Tethia Barĩa Bakwenda Kwiritana Bwegie Mũrungu

1. Antũ bomba gwĩtĩkĩĩria atĩa rĩrĩa twabatũmĩrĩria nkuma ĩnjega? (Mathithio 13:47, 48; 16:14, 15)

ANTŨ BABAINGĨ karine ya mbere, barĩkwigua rũteto rwa Mũrungu, nĩbaarwĩtĩkĩrĩrie orĩo. (Thoma Mathithio 13:47, 48; 16:14, 15.) O ta ũu ntukũne cietũ, antũ bamwe nĩbagwĩragua mono baigua nkuma ĩnjega rĩa mbere. Kinya barĩa bethĩrĩtwe batĩkwenda nkuma ĩnjega, nyumene, no betĩkĩĩrie. Nĩatĩa tũbuĩrĩte kũthithia rĩrĩa twacemania na antũ bakwenda kwiritana Bibiria, na bwegie Mũrungu?

2. Nĩ na njĩra ĩrĩkũ ngũgĩ yeetũ ya kweethia antũ aritwa, ĩngʼuanene na ya mũrĩmi?

² Thũgaanĩria ngerekano ĩjĩ. Ngũgĩ yeetũ ya kweethia antũ aritwa yomba kũngʼuanithanua na ya mũrĩmi. Matunda ja kĩmera kĩmwe jakeeja kũguunda, mũrĩmi omba kũjaketha, o etĩte na mbere kũmenyeera na kũrĩmĩra jarĩa jatĩrakũra. O ta ũu, rĩrĩa twona muntũ ũgwĩtĩkĩĩria nkuma ĩnjega, nĩtũbuĩrĩte kũmũtetheeria na mpwĩ, nĩkenda aa mũthingati wa Kristũ. Na o ĩgiita o rĩu, nĩtũbuĩrĩte gwĩta na mbere gũtetheeria barĩa batĩkwona baita ya jarĩa tũkũritana nĩkenda kinya bo baciũkĩrwa. (Joh. 4:35, 36) Twethĩrwa na ũmenyo, tũkoomba kũthuura bwega njĩra ĩrĩa ĩkwagĩra athikĩĩria beetũ. Kĩthomone gĩkĩ, tũkairitana ũrĩa tũũmba kwaranĩria rĩa mbere na barĩa barĩ na wendi bwa kũthikĩĩra nkuma ĩnjega. Kinya tũkoona ũrĩa tũũmba gũtethia antũ ta bau nĩkenda bathithia wĩti na mbere gĩkĩrundu.

TETHIA BARĨA BAKWENDA KWIRITANA ŨMMA

3. Nĩatĩa tũbuĩrĩte kũthithia rĩrĩa twona antũ bakwenda kwiritana ũmma? (1 Akorintho 9:26)

³ Rĩrĩa twona antũ bakwenda kwiritana ũmma, tũrĩenda kũbatethia bambia kũthingata njĩra ya mwoyo orĩo. Rĩrĩa twona antũ ta bau rĩa mbere, nĩtũbuĩrĩte kwambia kwiritana nabo Bibiria, na kũbagwata ũgeni mĩcemanione yeetũ.—Thoma 1 Akorintho 9:26.

4. Taarĩĩria ũntũ bwonetwe, bwegie muntũ ũrĩa wetĩkĩĩrĩrie kwiritana Bibiria orĩo.

⁴ Ritana antũ Bibiria. Bamwe barĩa twaragia nabo, nĩbetĩkagĩĩria twambia kwiritana orĩo. Ngerekano, kũrĩ Alamisi, mwekũrũ ũmwe kuuma Kananda, neejĩre kagarĩne ka mauku, na araromba gauku, Gwĩrĩrua Ũtũũro Kenya na Kenya! Mwarĩ wa baaba ũrĩa waarĩ au, naamwĩrĩre atĩ barĩa twejaga gauku kau, bakenda nĩtũbaritanaga Bibiria tũtĩkũbarĩyia. Mwekũrũ ũu neetĩkĩrĩrie mũbango jũu jwa kwiritana, na aramwaa namba ya thimũ. Nyumene ntukũ o ĩu, mwekũrũ ũu naatũmĩĩre mwarĩ wa baaba ntũmwa ya thimũ, akĩmũũragia nĩrĩ bakairitana. Mwarĩ wa baaba arĩkũmũũria kethĩra eje mũthia jwa kiumia, mwekũrũ ũu aramũũria: “To wĩje rũũjũ? Ngagweteera.” Rũũnene neetĩre na barambia kwiritana. Mũthia jwa kiumia o kĩu neejĩre mũcemanione, na arathithia wĩti na mbere na mpwĩ.

5. Nĩatĩa tũũmba kwonania ũmenyo rĩrĩa tũkwenda kwambia kwiritana Bibiria na antũ? (Tega kinya mbica.)

⁵ Nĩ mma, tũtĩkwĩrĩgĩĩra bonthe barĩa bagatũthikĩĩra betĩkĩĩria kwiritana orĩo, ta mwekũrũ ũu. Bamwe bomba kũjũkia kagiita. Mbere, no twarĩĩrie ũntũ bũrĩa bũgũkucĩĩria muntũ nkũrũki. Kethĩra tũgeeta na mbere kwĩthĩrwa na mwonere jũmwega na kũbonia wendo, nyuma ya kagiita gaakai bomba gwĩtĩkĩĩria kwiritana. Nĩatĩa tũũmba kwĩra muntũ rĩrĩa tũkwenda kwiritana nawe Bibiria? Ga twone macokio ja atũmĩĩria bamwe, barĩa bethĩrĩtwe na maumĩĩra jameega rĩrĩa bakwambĩrĩria kwiritana Bibiria na antũ.

6. Nĩ njĩra ĩrĩkũ ĩnjega ya kwĩra muntũ no twende kwaranĩria nawe kaĩrĩ?

⁶ Atũmĩĩria na mapainia barĩa boorĩrue, baugĩre atĩ icigone bimwe tĩ bwega gũtumĩra biugo ta, “kwiritana,” “kũritanwa Bibiria,” kana “gũkũritana” rĩrĩa ũgũtaarĩĩria mũbango jũu. Nĩbonete atĩ nĩkwĩthagĩrwa na maumĩĩra jameega rĩrĩa batumĩra biugo ta, “kwaranĩria,” “gũcũnkũũna” kana “kwenda kũmenya Bibiria bwega.” Nĩkenda ũũmba kwaranĩria na muntũ ũu kaĩrĩ no ũmwĩre, “Nĩ ũntũ bwa kũrigaria kwona ũrĩa Bibiria ĩcokagia bwega biũria bia gĩtũmi biegie ũtũũro” kana “Bibiria ĩtĩaragĩĩria mantũ ja ndini akĩ, ĩndĩ nĩtũtethagia na kĩrĩra kĩa gũtumĩra ũtũũrone.” Kinya no wongeere ũjũ: “To mwanka ũtumĩre ĩgiita rĩraaja, ndagĩka ta 10-15 nikũngʼana kwiritana ũntũ bwa gĩtũmi.” No uuge ũu ũtĩgũtumĩra biugo ta, “kĩrĩĩko,” kana “o kiumia,” ũntũ bũrĩa bũũmba gũtũma oona teka akabatara kwiritanĩria mono.

7. Nĩ ĩgiita rĩrĩkũ antũ bamwe baciũkagĩrwa bwega nĩ mma cia Bibiria? (1 Akorintho 14:23-25)

⁷ Bagwate ũgeni mĩcemanione. Ĩgiita rĩa mũtũmwa Paũlũ, kwombĩka antũ bamwe baciũkĩĩrwe nĩ mma cia Bibiria, barĩgwĩta mĩcemanione ya Gĩkristũ rĩa mbere. (Thoma 1 Akorintho 14:23-25.) Nou gũkarĩkaga kinya ntukũne cietũ. Antũ babaingĩ rĩrĩa bakwiritana ũmma bathithagia wĩti na mbere na mpwĩ bambia kwĩja mĩcemanione yeetũ. Nĩrĩ ũbuĩrĩte kũbagwata ũgeni? Iuku Gwĩrĩrua Ũtũũro Kenya na Kenya! nĩrĩarĩrĩĩtie mĩcemanio yeetũ kĩthomone gĩa 10, ĩndĩ to mwanka weteere mwanka ũkinye kĩthomone kĩu. Rĩrĩa waranĩria na muntũ rĩa mbere, no ũmũgwate ũgeni kĩrĩ mũcemanio jwa mũthia jwa kiumia, na no ũmũgwetere kĩongo kĩa rwaria rwa antũ bonthe, kana ũntũ bũngĩ bũrĩa tũkairitana ngacĩtine ya Mũkaria.

8. Nĩ mantũ jarĩkũ tũũmba kwĩra muntũ rĩrĩa tũkũmũgwata ũgeni eja mĩcemanione yeetũ? (Isaya 54:13)

⁸ Rĩrĩa ũkũgwata muntũ ũgeni mĩcemanione, mũtaarĩĩrie ũrĩa ĩrĩ mwanya na ya ndini ingĩ. Rĩrĩa mũritwa ũmwe eejĩre mũcemanione rĩa mbere, noorĩrie mwarimũ waawe wa Bibiria ũjũ, “Rĩ, ũrĩa ũgũtongagĩĩria kĩthomo kĩa Mũkaria gakũmenyaga mariĩtwa ja antũ bonthe?” Mwarĩ wa baaba ũu naamũtaarĩrĩrie atĩ, nĩtũciũmagia kũmenya bonthe barĩa barĩ kĩũthũranone, o ta ũrĩa tũmenyaga antũ ba nja cietũ. Bũu nĩbwatũmĩre mũritwa ũu oona tũrĩ mwanya mono na antũ ba kanisa ĩrĩa eetaga. Kinya no tũmũtaarĩĩrie ũntũ bũngĩ bũrĩa bwonanagia tũrĩ mwanya na ndini irĩa ingĩ. (Thoma Isaya 54:13.) Tũcemanagia kũthathayia Jehova, kwiritana kuuma kĩrĩwe, na gwĩkanĩra inya. (Ahi. 2:12; 10:24, 25) Kwou, mĩcemanio yeetũ nĩĩthagĩrwa na mũtaratara, ĩbangi bwega nĩkenda ĩtũtethia, na tũtĩthingataga nkuagaya cia antũ. (1 Ako. 14:40) Nĩkenda tũũmba kwiritana tũkirĩrĩĩtie, gũntũ gwetũ gwa kũthathaĩria gũtĩĩthagĩrwa na mantũ ja gũtwangaratania. Tũtĩaragĩĩria mantũ ja gĩciaca tontũ tũtĩgwataga mbaru rũteere kinya rũrĩkũ, kana tũthithia mantũ ja gwikaatha kana ja gũcionania. Mbere mũritwa waaku wa Bibiria eja mĩcemanione, nĩbwega kũmwonia vidio ĩjĩ ya, Nĩ Mantũ Jarĩkũ Jathithagua Nyomba ya Ũnene? Bũu bũkamũtethia kũmenya nĩ mantũ jarĩkũ akerĩgĩĩra eja.

9-10. Rĩrĩa tũkũgwata muntũ ũgeni mĩcemanione yeetũ, nĩatĩa tũũmba kũmwĩra nĩkenda atĩgakĩre kwĩja? (Tega kinya mbica.)

⁹ Bamwe nĩbaregaga kwĩja mĩcemanione yeetũ tontũ nĩbakĩraga kwĩrwa bae Akũũjĩ ba Jehova. Rikithĩria antũ ta bau atĩ nĩtũgwĩragua kũriũngĩrwa nĩ ageni, ĩndĩ tũtĩbakinyagĩĩria kwaa Akũũjĩ ba Jehova kana kwaria mĩcemanione yeetũ. Antũ bonthe, kinya aciari na aana nĩbagwatagwa ũgeni kwĩja. Aana batĩathũranagwa na antũ bangĩ. Bakaraga amwe na aciari baao na bakairitana barĩ amwe. Bũu nĩbũtethagia aciari kũthingatĩĩra jarĩa aana baao bakũthithia. (Kur. 31:12) Tũtĩũthũranagia mĩũthi, kana tũnenkera antũ mbaasha cia gwĩkĩra mbeca. Mwanya na ũu, tũthingataga ũtaaro bũbũ bwa Jesũ, “Twaerwe na magi, na twejanage na magi.” (Mat. 10:8) Kinya no ũmwĩre to mwanka ethĩrwe na nguũ cia goro nĩkenda eja mĩcemanione. Ũntũ bũrĩa Mũrungu ategagĩĩra mono nĩ nkoro, na tĩ ũrĩa tũkwoneka oome.—1 Sam. 16:7.

¹⁰ Kethĩra akeeja mĩcemanione, thithia jonthe jarĩa ũkũũmba nĩkenda aigua angʼanĩri. Mũtethie kũmenya akũrũ ba kĩũthũrano, na atũmĩĩria bangĩ. Kethĩra akoonua wendo, bũu bwomba gũtũma enda kwĩja kaĩrĩ. Ĩgiita rĩa mũcemanio, ethĩrwa atĩna Bibiria, no bũtumĩre yaaku na ũmũtetheerie kũthingatana na mwaria, na jarĩa jakũritanwa.

TETHIA BARĨA BAMBĨTIE KWIRITANA

11. Nĩatĩa tũũmba kwonania nĩ tũgũtĩĩa mathaa na ntukũ ĩrĩa mũritwa athuurĩte?

¹¹ Nĩ mantũ jarĩkũ tũbuĩrĩte kũriikana rĩrĩa twambia kwiritana Bibiria na muntũ? Thingatĩĩra mathaa na ntukũ ĩrĩa bwetĩkanĩĩria. Ngerekano, ciũmie gũkinya kũrĩo kinya kethĩra antũ ba kwenu batĩthingatagĩĩra mathaa. Nkũrũki, nĩbwega ũtĩkajũkie ĩgiita rĩraaja ntukũ ya mbere. Atũmĩĩria bamwe nĩbonete nĩbwega rĩonthe kũthiria kwiritana kũrĩo, kinya kethĩra mũritwa nakwenda kũmenya nkũrũki. Menya waria mono. Aa mũritwa kaanya ga gũtaarĩĩria maoni jaawe.—Nju. 10:19.

12. Mworoto jwetũ jũbuĩrĩte kwĩthĩrwa jũrĩ jũrĩkũ rĩrĩa twambia kwiritana na muntũ Bibiria?

¹² Kuuma kĩambĩrĩria, mworoto jwaku jũbuĩrĩte kwĩthĩrwa jũrĩ gũtethia mũritwa amenya na enda Jehova na Jesũ. Nĩkenda tũbatethia kũthithia ũu, tũbuĩrite kũbaritana jarĩa jarĩ Bibiriene, na tĩ jarĩa tũkũthũgaanĩria. (Atum. 10:25, 26) Kaingĩ rĩrĩa mũtũmwa Paũlũ aaritanaga, naainyagĩĩria mono bwegie Jesũ tontũ nĩwe Jehova aatũmĩte atũtethia kũmũmenya na kũmwenda. (1 Ako. 2:1, 2) Paũlũ kinya noonanĩrie nĩkĩ bũrĩ ũntũ bwa gĩtũmi gũtethia aritwa gũkũria nkuma injega irĩa ciũmba kũngʼuanithanua na thaabu, fetha, kana twiga twa goro. (1 Ako. 3:11-15) Imwe cia nkuma iu cia gĩtũmi nĩ wĩtĩkio, ũũme, na gũkĩra Jehova. (Zb. 19:9, 10; Nju. 3:13-15; 1 Pet. 1:7) Thingata ngerekano ya Paũlũ ya kũritana, gũtetheeria aritwa baaku ba Bibiria kwĩthĩrwa na wĩtĩkio bũũriku, na ngwatanĩro ya akuĩ amwe na Jehova.—2 Ako. 1:24.

13. Nĩatĩa tũũmba kwonania weteeri na kĩao rĩrĩa tũgũtethia barĩa bakwenda kwiritana? (2 Akorintho 10:4, 5) (Tega kinya mbica.)

¹³ Ĩthĩrwa na weteeri na kĩao o ta Jesũ rĩrĩa ũkũritana bangĩ. Menya ũũria biũria birĩa biũmba gũtũma muntũ aigua atĩngʼanĩri. Kethĩra atĩgũciũkĩrwa nĩ ũntũ bũnna, no bwĩte na mbere kwiritana, rĩu bũkabwarĩĩria nyumene. Antũ a kũmũkinyĩĩria etĩkĩĩria ũritani bũnna, mwee kaanya mwanka bũrike nkorone. (Joh. 16:12; Akol. 2:6, 7) Bibiria ĩngʼuanithanagia mooritani ja ũrongo jarĩa tũbuĩrĩte gũciebania najo, na gĩntũ kĩthũngũkĩte. (Thoma 2 Akorintho 10:4, 5; tega study note, “overturning strongly entrenched things.”) Antũ a gũkinyĩĩria mũritwa waaku wa Bibiria gũtigana na mantũ jarĩa etĩkĩtie, mũtetheerie aethie Jehova kĩmatũko kĩawe.—Zb. 91:9.

TETHIA BARĨA BAMBĨTIE KWĨJA MĨCEMANIONE

14. Nĩatĩa tũũmba kũthithĩria barĩa bambĩtie kwĩja mĩcemanione yeetũ?

¹⁴ Jehova endaga twonia antũ bonthe wendo ĩtĩkũmakania naarĩa baumĩte, ĩgweta, kana ũtonga bwao. (Jak. 2:1-4, 9) Nĩatĩa tũũmba kwonia wendo barĩa bambĩtie kwĩja mĩcemanione yeetũ?

15-16. Nĩatĩa tũũmba kũthithia nĩkenda barĩa bambĩtie kwĩja mĩcemanione baigua bangʼanĩrĩĩte?

¹⁵ Antũ bamwe bomba kwĩja mĩcemanione kwona akĩ jarĩa tũthithagia, kana bagwati ũgeni nĩ ũmwe weetũ ũrĩa ũkaraga gĩcigone kĩngĩ. Kwou, rĩrĩa antũ ta bau beja mĩcemanione rĩa mbere, aranĩria nabo. Bagwate ũgeni, na menya ũtũma baigua batĩngʼanĩrĩĩte. No bũkare gĩtĩne kĩmwe. Kinya no bũtumĩre Bibiria yaaku na mauku jangĩ jarĩa jagatumĩrwa, kana ũbae jagũtumĩra. No ũbathithĩrie mantũ jangĩ jarĩa jomba gũtũma baigua bangʼanĩrĩĩte. Muntũ mũrũme ũmwe arĩkwĩja mĩcemanione rĩa mbere, neerĩre mũtaana wa baaba ũrĩa wamũgwete ũgeni atĩ naaigagua atĩngʼanĩri tontũ ateekĩrĩte ta bangĩ. Mũtaana wa baaba ũu naamũtetherie atiga kũmaka na aramũtaarĩĩria atĩ tũrĩ antũ o ta bangĩ. Muntũ mũrũme ũu naabatithĩrue, na kinya nandĩ no ariikanaga ũntũ bũu aathithĩĩrue. Nĩbwega twimenyeere tũtĩgatonyeere mantũ ja ndeene ja barĩa bariũngĩte mĩcemanione rĩrĩa tũkwaria nabo.—1 Pet. 4:15.

¹⁶ Twomba kinya gũtũma baigua bangʼanĩrĩĩte gũkũrũkĩĩra rwaria na macokio jeetũ, na kinya tũcuncĩne twetũ rĩrĩa tũkwarĩĩria barĩa batĩ Akũũjĩ ba Jehova kana jarĩa betĩkĩtie. Kinya no tũciebanie na biugo birĩa biũmba gũtũma baigua teka tũtĩkũbatĩĩa. (Tit. 2:8; 3:2) Ngerekano, tĩ bwega kũmeneeria jarĩa bangĩ betĩkĩtie kinya kethĩra jatĩgwĩtanĩria na Maandĩko. (2 Ako. 6:3) Ataana ba baaba barĩa baritaga ndwaria cia antũ bonthe, nĩbabuĩrĩte kũmenyeera mono ũntũ bũbũ. Kinya nĩbonanagia nĩbakũthũgaanĩria barĩa batĩ Akũũjĩ ba Jehova, rĩrĩa bagũtaarĩĩria biugo birĩa bomba kwĩthĩrwa batĩgũciũkĩrwa nĩbio.

17. Mworoto jwetũ nĩ jũrĩkũ rĩrĩa twacemania na antũ barĩna mwerekera jũkwagĩra?

¹⁷ O ũrĩa ntukũ igũkũrũka, nou tũbuĩrĩte kũrita ngũgĩ ya kweethia antũ aritwa na mpwĩ, na gwĩta na mbere gũcwa barĩa barĩna mwerekera jũkwagĩra jwa kwona “mwoyo jwa kenya na kenya.” (Atum. 13:48) Rĩrĩa twona antũ ta bau, tũbuĩrĩte kwambia kwiritana nabo Bibiria, na tũbagwate ũgeni mĩcemanione yeetũ orĩo. Twathithia ũu, tũkabatethia kwambia gwĩtĩĩra ‘njĩrene ĩrĩa ĩĩtaga mwoyone.’—Mat. 7:14.