Rĩ, Gwĩtĩkia Jesũ Nĩku akĩ Tũkũbatara Nĩkenda Twonokua?

Ĩcokio rĩa Bibiria

Akristũ nĩbetĩkĩtie Jesũ aakuĩre tontũ bwa meeyia ja antũ. (1 Petero 3:18) Kwou, wonokio nĩbũkũbatara mantũ jamaingĩ nkũrũki ya gwĩtĩkia akĩ Jesũ nĩ mwonokia. Irundu bithũũku nĩbijĩ atĩ Jesũ nĩ ‘Mũtaana wa Mũrungu,’ ĩndĩ bitĩonokua neka bikathirua.—Luka 4:41; Juda 6.

• Nĩatĩa mbuĩrĩte kũthithia nĩkenda mbonokua?

• A “Ĩromba rĩa Eeyia” narĩo?

• Nĩkũ “Ĩromba rĩa Eeyia” rĩaumĩre?

Nĩatĩa mbuĩrĩte kũthithia nĩkenda mbonokua?

• No mwanka wĩtĩkie Jesũ aaritĩre mwoyo jwawe tontũ bwa meeyia jeetũ. (Mathithio 16:30, 31; 1 Johana 2:2) Bũbũ nĩ amwe na gwĩtĩkia Jesũ arĩ muntũ wengwa, na atĩ jarĩa jonthe Bibiria yugaga bũmwegie nĩ ja mma.

• Iritane ũrĩa Bibiria yugaga. (2 Timotheo 3:15) Bibiria ĩritanaga atĩ mũtũmwa Paũlũ na Sila, beerĩre mũbungwa ũmwe atĩ: ‘Ĩtĩkĩra Mwathani Jesũ, na ũkoonokua.’ Nyumene, atũmwa baramenyithia mũbungwa ũu ‘Rũteto rwa Mwathani.’a (Mathithio 16:31, 32) Bũu nĩbũkwonania atĩ mũbungwa ũu atĩngĩĩtĩkia Jesũ, tonga gũkethĩrwa naaritani mantũ ja mũsingi ja Rũteto rwa Mũrungu. Naabataraga ũmenyo bwa mma kuuma Maandĩkone.—1 Timotheo 2:3, 4.

• Irire. (Mathithio 3:19) No mwanka wirire kana wigue bũũnthũku nkorone tontũ bwa mathithio jamathũũku jarĩa waarĩ najo au mberene. Antũ bangĩ bakoona nwirirĩte rĩrĩa watiga mantũ jarĩa mathũũku, na waambia kũthithia ‘mantũ jarĩa jaagĩrĩte na kwirira.’—Mathithio 26:20.

• Batithua. (Mathayo 28:19) Jesũ aaugĩre barĩa bakaa aritwa baawe bakabatithua. Mũbungwa ũrĩa ũgweti arĩa ĩgũrũ naabatithĩrue. (Mathithio 16:33) Ũu nou, nyuma ya mũtũmwa Petero arĩkũritana kĩrĩndĩ mma ciegie Jesũ Kristũ, ‘ĩgiita rĩu barĩa beetĩkĩrĩĩrie nteto ciawe barabatithua.’—Mathithio 2:40, 41.

• Athĩkĩra mawaatho ja Jesũ. (Ahibirania 5:9) Barĩa ‘bamenyagĩĩra mantũ jonthe’ jarĩa Jesũ aabathĩĩte, nĩbonanagia gũkũrũkĩĩra mathithio jaao atĩ bo nĩ athingati baawe. (Mathayo 28:20) Baejaga ‘barĩa bathithagia Rũteto, tĩ barĩa ba kwigua akĩ.’—Jakubu 1:22.

• Ũmĩĩria mwanka mũthia. (Mariko 13:13) Aritwa ba Jesũ nĩbabuĩrĩte ‘kũũmĩĩria mono’ nĩkenda bonokua. (Ahibirania 10:36) Ngerekano, mũtũmwa Paũlũ naathĩkĩĩre mooritani ba Jesũ na rĩonthe naarĩ mwĩtĩkĩkua kĩrĩ Mũrungu, na noomĩrĩĩrie kũũma ntukũ ĩrĩa aere Mũkristũ mwanka arakua.—1 Akorintho 9:27.

A “Ĩromba rĩa Eeyia” narĩo?

Kĩrĩ ndini ĩmwe antũ nĩbarombaga maromba jamwe ta “Ĩromba rĩa Eeyia” na “Ĩromba rĩa Wonokio.” Barĩa barombaga maromba jau, nĩbamenyaga bo nĩ eeyia na nĩbeetĩkĩĩtie Jesũ aakuĩre tontũ bwa meeyia jaao. Kinya nĩbarombaga Jesũ eeje nkorone kana ũtũũrone bwao. Ĩndĩ Bibiria ĩtĩgwatanagĩra na maromba ta jau ja gũcokera.

Antũ bamwe bathũgaanagia nyuma ya kũromba “Ĩromba rĩa Eeyia,” muntũ arĩ na mma atĩ akoonokua. Ĩndĩ, gũtĩ ĩromba rĩũmba kwonokia muntũ. Tontũ tũtĩũjũri, nĩtwĩtaga na mbere kũthithia meeyia. (1 Johana 1:8) Nĩkĩo gĩtũmi Jesũ aaritanĩre aritwa baawe barombage ntukũ cionthe nĩkenda barekerwa meeyia jaao. (Luka 11:2, 4) Akristũ bamwe barĩa barĩngĩtũũra kenya na kenya nĩbaatere ĩtũi rĩu, tontũ bwa kũrega kwathĩkĩra Mũrungu mwanka mũthia.—Ahibirania 6:4-6; 2 Petero 2:20, 21.

Nĩkũ “Ĩromba rĩa Eeyia” rĩaumĩre?

Antũ barĩa bathithagia ũcũnkũũni nĩbethagĩrwa na maoni mwanya mwanya jegie kaumo ka “Ĩromba rĩa Eeyia.” Bamwe baugaga ũntũ bũu bwambĩrĩĩrie rĩrĩa ndini ya Protestanti yeejĩre. Bangĩ beetĩkĩtie atĩ antũ baambĩrĩrie ĩromba rĩu, mĩcemanione ya kĩndini karine ya 18 na 19. Amwe nou, ũritani bũu bũtĩgwatanagĩra na ũritani bwa Bibiria.