Niˈamukë ninuˈun nDiosmëduˈunëm mbäät nanduˈun njäjtëm ixtëm yäˈädë mixy. Ets ko pën duˈun pyokytyuny mbäädë net jyënaˈany ko “alokë” duˈun të jyaty o ko kyaj tnijawë “tiijën ko duˈun të pyokytyuny”. Per kyaj ti alokë tyuny jyatyë, tamën tii mëdiˈibë ëgäˈäny tyuumpy parë net pyokytyuny. Waˈan yëˈë mëët ojts oy nyayjyäˈäwënë jäˈäy mëdiˈibë kyajë Jyobaa tmëduny, tˈijxnë mëdiˈibë kyaj yˈoyëty mä internet o waˈan ojts ttuunë mëdiˈibë kyaj yˈoyëty ttunët tuˈugë Diosmëduumbë. Waˈan kyaj ojts nanduˈun yˈoknuˈkxtaknë, kyaj tˈokkäjpxnë Biiblyë, kyaj yˈoknëjkxnë reunyonk ets ni ëwäˈkx käjpxwäˈkxpë. Pääty tuˈugë Diosmëduumbë kyaj alokë pyokytyuny, tamën tijaty mëdiˈibë ëgäˈäny tyuumpy duˈun extëm ja mixy mëdiˈibë yajnimaytyakp mä Proverbios. ¿Ti mdukniˈˈijxëp yäˈädë ijxpajtën mëdiˈibë yajmaytyakp mä Proverbios? Ko kyaj yˈoyëty tijaty nduˈunm mëdiˈibë mbäät xyajpokytyuˈunënë mëjwiin kajaa. Pääty Salomón tmaytyaky yäˈädë mixy ets ja toxytyëjk (Mat. 5:​29, 30). w24.07 paj. 16 parr. 10, 11

¿Tidën myaytyäˈägaampy ko jyënaˈany “tadë oyˈäjtën”? Yëˈë ko nˈëwäˈkx ngäjpxwäˈkxëm ja Diosë yˈayuk parë jäˈäy nyitsoˈoktët (2 Kor. 4:1). ¿Ets pënatyën duˈun “extëmë naxpotsytyuˈtsën”? Ëtsäjtëm yajmaytyakëm ninuˈun nˈëwäˈkx ngäjpxwäˈkxëm. Ko apostëlë Pablo jyukyˈajty, jap ijtyë jäˈäy tmëjëdittë mä ja naxpotsytyuˈtsën mëdiˈibë yajtsobattëp, extëmë meeny, jëˈxy pëky o binë. Tyam nanduˈunë Jyobaa xyajtuˈunëm parë nˈëwäˈkx ngäjpxwäˈkxëm ja oybyë ayuk mëdiˈibë tsobatp ets yëˈë Jyobaa xypyudëjkëm parë nduˈunëm ja tyuunk. Näˈäty yëˈë ntsëˈkëm ko jäˈäy kyaj tmëdoowˈitäˈändë Diosë yˈayuk. ¿Ti mbäät nduˈunëm pën tsëˈkëm? Nˈokmënuˈkxtakëmë Jyobaa parë xymyoˈoyëmë jotmëkˈäjtën ets nnimaytyakëm ja yˈayuk duˈun extëm ttuundë ja apostëlëtëjk. Ko yaˈˈanmääytyë ets kyaj yˈokkäjpxwäˈkxnëdët tuktëjkëdë ja tsëˈëgë, per ta Jyobaa tmënuˈkxtaktë: “Okˈix wiˈix jyotˈambëktë, es meegyëts ja [jotmëkˈäjtën] es këdiibë ëëtsëty ntsëˈëgëdë esëts ngäjxwäˈxtët mijë mˈayuk”. Jyobaa netyë jyotmëkmooyëdë (Apos. 4:​18, 29, 31). w24.04 paj. 16 parr. 8, 9

Ëtsäjtëm ntsojkëm etsë Diosë xyëëw yˈitët wäˈäts. Kom mëk ntsojkëmë Jyobaa, pääty mä nˈëwäˈkx ngäjpxwäˈkxëm ndukmëtmaytyakëm ja jäˈäy ko kyaj tyëyˈäjtënëty extëmë Satanás nyiwäämbetyëty (Gén. 3:​1-5; Job 2:4; Fwank 8:44). Ko nëjkxëm ëwäˈkx käjpxwäˈkxpë, ta ndukmëtmaytyakëmë jäˈäy mëdiˈibë yˈoymyëdoowdëbën ja Diosë yˈääw yˈayuk, pënën Jyobaa ets wiˈixën jyaˈayˈaty. Ntsojkëm ets niˈamukë jäˈäy tnijawëdët ko Jyobaa jyaˈayˈäjtën mëdiˈibë niˈigyë yajnigëxëˈkypy, yëˈë ko xytsyojkëm, perë nan oy yˈaneˈemy. Ets ko ja yˈAnaˈam Kyutujkën tim tsojk dyajjëjptëgoyaˈany ja ayoˈon jotmay mëdiˈibë tyam jaˈäjtp ets ko yëˈë yajminaampy ja agujkˈäjt jotkujkˈäjtën yä naxwiiny (Sal. 37:​10, 11, 29; 1 Fwank 4:8). Ko nˈëwäˈkx ngäjpxwäˈkxëm, ta nyajwatsëmë Diosë xyëëw. Nan agujk jotkujk nnayjyäˈäwëm ko jaa nduˈunëm ja tuunk mëdiˈibë të nyajtuknipëjkëm. w24.05 paj. 18 parr. 12