GĨCUNCĨ KĨA 7
Ũrĩa Ũũmba Kũritana Mwana Waaku
“Mantu jaja ngukwira narua jatuurage nkorone yaku; nagwe uritane aana baku na wiru.”—Kuriikanithia Maathana 6:6, 7
Rĩrĩa Jehova aambĩrĩĩrie mũbaango jwa nja, naere aciari waatho bwa gũtongeeria aana bao. (Akolosai 3:20) Nĩ kaanya keenu bwĩ aciari kũritana aana beenu kwenda Jehova na kwaa antũ agima bakwĩrĩgĩrĩka. (2 Timotheo 1:5; 3:15) No mwanka ũmenye kĩrĩa kĩrĩ nkoroone ya mũtaana kana mwaarĩ waaku. Nĩ mma, ngerekano yaaku wengwa nĩ ya gĩtũmi mono. Ũkoomba kũritana mwana waaku Rũteto rwa Jehova bwega, kethĩra ũkarwĩkĩra nkorone yaaku mbere.
—Zaburi 40:8.
1 TŨMA BWĨTHĨRWE BŨRĨ BŨBŨŨTHŨ AANA BAAKU KWARANĨRIA NAAGWE
ŨRĨA BIBIRIA YUUGAGA: ‘Gita mpwi cia kuthikiira, indi utige kugita mpwi cia kwaria.’ (Jakubu 1:19) Ũrĩenda aana baaku baigue atĩ no baaranĩrie naagwe batĩgũkĩra. No mwanka bamenye atĩ ũrĩna wendi bwa kũbathikĩĩra rĩrĩa bakwenda kwaria naagwe. Tũma kwĩthĩrwe na thĩĩrĩ nĩkenda boona bũrĩ bũbũũthũ gũciarĩĩria. (Jakubu 3:18) Bakeeja kwona ũkabang’enteera kana ũbatwĩre bũbũũĩ, boomba gũkwitha mantũ. Ĩthĩrwa na weteeri kĩrĩ aana baaku, na kaingĩ boonie mma atĩ nũbeendete.—Mathayo 3:17; 1 Akorintho 8:1.
ŨRĨA ŨŨMBA KŨTHITHIA:
Ĩthĩrwa ũkĩoneka rĩrĩa aana baaku bakwenda bwaria
Menyeria kwaragia na aana baaku rĩonthe, tĩ rĩrĩa akĩ kũrĩna mathĩĩna
2 GERIA GŨCIŨKĨRWA NĨ ŨRĨA BUNGWA BAKUUGA
ŨRĨA BIBIRIA YUUGAGA: “Uria umenyagiira umenyo akoona mawega.” (Njuno 19:8) Magiita jamwe, ũkeendeka ũthũgaanĩria biugo bia mwana ndeene nkũrũki nĩkenda ũcĩũkĩrwa nĩ ũrĩa akwiigua. Nĩ wĩthĩre aana babaĩthĩ kwongeera mantũ chumbĩ kana kwaria mantũ na rũũgo. “Ni waa na nthoni kiri muntu uria ucokagia kiuria atikiigitue.” (Njuno 18:13) Menya ũthũũra ntũti.—Njuno 19:11.
ŨRĨA ŨŨMBA KŨTHITHIA:
Tua ĩtua rĩa kũrega kũmũgitaria kana kũthũũra ntũti, kinya mwana auga ũntũ bũng’ana ta njogu
Geria kũriikana ũrĩa waigagua rĩrĩa waarĩ ũkũrũũne ta bwao, na nĩmbi woonaga birĩ bia bata
3 GWATANĨRENI
ŨRĨA BIBIRIA YUUGAGA: “Igwe mutana wakwa, thikiira mooritani ja abagu, na ukarega mawatho ja nyakwe.” (Njuno 1:8) Jehova naete aciari bobaĩrĩ waatho kĩrĩ aana bao. No mwanka bũritane aana beenu babũtĩĩe na babwathĩkĩre. (Aefeso 6:1-3) Aana boomba kũmenya kethĩra
aciari nĩ ‘bakwiganua boojuri mathuganione’ jamwe. (1 Akorintho 1:10) Kethĩra bũtĩgwĩtĩkanĩĩria, menya bũteta meethone ja aana beenu, nĩũntũ bũu bwomba gũtũma batiga kũbũtĩĩa bũrĩ aciari.
ŨRĨA BŨŨMBA KŨTHITHIA:
Arĩĩrieni na bũrĩĩkanie ũrĩa bũgakanũkagia aana beenu
Wethĩrwa na mwonere mwanya jwĩgiĩ ũrĩa bukaritana aana beenu, geria kũthũgaanĩria ũrĩa mũkũrũ kana mwekũrũ waaku akwona
4 ĨTHĨRWENI NA MŨBAANGO
ŨRĨA BIBIRIA YUUGAGA: “Ritana mwana waku njira iria abwirite kuthingata.” (Njuno 22:6) Kũũmbana kũritana aana beenu gũtiumĩra o ũu ũtheri. Nĩbũkũbatara mũtaratara jwa kũbaritana, na nĩ amwe na kũbakanũkia. (Zaburi 127:4; Njuno 29:17) Gũkanũkia tĩ kuuga akĩ kwaa nthĩnje, ĩndĩ nĩ amwe na gũteetheria mwana weenu kũmenya gĩtũmi kĩa kwathĩkĩra mawaatho. (Njuno 28:7) Kinya baritaneni kwenda Rũteto rwa Jehova na kwona mwanya jwa mooritani ja Rũteto rũu. (Zaburi 1:2) Bũu bũkabateethia kwĩthĩrwa na thamiri ĩnjega.—Ahibirania 5:14.
ŨRĨA BŨŨMBA KŨTHITHIA:
Oneeni kamma aana beenu nĩboonaga Mũrungu arĩ Muntũ ũrĩo, ũrĩa boomba kwĩrĩgĩĩra
Bateethieni bairitane kũmenya moogwati ja kĩmũtũũrĩre na gũciebania najo, ta jarĩa joonekaga kĩrĩ Intaneti na ituo bia mwingĩ bia kwaranĩria kĩrĩ Intaneti. Baritaneni ũrĩa boomba gũciebania na barĩa boomba kũbaĩĩria bamenyana nabo kĩmwĩrĩ
“Ritana mwana waku njira iria abwirite kuthingata”