Ĩthĩrwa na Ũcamba na Wĩtĩkĩkua ta Benaia

Benaia aarĩ ncamba ya ndwa na aatumĩkaga ĩgiita rĩa Mũnene Daudi na Solomoni. Kinya kethĩra ĩthe aarĩ mũthĩnjĩri wa Mũrungu na kaingĩ ataatumagĩra mathaga ja ndwa, nethagĩrwa arĩ ndwene irĩa ciarũjagwa nĩ antũ ba Jehova. Noonanĩrie ũcamba bũbũnene. Ngerekano, nooragĩre ngatũnyi ĩrĩ ĩrinyene na arooraga muntũ waarĩ ncamba ĩnene. Daudi neetĩkĩtie Benaia mono na naamwetherie mũrũngamĩĩri wa akaria baawe.—2 Sam. 23:20-23.

Benaia no aarĩ mwĩtĩkĩkua kĩrĩ Daudi kinya rĩrĩa Abisalomu na Adonija beendaga kũjũkia wathani kĩainya. (2 Sam. 8:18; 15:18; 1 An. 1:8) Kinya Daudi aagũkũra, Benaia naagwatĩre mbaru mĩbango ya kwethia Solomoni mũnene. (1 An. 1:32-40) Kamma, Benaia naarĩ mwĩtĩkĩkua kĩrĩ Jehova na anene barĩa aathurĩte, kinya rĩrĩa bangĩ baaregaga kũgwatĩĩra wĩtĩkĩkua bwao.

Kinya tuĩ nĩtũkũbatara ũcamba nĩkenda tũciinda mũnthũ weetũ Shaitani ũrĩa ũrĩ na inya na athingati baawe. Na nĩtũbuĩrĩte gwĩta na mbere kũthingata ithimi bia Jehova bia wagĩru. (Aef. 6:11; 1 Pet. 5:8, 9) Kinya bamwe bathuura gũtiga Jehova, tũkarũmĩĩra wĩtĩkĩkua bwetũ, tũrĩ na mma agatwaa ĩtui.—2 Sam. 22:26.