beta biathone na bathithia mantũ jonthe jarĩa jakathithua nao—ta kũnyua ncobi, gũtumĩra ndawa cia mbogita, na kũmenyana kĩmwĩrĩ. Nĩncionerete atĩ kwaria na aciari bakwa ntĩkũbaitha bwegie mantũ jau, nĩgũntethagia mono. Kinya kwĩthĩrwa na ũntũ bwa kũthithia rĩrĩa nogoki, nĩgũntethetie mono ntĩkathithie ũntũ bũtĩagĩrĩte.”—Jared.

“Bũmwe bwa mantũ jarĩa jambũmagĩra mono, nĩ rĩrĩa ngwatĩkwa nthithia ũntũ bũnna bũrĩa mbonaga bũtĩagĩrĩte, ĩndĩ bangĩ bakĩbwonaga bũtĩthũũki—ta rĩrĩa nkũthuura mantũ ja kwigwĩria. Nĩkenda ũũmbana rĩrĩa ũgwatĩka na njĩra ĩu, no mwanka ũmenye birĩa bikũrikithĩrĩte ũtĩkathithie ũrĩa bakwenda, na ũkabatara ĩgiita na ũtea bwa kũngʼana nĩkenda ũũmbana.”—Mayan.

“Bwegie magerio, nũbuĩrĩte kwĩthĩrwa ũtĩgũciaĩĩria. Nũbuĩrĩte kũmenya nĩ ituo birĩkũ intanetine bikwonania mantũ jarĩa jomba gũgũtoonyia magerione, mĩtugo ya waganu, na nũbuĩrĩte kũmenya ũrĩa ũkathithia mantũ jau jakeeja kuumĩra. Nũbuĩrĩte kũmenya ũrĩa ũkathithia nĩkenda ũtĩkagwe kĩgerione kĩu.”—Julian.