1925​—Mĩaka Ĩgana Mĩthiru

JARĨA BEERĨGĨĨRĨTE JATOJŨRĨRUE

Aritwa babaingĩ ba Bibiria nĩbeerĩgĩĩrĩte nthĩgũrũ yaa Paradiso 1925. Nĩkĩ? Mũtaana wa Baaba Albert Schroeder, ũrĩa nyumene watumĩkĩre kĩrĩ Kĩama Kĩrĩa Gĩtongagĩĩria nataarĩĩrĩrie ũjũ: “Twetĩkĩtie atĩ 1925, etũrĩrua maguta barĩngĩĩta ĩgũrũ, na antũ arũme etĩkĩkua ta Abrahamu, Daudi na bangĩ barĩngĩriũkua na bathane aja nthĩgũrũne barĩ gĩcuncĩ kĩa Ũnene bwa Mũrungu.” Ũntũ bũu bũkũremwa gũkinyanĩra ataana na aarĩ ba baaba bamwe nĩbaaunĩkĩre nkoro.—Nju. 13:12.

Amwe nou, aritwa babaingĩ bataatigĩre kwĩthĩrwa na wĩru bwa gũtũmĩĩria na nĩbaaciũkĩrwe atĩ ngũgĩ ĩu nĩyo ya gĩtũmi mono ĩrĩa Jehova eendaga bathithia. Ngerekano, gatũcũnkũũne ũrĩa baatumagĩra redio gũtũmĩĩria ũmma kĩrĩ antũ babaingĩ.

GŨTŨMĨĨRIA NA REDIO KŨRONGEREKA

Mwaka jwa 1924, antũ babaingĩ nĩbaathikĩĩrĩre gĩtuo gĩetũ kĩa redio kĩa WBBR, na 1925 Aritwa ba Bibiria baraaka gĩtuo kĩngĩ gĩkĩnene, nandĩ akuĩ na Chicago, Illinois. Gĩtuo kĩu gĩetagwa WORD. Ralph Leffler, injinia ũrĩa watethererie mwakone jwa gĩtuo kĩu aaugĩre ũjũ, “Antũ babaingĩ kinya ba icigo bia kũraaja nĩbathikagĩĩra gĩtuo kĩu ũtukũ na kinya ĩgiita rĩa mpio.” Ngerekano, nja ĩmwe ĩrĩa yakaraga kilomita nkũrũki ya 5,000 kuuma gĩtuone kĩu nĩbaathikĩĩrĩre ntũmĩĩri yeetũ ya mbere. Nyuma ya kũthikĩĩra, nĩbaandĩkĩĩre barũga bagĩcokia nkaatho tontũ bwa rwaria rũu rwa kũbekĩra inya.

Ngacĩti ya The Watch Tower ya Dicemba 1, 1925 ĩkĩonania nĩkĩ gĩtuo kĩu gĩakinyagĩĩra antũ kinya barĩ kũraaja yaugĩre: “Gĩtuo gĩkĩ nĩ kĩmwe kĩa birĩa birĩ na inya mono naaja Amerika. Antũ ba icigo bia ũrĩo na bia ũmotho naaja nĩbakũmigua bwega. Nĩtũmĩte babaingĩ barĩa bataigua ũmma, benda kwiritana nkũrũki.”

Ĩgiita orĩu Aritwa ba Bibiria kinya nĩbaaciũmagia gũtaambia nkuma ĩnjega Kanada bagĩtumagĩra redio. Mwakene jwa 1924 gĩtuo kĩa redio CHUC nĩgĩakĩrwe naarĩa Saskatoon, Saskatchewan. Kĩarĩ kĩmwe kĩa ituo bia mbere bia redio birĩa biaritanaga mantũ ja kĩndini Kanada. Mwaka jwa 1925 nĩbeendaga gũcwaa antũ anene arĩa gĩtuo kĩu kĩrĩngĩngʼanĩĩra. Kwou Watch Tower Society nĩbaagũrĩre mwako jũrĩa jwatumagĩrwa tontũ bwa mĩcetho naarĩa Saskatoon, barajwagĩrithia rĩu barathamĩria gĩtuo kĩu mwakone jũu.

Ũntũ bwa kũgwĩria nĩ atĩ, antũ babaingĩ barĩa baakaraga gĩcigone kĩa Saskatchewan nĩbaaigĩrue nkuma ĩnjega rĩa mbere tontũ bwa gĩtuo gĩkĩ. Ngerekano, mwekũrũ ũmwe ũrĩa waakaraga kũraaja na gĩtuo kĩu, naandĩkĩre barũga akĩrombaga aewe mauku nyuma ya kũthikĩĩra redio ĩu. Mũtaana wa Baaba George Naish naaugĩre, “Gũkũrũkĩĩra ĩromba rĩu, noonekanaga nendaga gũtethua na mpwĩ kwou tũramũtũmĩra mauku jonthe ja Studies in the Scriptures.” Nyuma ya kagiita gaakai, naambĩrĩĩrie gũtambia nkuma ĩnjega kinya icigone bia kũraaja.

GŨTAARĨĨRIA JARĨA TWĨTĨKĨTIE

Machi 1, 1925, ngacĩti ya The Watch Tower nĩyaarĩĩrĩrie gĩcuncĩ kĩa gĩtũmi kĩgwĩtwa, “Birth of the Nation.” Nĩkĩ kĩarĩ kĩa gĩtũmi mono? Aritwa ba Bibiria, nĩbaarĩ bakũmenya atĩ Shaitani nathaga irundu bibithũũku, ikundi bia kĩndini, kĩbiashara na bia gĩsiasa bia nthĩgũrũ ĩjĩ. Ĩndĩ gũkũrũkĩĩra gĩcuncĩ kĩu kĩa The Watch Tower, ‘nthũmba’ mbĩtĩkua na ‘ĩnjũme’ nĩyatetherie ataana na aarĩ ba baaba gũciũkĩrwa atĩ kinya Jehova nethagĩrwa na ũthuranĩri bũrĩ mwanya na bũtĩgwatanagĩra na bwa Shaitani. (Mat. 24:45) Nkũrũki, nthũmba mbĩtĩkua nĩyataarĩĩrĩrie atĩ Ũnene bwa Mũrungu nĩbwambĩrie kwathana 1914 na atĩ mwaka o jũu, Shaitani nengĩrwe ĩgũrũ areeja nthĩgũrũne na irundu biawe bibithũũku nyuma ya ndwa ĩrĩa yarũĩrwe naarĩa ĩgũrũ.—Kug. 12:7-9.

Bamwe nĩboonere bũrĩ bũbũũmũ gwĩtĩkĩĩria ũntũ bũu. Kwou gĩcuncĩ kĩu nĩkĩaugĩre ũjũ: “Kethĩra kũrĩ athomi ba The Watch Tower batĩgwĩtĩkanĩĩria na ũntũ bũrĩa bũgweti aja, nĩtũkũbaromba bethĩrwe na weteeri na berĩgĩĩre Mwathani, bakĩmũtumĩkĩra barĩ etĩkĩkua.”

Amwe nou Tom Eyre wa kuuma Britain, ũrĩa waarĩ Kolpota (nandĩ betagwa Mapainia) agĩtaarĩĩria ũrĩa aritwa babaingĩ baaigagua bwegie gĩcuncĩ kĩu, aaugĩre ũjũ: “Ataana ba baaba nĩbaagwĩrĩrue bakwona ũrĩa Kugwurirwa 12:7-9 yataarĩĩrĩĩrue. Tũrĩgũciũkĩrwa atĩ Ũnene nĩbwaarĩ bũkwambia kwathana naarĩa ĩgũrũ, nĩtwagĩĩre wĩru bwa kwĩra bangĩ nkuma ĩnjega. Bũu nĩbwatũmĩre twongera wĩru bwa gũtũmĩĩria na bwatũtethia kwona ũrĩa Jehova arĩngĩthithia mantũ ja kũrigarania ĩgiita rĩĩjĩte.”

GŨKŨŨJĨĨRA BWEGIE JEHOVA

Ntukũne cietũ, Akũũjĩ ba Jehova kaingĩ nĩbaragia bwegie Isaya 43:10 ĩrĩa yugaga: ‘Buĩ nĩbui akũũjĩ bakwa, nĩu Mwathani auga, na nthũmba yakwa ĩrĩa ntaarĩte.’ Ĩndĩ, mbere ya 1925, ĩandĩko rĩu rĩtaarĩĩragua mono maukune jeetũ. Bũu nĩbwagarũkĩre nyuma ya kagiita. Mwaka jwa 1925 ngacĩti cia The Watch Tower irĩa ciathingatĩte nĩciaarĩĩrĩrie mono ĩandĩko rĩa Isaya 43:10 na 12.

Mũthiene jwa Agasti, 1925, Aritwa ba Bibiria nĩboothũranĩre kĩgomanone naarĩa Indianapolis, Amerika. Kĩrĩ programu ya kĩgomano, Joseph F. Rutherford naandĩkĩte biugo bibi bia kũgwata antũ ũgeni: “Twĩjĩte kĩgomanone gĩkĩ nĩkenda Mwathani atwaa inya na tũcoka gũtũmĩĩria tũrĩ na wĩru nkũrũki tũrĩ Akũũjĩ baawe.” Kĩgomanone kĩu gĩa ntukũ inyaanya, athikĩĩria nĩbeekĩĩrwe inya kũrita ũkũũjĩ bwegie Jehova rĩonthe rĩrĩa kaanya koneka.

Jumamosi, Agasti 29, Mũtaana wa Baaba Rutherford naaritĩre rwaria rũrĩ na kĩongo “A Call to Action.” Naainyĩrĩrie nĩkĩ ngũgĩ ya gũtũmĩĩria ĩrĩ ya gĩtũmi na arauga: “Jehova arĩĩra antũ antũ baawe . . . : ‘Buĩ bũrĩ akũũjĩ bakwa . . . ndĩ Mũrungu.’ Rĩu arabeera: ‘Ũkĩĩrieni kĩthethero tontũ bwa kĩrĩndĩ kĩa mĩgongo ĩngĩ.’ Antũ barĩa akĩ boomba kũrita ũkũũjĩ bwegie Jehova nthĩgũrũne nĩ barĩa atongagĩĩria gũkũrũkĩĩra Kĩrundu kĩawe tontũ bo nĩ antũ baawe.”—Isa. 43:12; 62:10.

Nyuma ya rwaria, naathomeere athikĩĩria nteto ĩrĩa ciarĩ na kĩongo “Message of Hope,” irĩa cioonanagia atĩ Ũnene bwa Mũrungu akĩ nĩbu bũkareta “thĩĩrĩ ya mma, ũũmbani, ũgima na ũtũũro bũbwega, kũthaũrwa kuuma ũkombone na kũgwĩrua gwa kenya na kenya na baretĩkanĩria nacio.” Nyumene, ntũmĩĩri ĩu nĩyataũrĩrwe na mĩgambo mwanya mwanya na ĩracabithua ĩkari ta trakti. Akuĩ trakti milioni 40 nĩciaejanĩrwe.

Aritwa ba Bibiria bataambĩrie gũtumĩra riĩtwa Akũũjĩ ba Jehova orĩo. Amwe nou, nĩbaarĩ bakwambia gũciũkĩrwa ũrĩa bwarĩ ũntũ bwa gĩtũmi gwĩta na mbere gũtũmĩĩria bwegie Jehova.

GŨCOKERA BARĨA BAARĨ NA WENDI BWA KŨTHIKĨĨRA

O ũrĩa Aritwa ba Bibiria beetĩre na mbere kwongereka nthĩgũrũne, nĩbeekĩĩrwe inya gũcokera antũ barĩa boonanĩtie wendi bwa kũthikĩĩra nkuma ĩnjega. Nĩbeekĩĩrwe inya baejane mauku na bacokere barĩa baabathikĩĩrĩte. Nyuma ya kampeni ya kwejana trakti Message of Hope, ngacĩti ĩrĩa yeetagwa Bulletina nĩyaugĩre ũjũ: “Banganieni gũcokera antũ barĩa baatigĩri trakti ĩu na bataei mauku.”

Ngacĩti ya Bulletin ya Januarĩ 1925 nĩyaarĩ na ripoti ĩjĩ kuuma kĩrĩ Mũritwa wa Bibiria wa naarĩa Plano, Texas ĩrĩa yaugaga: “Rĩrĩa twatũmĩĩria icigone birĩa twatũmĩĩrĩtie, nĩtũkwona maumĩĩra jameega nkũrũki ya rĩrĩa twatũmĩĩria icigone bibierũ. Gĩcigo kĩmwe gĩkĩniini naaja gwetũ, nĩgĩtũmĩĩrĩtue maita jatano mĩaka ĩkũmi mĩthiru. . . . Rua, Mwarĩ wa Baaba Hendrix na maami wakwa nĩbaraere antũ mauku jamaingĩ nkũrũki ya au mberene.”

Kinya Kolpota ũmwe wa nthĩgũrũ ya Panama, naandĩkĩre ũjũ: “Antũ babaingĩ barĩa bataanthikĩĩrĩre ndĩkũbariũngĩra rĩa mbere, nĩbanthikĩĩrĩre ndĩgũcoka rĩa jaĩrĩ kana rĩa jathatũ. Mwaka jũjũ nĩntumĩrĩte ĩgiita rĩriingĩ gũcokera barĩa ndaranĩrĩtie nabo au mberene na maumĩĩra jarĩa ncionerete nĩjameega mono.”

KWIBANGANIA TONTŨ BWA ĨGIITA RĨĨJĨTE

Mũthiene jwa 1925, Rutherford naandĩkĩĩre Kolpota bonthe barũga arataarĩĩria jarĩa baaingĩtie na jarĩa baabuĩrĩte kũthithia 1926. Aaugĩre: “Mwaka jũjũ nĩbũraarĩ na wendeeri bwa kũboreria babaingĩ barĩa baraarĩ na kĩeba. Ngũgĩ ĩu nĩrabũreterete kũgwĩrua . . . Mwaka jũu jũngĩ, bũkethĩrwa na twanya tũtwingĩ twa gũkũjĩĩra bwegie Mũrungu na Ũnene bwawe na gũtethia antũ baciũkĩrwa nĩbaaũ athathayia ba mma. . . . Rekeni twinthe twĩte na mbere gũkĩĩria tũjũ gũkumia Mũrungu na Mũnene weetũ.”

Mũthiene jwa 1925 ataana ba baaba nĩbaambĩrie kũthithia mĩbango ya kwaramia Betheli ya Brooklyn. Na 1926 barĩngĩambia mwako jũmũnene nkũrũki ya ĩrĩa baakĩte.